Mãtiyew 21

Yesuẁ jãn Serusalɛmgu, yuntaa'n tammã

(Markaw 11.1-11 ; Lukaw 19.29-40 ; Yuhanãw 12.12-19)

Yesubà gáa kuganãã Serusalɛmgɩ nã, nã̀ã da bà yáá bàa hi Betɩfasɩ lǝri ǹ-tã, Olivie tun'n tãnũũ'n yiɛgu, Yesuẃ fǝ̃ǝ̃ ǹ-tĩɛ̃ wù duunãtaaba hǝ̃ǝ̃ldaba wà:

2 «Kã́ã̀ lǝri mãã yì yigagɩ nã nnĩĩ nã, ɲi ga paa ǹ-da bàa vaa kǝkũm nǝ̃nũɔ̃ndiɛ nǝ̃ wù blɩw.

Ɲi fɩr-ba ɲí ji hã-m nǝ̃-ba.

3 Wùú nǝ̃n yugu-ɲã́ã̀, ɲí waa wà Yitii'n dugɔ-i wù nã.

Ɲi-ń waa-dǝ gɩ̀-lǝ gɩ̀ tammã, bà ga paa ǹ-ya ɲí jo nǝ̃-ba.»

4 Dɩ̀-lǝ dɩ̀ cíé ǹ-da ce Dũnnũ tanhiil'n cãnwanĩɛ̃gá suu.

Wù wáalá wà:

5 «Wáalà nǝ̃ Siyɔ̃ lǝntaa^a wà: Níyà, ɲì yuuntii jówà nnĩĩ ɲì nãã, wù sǝ̃n buɔ wù hla nã.

Wùú yúgorá ǹ-jiraa nnĩĩ kǝkũm nǝ̃nũɔ̃nw drɔ, kǝkũmblɩẁ drɔ^b.»

6 Duunãtaabà fǝ̃ǝ̃ ǹ-kã, ǹ-kãã ce Yesuẁ yáá wùu kra dìi nã mãã ǹ-hã-ba.

7 Bá kãã jo nǝ̃ kǝkũm nǝ̃ wù blɩw, nã̀ã piɛ bà kuulaadiibapɩpuɔlaaba bà furũnɲã nã nǝ̃ Yesuẃ yugo ǹ-jiraa.

8 Cohuɔgɩ́ hiil bà kuulanãmba ǹ-ba bà fa-ba hlũũgu nã, badaaba ka kãbiɛnɲã ǹ-ba bà kra.

9 Cohuɔguu nǝ̃n yáá Yesu yigagɩ nã nǝ̃ wù furũũgɩ nã, bá ba bà kaasǝraa bà min wà: «Dũnnũ yiirɩ́ bũũ Dawuda bíɛ́ wáà cɔ̃mmã nã!

Wùú mãã wù jo Yitii'n yiirɩ nã nnĩĩ, Dũnnũẃ piɛ wù nãkrɔfɩnfaagu wù drɔ!

Dũnnũw mãã drɔkuɔlɩ nã^c wù yiirɩ́ bũũ!»

10 Yesuẁ gáa kãã jãn Serusalɛmgu, lǝrɩ min dɩ́ suro ǹ-hiraa dɩ̀ vyanɲã nã.

Ba-ń ba bà ta gùú sùɔ́gu, cwaaba ba bà yugu wà: «Halǝmblǝ-i nǝ̃ biɛ wáà-lǝ?»

11 Cohuɔgɩ́ siɛ-ba wà: «Yesuw mãã Dũnnũ tanhiilw, wùú mãã wù hlǝ́rá Nasarɛtɩ lǝrii mãã Galile yiɛgu, wɩ̀-i.»

Yesuẁ per Dũnnũ bũũsuɔgɩ nã

(Markaw 11.15-19 ; Lukaw 19.45-48 ; Yuhanãw 2.13-22)

12 Yesuẃ fǝ̃ǝ̃ ǹ-kãã jãn Dũnnũ bũũsuɔgɩ nã, ǹ-ɲǝ̃ǝ̃ ǹ-hiil cǝrcieraaba min nǝ̃ ɲããsǝ̃ǝ̃rǝ̃ǝ̃ba min mãã bà yáá gɩ̀ kusunã.

Nã̀ã kãã juu ǹ-tĩɛ̃ jiihwariɛ'n tabalaaba, nǝ̃ tǝbuhũɔ̃rɔ̃nãm'n suurǝǝ'n ɲããjiraɲinɲã.

13 Nã̀ã fǝ̃ǝ̃ ǹ-waa wà: «Dɩ̀ yállá wà: “Mǝ̃̀ duugɩ̀ ji ba gùú sùɔ́guu mãã cwaabà ji ba bà kã bà cirǝ̃ǝ̃ mǝ̃̀ nã” Ɲimãã juo ce gɩ́ ba ŋmãllãã'n kuruu!»

14 Yɩrnǝ̃ǝ̃daba nǝ̃ kasarnãdaabá fǝ̃ǝ̃ ǹ-kuganãã Yesuw nã Dũnnũ bũũsuɔgɩ nã, wú ce bá buɔ.

15 Yahudyaba puruɔntaa'n yuntaaba nǝ̃ Musa hlũũ'n yuntaabà gáa da wù ce cɔ̃nnurommãã nǝ̃ tãnkuuraabá ba bà kaasǝraa Dũnnũ bũũsuɔgɩ nã wà Dũnnũ yiirɩ́ bũũ Dawuda bíɛ́'n cɔ̃mmã nã, bà hiɛgá dũ.

16 Bá ba bà waa nǝ̃ Yesuw wà: «Ǹ nṹɔ̃́ tãnkuuraabà wáalá dìí mãã-ì?»

Yesuẃ waa wà: «Ũwũũ!

Dũnnũ cãwan'n sɛbɛẁ wáalá gùú sùɔ́guu mãã wà: “Ǹ cíé halle tãnkuuraaba nǝ̃ tãnkuuraabaa mãã furũũgɩ nã, bá ba bà bũũ-n^d”, ɲimãã sáa kal gɩ̀ sùɔ́guu ǹ-da-ì?»

17 Wú fǝ̃ǝ̃ ǹ-hal bà nãã, ǹ-hlǝ lǝ'n kusuugɩ nã.

Nã̀ã ga fǝ̃ǝ̃ ǹ-kãã cɔ Betani lǝri.

Yesuẁ piɛ wù nãkrɔbɩblaagu figie tuudagǝ drɔ

(Markaw 11.12-14, 20-24)

18 Gɩ̀ taakaal ciibǝǝgu, Yesuẁ gáa suro ǹ-ba wù jo lǝ'n kusuugɩ nã, nũmmã́ kãã jaa-yǝ.

19 Wú da figie tuudagǝ hlũũ'n tũɔ̃gɩ nã.

Wú kuganãã gɩ̀ nã, ǹ-kãã da pɩpɩrãkwanɲã dɩn; blɩ'n sǝ gɩ̀ nã.

Wú waa wà: «Figietuu yíì, ǹ síì gbǝ̃ǝ̃ ǹ-ver ǹ-ŋmǝ̃ǝ̃ blɩ ǹ-da hlo gbal!»

Figietuu gúɔ̀gɩ́ paa ǹ-kuul.

20 Gɩ́ cu wù duunãtaa'n kusunɲã, bá ba bà yugu wà: «Nǝ̃ dɩ̀ cíé danii nǝ̃ figie tuu gúɔ̀gɩ́ kuul yindiinw nnĩĩ tammã?»

21 Yesuẃ waa nǝ̃-ba wà: «Yáalà mǝ̃́ waa sulammã nǝ̃-ɲã́ã̀: ɲi-ń hũɔ̃ mǝ̃̀ cɔ̃mmã, nǝ̃ ɲi-ń ba ɲì sáa ya cincaruugɩ́ ba ɲì hiɛga nã, mǝ̃n cíé dìí mãã nnĩĩ, ɲí gbǝ̃ǝ̃ ǹ-ce-dǝ-i; nǝ̃ halle ɲi ji ba ɲi-ń ce ɲí gbǝ̃ǝ̃ ǹ-waa nǝ̃ tãnũũ gúɔ̀ wà gɩ́ suro ǹ-hal níɛ́ nã, ǹ-ga dũn lwaakɩnkandɩ nã, ɲí da dìi ce-i.

22 Ɲi-ń cirǝ̃ǝ̃ kuu wo kuu nã Dũnnũẁ saa, nã̀ã piɛ ɲì nãkruɔgu wù nã, ɲi ji da-gǝ.»

Cwaabà yugu Yesuw wà halii hlã-yǝ nǝ̃ wù gaacie'n hlũũgu

(Markaw 11.27-33 ; Lukaw 20.1-8)

23 Yesuẁ gáa juo hi, wú jãn Dũnnũ bũũsuɔgɩ nã ǹ-du nã ǹ-ba wù kal cwaaba nǝ̃ Dũnnũ cãwandi.

Yahudyaba puruɔntaa'n yuntaaba nǝ̃ Yahudyaba vũnvãnããbá kuganãã ǹ-yugu-yǝ wà: «Ǹ díɛ́ gaacie gáàgà hlũũgu haa-ì?

Halii hlã-n nǝ̃ gà hlũũgu?»

24 Yesuẃ siɛ-ba wà: «Mã́ã yo mǝ̃̀ ji yugu-ɲã́ã̀ nǝ̃ yugumdamã.

Ɲi-ń siɛ-m, mã́ã yo, mǝ̃̀ ji pɩgaa-ɲã́ã̀ nǝ̃ mǝ̃̀ gaacie gáàga hlũũ'n dal'n sùɔ́gu:

25 Yuhanãw mãã wù yáá wù ɲĩɛ̃ cwaaba, Dũnnũ yáá wùu tĩɛ̃ wú jo, dàa cwaa yáá?»

Bá du nã ǹ-ba bà waa nǝ̃ bà ɲĩɛ̃ wà: «Yi-ń waa wà Dũnnũ tĩ́ɛ̃lã́-yǝ, wù ji waa nǝ̃-yáà wà nǝ̃ bii cíé yí ba yì sáa hũɔ̃ wù cãwandi.

26 Yi-ń waa wà cwaa tĩ́ɛ̃lã́-yǝ, yi saa yí sɔ̃ cocindɩ nã, nã̀ã wa bàá mãã dìɛ níɛ́ nã bà min ba yáá bà ne Yuhanãw ba Dũnnũ tanhiil-i.»

27 Bá fǝ̃ǝ̃ ǹ-siɛ Yesuẁ wà: «Yi sáa fǝ̃ǝ̃.»

Gɩ̀-i, Yesuẃ waa wà: «Nĩĩguu nǝ̃n ba, mã́ã yo, gùú tiiw nǝ̃n hlã-m nǝ̃ hlũũgu, mǝ̃́ ba mǝ̃̀ ce gaacie gáà, mǝ̃̀ síì pɩgaa-yǝ ǹ-ja-ɲã́ã̀.»

Biɛnããba hǝ̃ǝ̃l cɔ̃mmã

28 Gɩ̀ furũũgɩ nã, Yesuẃ waa hlo wà: «Ɲimãã kãn wanĩĩ cɔ̃m mã́ã̀ nã?

Biɛdiɛ yáá nǝ̃ pũmpɩriiba hǝ̃ǝ̃l.

Yuudagǝ, wú waa nǝ̃ wù vũnvã yow wà: “Suro ń maar fugagɩ nã.”

29 Pũmpɩrw, wú waa nǝ̃-yǝ wà: “Mǝ̃n síì kã.”

Nǝ̃ gɩ̀ furũũgɩ nã, gɩ́ ca wù nã, wú ver dìí nǝ̃n yáá wù yuugɩ nã, nã̀ã fǝ̃ǝ̃ ǹ-suro ǹ-ta.

30 Tiiyǝẃ ta kãã waa gùú dɩ dɩndɩ-i nǝ̃ wudiɛw.

Wù-lǝ wú waa nǝ̃-yǝ wà: “Tii, mǝ̃̀ ji kã”, nǝ̃ wù sáa ga kã.»

31 Yesuẃ yugu-ba wà: «Pũmpɩriiba hǝ̃ǝ̃l báà nã, hawu cíé wù tǝ kusuugu?»

Bá waa wà: «Dĩɛ̃lnã yo-i.»

Yesuẃ fǝ̃ǝ̃ ǹ-waa wà: «Yáalà mǝ̃́ waa sulammã nǝ̃-ɲã́ã̀: nãnhũɔ̃rããba nǝ̃ canããbaa mãã bà suur bà hla bà hã bibyanããba bà ga jãn ɲì yiga nã Dũnnũ yuuntasǝrɩ nã.

32 Hamã nã-ì?

Yuhanãẁ júó ǹ-ji pɩgaa-ɲã́ã̀ nǝ̃ hlũsũɔ̃lgǝgu, ɲí hla ɲí sáa hũɔ̃ wù cãwandi, nǝ̃ nãnhũɔ̃rããba nǝ̃ canããbaa mãã bà suur bà hla bà hã bibyanããba, bá hũɔ̃-dǝ.

Nǝ̃ halle dɩ̀-lǝ dɩ̀ min nã, ɲi díɛ́-dǝ nǝ̃ gɩ̀ sáa ji ba gɩ̀ ji ca ɲì nã ɲi ver dìí nǝ̃n yáá ɲì yunɲã nã, nã̀ã hũɔ̃ Yuhanã cãwandi.»

Mããcierabɩbliɛ'n cɔ̃mmã

(Markaw 12.1-12 ; Lukaw 20.9-19)

33 Yesuẃ fǝ̃ǝ̃ ǹ-waa wà: «Nṹwã̀ cãwaadũũmdamã hlo ɲí hã-m: Suɔntiidiɛẁ yáá wùu so ɛrsɛ̃ tun'n fugagu nã̀ã ce huɔtun'n nɔ̃nɲã ǹ-caliɛ gɩ̀ nã, nã̀ã fǝ̃ǝ̃ ǹ-ka ɛrsɛ̃ bikumãfuugu nã̀ã ce kuudagǝ vǝlvǝl ǹ-ba wù ne fugagɩ min nã, nã̀ã fǝ̃ǝ̃ ǹ-dii-gǝ ǹ-hã sɩkũɔ̃rããdaba, nã̀ã ta waali.

34 Tubiɲin'n biiga jáa hi tɩgimmã nã gùú bǝ̃ǝ̃gu, wú tĩɛ̃ wù mããcieraadaba ɛrsɛ̃ kũɔ̃rãã báà nãã wà bá kãã hũɔ̃ wù-lǝ wù yuɔri ǹ-ga hã-yǝ.

35 Mããcieraabà gáa kã, ɛrsɛ̃ kũɔ̃rããbá mũũ wudiɛw nã̀ã ko bà hǝ̃ǝ̃lnãw.

Bà nǝ̃́ǝ̃lã́ wudiɛw nǝ̃ tɩntrãga-i ǹ-ko-yǝ.

36 Fugantiiẃ ver ǹ-tĩɛ̃ badaba piyɛ̃ hlo.

Bà gáa kã, ɛrsɛ̃ kũɔ̃rãã báà, bá ver ǹ-ce-ba nã́ã́ bà cíé baadĩɛ̃lããba gùú tammã.

37 Gɩ̀ furũũgɩ nã, fugantiiẃ ǹ-tĩɛ̃ wù bíɛ́ẃ kã bà nãã, nã̀ã ba wù ne wà fíí ba bũũ-yǝ-i.

38 Nǝ̃ bà gáa da biɛnĩĩw, bá waa nǝ̃ bà ɲĩɛ̃ wà: “Sɔtuurw-i nnĩĩ nã!

Jówà yí ko-yǝ, gɩ̀-lǝ gɩ̀ nã, sùɔ́gɩ̀ ji ba hãmĩĩ kuu-i!”

39 Bá blǝ ǹ-hiil-yǝ ɛrsɛ̃ tun'n fuga'n taasǝ̃ǝ̃nǝ̃ǝ̃gu ǹ-kãã ko-yǝ.»

40 Yesuw nã̀ã fǝ̃ǝ̃ ǹ-yugu cwaaba wà: «Ɲimãã saa, fugantii wu-ń ga jo, wù ji ce ɛrsɛ̃ kũɔ̃rãã báà danii?»

41 Bá waa wà: «Wu-ń jo wù ji ko-ba nǝ̃ kuubɩblaagu, mããcierabɩbliɛ-i nǝ̃-ba, nã̀ã hã badaba nǝ̃ ɛrsɛ̃ tun'n fugagu.

Bàá mãã bà ji ba bà hã-yǝ nǝ̃ wù fuga'n dalaagu gɩ̀ tammã nã.»

42 Yesuẃ waa nǝ̃-ba wà: «Ɲi sáa kal gɩ̀ sùɔ́gu Dũnnũ cãwan'n sɛbɛba nã ǹ-da-ì?

Wà: “Domããrããbà hlárá gùú tɩntãndii mãã wà dɩ sǝ̃n fa, dɩ̀-lǝ dìí jáa blǝ dojiili.

Cuutii Dũnnũẁ cíé dɩ̀-lǝ dɩ́ ce, hãmĩĩ saa, cɔ̃nnurom-i wù cíé-mã^e.”

43 Gùú cíé mǝ̃́ ba mǝ̃̀ waa nǝ̃-ɲã́ã̀ mǝ̃́ wa: bà ji hũɔ̃ Dũnnũ yuuntasǝrɩ ɲì saa, ǹ-hã bàá mãã bà sǝ Yahudyaba nã̀ã ba bà nɔ̃ bà hã Dũnnũw.

44 [Curo wo curo, wu-ń duruu gɩ̀ tɩntãndii drɔ, wù kukuunɲã karaa-i.

Nǝ̃ gɩ̀ tɩntãndɩ-ń duruu yíi mãã ǹ drɔ, dɩ̀ mugunãã ǹ nã-i.]»

45 Yesuẁ wáalá gùú cãwaadũũmãã mãã nnĩĩ, Yahudyaba puruɔntaa'n yuntaaba nǝ̃ Farisĩɛ̃ba, bá fǝ̃ǝ̃ wà wù ja bà-lǝ bà-i.

46 Bá ba bà caa bá blǝ-yǝ, nǝ̃ cwaaba yáá bà blǝ-yǝ Dũnnũ tanhiil-i, gɩ̀-lǝ gùú yáá gùu ce bá ba bà sɔ̃ cocin díɛ̀ nã.