Mãtiyew 22

Yuuntiidiɛ bá nǝ̃ wù jambliɛba

Yesuẃ ver ǹ-kã nǝ̃ yiga ǹ-ba wù waa cãwaadũũmã nǝ̃-ba wà:

2 «Dũnnũ yuuntasǝrɩ nǝ̃ nã́ã́ yuuntii mãã wù yáá wùu ce bá hĩɛ̃ wuuri wù bíɛ́'n cataapaaruugɩ nã.

3 Nã̀ã ga fǝ̃ǝ̃ ǹ-tĩɛ̃ wù mããcieraabá be bàá nǝ̃n yáá wùu jar-ba cataa gúɔ̀ nã, nǝ̃ taaraabá ba bà sǝ̃n caa bá kã.

4 Yuuntiiẃ ver ǹ-tĩɛ̃ wù mããcieraadaba bà nãã, nã̀ã waa nǝ̃-ba wà: “Kã́ã̀ ɲi ga waa nǝ̃-ba wà mǝ̃n wa mǝ̃̀ hĩɛ̃rɩ́ tɩgɩnǝ̃ǝ̃ ǹ-tã, wà mǝ̃ kúó mǝ̃̀ ninɲã nǝ̃ mǝ̃̀ nǝ̃ǝ̃binǝ̃ǝ̃baa mãã bàa bɩnǝ̃ǝ̃, wà bá jo cataagǝgɩ nã.”

5 Tĩɛ̃taabá kã, nǝ̃ cwaaba sáa blǝ dɩ́ ba nũɔ̃sǝn dǝl: bá suro badaabá ta fugasǝrɩ nã, badaabá ta bà cǝruugɩ nã.

6 Badaaba ver ǹ-blǝ yuuntii'n mããcieraa báà ǹ-kãnãã-ba, nã̀ã ko-ba.

7 Yuuntii'n hiɛgá juo mǝ̃gaa ǹ-dũ.

Wú ce wù sɩrǝǝsɩbá kãã guu gɩ̀ cokuoraaba nã nã̀ã hyã bà lǝri.

8 Wù gáa ce dɩ̀-lǝ, wú waa nǝ̃ wù mããcieraaba wà: “Cataawuurɩ̀ bíé ǹ-tã, nǝ̃ mǝ̃̀ yáá mã̀ã jar bàá mãã, bà sǝ̃n saa nǝ̃-dǝ.

9 Kã́ã̀ hlũngaaga nã, ɲi-ń ga da curow wo curow, ɲí jar-yǝ wú jo cataagǝgɩ nã.”

10 Mããcieraabà tíɛ́ gɩ̀-lǝ gùú nã-i ǹ-kã hlũngaaga nã, ǹ-kãã jar curo wo curo mãã bà jal nǝ̃-yǝ, cobɩbliɛba nǝ̃ cofɩnfaaba min ǹ-juo dii cataaduugɩ̀ yísɩ̀.

11 Yuuntiiẃ jãn wà wú kãã ne-ba, ǹ-kãã da biɛdiɛ wù sáa dii cataakuulanãmba.

12 Wú yugu-yǝ wà: “Mǝ̃̀ jĩɛ̃, yíǹ bla danii ń jãn níɛ́ nǝ̃ kuulaa wáà tuugu?”

Biɛ sáa da cãwan.

13 Yuuntiiẃ waa nǝ̃ wù mããcieraabaa wà: “Blǝ́rà biɛ wáà ɲí vaa wù nãkrɔnɲã nǝ̃ wù vyanɲã nǝ̃ ɲí huɔ ɲí nǝ̃ǝ̃ ɲí hiil-yǝ curũɔ̃gɩ nã cɩnkaaraagu, wú ba dudũũmã nã.

Wu-ń ga ba dàa gɩ̀ sùɔ́gɩ nã, kaaluugu nǝ̃ ɲirãn'n wuumã̀ ga ba dàa.”

14 Nã̀ã wa Dũnnũẁ bíé cocin, nǝ̃ wù mãã wù ga ne ǹ-hiil bàá mãã bà sǝ dugɔ.»

Bà caa bá vuu ǹ-blǝ Yesuw nãn'n cɔ̃mmã nã

(Markaw 12.13-17 ; Lukaw 20.20-26)

15 Gɩ̀-i, Farisĩɛ̃bá ta ǹ-kãã tɩgii bà ɲĩɛ̃ ǹ-gbǝ dɩ̀ nã bà mãã bà ji ce nĩĩguu mãã nã̀ã blǝ-yǝ nǝ̃ wù hla'n nũɔ̃nãcãwandi.

16 Bá fǝ̃ǝ̃ ǹ-tĩɛ̃ bà duunãtaadaba nǝ̃ Erodɩ bluudaba wù nãã.

Bá yugu-yǝ wà: «Kaltii, yi fǝ̃́ǝ̃lã́ wà n sṹɔ̃lã́, nǝ̃ n kal cwaaba nǝ̃ Dũnnũ hlũũgu sulammã nã, nã̀ã wa ǹ sǝ̃n sɔ̃ curo nã, ǹ sǝ̃n ne curo'n yiga.

17 Yi yáá wa yi yugu-n ǹ-ne wo, yíǹ saa, gɩ́ ba nã́ã́ ǹ-vaa nǝ̃ Musa hlũũgu, yi saa yí ba yì pã nãndi yì hã yuuntigǝ̃ngã Sesaarw-i dàa, yi sǝ̃n saa yí ce-dǝ?»

18 Nǝ̃ Yesuẁ yáá wùu fǝ̃ǝ̃ bà gaabɩbliɛga; wú waa nǝ̃-ba wà: «Kusunɲãhǝ̃nhãltaa ɲimãã mãã nnĩĩ, ɲi caa ɲí dǝ̃ǝ̃-m hamã nã-ì?

19 Ɲi mãã ɲì pã nãndi nǝ̃ jinɲã mãã, hlã́ã̀-m nǝ̃ dɩ̀ dɩn mǝ̃̀ ne.»

Bá hã-yǝ worblɩdarǝ.

20 Gùú nã-i, Yesuẃ fǝ̃ǝ̃ ǹ-waa nǝ̃-ba wà: «Bà cíé halii yuu-i worblɩ díɛ̀ drɔ?

Nǝ̃ yiirii mãã bàa yal-dǝ nnĩĩ, halii yir-i?»

21 Bá waa wà: «Sesaar-i.»

Gɩ̀-i, Yesuẃ fǝ̃ǝ̃ ǹ-waa nǝ̃-ba wà: «Nĩĩguu nǝ̃n ba, gùú mãã Sesaarw kuugu hlã́ã̀-yǝ nǝ̃-gǝ, nǝ̃ gùú mãã Dũnnũ kuugu, ɲí hã-yǝ nǝ̃-gǝ.»

22 Cãwan díɛ̀dɩ́ tugulǝǝ bà nã, bá fǝ̃ǝ̃ ǹ-ta nǝ̃ wù ba.

Bà yugu Yesuw nǝ̃ cugutaa'n nĩĩm'n cɔ̃mmã

(Markaw 12.18-27 ; Lukaw 20.27-40)

23 Yahudyadaabà yáá dàa bà be-ba wà Saduusɩba.

Bà-lǝ bàá wáalà wà curow-ń ku ǹ-tã, dɩ tĩ́ɛ̃́-i, cugutaa'n pĩĩmã sɩraa hlo.

Gùú yuugɩ dɩngu, badaabá kuganãã Yesuw nãã, ǹ-yugu-yǝ wà:

24 «Kaltii, Musaẁ wáalá wà: “curow mãã wù sáa da tãnkuur nã̀ã ku, wù hǝ̃ǝ̃ẁ saa wú tuu blakuuciɛ wáà nǝ̃ sùɔ́gu, ǹ-huu tãnkuur nǝ̃-yǝ, wù vũnvũɔ̃'n yiirɩ báa ji da, ǹ-guu nã^a.”

25 Nǝ̃ ɲũũnãtaadaabà yáá dìɛ yì sǝ̃ǝ̃nã, cwa nɩrhǝ̃ǝ̃l.

Bà vũnvãtiiẃ taa wù ciɛw, ǹ-ji ku nǝ̃ wu ba, bà sáa da tãnkuur.

Wù duunãyoẃ tuu cijalẁ;

26 gùú mã̀ dɩnmã-i.

Bà siɛlnã yo yo, gùú dɩ̀ diidɩ-i.

Bà bla dìí nã-i fuwɔ cwa nɩrhǝ̃ǝ̃l wáà min, ba ji kurǝǝ ǹ-baal.

27 Bà-lǝ bà furũũgɩ nã cijal yo wú juo naa.

28 Yindiɛ cwa nɩrhǝ̃ǝ̃l wáà min, bá ba bàa dii-yǝ nǝ̃ ciɛ ǹ-ta, cugutaa'n pĩĩm'n bǝ̃ǝ̃gu, wù ga ba halii yo-ì?»

29 Yesuẃ fǝ̃ǝ̃ ǹ-siɛ-ba wà: «Ɲi mãã ɲì sǝ̃n fǝ̃ǝ̃ Dũnnũ cãwan'n sɛbɛbaa mãã bà waa dìí, nã̀ã ba ɲì sǝ̃n fǝ̃ǝ̃ wù fãngãã yo, gùú cíé ɲí pe nnĩĩ tammã.

30 Ɲi sáa da, cugutaa'n pĩĩm'n yuugu, cataacɔ̃mmã sɩga ba dàa, cwaabà ga ba nã́ã́ mɛlɛgɛba-i drɔkuɔlɩ nã.

31 Nǝ̃ gɩ́ ba nã́ã́ Dũnnũẃ wáalá dìi nǝ̃-ɲã́ã̀, ǹ-kã cugutaa'n pĩĩm'n cɔ̃mmã nã, ɲi sáa kal gɩ̀ sùɔ́gu-ì?

32 Wù wáalá wà: Mã́ã-i ǹ tǝvũnvãnããbaa mãã Ibramãw, Isiyagaw nǝ̃ Yakuba bà Dũnnũw^b.

Nũmǝ̃nãtaa'n Dũnnũ-i, cugutaa'n yo sǝ.»

33 Gùú cocindɩ min mãã dɩ̀ nṹɔ̃́ Yesu cãwanĩɛ̃ga, gá tugulǝǝ bà nã ǹ-car.

Dìí mãã cɔ̃mmã min yigagɩ nã Dũnnũ hlũũgɩ nã

(Markaw 12.28-34 ; Lukaw 10.25-28)

34 Farisĩɛ̃ba gáa nɔ̃ wà Yesuẃ cíé Saduusɩbá suu bà nɔ̃nɲã nã, bá kãã tɩgii bà ɲĩɛ̃.

35 Bà sǝ̃ǝ̃nã Musa hlũũ'n yuuntiidiɛ yáá dàa, wù caa wú dǝ̃ǝ̃ Yesuw, wù-lǝ wú tuu cãwandi wà:

36 «Kaltii, Dũnnũẁ kárrá gùú hlũũ'n nǝ̃ǝ̃yaga nã ǹ-hã-yáà wà yí ba yì wáà-ga, hadɩ-i ɲã̀ min yigagɩ nã?»

37 Yesuẃ waa wà: «Ǹ saa ń blǝ Cuutii Dũnnũ cɔ̃mmã́ dwal ǹ nã nǝ̃ ǹ hiɛga min nã, nǝ̃ ǹ kusuugɩ min nã, nǝ̃ ǹ kãnɩmmã min nã.^c

38 Dũnnũẁ kárrá gùú hlũũ'n nǝ̃ǝ̃yaga nã wà yí ba yì wáà-ga, díɛ̀-i gà min yigagɩ nã, dɩ̀-i gà min diigǝ̃ngããri.

39 Gà hǝ̃ǝ̃lnã dǝl yo, dɩ̀ hlǝ diidĩɛ̃lãrǝdi, dɩ̀-lǝ dɩ̀ waa wà curo ǹ saa ń ya ǹ nãcuro'n cɔ̃mmã́ dwal ǹ nã nã́ã́ ǹ hla-i.^d

40 Musa hlũũgu nǝ̃ Dũnnũ tanhiilaabà min bà wáalá gàá, gá nǝ̃ gàa jiraa gùú nǝ̃ǝ̃yaga hǝ̃ǝ̃lga drɔ-i.»

Dawuda bíɛ́ dɩn sǝ nǝ̃ Kɩrsaw, wù tii-i nǝ̃-yǝ

(Markaw 12.35-37 ; Lukaw 20.41-44)

41 Farisĩɛ̃bà gáa tɩgii bà ɲĩɛ̃ nnĩĩ nã, Yesuẃ yugu-ba wà:

42 «Ɲimãã wa Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wu ga huu halii nũɔ̃ nã-ì?»

Bá siɛ-yǝ wà: «Wù ji ba haasǝ yuuntii Dawuda furũntii-i.»

43 Yesuẃ waa nǝ̃-ba wà: «Nǝ̃ gɩ̀ ce danii Dũnnũ Yuflǝẃ ce Dawudaẃ be-yǝ wà Yitii?

Dawudaẁ wáalá wà:

44 “Cuutii Dũnnũẁ wáalá nǝ̃ mǝ̃̀ tiiw wà wú ta ǹ-jiraa wù nãdĩĩ yiɛgu, fuwɔ wu ji dii wù ɲããtaaba, wù vyan'n taaragu”? ^e

45 Dawuda nǝ̃ wù hla wu-ń ba wù be Kɩrsaw wà: “Yitii”, Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wù ji ce danii nã̀ã gbǝ̃ǝ̃ ǹ-ba wù huɔnblɩw?»

46 Curo'n sáa ga da cãwan ǹ-ba wù ga siɛ-yǝ.

Ǹ-tuu gɩ̀-lǝ gɩ̀ yuugu, curo'n sáa ga ba wù ga siɛ ǹ-yugu-yǝ nǝ̃ cɔ̃m.