Lukaw 14

Yesuẁ buɔ hlɔnĩĩdiɛ Yahudyaba fiisaa'n yuugu

Yahudyaba fiisaa'n yuudagǝ, bá jar Yesuw wà wú kã bá ga wuu wuuri, Farisĩɛ̃ba yuuntiidiɛ suɔ.

Cwaabaa nǝ̃n yáá dàa gɩ̀ sùɔ́gɩ nã, bá ba bà ne Yesuẁ mãã wù ji ce dìi.

2 Nǝ̃ ɲũrɔ̃m'n huulaagɩ̀ yáá biɛdiɛ nã, wù-lǝ yà hiraa wù yigagɩ nã.

3 Yesuẃ tuu cãwandi nã̀ã yugu Musa hlũũ'n yuntaaba, nǝ̃ Farisĩɛ̃baa wà: «Hãmĩĩ hlũũgɩ nã, gɩ̀ saa curoẃ buɔ hlɔnĩĩẁ fiisaa'n yuugu-ì?»

4 Bá ba ciyɛ̃ ciyɛ̃.

Yesuẃ fǝ̃ǝ̃ ǹ-jĩɛ̃ hlɔnĩĩw nã, wú buɔ, nã̀ã ce wú maar.

5 Nã̀ã fǝ̃ǝ̃ ǹ-yugu-ba wà: «Ɲimãã sǝ̃ǝ̃nã, halii tãnkuur-i, yindagǝ nã wù nǝ̃ǝ̃ ji dũn nã hũnfuugɩ nã fiisaa'n yuugu, nǝ̃ wú ba wù sáa paa ǹ-fa ǹ-hiil-yǝ?»

6 Bà sáa gbǝ̃ǝ̃ ǹ-siɛ wù cãwandi.

Curo'n báa buɔ wù hla nã

7 Yesuẁ gáa ne ǹ-da yiganã ɲããjiraɲinɲã̀ dwal noraaba nã, wú fǝ̃ǝ̃ ǹ-waa cãwaadũũm mã́ã̀ nǝ̃-ba wà:

8 «Ba-ń jar-n cataasuɔgɩ nã, báa kã n ga jiraa yiganã ɲããjiraɲinɲã nã.

Nǝ̃-ń ba ǹ sáa fǝ̃ǝ̃, nũɔ̃sǝn curodiɛ wanjiram-i.

9 Nǝ̃ gùú tiiw nǝ̃n jã́nnã́ cwa ɲì hǝ̃ǝ̃l ɲì min, wù báa ga juo suro-n, nã̀ã hã-yǝ nǝ̃ gɩ̀ wanjirammã.

Ǹ ji suro nǝ̃ ciiri-i, ǹ-kã furũnyiɛgu.

10 Ba-ń jar-n gɩ̀ tammã, kã n ga jiraa furũnguujirakuugɩ nã.

Wùú nǝ̃n járrá-n, wu-ń ga juo da-n, wú waa nǝ̃-n wà: “Mǝ̃̀ jĩɛ̃, jo yiganãyiɛgu.”

Ɲi járrá nǝ̃ bàá mãã, ǹ-ga da yiiri bà yinɲã nã.

11 Nã̀ã wa, yíi nǝ̃n yuguraa ǹ hla nã, Dũnnũẁ hɩr-n-i.

Yíi nǝ̃n hɩr ǹ hla, Dũnnũẁ yuguraa ǹ nã-i.»

12 Gùú nã-i, Yesuẃ waa nǝ̃ biɛw mãã wù yáá wùu jar-yǝ wà: «Nǝ̃-ń jar cwaaba wuurɩ nã, bǝciigǝ-i yo, dɩndǝ̃mbǝ̃ǝ̃-i yo, báa jar ǹ jambliɛba, ǹ ɲũũnãtaaba, ǹ cwanããba, nǝ̃ kuutaabaa mãã ǹ tuɔra yo.

Nǝ̃-ń ce gɩ̀ tammã, bàá yo, bà ji jar-n yuudagǝ ǹ-hiil bà wuɔlw.

13 Nǝ̃-ń hĩɛ̃ wuuri, nã̀ã wa ń jar cwaaba, jar kokwaaba, nǝ̃ wuulaaba, kasarnãba, nǝ̃ yɩrnǝ̃ǝ̃ba.

14 Nǝ̃-ń ce gɩ̀ tammã, ǹ yuugɩ̀ dwállá.

Bà-lǝ bà mãã bà síì gbǝ̃ǝ̃ ǹ-pã gɩ̀ wuɔlẁ sǝ, cosũɔ̃lba'n pĩĩmã nã, wù ga pã ǹ diifɩnfaari ǹ-hã-n.»

Paaruugǝ̃ngãã'n cãwaadũũm'n cɔ̃mmã

15 Bà gáa nɔ̃ gɩ̀-lǝ gɩ̀ cãwanĩɛ̃ga, bà yáá juwuukaagɩ nã nǝ̃ bàá mãã, wudiɛẃ waa nǝ̃ Yesuw wà: «Gùú tii mãã wù ga da wù wuur'n yuɔri, Dũnnũ yuuntasǝrɩ nã, wù yuugɩ̀ dwállá!»

16 Yesuẃ siɛ-yǝ wà: «Paaruugǝ̃ngããdaagɩ̀ yáá biɛdiɛ suɔ, wú be cwaaba piyɛ̃.

17 Wuur'n bǝ̃ǝ̃gɩ̀ gáa hi, wú tĩɛ̃ wù mããcierẃ kã, ǹ-kãã waa nǝ̃ cwaaba wà: “Jówà, wuurɩ̀ bíé.”

18 Nǝ̃ bá fǝ̃ǝ̃ ǹ-ba bà hla cwaaba dɩndǝn.

Wuudĩɛ̃lẃ waa nǝ̃ mããcierw mãã bà tĩ́ɛ̃lã́-yǝ wà: “Mǝ̃̀ sǝ̃́ǝ̃lã́ fugadagǝ, gɩ̀ saa mǝ̃́ kãã ne-gǝ.

Mǝ̃̀ cirǝ̃ǝ̃ ǹ nã, ń ce mǝ̃̀ kafal.”

19 Wudiɛẃ waa nǝ̃-yǝ wà: “Mǝ̃n sǝ̃́ǝ̃lã́ nin'n pɩplãmba ndii, mǝ̃̀ kã mǝ̃̀ ga dǝ̃ǝ̃ ɲã-i, mǝ̃̀ cirǝ̃ǝ̃ ǹ nã, ń ce mǝ̃̀ kafal.”

20 Wudiɛẃ fǝ̃ǝ̃ ǹ-waa hlo wà: “Mǝ̃n táalá mǝ̃̀ ciɛw gɩ̀ sáa hǝ̃ǝ̃sǝ, mǝ̃̀ síì gbǝ̃ǝ̃ ǹ-kã.”

21 Mããcierẃ ver ǹ-kã wù yuuntii nãã, ǹ-kãã taa cãwanĩɛ̃ gáà ǹ-ja-yǝ.

Yuuntii'n hiɛgá dũ, wú fǝ̃ǝ̃ ǹ-waa nǝ̃ wù mããcierw wà: “Maar ń kã lǝ'n kusunã hlũn'n nɔ̃nɲã nã, nǝ̃ cwaa'n tɩgim'n sɔnɲã nã, n ga be kokwaaba, wuulaaba, yɩrnǝ̃ǝ̃ba, nǝ̃ kasarnãba.”

22 Mããcierẁ gáa ver, wú juo waa wà: “Yuuntii, ǹ wáalá dìí mãã, mǝ̃̀ cíé-dǝ, nǝ̃ wanjirammã́ nìɛ, dìɛ dìɛ.”

23 Yuuntiiẃ fǝ̃ǝ̃ ǹ-waa nǝ̃ mããcierw wà: “Kã jieriɛ'n hlũsǝrɩ nã nǝ̃ fugasǝ'n nɔ̃nɲã nã.

Nǝ̃-ń da curo wo curo, ń ce wú juo jãn mǝ̃̀ suɔgu, gɩ́ da ǹ-yu.”

24 Mǝ̃̀ waa-dǝ nǝ̃-ɲã́ã̀, mǝ̃̀ yáá mã̀ã jar bàá mãã dĩɛ̃lãmmã nã, curow dɩn yo, wù síì da ǹ-wuu mǝ̃̀ wuuri hlo.»

Curow mãã wù saa wú ce dìí mãã, nã̀ã da ǹ-duu Yesuw nã

(Mãtiyew 10.37-38)

25 Cocindaarɩ̀ yáá dɩ̀ duu Yesuw nã.

Wú kãã yiil wù yigagu bà yiɛgu, nã̀ã waa nǝ̃-ba wà:

26 «Gùú tiiw mãã wu-ń jo mǝ̃̀ nãã, nã̀ã ba wù sáa blǝ mǝ̃n cɔ̃mmã́ gbǝ̃ǝ̃ wù nã, ǹ-ɲǝ̃ǝ̃ wù tǝw, wù ɲũw, wù ciɛw, wù tãnkuuraaba, wù ɲũũnãtaaba, nǝ̃ wù hla'n yuugu, wù síì gbǝ̃ǝ̃ ǹ-ba mǝ̃n duunãtii.

27 Gùú tii nǝ̃n ba wù sáa tuu wù gbǝl'n daagu, ǹ-ba wù duu mǝ̃̀ nã, wù sǝ̃n saa wú ba mǝ̃̀ duunãtiiw.

28 Ɲimãã sǝ̃ǝ̃nã, curow-ń wa wú mã nũɔ̃sǝn duugu, wù saa wú blǝ ǹ-ne haasǝ, wù jinɲã-ń ba ɲã̀ ji ce wú mã gɩ́ yiil.

29 Wu báa ji fũũ-gǝ, nã̀ã ji ba wù síì gbǝ̃ǝ̃ ǹ-yiil-gǝ, nǝ̃ cwaabá ba bà ta bà hiil wù kwãmmã nã,

30 wà biɛ wáà fṹũlã́ wù duugu, nã̀ã ji ba wù síì gbǝ̃ǝ̃ ǹ-mã gɩ́ yiil.

31 Yindagǝ nã, yuuntiiw-ń ba nǝ̃ sɩrǝǝsɩcin, nã̀ã ba wù kã wù ga ce byaari nǝ̃ wù nãyuuntiiw.

Nǝ̃ wù nãyuuntii wáà, wù-lǝ wù sɩrǝǝsɩba ba bàa ɲũrũɔ̃ ǹ-maa wù bɩgaaba yinhǝ̃ǝ̃lgu, wù saa wù jiraa ǹ-blǝ ǹ-ne haasǝ, wu-ń ba wù ga gbǝ̃ǝ̃ ǹ-kã bá ce byaari nǝ̃-yǝ.

32 Wu-ń ba wù síì gbǝ̃ǝ̃ ǹ-kã bá ce byaari nǝ̃-yǝ, wù ya wú ba halbaa, nã̀ã tĩɛ̃ tĩɛ̃taabá kã wù nãã, ǹ-ga caa gbǝlli, byaarɩ báa da ǹ-ce.»

33 Yesuẃ waa hlo wà: «Ɲimãã sǝ̃ǝ̃nã, dɩ́ nǝ̃ gùú tammã-i, yíi nǝ̃n ba ǹ sáa ya ǹ nãkruɔɲinɲã min cɔ̃mmã ba, ǹ síì gbǝ̃ǝ̃ ǹ-ba mǝ̃n duunãtiiw.

34 «Dɔ̃mmã, kuhuhorgǝ-i, nǝ̃ mã̀ yiyellǝmmã-ń hlǝ mã̀ nã, ɲi ji ver ǹ-dii yiyellǝm mã́ã̀mã̀ nã nǝ̃ bii?^a

35 Mã̀ síì gbǝ̃ǝ̃ ǹ-fa hlɔ̃m'n cɔ̃m yo, nã̀ã ji wa sãm'n cɔ̃m.

Bà nǝ̃ǝ̃ ǹ-tĩɛ̃-mã pupuguu nã-i.

Wùú nǝ̃n ba wù ji nɔ̃, wú mǝ̃gaa ǹ-nɔ̃!»