Lukaw 20

Cwaabà yugu Yesuw wà halii hlã-yǝ nǝ̃ wù gaacie'n hlũũgu

Yuudagǝ yáá, Yesuẃ nǝ̃ wù kal cwaaba Dũnnũ bũũsuɔgɩ nã, nã̀ã ba wù waa cɔ̃ndudwalɩmmã nǝ̃-ba.

Yahudyaba puruɔntaa'n yuntaaba, nǝ̃ Musa hlũũ'n yuntaaba, nǝ̃ vũnvãnããbá jo ǹ-juo yugu-yǝ wà:

2 «Ǹ díɛ́ gaacie gáàgà hlũũgu haa-ì?

Halii hlã-n nǝ̃ gà hlũũguu?»

3 Yesuẃ fǝ̃ǝ̃ ǹ-yugu-ba wà: «Mã́ã yo, mǝ̃̀ ji yugu-ɲã́ã̀ nǝ̃ cɔ̃mmã dɩndɩn, wáalà mǝ̃́ nɔ̃:

4 Yuhanãw mãã wù yáá wù ɲĩɛ̃ cwaaba, Dũnnũẃ yáá wùu tĩɛ̃-yǝ dàa cwaa yáá bàa tĩɛ̃ yǝ-ì?»

5 Bá ver ǹ-ba bà waa nǝ̃ bà ɲĩɛ̃ wà: «Yi-ń wa Dũnnũ yáá wùu tĩɛ̃-yǝ, wù ji waa nǝ̃-yáà wà nǝ̃ bii cíé yí ba yì sáa hũɔ̃ wù cãwandi.

6 Yi-ń waa wà cwaa tĩ́ɛ̃lã́-yǝ, nǝ̃ Cocin díɛ̀dɩ min dɩ̀ hṹɔ̃lã́, wà Yuhanãw Dũnnũ tanhiil yáá, bà ji nǝ̃ǝ̃ ǹ-ko-yáà nǝ̃ tɩntrãga.»

7 Bá naa bá waa nǝ̃-yǝ, wà bà-lǝ ba sáa fǝ̃ǝ̃ gùú tiiw nǝ̃n yáá wùu tĩɛ̃-yǝ.

8 Yesu yo, wú fǝ̃ǝ̃ ǹ-siɛ-ba wà: «Nĩĩguu nǝ̃n ba, mã́ã yo, gùú tiiw nǝ̃n hlã-m nǝ̃ hlũũgu, nǝ̃ mǝ̃́ ba mǝ̃̀ ce cɔ̃m mã́ã̀, mǝ̃̀ síì pɩgaa-yǝ ǹ-ja-ɲã́ã̀.»

Mããcierabɩbliɛ'n cɔ̃mmã

(Mãtiyew 21.33-46 ; Markaw 12.1-12)

9 Gùú nã-i, Yesuẃ fǝ̃ǝ̃ ǹ-ba wù waa cãwaadũũm mã́ã̀ nǝ̃-ba, wà: «Biɛdiɛẁ yáá wùu so ɛrsɛ̃ tun'n fugagu, nã̀ã dii-gǝ ǹ-hã sɩkũɔ̃rããdaba, nã̀ã fǝ̃ǝ̃ ǹ-ta waali mãã wù ga hǝ̃ǝ̃sǝ dɩ̀ nã.

10 Ɛrsɛ̃ wuɔrɩm'n bǝ̃ǝ̃gɩ̀ gáa hi, wú tĩɛ̃ curodiɛ wà wú kãã hũɔ̃ wù ɛrsɛ̃ yuɔri ǹ-ji hã-yǝ.

Wù gáa kãã hi, sɩkũɔ̃rããbá blǝ ǹ-mũũ-yǝ, nã̀ã ɲǝ̃ǝ̃ ǹ-tĩɛ̃ wú ver nãkwasǝri.

11 Fugantiiẃ ver ǹ-tĩɛ̃ mããcierdiɛẃ kã bà nãã hlo, sɩkũɔ̃rããbá kãã blǝ ǹ-mũũ-yǝ, ǹ-tuuraa wù nã, nã̀ã fǝ̃ǝ̃ ǹ-ɲǝ̃ǝ̃ ǹ-tĩɛ̃ wùú yo nãkwasǝri.

12 Fugantiiẃ fǝ̃ǝ̃ ǹ-ver ǹ-tĩɛ̃ cwaaba siɛlnãẃ kã bà nãã hlo.

Bá kãã blǝ wù-lǝ, ǹ-mũũ ǹ-kɔsuɔ-yǝ, nã̀ã tuu ǹ-kãã nǝ̃ǝ̃ ǹ-hiil-yǝ fugagɩ nã.

13 Gùú nã-i, fugantiiẃ fǝ̃ǝ̃ ǹ-waa wà: “Mǝ̃̀ ji ce cɔ̃m mã́ã̀ danii?

Mǝ̃̀ ji tĩɛ̃ mǝ̃̀ bíɛ́ cituublɩw-i, wùú mãã mǝ̃̀ kadiinw wú kã, fíí bà ga wa bá bũũ wù-lǝ yoo.”

14 Sɩkũɔ̃rããbà gáa da fugantii'n biɛẁ jo, bá fǝ̃ǝ̃ ǹ-ba bà waa nǝ̃ bà ɲĩɛ̃ wà: “Biɛ'n sɔtuurẃ jówà nnĩĩ.

Jówà yí ko-yǝ, gɩ̀-lǝ gɩ̀ nã, fugagɩ̀ ji ba hãmĩĩ kuugɩ-i.”

15 Bá hiil-yǝ ɛrsɛ̃ tun'n fuga'n taasǝ̃ǝ̃nǝ̃ǝ̃gu, ǹ-kãã ko-yǝ.»

Yesuẃ fǝ̃ǝ̃ ǹ-yugu-ba wà: «Kuɔkuɔ, fugantiiẁ ga juo ce hadi?

16 Wù ga juo guu sɩkũɔ̃rãã báá nã, nã̀ã dii wù ɛrsɛ̃ tun'n fugagu ǹ-hã badaba.»

Cwaabà gáa nɔ̃ dɩ̀-lǝ, bá fǝ̃ǝ̃ ǹ-ba bà waa wà: «Dɩ̀-lǝ dɩ báa ce.»

17 Yesuẃ fǝ̃ǝ̃ ǹ-ne-ba, nã̀ã waa nǝ̃-ba wà: «Dɩ̀ yállá wà: “Domããrããbà hlárá gùú tɩntãndii mãã wà dɩ sǝ̃n fa, dɩ̀-lǝ dìí jáa blǝ dojiili.”

Ɲimãã kãn wà gɩ̀ cãwan'n fɩrɩmmã-i danii?

18 Curo wo curo, wu-ń duruu gɩ̀ tɩntãndii drɔ, wù kukuunɲã karaa-i.

Nǝ̃ gɩ̀ tɩntãndɩ-ń duruu yíi mãã ǹ drɔ, dɩ̀ mugunãã ǹ nã-i.»

19 Musa hlũũ'n yuntaaba, nǝ̃ Yahudyaba puruɔntaa'n yuntaabá fǝ̃ǝ̃ wà Yesuw wáalá cãwaadũũm mã́ã ǹ-ja ba-i.

Bà ba bà caa bá blǝ-yǝ gùú bǝ̃ǝ̃gu dàa, nã̀ã ba bà sɔ̃ cwaaba nã.

Bà caa bá vuu ǹ-blǝ Yesuw nãn'n cɔ̃mmã nã

(Mãtiyew 22.15-22 ; Markaw 12.13-17)

20 Bá fǝ̃ǝ̃ ǹ-ba bà dǝ̃ǝ̃ Yesuw, nã̀ã tĩɛ̃ cwaadaabá kã wù nãã, ǹ-kãã ba bà vuu bà ce bà hla, wà bà-lǝ cosũɔ̃lba-i.

Bà-lǝ bàá yáá bà saa bá vuu ǹ-blǝ Yesu nũɔ̃gu, ǹ-da ǹ-dii-yǝ kumãndã nãkruɔgɩ nã, wú da ǹ-ce bá ko-yǝ.

21 Gùú nã-i, bá fǝ̃ǝ̃ ǹ-yugu-yǝ wà: «Kaltii, yi hṹɔ̃lã́ wà ǹ cãwanĩɛ̃ga nǝ̃ ǹ mãã ǹ kal cwaaba nǝ̃ cɔ̃m wo cɔ̃m, mã sṹɔ̃lã́.

Ǹ sǝ̃n ne curoẁ yinɲã nã, nã̀ã kal cwaaba nǝ̃ sulammã Dũnnũ cɔ̃mmã nã.

22 Yi yáá wa yí yugu-n ǹ-ne wo, Musa hlũũgɩ nã, gɩ̀ saa yí pã yuuntigǝ̃ngã Sesaar nãndi-ì, dàa, yi sǝ̃n saa yí pã-ì?»

23 Nǝ̃ Yesuẃ hla, nã̀ã fǝ̃ǝ̃ wà ba wa bá vuu ǹ-blǝ wù nũɔ̃-i, wú fǝ̃ǝ̃ ǹ-waa nǝ̃-ba wà:

24 «Hlã́ã̀-m nǝ̃ worblɩdarǝ mǝ̃́ ne.

Gùú coyuuguu mãã dɩ̀ drɔ nnĩĩ, halii yuu-i?

Nǝ̃ yiirii mãã bàa yal-dǝ nnĩĩ, halii yir-i?»

Bá siɛ-yǝ wà: «Sesaar dǝlli-i.»

25 Gùú nã-i, Yesuẃ fǝ̃ǝ̃ ǹ-waa nǝ̃-ba wà: «Nĩĩguu nǝ̃n ba, hlã́ã̀ Sesaarw nǝ̃ wù kuugu, nǝ̃ gùú mãã Dũnnũ kuugu, ɲí hã-yǝ nǝ̃-gǝ.»

26 Bà sáa ji ba bà ji da cãwan, ǹ-blǝ Yesu nũɔ̃gu cwaaba sǝ̃ǝ̃nã.

Wù mãã wù siɛ-ba gùú tammã, dɩ́ tugulǝǝ bà min nã, bá ba ciyɛ̃ ciyɛ̃.

Bà yugu Yesuw nǝ̃ cugutaa'n nĩĩm'n cɔ̃mmã

(Mãtiyew 22.23-33 ; Markaw 12.18-27)

27 Yahudyadaabà yáá dàa bà be-ba wà Saduusɩba.

Bà-lǝ bàá wáalà wà curow-ń ku ǹ-tã, dɩ tĩ́ɛ̃́-i, cugutaa'n pĩĩmã sɩraa hlo.

Bà-lǝ bà bluudaabá wáà ǹ-kuganãã Yesuw nã, ǹ-kãã yugu-yǝ wà:

28 «Kaltii, Musa hlũũgɩ nã, curow mãã wù sáa da tãnkuur nǝ̃ wù ciɛw, wu-ń ku nǝ̃ gɩ̀ ciɛẃ ba, wù hǝ̃ǝ̃ẁ saa wú tuu-yǝ nǝ̃ sùɔ́gu, ǹ-huu tãnkuur nǝ̃-yǝ, wù vũnvũɔ̃'n yiirɩ báa ji da, ǹ-guu nã.

29 Nǝ̃ ɲũũnãtaadaabà yáá dàa, cwa nɩrhǝ̃ǝ̃l.

Bà vũnvãtiiẃ taa wù ciɛw, ǹ-ji ku nǝ̃ wu ba, bà sáa da tãnkuur.

30 Wù duumǝ̃nãtiiẃ tuu cijal wáà, ǹ-ji ta ǹ-ga ku, bà sáa da tãnkuur,

31 bà siɛlnã yo yo, wú fǝ̃ǝ̃ ǹ-juo tuu-yǝ.

Cwa nɩrhǝ̃ǝ̃l wáà minw wú juo ku, curo'n sáa ji da tãnkuur nǝ̃-yǝ.

32 Gɩ̀ furũũgɩ nã, cijal yo, wú juo ku.

33 Nǝ̃ gɩ̀-lǝ gɩ̀ nã, cugutaa'n pĩĩm'n bǝ̃ǝ̃gu, nǝ̃ cwa nɩrhǝ̃ǝ̃l wáà min, bá ba bàa dii-yǝ nǝ̃ ciɛ ǹ-ta, wù ga ba halii yo-ì?»

34 Yesuẃ fǝ̃ǝ̃ ǹ-siɛ-ba wà: «Cuu wáá nã-i cwaabà taa canããba, nã̀ã ba bà taa bà hiil bà bisiiba.

35 Nǝ̃ gùú cwaabaa mãã Dũnnũẁ ga ne wà ba sáalá wú pĩĩ ǹ-hiil-ba cugutaaba sǝ̃ǝ̃nã, ǹ-da ǹ-ba gùú cuuflãmw nã mãã wù ga nǝ̃ǝ̃-yǝ, bà-lǝ bà saa, cataacɔ̃m'n sɩga ba dàa.

36 Dũnnũẁ pĩ́ĩlã́ ǹ-hiil-ba, wù tãnkuuraa-i, bá nǝ̃ nã́ã́ mɛlɛgɛba-i, bà síì gbǝ̃ǝ̃ ǹ-kurǝǝ.

37 Musaw nǝ̃ wù hla, wù pɩ́gará cugutaa'n pĩĩm'n cɔ̃mmã́ kaalaa.

Wù táalá partuuguu mãã gɩ̀ yáá gùu blǝ nã nǝ̃ dǝ̃ǝ̃mã, gɩ̀ cɔ̃mmã gùú sùɔ́gɩ nã, wù táalá wà Dũnnũw wáalá nǝ̃-yǝ wà: “Mã́ã-i ǹ tǝvũnvãnããbaa mãã Ibramãw, Isiyagaw, nǝ̃ Yakuba bà Dũnnũw.”

38 Nũmǝ̃nãtaa'n Dũnnũ-i, cugutaa'n yo sǝ.

Yi fǝ̃ǝ̃ gùú sùɔ́gɩ-i, wà gɩ̀ vũnvãnããba siɛlba nǝ̃ nũmǝ̃nã-i.»

39 Gɩ̀-i, Musa hlũũ'n yuntaadaabá fǝ̃ǝ̃ ǹ-waa wà: «Kaltii, ǹ fǝ̃́ǝ̃lã́ cãwandi.»

40 Ǹ-tuu gɩ̀-lǝ gɩ̀ nã, bà sáa ji siɛ ǹ-yugu-yǝ nǝ̃ cɔ̃m hlo.

Dawuda biɛ dɩn sǝ nǝ̃ Kɩrsaw, wù tii-i nǝ̃-yǝ

(Mãtiyew 22.41-45 ; Markaw 12.35-37)

41 Gùú nã-i, Yesuẃ fǝ̃ǝ̃ ǹ-yugu-ba wà: «Gɩ̀ ba danii, cwaabá ba bà waa wà Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wà haasǝ yuuntii Dawuda furũntii-ì?

42 Nǝ̃ Dawuda-lǝ, wú ba yà yal Sabur sɛbɛw nã wà: “Cuutii Dũnnũẁ wáalá nǝ̃ mǝ̃̀ tiiw wà wú ta ǹ-jiraa wù nãdĩĩ yiɛgu,

43 fuwɔ wu ji dii wù ɲããtaaba, wù vyan'n taaragu.”

44 Dawudaw-ń ba wù be Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wà wù Tii, wù ji ce danii nã̀ã ver ǹ-ba Dawuda furũntii hlo?»

Curo'n báa ce Musa hlũũ'n yuntaa'n tammã

(Mãtiyew 23.1-36 ; Markaw 12.38-40)

45 Cwaaba min bà gáa jǝ̃ǝ̃ bà tɔ̃nɲã ǹ-ba bà nɔ̃ bà hã Yesuw, wú fǝ̃ǝ̃ ǹ-waa nǝ̃ wù duunãtaabaa wà:

46 «Blǝ́rà ɲì hla nã nǝ̃ Musa hlũũ'n Yuntaabaa mãã, ba-ń ce bá dii bà kuulaapɩpuɔlaaba, ǹ-ba bà ta cɔ̃ncesɔsiɛga nã, cwaaba-ń ba bà fyãn-ba gɩ́ ba gɩ̀ dwal bà nã.

Ba-ń ba Yahudyaba tɩgim'n donɲã nã, bá ba bà caa ba nã́ã̀ ba yiganãyiɛ'n ɲããjiraɲinɲã nã.

Nǝ̃ paaruu'n sɔnɲã nã, bá ba bà caa bá jiraa cogǝ̃ngĩɛ̃'n wanjirammã nã.

47 Bà-lǝ bàá vúulà bà hũɔ̃ blakuucanãã'n nãkruɔɲinɲã min, nã̀ã ba ba-ń ce bá ba bà cirǝ̃ǝ̃ Dũnnũw nã bà sǝ̃n hiraa, cwaabá da ǹ-waa wà bà-lǝ ba sṹɔ̃lã́.

Bà-lǝ bàá ga ywar cicuɔgu, ǹ-ɲǝ̃ǝ̃ cwa'n dɩgaliɛw.»