Mãtiyew 10

Yesuẁ hã wù duunãtaaba nǝ̃ fãngããgu

Yesuẁ gáa waa dɩ̀-lǝ, wú be wù duunãtaabaa mãã bà yáá nũɔ̃sɔ̃ nǝ̃ bà hǝ̃ǝ̃lba, ǹ-hã-ba fãngããgu, bá da ǹ-ba bà gbǝ̃ǝ̃ bà ɲǝ̃ǝ̃ bà hiil tãntɔ̃nããba cwaaba nã, nã̀ã ba bà buɔ hlɔm'n plaaga min nǝ̃ ɲããjiran'n plaaga min.

2 Wù tĩɛ̃taa nũɔ̃sɔ̃ nǝ̃ bà hǝ̃ǝ̃l yiriɛga-i nnĩĩ: Dĩɛ̃lnã yo wɩ̀-i Simɔ̃w mãã bà be-yǝ wà Piɛr, bá nǝ̃ wù hǝ̃ǝ̃ Ãndrew.

Sebede byanããbaa mãã Yakubaw bá nǝ̃ wù hǝ̃ǝ̃ Yuhanãw.

3 Filipɩba nǝ̃ Bartelemiiw, Tumasɩba nǝ̃ nãnhũɔ̃r Mãtiyew, Yakubaw mãã Alfe bíɛ́w, nǝ̃ Tadew.

4 Ǹ-pya Simɔ̃diɛ yáá dàa bà yáá bà be-yǝ Selɔtɩ^a nǝ̃ Sudasɩ Isɩkariyɔtɩw.

Wùú mãã wù jáa hlǝ Yesu furũũgɩ nã.

Yesuẁ tĩɛ̃ Nũɔ̃sɔ̃nǝ̃bahǝ̃ǝ̃lba

(Markaw 6.7-13 ; Lukaw 9.1-6)

5 Yesuẁ gáa hã Nũɔ̃sɔ̃nǝ̃bahǝ̃ǝ̃lba nǝ̃ fãngããgu, wú tĩɛ̃-ba wà: «Ɲi-ń ba ɲì maar, curo'n báa ga wa wú kã bàá mãã bà sǝ̃n fǝ̃ǝ̃ Dũnnũw bà nãã, nǝ̃ bláá jãn Samari yiɛ'n liɛga nã.

6 Kã́ã̀ Isɩrayɛl bluubaa dɩndɩn nãã-i, bá nǝ̃ bàa vaalaa nã́ã́ tũm-i.

7 Ɲi-ń hi sùɔ́ wo sùɔ́, ɲí waa nǝ̃ cwaaba wà Dũnnũ yuuntasǝrɩ híí ǹ-tã.

8 Búɔlà hlɔnããba, pĩ́ĩlã̀ cugutaaba, búɔlà sǝ̃nkũnããba, ɲǝ̃́ǝ̃lã̀ ɲí hiil tãntɔ̃nããba tãntɔ̃nããntaaba nã.

Dũnnũẁ hlã-ɲã́ã̀ nǝ̃ gɩ̀ fãngããgu nǝ̃ǝ̃nĩĩ-i, ɲimãã yo, bláà ɲì ce ɲì hã cwaaba nǝ̃ǝ̃nĩĩ.

9 Ɲi-ń wa ɲí ta, bláá tuu sãnã, yindagǝ nã kwaplar yindagǝ nã worblɩ.

10 Curo'n báa tuu bɩgatĩɛ̃, curo'n báa tuu kuulaadiiyǝdiɛ ǹ-pya wùú mãã wù cãndɩ nã, curo'n báa tuu viɛtaan, curo'n báa tuu guruu.

Mããcierẁ saa nǝ̃ wù wuurɩ-i.

11 «Ɲi-ń kã gùú lǝgǝ̃ngããrɩ nã yindagǝ nã gùú lǝblɩrɩ nã, yugurǝǝ ɲí fǝ̃ǝ̃ gùú tii mãã gɩ̀ saa nǝ̃ wú ba wù ji hyar-ɲã́ã̀.

Ɲi-ń hyar wù nãã, ɲí ba gùú sùɔ́gu, fuwɔ ɲì tallɩ ji hi.

12 Ɲi-ń jãn gùú suɔgɩ nã mãã, fyã́nnã̀ gɩ̀ suɔntaaba!

13 Gɩ̀ suɔntaaba-ń ba bà saa nǝ̃ ɲì fyãnuugu, sɩsɩrãmmã́ ba nǝ̃-ba, nǝ̃ ba-ń ba bà sǝ̃n saa nǝ̃ ɲì fyãnuugu, sɩsɩrãmmã́ báa ba dàa nǝ̃-ba.

14 Ɲi-ń kã gùú suɔgɩ nã mãã yindagǝ nã gùú lǝrɩ nã mãã, nǝ̃ bá hla ɲì hyarɩmmã, yindagǝ nã ǹ-hla bà sáa nɔ̃ ɲì cãwanĩɛ̃ga, hlǝ́rà gɩ̀ sùɔ́gɩ nã, nǝ̃ ɲí pugurǝǝ ɲì viɛtra'n hlɔ̃mmã nã.^b

15 Yáalà mǝ̃́ waa sulammã nǝ̃-ɲã́ã̀: bàá mãã bà ce dɩ̀-lǝ, Dũnnũ sugol'n yuugu, halle Sodɔm lǝntaaba nǝ̃ Gomɔr lǝntaa'n ywaruugɩ̀ sɩga hi gɩ̀ lǝntaa'n kuugu.»^c

Gùú ywaruugu mãã Dũnnũ mããcemmã nã

(Markaw 13.9-13 ; Lukaw 21.12-19)

16 «Ɲi sáa da, ɲí nǝ̃ nã́ã́ tũmbaa mãã mǝ̃̀ tĩɛ̃-ba mǝ̃yɩrǝǝba sǝ̃ǝ̃nã.

Gɩ̀ sùɔ́gɩ nã, bláà ɲì fǝ̃ǝ̃rǝ̃ǝ̃ nã́ã́ waalaa-i, nǝ̃ ɲí blariɛ nã́ã́ tǝbuhũɔ̃rɔ̃nãm-i.

17 Blǝ́rà ɲì hla nã: bà ji kã nǝ̃-ɲã́ã̀ sugojarsɔnɲã nã, nã̀ã kã nǝ̃-ɲã́ã̀ Yahudyaba tɩgim'n donɲã nã ǹ-ga mũũ-ɲã́ã̀ nǝ̃ cãmbiiga.

18 Bà ji blǝ-ɲã́ã̀ ǹ-kã nǝ̃-ɲã́ã̀ kumãndãba nãã, nǝ̃ yuntaa yo bà nãã mã́ã cɔ̃mmã nã-i.

Gɩ̀-lǝ gùú ji ce ɲi fǝ̃́ǝ̃lã́ dìí mãã mǝ̃n cɔ̃mmã nã, ɲí ce dɩ̀ siɛrnãsǝri bà yinɲã nã, nǝ̃ bàá mãã bà sǝ̃n fǝ̃ǝ̃ Dũnnũw.

19 Ba-ń ji dii-ɲã́ã̀ nãkrɔnɲã nã, curo'n báa jã ǹ mãã ǹ ga waa dìí mãã, yindagǝ nã ǹ mãã ǹ ga waa-dǝ nĩĩgu mãã.

Ɲi mãã ɲì ga waa gàá mãã, Dũnnũẁ ga hã-ɲã́ã̀ nǝ̃-ga gɩ̀-lǝ gɩ̀ bǝ̃ǝ̃gu.

20 Gɩ̀ sáa ce nã́ã́ cãwan díɛ̀ ɲimãã nũɔ̃nãcãwan-i.

Ɲì Tǝẁ ga ce wù Yuflǝẁ dii-dǝ ɲì hiɛga nã, ɲí waa-dǝ.»

21 «Ɲũũnãtii ji dii ɲũũnãtiiw fãngãtaa'n nãkruɔgɩ nã bá ko-yǝ.

Tiiba yo bà ji ce gùú dɩ̀ dɩndɩ-i nǝ̃ tãnkuuraaba.

Tãnkuuraabà ji suro bà tǝba yuunã, ǹ-ce bá ko-ba.

22 Ɲì cɔ̃mmã̀ ji bla cwaaba min nã, mã́ã cɔ̃mmã nã-i.

Nǝ̃ gùú tii mãã wù ji sa ǹ-cii ǹ-hiraa dɩ̀ dɩndɩ nã fuwɔ gɩ̀ kǝǝrɩ nã, Dũnnũẁ ji kor-yǝ.»

23 Ba-ń ji ba bà cuɔl-ɲã́ã̀ lǝ díɛ́ nã, kwárrà ɲí kã náá dǝllɩ nã.

Yáalà mǝ̃́ waa sulammã nǝ̃-ɲã́ã̀: Curonbiɛẁ ga ver ǹ-jo ǹ-ji da ɲi sáa hi ǹ-waaraa ǹ-baal Isɩrayɛl liɛga min.

24 «Ɲi sáa da, ǝ̃ǝ̃lãntiiẁ sǝ̃n ta ǹ-maa wù kaltiiw, nǝ̃ mããcier yo, wù sǝ̃n ta ǹ-maa wù yuuntiiw.

25 Duunãtiiw-ń ba wù kaltii'n tammã, gɩ̀ sáalá, nǝ̃ mããcier yo wu-ń ba wù tii'n tammã gɩ̀ sáalá.

Bà tuuraa suɔntii nã-i wà tãntɔ̃nãã'n yuuntii Iblisa-i nǝ̃-yǝ, nã̀ã ji wa ba síì tuuraa suɔntaaba nã ǹ-maa wù-lǝ.»

Wùú mãã wù saa bá sɔ̃ wù nãã

(Lukaw 12.2-9)

26 Yesuẁ nã̀ã fǝ̃ǝ̃ ǹ-waa wà: «Gɩ̀ sùɔ́gɩ nã, bláá ba ɲì sɔ̃ cwaaba nã.

Mã̀ min mãã bàa suu mã̀ nã, mã̀ ji curuɔ, nǝ̃ cɔ̃nŋmǝ̃ǝ̃rǝ̃mmã̀ min, mã̀ cɔ̃mmã̀ ji fǝ̃ǝ̃.

27 Gùú cíé mǝ̃-ń waa gùú cɔ̃mmã nǝ̃-ɲã́ã̀ dudũũmã nã, vérrà ɲí waa-mã bǝ̃ǝ̃nãgu.

Ba-ń tɔ̃nãã ǹ-waa gùú cɔ̃mmã, bláà ɲì waa-mã ɲì waaraa

28 Bàá mãã bà ji gbǝ̃ǝ̃ ǹ-ko-ɲã́ã̀ nǝ̃ cãnkũɔ̃m'n kukwoga dɩndɩn, nã̀ã ba bà síì gbǝ̃ǝ̃ ǹ-ce kuu ɲì yuflaaba nã, bláá ba ɲì sɔ̃ gɩ̀-lǝ gɩ̀ taaba nã.

Nǝ̃ Dũnnũw mãã wù ga gbǝ̃ǝ̃ ǹ-dii-ɲã́ã̀ jahãlmãw nã nǝ̃ ɲì yuflaaba ǹ-guu ɲì nã, ɲi saa ɲí sɔ̃ wù-lǝ wùú nã-i.

29 Nǝ̃-ń suur tafyãmba hǝ̃ǝ̃lba, ǹ ji da nĩɛ̃-i?

Nǝ̃ halle wù dɩnw-ń duruu ɲũũrũũgu, ɲì Tǝ fǝ̃ǝ̃-i.

30 Nǝ̃ ɲimãã-lǝ, halle ɲì yukwaasǝbiiga, Dũnnũẁ fǝ̃́ǝ̃lã́ gà nũɔ̃gu.

31 Gɩ̀ sùɔ́gɩ nã, bláá sɔ̃ cɔ̃m nã, Dũnnũw saa, ɲimãã buɔ tafyãm'n huɔgɩ nã.»

32 «Curo wo curo, wu-ń hiraa dɩ̀ nã cwaaba sǝ̃ǝ̃nã, wà wú nǝ̃ mã́ã-i, mã́ã yo mǝ̃̀ ga hiraa dɩ̀ nã mǝ̃̀ Tǝ Drɔ-Dũnnũ yigagɩ nã wà mã́ã yo-i nǝ̃ gɩ̀ tiiw.

33 Nǝ̃ gùú tiiw nǝ̃n hla-m cwaaba sǝ̃ǝ̃nã, mã́ã yo, mǝ̃̀ ga hla-yǝ mǝ̃̀ Tǝ Drɔ-Dũnnũ yigagɩ nã.»

Yesuẁ sǝ̃n jo nǝ̃ sɩsɩrãmmã, wù jo nǝ̃ byar-i

(Lukaw 12.51-53 ; 14.26-27)

34 «Bláá ne wà mǝ̃ júó nǝ̃ sɩsɩrãm-i mǝ̃̀ ji hã cuu cwaaba.

Mǝ̃̀ sáa jo nǝ̃ sɩsɩrãm sǝ, nǝ̃ mǝ̃̀ júó nǝ̃ byarcegɩ-i.

35 Mǝ̃̀ júó mǝ̃̀ ji buruɔ biɛnĩĩw bá nǝ̃ wù tǝw nã, nã̀ã buruɔ busulw bá nǝ̃ wù ɲũw nã, nã̀ã fǝ̃ǝ̃ ǹ-buruɔ cijalw bá nǝ̃ wù hǝ̃̀ǝ̃́w nã.

36 Ɲì suɔntaaba ji suro ɲì yuunã.»

37 «Wùú nǝ̃n ya wù tǝw yindagǝ nã wù ɲũ cɔ̃mmã dwal wù nã ǹ-ɲǝ̃ǝ̃ mã́ã̀, gɩ̀ tiiẁ síì gbǝ̃ǝ̃ ǹ-ba mǝ̃̀ duunãtii.

Wùú nǝ̃n ya wù bíɛ́w yindagǝ nã wù bisĩɛ̃'n cɔ̃mmã gbǝ̃ǝ̃ wù nã ǹ-ɲǝ̃ǝ̃ mã́ã̀, gùú yo gɩ̀ tiiẁ sǝ̃n saa wú ba mǝ̃̀ duunãtii.

38 Gùú tii nǝ̃n ba wù sáa tuu wù gbǝl'n daagu, ǹ-ba wù duu mǝ̃̀ nã, wù sǝ̃n saa wú ba mǝ̃̀ duunãtii.

39 Gùú tiiw nǝ̃n ba wù kaal wù hla'n yuugɩ nã, wùú kuuguu ji guu nã.

Nǝ̃ gùú tii mãã wu-ń hũɔ̃ kuugu mã́ã cɔ̃mmã nã, gɩ̀ tiiẁ ga da fɩraa nũmǝ̃nãsǝri.»

Diifɩnfaarɩ̀ pã dɩ̀ tiiw

(Markaw 9.41)

40 «Wùú nǝ̃n fǝ̃ǝ̃ ǹ-hyar-ɲã́ã̀, gɩ̀ tiiẁ fǝ̃́ǝ̃lã́ ǹ-hyar mã́ã-i.

Nã̀ã wa wùú nǝ̃n fǝ̃ǝ̃ ǹ-hyar mã́ã̀, gɩ́ nǝ̃ nã́ã́ wù fǝ̃́ǝ̃lã́ ǹ-hyar gùú tii mãã wù tĩ́ɛ̃lã́ mǝ̃́ jo-i.

41 Wùú nǝ̃n fǝ̃ǝ̃ ǹ-hyar Dũnnũ tanhiilw, ǹ-hũɔ̃ wà Dũnnũ tanhiil-i, Dũnnũẁ mãã wù ji pã Dũnnũ tanhiilẁ gùú tammãã mãã, wù ji pã gùú yo gɩ̀ tiiẁ nĩĩgɩ-i.

Wùú nǝ̃n fǝ̃ǝ̃ ǹ-hyar Dũnnũ cosũɔ̃lyǝw wà wu mãã cosũɔ̃lyǝw, Dũnnũẁ mãã wù ji pã wù cosũɔ̃lyǝw gùú tammãã mãã, wù ji pã gùú yo gɩ̀ tiiẁ nĩĩgɩ-i.

42 Wùú nǝ̃n ne mǝ̃̀ duunãtii nǝ̃ wù kolɩmmã nã nã̀ã hã-yǝ nǝ̃ hũnciraagɩ dɩngu wú ɲũɔ̃, yáalà mǝ̃́ waa sulammã nǝ̃-ɲã́ã̀, dɩ̀ káaláa, Dũnnũẁ ga pã gɩ̀ tiiw ǹ-hiil wuɔl.»