Yuhanãw 2

Yesuẁ cin hũmmã́ ba ɛrsɛ̃ kwãmmã

Natanayɛl bel'n bãnɲã siɛlnã yuugu, cataagǝdaagɩ̀ yáá dàa lǝdarǝ nã, bà be-dǝ wà Kanã lǝ, Galile yiɛgu.

Yesu ɲũẁ yáá dàa gɩ̀ cataagǝgɩ nã.

2 Bà yáá bàa jar Yesuw nǝ̃ wù duunãtaa yo gɩ̀ nã.

3 Bǝ̃ǝ̃daagɩ̀ jáa hi, bà ɛrsɛ̃ kwãmmã́ yon.

Yesu ɲũẃ waa nǝ̃-yǝ wà: «Ǹ díɛ́, bà kwãmmã̀ yónnã́ bà saa.»

4 Yesuẃ waa wà: «Yíi ji ja-m nǝ̃ mǝ̃̀ mããcemmã-ì?

Mǝ̃̀ mããcem'n bǝ̃ǝ̃gɩ̀ sáa hi ǹ-hi yugo.»

5 Ɲũũyǝẃ waa nǝ̃ mããcieraaba wà: «Wu-ń waa cɔ̃m wo cɔ̃m nǝ̃-ɲã́ã̀, cíyà mã̀ min.»

6 Yàá, ǹ-saa nǝ̃ Yahudyaba Dũnnũ hlũũgu, bà yáá bàa kra tɩntrã'n gbafiɛdaga nã ǹ-ba bà dii hũmmã gà nã bà per bà hla nã nǝ̃-mã.

Gà yáá gbafiɛ nãndien-i, dɩ̀ dɩn yisɩrɩ̀ ji hi liitɩr yii gundii tuugu.

7 Yesuẃ waa nǝ̃ mããcieraaba wà: «Kã́ã̀ ɲi ga hu hũmmã ɲi ji dii gbafiɛ gáá nã gá yurǝǝ.»

Bá kã ǹ-kãã hu hũmmã ǹ-juo dii gbafiɛgá yurǝǝ ǹ-ba talalla.

8 Wú waa nǝ̃-ba wà: «Káalà mãdamã ɲi ga hã wùú mãã dìɛ wuur'n yuugɩ nã.»

Bá kaa ǹ-kãã hã-yǝ.

9 Hũmmã́ cin ɛrsɛ̃ kwãmmã!

Wú hũɔ̃ ǹ-ɲũɔ̃, wù sáa fǝ̃ǝ̃ kwãm mã́ã̀ hlǝ́rá gùú sùɔ́gu, nǝ̃ mããcieraabaa mãã bà húú hũmmã, bà-lǝ bà fǝ̃́ǝ̃lã́ mã̀ wanhlǝm'n sùɔ́gu.

Wùú mãã wuur'n yuugɩ nã, wú be blanĩĩw,

10 ǹ-ji ǹ-ba wù waa nǝ̃-yǝ wà: «Ɛrsɛ̃ kwãmmã mãã mã̀ dwal, bà hã cwaaba nǝ̃ mã̀-i haasǝ, ba-ń ji ɲũɔ̃ ǹ-ye gùú bǝ̃ǝ̃gu, bá fǝ̃ǝ̃ ǹ-hã-ba nǝ̃ mã̀ã́ mãã mã̀ sǝ̃n dwal.

Yíǹ-lǝ, ń fǝ̃ǝ̃ ǹ-ver ǹ yaala, nã̀ã kra mããdwalɩmmã nã ǹ-ji ba ǹ hã-ba nǝ̃-mã furũũgɩ nã!»

11 Yesuẁ cíé gùú cɔ̃mmãã mãã ǹ-pɩgaa cwaaba nnĩĩ nã, mã̀-lǝ mã̀ã cíé wù cɔ̃ndĩɛ̃lãmmã.

Wù cíé-mã Kanã lǝ-i, Galile yiɛgu.

Wù pɩ́gará wù yuuntasǝ'n gbɩgbaamã nnĩĩ-i, ǹ-ja wù duunãtaaba, nǝ̃ bá fǝ̃ǝ̃ ǹ-hũɔ̃ wù cɔ̃mmã.

12 Dɩ̀-lǝ dɩ̀ furũũgɩ nã, wù-lǝ nǝ̃ wù ɲũw nǝ̃ wù hãmba ǹ-pya wù duunãtaaba nã, bá maar ǹ-ga ce bãndaɲã Kapɛrnã lǝri.

Yesuẁ ɲǝ̃ǝ̃ wù hiil cǝrcieraaba Dũnnũ bũũsuɔgɩ nã

(Mãtiyew 21.12-13 ; Markaw 11.15-17 ; Lukaw 19.45-46)

13 Yahudyaba paaruuguu mãã bà ko tũmblɩw gɩ̀ nã, bà be-gǝ wà Ta-n-maa paaruu, gɩ̀ jáa ba gɩ̀ piɛ nã, Yesuẃ yuguraa ǹ-kã Serusalɛmgu.

14 Wù gáa kã, wú kãã da bà suur ninɲã nǝ̃ tũmba ǹ-pya tǝbuhũɔ̃rɔ̃nãmba nã Dũnnũ bũũsuɔgɩ nã, nã̀ã da jiihwarriɛ yo jirammã nã.

15 Wú ce ɲĩĩnǝ̃ǝ̃biiga, ǹ-pyãl cãnblɩri, ǹ-mũũ ǹ-ɲǝ̃ǝ̃ ǹ-hiil bà min Dũnnũ bũũsuɔgɩ nã, nǝ̃ bà ninɲã, nǝ̃ bà tũmba min.

Nã̀ã juu ǹ-tĩɛ̃ jiihwarriɛ'n tabalaaba ǹ-tũnũũ bà jinɲã min nã,

16 nã̀ã waa nǝ̃ bàá nǝ̃n yáá bà suur tǝbuhũɔ̃rɔ̃nãmba wà: «Blǝ́rà ɲì hũɔ̃rɔ̃nãmba ɲí hiil-ba níɛ́ nã; bláá ce mǝ̃̀ Tǝ suɔgɩ́ ba ɲããsuursuɔ.»

17 Wù gáa ce dɩ̀-lǝ, wù duunãtaabá fǝ̃ǝ̃ ǹ-kãnãã cãwandɩ nã mãã dìi yal wà: «Dũnnũ bũũsuɔ'n cɔ̃mmã̀ nǝ̃ samǝ̃gasǝri mǝ̃̀ nã ǹ-car, gɩ̀ cɔ̃mmã́ nǝ̃ mã̀ hyã-m nã́ã́ dǝ̃ǝ̃m-i mǝ̃̀ hiɛga nã.»

18 Gɩ̀-i, Yahudyaba yuntaabá fǝ̃ǝ̃ ǹ-yugu-yǝ wà: «Ǹ ji ce cɔ̃m hamã-i ǹ-pɩgaa-yáà wà Dũnnũ hlã-n nǝ̃ dɩ̀ cel'n hlũũgu?»

19 Yesuẃ waa nǝ̃-ba wà: «Mṹũlã̀ Dũnnũ bũũduu gúɔ̀, ɲí da mã̀ã mã-gǝ bãnɲã siɛl kusuugɩ nã-i.»

20 Bá waa nǝ̃-yǝ wà: «Bà mlã kuuguu mãã bii gwaahǝ̃ǝ̃l nǝ̃ nãndien kusuugɩ nã, yíǹ wa n ji ver ǹ-mã gɩ̀-i bãnɲã siɛl dɩn kusuugɩ nã kɛ-i!»

21 Nǝ̃ Yesuẁ yáá wù waa gùú Dũnnũ bũũduu'n cɔ̃mmãã mãã, wù yáá wù waa wù hla'n cãn'n cɔ̃m-i.

22 Gɩ̀ furũũgɩ nã, Yesuẁ jáa nĩĩ ǹ-hlǝ cugutaaba sǝ̃ǝ̃nã, wù duunãtaabá fǝ̃ǝ̃ ǹ-kãnãã cãwan díɛ́dɩ nã.

Bá paa ǹ-hũɔ̃-dǝ wà ba yállá dìí mãã Dũnnũ cãwan'n sɛbɛba nã, nǝ̃ Yesuẁ cãwandi wà dɩ̀ min sulam-i.

Yesuẁ fǝ̃ǝ̃ cwaaba

23 Yesuẁ yáá dàa Serusalɛmgu, Yahudyaba paaruuguu mãã bà be-gǝ wà Ta-n-maa paaruu, wù cíé cɔ̃ncin ǹ-pɩgaa cwaaba.

Gɩ̀-lǝ gɩ̀ nã, cwaabaa nǝ̃n díɛ́ gɩ̀ cɔ̃mmã, bà cindɩ́ hũɔ̃ wù cɔ̃mmã.

24 Nǝ̃ Yesuẁ mãã wù yáá wùu fǝ̃ǝ̃-ba ǹ-car, gùú cíé wù sáa hũɔ̃ ǹ-piɛ wù nãkruɔgu bà drɔ.

25 Wù-lǝ nǝ̃ wù hla wù yáá wùu fǝ̃ǝ̃ cwaa'n kusunã cɔ̃mmã, wù sáa wa wu ji yugu curodiɛ wà wáà nǝ̃ danii yindagǝ nã wáà nǝ̃ danii.