Markaw 3

Yesuẁ buɔ curodiɛ fiisaa'n yuugu

(Mãtiyew 12.9-14 ; Lukaw 6.6-11)

Yesuẃ ver ǹ-kã Yahudyaba tɩgim'n duugɩ nã.

Gɩ̀ sùɔ́gɩ nã biɛdiɛ yáá dàa wù nãkruɔgùu ku.

2 Bá ba bà ne Yesuw wu-ń ba wù ji buɔ-yǝ fiisaa'n yuugu, bá da ǹ-da wanyuɔrɔm'n sùɔ́ wù nã.

3 Gɩ̀-i Yesuẃ fǝ̃ǝ̃ ǹ-waa nǝ̃ biɛw mãã wù nãkruɔgùu ku wà: «Suro ń hiraa cwaaba min yinɲã nã.»

4 Nã̀ã fǝ̃ǝ̃ ǹ-waa nǝ̃-ba wà: «Hadi sáalà dɩ́ ce fiisaa'n yuugu, diifɩnfar-i, dàa diibɩblar-i?

Ǹ hiil curo'n yuu-i dàa, ǹ ko gɩ̀ tii-i?»

Bá ba ciyɛ̃ ciyɛ̃.

5 Yesuw nã̀ã fǝ̃ǝ̃ ǹ-ne ǹ-waaraa bà yigasǝrɩ nã nǝ̃ hyadũũgu, wú da bà yugbǝ̃ǝ̃gǝgu, wù yigagɩ́ ɲǝ̃ǝ̃, wú fǝ̃ǝ̃ ǹ-waa nǝ̃ nãkrɔkulǝǝnãw, wà: «Fɩraa ǹ nãkruɔgɩ nã.»

Wú fɩraa gɩ̀ nã, gɩ́ paa ǹ-buɔ.

6 Farisĩɛ̃bà gáa yii ǹ-hlǝ bá paa tɩgii bà ɲĩɛ̃ nǝ̃ Erodɩ bluuba ǹ-blǝ Yesu cɔ̃mmã, bà mãã bà ji guu wù nã nĩĩgu mãã.

Cohuɔdaagɩ̀ jo Yesuw nãã

7 Yesuẃ fǝ̃ǝ̃ ǹ-hillaa nǝ̃ wù duunãtaaba, bá ta maar lwaakɩnkan'n nũɔ̃gɩ nã.

Cohuɔdaagɩ́ hlǝ ǹ-ba gɩ̀ duu wù nã.

Bà yáá bàa hlǝ Galile yiɛgu, Suude yiɛgu,

8 Serusalɛm yiɛgu, Idume yiɛgu, Surdɛ̃ huɔlɩm nã, nǝ̃ Tiir lǝ'n yiɛgu nǝ̃ Sidɔ̃ lǝ'n yiɛgu.

Cohuɔ gúɔ̀gɩ̀ mãã gɩ̀ nṹɔ̃́ Yesu cíé gàá gà minw mãã, gɩ̀-i bá ba bà duu wù nã.

9 Cohuɔ gúɔ̀gɩ cɔ̃mmã nã, Yesuẃ fǝ̃ǝ̃ ǹ-waa nǝ̃ wù duunãtaaba wà bá tɩgɩnǝ̃ǝ̃ viigǝdagǝ nã ǹ-kra-gǝ wùú krammã nã, ba báa ji ba bà juuraa wù nã.

10 Nã̀ã wa wù yáá wù buɔ hlɔnããcin, gùú yáá gùu ce bàá nǝ̃n yáá nǝ̃ hlɔmmã, bá ba bà joraa bà kã Yesuw nãã, bà jĩɛ̃ wù nã.

11 Tãntɔ̃nããbà yáá ba-ń da-yǝ, bá ba bà durnãã wù yigagɩ nã, bà kaasǝraa bà waa wà: «Dũnnũ Bíɛ́-i nǝ̃-n!»

12 Nǝ̃ Yesuẃ hla nã̀ã waa dɩ́ gbǝ̃ǝ̃ nǝ̃-ba wà ba báa waa wù-lǝ wu mãã gùú tiiw.

Yesuẁ ne wù hiil wù tĩɛ̃taa nũɔ̃sɔ̃ nǝ̃ bà hǝ̃ǝ̃lba

(Mãtiyew 10.1-4 ; Lukaw 6.12-16)

13 Yesuẃ ta ǹ-yuguraa tãnũũgɩ nã, nã̀ã be wù mãã wù caa gùú cwaabaa mãã, bá fǝ̃ǝ̃ ǹ-kã wù nãã.

14 Bà-lǝ bà sǝ̃ǝ̃nã, wú ne ǹ-hiil nũɔ̃sɔ̃ nǝ̃ bà hǝ̃ǝ̃lbaa [ǹ-be-ba wà tĩɛ̃taa], bá ba nǝ̃-yǝ, nǝ̃ wú da ǹ-tĩɛ̃-ba bá kãã waa Dũnnũ cãwandi ǹ-ja cwaaba,

15 nã̀ã da ǹ-da fãngããgu ǹ-ba bà ɲǝ̃ǝ̃ tãntɔ̃nããba.

16 Wù kárrá gùú cwa nũɔ̃sɔ̃ nǝ̃ bà hǝ̃ǝ̃lba nã mãã, bà-i nnĩĩ: Simɔ̃w, Yesuẃ suu-yǝ wà Piɛr;

17 Sebede byanããbaa mãã Yakubaw bá nǝ̃ wù hǝ̃ǝ̃ Yuhanãw, Yesuẃ suu-ba wà Bowanɛrgɛsɩ dɩ̀ yuugɩ-i wà cwaabaa mãã bà vaa nǝ̃ Dũnnũ nãlɛ̃mmã;

18 nǝ̃ Ãndrew, Filipɩw, Bartelemiiw, Mãtiyew, Tumasɩw, Alfe bíɛ́ Yakubaw, Tadew, nǝ̃ Simɔ̃w mãã bà be-yǝ Selɔtɩ^a,

19 nǝ̃ Sudasɩ Isɩkariyɔtɩw, wùú mãã wù gáa hlǝ Yesu furũũgɩ nã.

Yesuw bá nǝ̃ tãntɔ̃nãã'n yuuntii Iblisa cɔ̃mmã

(Mãtiyew 12.22-32 ; Lukaw 11.14-23 ; 12.10)

20 Yesuẃ fǝ̃ǝ̃ ǹ-ver ǹ-kũũ, cocindɩ́ juo tɩgii ǹ-suu wù nã fuwɔ ǹ-ce wù-lǝ nǝ̃ wù duunãtaaba, bá ba bà síì gbǝ̃ǝ̃ ǹ-da gbaagu ǹ-wuu wuuri.

21 Yesu cwanããbà gáa nɔ̃ dɩ̀-lǝ, bá jo bà ji blǝ ǹ-ta nǝ̃-yǝ.

Nã̀ã wa, bà yáá bà waa wà Yesu yuugɩ sɩriɛ!

22 Musa hlũũ'n yuntaabaa nǝ̃n yáá bàa hlǝ Serusalɛmgu ǹ-hɩr ǹ-jo, bá ba bà waa wà: «Iblisaẃ nàa wù nã» wà: «Tãntɔ̃nãã'n yuuntiiw cíyà wú ba wù gbǝ̃ǝ̃ wù da fãngããgu wù ɲǝ̃ǝ̃ tãntɔ̃nããba.»

23 Yesuẃ fǝ̃ǝ̃ ǹ-be-ba ǹ-juo ba wù waa cãwaadũũmã nǝ̃-ba wà: «Sɩtãnẁ ji ba danii wú ba wù ɲǝ̃ǝ̃ Sɩtãnw?

24 Gùú yiɛntaabaa mãã bà gãnãã nǝ̃ bà ɲĩɛ̃, gɩ̀ yiɛgɩ̀ síì gbǝ̃ǝ̃ ǹ-hǝ̃ǝ̃sǝ.

25 Nǝ̃ gùú suɔntaabaa mãã bà gãnãã nǝ̃ bà ɲĩɛ̃, gɩ̀ suɔgɩ̀ síì gbǝ̃ǝ̃ ǹ-hǝ̃ǝ̃sǝ.

26 Nǝ̃ Sɩtãnw-ń ba wù suro wù hla'n yuunã, wù gãnãã wù hla nã-i, wù síì gbǝ̃ǝ̃ ǹ-hǝ̃ǝ̃sǝ.

Wù cɔ̃mmã̀ tĩ́ɛ̃́-i.

27 Curo'n síì gbǝ̃ǝ̃ ǹ-jãn ciciɛnĩĩ'n duugɩ nã ǹ-kaala wù wariɛga nã́ã́ wu sáa vaa ciciɛnĩĩ wáà haasǝ.

Wù vaam'n furũũ nã-i wù ga kaala wù duu'n wariɛga min ǹ-ta.

28 Yáalà mǝ̃́ waa sulammã nǝ̃-ɲã́ã̀, cwaabà mãã bà yuɔruɔ nǝ̃ gàá gà minw mãã, Dũnnũẁ ji ce gà min dũndɔw ǹ-pyar-ga bà yuunã, halle ba-ń ba bàa waa ǹ-jãn Dũnnũw nã tam wo tam.

29 Nǝ̃ yíi nǝ̃n waa ǹ-jãn Dũnnũ Yuflǝw nã, Dũnnũẁ síì ce ǹ dũndɔw ǹ-da, nã̀ã wa ǹ hã ǹ hla nǝ̃ yuɔrɔm-i fɩraa.»

30 Bà mãã bà yáá bà waa wà tãntɔ̃nããbá nàa Yesuw nã, gùú cíé wú wanãã nǝ̃-ba nĩĩgu.

Bàá mãã Yesu suɔntaaba huhorɩmmã nã

(Mãtiyew 12.46-50 ; Lukaw 8.19-21)

31 Yesu ɲũw nǝ̃ wù hãmbá juo hi.

Bà yáá dàa hirammã nã fɩr'n yiɛgu, nã̀ã tĩɛ̃ curoẃ kã wù ga be-yǝ.

32 Cocindɩ̀ yáá dìi jiraa ǹ-caliɛ wù nã, bá waa nǝ̃-yǝ wà: «Ne, ǹ ɲũw nǝ̃ ǹ hãmbá [nǝ̃ ǹ tǝ̃ǝ̃bá] nàa bà caa-n fɩr'n yiɛgu.»

33 Wú siɛ-ba wà: «Halǝmblǝ-i mǝ̃̀ ɲũw?

Halǝmblaa-i mǝ̃̀ hãmba?»

34 Wú ciir ǹ-ne ǹ-waaraa bà yigasǝrɩ nã, nã̀ã fǝ̃ǝ̃ ǹ-waa nǝ̃ bàá nǝ̃n yáá bà jiraa ǹ-caliɛ wù nã wà: «Níyà: mǝ̃̀ ɲũw nǝ̃ mǝ̃̀ hãmba, bà-i nhlíɛ̀.

35 Sulammã nã gùú tii mãã wù ce Dũnnũ kusunã cɔ̃mmã, wù-lǝ wɩ̀-i mǝ̃̀ hǝ̃ǝ̃w, wù-lǝ wɩ̀-i mǝ̃̀ tǝ̃̀ǝ̃́w, wù-lǝ wɩ̀-i mǝ̃̀ ɲũw.»