Mãtiyew 12

Fiisaa'n yuu'n cɔ̃mmã

Yahudyaba fiisaa'n yuudagǝ, Yesubá ba bà ta bà hlǝ fugasǝdarǝ kusunã.

Nũmmã yáá wù duunãtaaba nã.

Bá du nã ǹ-ba bà karaa dũm'n sunɲã nã bà wuu.

2 Farisĩɛ̃bà gáa da dɩ̀-lǝ, bá suro ǹ-ba bà waa nǝ̃ Yesuw wà: «Ne ǹ duunãtaaba, dìí mãã dɩ̀ sǝ̃n saa dɩ́ ce fiisaa'n yuugu, bà ce dɩ̀-i nnĩĩ nã!»

3 Yesuẃ siɛ-ba wà: «Nũmmã̀ yáá mã̀ã jaa Dawudaw bá nǝ̃ wù bluuba nǝ̃ wú ce dìí mãã ɲi sáa kal gɩ̀ sùɔ́gu Dũnnũ sɛbɛw nã-ì?

4 Dawudaẁ jã́nnã́ Dũnnũ bũũsuɔgɩ nã, ǹ-tuu burw mãã bà jãn Dũnnũw nǝ̃-yǝ, bá wuu nǝ̃ wù bluuba!^a

Nã̀ã da gɩ-ń vã ǹ-hlǝ Yahudyaba puruɔntaaba nã, nǝ̃ǝ̃nĩĩtiiẁ sáa saa wú wuu-yǝ.

5 Ɲi sáa kal ǹ-da-gǝ Musa hlũũ'n sɛbɛba nã wà curo'n sǝ̃n saa wú ce mããcemmã Yahudyaba fiisaa'n yuugu-ì?

Nǝ̃ Yahudyaba puruɔntaa-lǝ bà ce bà mããcemmã Dũnnũ bũũsuɔgɩ nã fiisaa'n yuugu nǝ̃ curo'n sǝ̃n blǝ dɩ́ ba yuɔrɔm bà saa.

6 Nǝ̃ mǝ̃̀ waa-dǝ nǝ̃-ɲã́ã̀, níɛ́ nã, cɔ̃mdaamã́ nìɛ mã̀ã́ mãã mã̀ã maa Dũnnũ bũũsuɔgu.

7 Dũnnũẁ wáalá wà ɲí ba ɲì sɔ̃ ɲì ɲĩɛ̃ hujãndi, wà gɩ̀-lǝ gùú dwállà wù-lǝ wù nã ǹ-ɲǝ̃ǝ̃ ɲì siijãnɲinɲã^b.

Ɲi nã́ã̀ ba ɲĩ̀ĩ fǝ̃ǝ̃ cãwan díɛ̀dɩ yuugu, ɲi nã́ã̀ sáa ba ɲì hã bàá mãã bà sǝ nǝ̃ yuɔrɔm nǝ̃ yuɔrɔmmã.

8 Curonbiɛ wɩ̀-i fiisaa'n yuu yuugɩ nã.»

Yesuẁ buɔ curodiɛ wù nãkruɔgùu ku

(Markaw 3.1-6 ; Lukaw 6.6-11)

9 Dɩ̀-lǝ dɩ̀ furũũgɩ nã, Yesuẃ fǝ̃ǝ̃ ǹ-hlǝ gɩ̀ sùɔ́gɩ nã ǹ-ta ǹ-maar Yahudyaba tɩgim'n duugɩ nã.

10 Nǝ̃ biɛdiɛ yáá dàa gɩ̀ sùɔ́gɩ nã, wù nãkruɔgɩ dɩngùu ku.

Farisĩɛ̃bà mãã bà yáá bà caa bá da wanyuɔrɔmmã wù nã, gɩ̀-i, bá yugu-yǝ wà: «Nã́ã́ gɩ sáalá curow buɔ hlɔnĩĩw fiisaa'n yuugɩ-ì?»

11 Yesuẃ waa wà: «Ɲimãã sǝ̃ǝ̃nã nã, halii ji ba nǝ̃ tũmblɩ dɩndɩnw dɩn, nǝ̃ wú dũn fuugɩ nã fiisaa'n yuugu, nǝ̃ gɩ̀ tiiẃ ba wù sɩga fa ǹ-hiil-yǝ gɩ̀ nã?

12 Curo'n blɩẁ sǝ̃n buɔ tũmũũ nã-ì?

Gɩ̀ sùɔ́gɩ nã, gɩ̀ sáalá curoẃ ce diifɩnfaari fiisaa'n yuugu.»

13 Nã̀ã fǝ̃ǝ̃ ǹ-waa nǝ̃ nãkrɔkulǝǝnã wáà wà: «Fɩraa ǹ nãkruɔgɩ nã.»

Wú fɩraa gɩ̀ nã, gɩ́ buɔ ǹ-ba gɩdaa gúɔ̀ tammã.

14 Farisĩɛ̃ba gáa hlǝ, bá fǝ̃ǝ̃ ǹ-tɩgɩnǝ̃ǝ̃ bà ɲĩɛ̃ nã, ǹ-blǝ, bà mãã bà ji guu Yesuw nã nĩĩguu mãã.

Yesuw-i Mããcierw mãã Dũnnũẁ ne wù hiil-yǝ

15 Yesuẁ gáa fǝ̃ǝ̃ wà bá nìɛ bà caa bá ko-yǝ, wú fǝ̃ǝ̃ ǹ-ta ǹ-hal gɩ̀ sùɔ́gɩ nã.

Cohuɔgɩ́ ba gɩ̀ duu wù nã.

Wú buɔ hlɔnããba minw nǝ̃n yáá bà sǝ̃ǝ̃nã,

16 nã̀ã waa dɩ́ gbǝ̃ǝ̃ nǝ̃-ba wà ba báa waa wù-lǝ wu mãã gùú tiiw nǝ̃ curo.

17 Dɩ̀-lǝ dɩ̀ cíé ǹ-da ǹ-ce Dũnnũ tanhiil Esayi cãwanĩɛ̃gá suu.

18 Dũnnũẁ wáalá wà: Wáàw-i wù mããcierw mãã wù níé ǹ-hiil-yǝ, wà wɩ̀-i wù cituublɩẁ mãã wù cɔ̃mmã̀ dwállá wù nã ǹ-car.

Wà wu ji hã wɩ̀-i nǝ̃ wù Yuflǝw.

Wà wù-lǝ wùú ji pɩgaa coplaaga min nǝ̃ hlũsũɔ̃lgǝgu.

19 Wù sǝ̃n jo cincaruu sǝ, wù sǝ̃n jo wù ji haar wù yal curo'n yuunã.

Curo'n síì nɔ̃ wù yallɩ nã hlũũ nã.

20 Wù síì ka hĩɛ̃blɩrii mãã dɩ̀ jo dɩ̀ ji ka, wù síì dĩĩ fitɩnɩẁ mãã wù jo wù ji dĩĩ.

Wù ji vaa wù hla nǝ̃ dɩ̀-i fuwɔ sũɔ̃lɩmmã́ ji ba sɔsǝrɩ min nã.

21 Coplaaga min gà ji piɛ gà nãkruɔgu wù drɔ.^c

Yesu fãngããgɩ sǝ̃n hlǝ tãntɔ̃nãã'n yuuntii Iblisa nã sǝ

(Markaw 3.22-30 ; Lukaw 11.14-23)

22 Gɩ̀ furũũgɩ nã, bá kãã jo nǝ̃ tãntɔ̃nããntiidiɛ Yesuw nãã, yɩrsǝri nǝ̃ kũnkunsǝri wù nã.

Bà júó nǝ̃-yǝ, Yesuẃ fǝ̃ǝ̃ ǹ-ce wú buɔ, ǹ-cugur wù yinɲã nã̀ã ce wú ba wù gbǝ̃ǝ̃ wù waa cɔ̃mmã.

23 Dɩ́ tugulǝǝ cocindɩ min nã.

Bá ba bà yugu bà ɲĩɛ̃ wà: «Nã́ã́ Dawuda huɔnblɩw sǝ-ì?»

24 Farisĩɛ̃bà jáa nɔ̃ dɩ̀-lǝ, bá waa wà: «Biɛ wáàw-ń ba wù sáa ta Iblisaw nãã, wùú mãã tãntɔ̃nãã'n yuuntiiw, wù síì gbǝ̃ǝ̃ ǹ-da fãngããgu ǹ-ɲǝ̃ǝ̃ tãntɔ̃nããba.»

25 Gɩ̀-i, Yesuẃ paa ǹ-fǝ̃ǝ̃ bà kusunã cɔ̃mmã, wú waa nǝ̃-ba wà: «Gùú yiɛntaabaa mãã bà gãnãã nǝ̃ bà ɲĩɛ̃, bà kuul bà yiɛ-i.

Gùú lǝntaabaa mãã, yindagǝ nã gùú suɔntaabaa mãã bà gãnãã nǝ̃ bà ɲĩɛ̃, gùú yo gɩ̀ lǝri yindagǝ nã gɩ̀ suɔgɩ síì gbǝ̃ǝ̃ ǹ-hǝ̃ǝ̃sǝ.

26 Sɩtãnw-ń ba wù ɲǝ̃ǝ̃ Sɩtãnw, gɩ̀ ba nã́ã́ wù gãnãã nǝ̃ wù hla-i.

Gɩ̀-lǝ gɩ̀ tammã, wù fãngããgɩ̀ ji hǝ̃ǝ̃sǝ danii?

27 Iblisa nǝ̃n ba wù hã mã́ã̀ nǝ̃ fãngããgu, mǝ̃́ ba mǝ̃̀ ɲǝ̃ǝ̃ tãntɔ̃nããba, halii hlã́ã̀ ɲimãã-lǝ ɲì bluuba nǝ̃ bà fãngããgu, bá ba bà ɲǝ̃ǝ̃-ba?

Ɲì bluu'n gaacie gáá ji car-ɲã́ã̀.

28 Nǝ̃ gɩ-ń ba gùu ba wà Dũnnũ Yuflǝ cíyà mǝ̃n ba mǝ̃̀ ɲǝ̃ǝ̃ tãntɔ̃nããba, gɩ̀-lǝ gɩ̀ pɩgaa wà Dũnnũ yuuntasǝrɩ híí-ɲã́ã̀ ǹ-tã!

29 Curo'n síì gbǝ̃ǝ̃ ǹ-jãn ciciɛnĩĩ'n duugɩ nã ǹ-kaala wù wariɛga nã́ã́ wu sáa vaa ciciɛnĩĩ wáà haasǝ.

Wù vaam'n furũũ nã-i, wù ga kaala wù duu'n wariɛga min ǹ-ta.

30 Gùú tii nǝ̃n ba wù sǝ nǝ̃ mã́ã̀, wù-lǝ mǝ̃̀ kuuri-i.

Wùú mãã wù sǝ̃n pɛ mǝ̃̀ nã, mǝ̃́ tɩgii, wù-lǝ, wù gasǝraa nǝ̃ gasǝram nã-i.

31 «Gɩ̀-lǝ gùú sùɔ́gɩ-i mǝ̃́ wa cwaabà mãã bà ce gùú gaacĩɛ̃ya'n plaaga minw mãã, nǝ̃ bà mãã bà waa gùú cãwanĩɛ̃'n plaaga mãã bà jãn Dũnnũw nã, Dũnnũẁ ga ce bà dũndɔw.

Nǝ̃ gùú tii nǝ̃n waa ǹ-jãn Dũnnũ Yuflǝw nã, Dũnnũẁ síì gbǝ̃ǝ̃ ǹ-ce gɩ̀ tii'n dũndɔw.

32 Gùú tii nǝ̃n waa diibɩblaari ǹ-hã Curonbiɛ mã́ã, Dũnnũẁ ji ce gɩ̀ tii'n dũndɔw; nǝ̃ wùú nǝ̃n waa diibɩblaari ǹ-hã Dũnnũ Yuflǝw, Dũnnũẁ síì ce gɩ̀ tii'n dũndɔw jimããgu, nǝ̃ wù síì ce-yǝ ǹ-da yo.»

33 Nã̀ã ver ǹ-ba wù waa hlo wà: «Bà fǝ̃ǝ̃ tubikuugu gɩ̀ bii nã-i.

Ɲi-ń ce ɲí ba ɲì waa wà tubikuugɩ-ń ba gɩ̀ fa, gɩ̀ biiga ba gà fa-i, nǝ̃ tubikuugɩ-ń bla, gɩ̀ bii yo gà bla-i.

34 Dɛbɛrtaa ɲimãã mãã nnĩĩ!

Ɲimãã ba ɲĩ̀ĩ bla nnĩĩ tuugu, cãwaafɩnfaarɩ̀ ji gbǝ̃ǝ̃ ǹ-hlǝ ɲì nũɔ̃gɩ nã tam hamã-i?

Nã̀ã da dìí mãã dɩ̀ hlǝ curo'n nũɔ̃gɩ nã, dɩ̀ hlǝ wù kusuugɩ nã-i.

35 Nã̀ã wa cohuhorẁ hiil cɔ̃nhuhorɩmmã, wù kusufɩnfaa nã-i.

Cobɩblayǝẁ hiil cɔ̃mbɩblammã, wù kusubɩblaa nã-i.

36 Nǝ̃ mǝ̃̀ waa-dǝ nǝ̃-ɲã́ã̀: Dũnnũ sugojaryuugu, cwaabà wáalá cãwaahãrãdǝ wo cãwaahãrãdǝ, bà ga taa dɩ̀ yuugu ǹ-ja Dũnnũw.

37 Nã̀ã wa curo wo curo ǹ nũɔ̃nãcãwanĩɛ̃gà ga ce ń ba cosũɔ̃lyǝw yindagǝ nã ǹ-hã-n nǝ̃ ǹ yuɔrɔmmã.»

Farisĩɛ̃bà waa wà Yesuw ce cɔ̃nnuromdamã ǹ-ja-ba

(Markaw 8.11-12 ; Lukaw 11.29-32)

38 Yesuẁ gáa waa cɔ̃mmã ǹ-tã, Musa hlũũ'n yuntaadaba nǝ̃ Farisĩɛ̃daaba waa wà: «Kaltii, yi yáá yì caa ń ce cɔ̃mdamã ǹ-pɩgaa-yáà.»

39 Yesuẃ siɛ-ba wà: «Kuɔkuɔtaabà blárá ǹ-car, bà sǝ bàa ba yalntaaba nǝ̃ Dũnnũw!

Bà caa mǝ̃́ ce cɔ̃mdamã ǹ-pɩgaa-ba.

Nǝ̃ cɔ̃m'n síì ce ǹ-pɩgaa-ba, nã́ã́ Dũnnũ tanhiil Sonasɩ cɔ̃mmã̀ cíé gùú tuugu sǝ.

40 Sonasɩẁ cíé bãnɲã siɛlɲã nǝ̃ yisɔsǝrɩ siɛldi nĩĩgu mãã tɩtrokɩnkãn'n kusuugɩ nã^d, Curonbiɛ yo, wù ji ce bãnɲã siɛlɲã nǝ̃ yisɔsǝrɩ siɛldi nnĩĩ-i hlɔ̃m'n kusuugɩ nã.

41 Sugojaryuugu, Ninive lǝntaabà ga suro ǹ-hã kuɔkuɔtaaba nǝ̃ yuɔrɔmmã.

Bà-lǝ bà nṹɔ̃́ ǹ-hã Sonasɩw, nã̀ã nǝ̃nǝ̃ǝ̃ bà gaacĩɛ̃yaga nã, nã̀ã tuu ǹ-tu^e.

Nǝ̃ ɲimãã sǝ̃ǝ̃nã níɛ́ nã, curodiɛ nìɛ wùú mãã wù máalá Sonasɩw!

42 Sugojaryuugu, Sabataa'n cijalw mãã wù yáá yuuntigǝ̃ngãw, wù ga suro ǹ-hã kuɔkuɔtaaba nǝ̃ yuɔrɔmmã.

Wù-lǝ wù sórrá sɔhaluu gúɔ̀ nã, ǹ-ta ǹ-hlǝ liɛga min nã, wù jo wù ji nɔ̃ Isɩrayɛl yiɛ'n yuuntigǝ̃ngã Solmãn cɔ̃nfǝ̃ǝ̃gǝ'n cãwandi, nǝ̃ ɲimãã sǝ̃ǝ̃nã níɛ́ nã curodiɛ nìɛ wùú mãã wù máalá Solmãnw!»

Nǝ̃-ń ba ǹ sǝ Dũnnũ yow, ń nǝ̃ Sɩtãn yo-i

(Lukaw 11.24-26)

43 Gɩ̀ furũũgɩ nã, Yesuẃ waa wà: «Tãntũɔ̃w-ń hlǝ curow nã, wù ta jerkwaar nã-i, ǹ-kãã caa fiisaa'n sùɔ́gu.

Wu-ń ga ba wù sáa ga da kuu,

44 wù ba wù waa wà wu ji ver ǹ-kã wù suɔgɩ nã mãã wù hlǝ́rá gɩ̀ nã.

Wú ver ǹ-kãã da kuu'n sǝ gɩ nã, bàa per-gǝ, nã̀ã mǝ̃gaa gɩ̀ kusuugu.

45 Gɩ̀-lǝ gɩ̀ nã, wú kãã tuu tãntɔ̃nãã nɩrhǝ̃ǝ̃l, ǹ-pya wù hla nã, bàá mãã bàa bla ǹ-ɲǝ̃ǝ̃ wù-lǝ.

Bà juo jãn ǹ-jiraa duugɩ nã.

Gɩ̀ biɛ'n cɔ̃mmã́ juo ɲirǝ̃ǝ̃ ǹ-maa dĩɛ̃lãmmã nã-i.

Dɩ̀-lǝ dìí tuuguu ji hi kuɔkuɔtaaba, bà ɲírǝ̃́ǝ̃ ǹ-bla ǹ-car.»

Bàá mãã Yesu suɔntaaba huhorɩmmã nã

(Markaw 3.31-35 ; Lukaw 8.19-21)

46 Yesuẁ bla wù waa dɩ̀-lǝ nǝ̃ cocindi, wù ɲũẃ, bá nǝ̃ wù hãmba, bá jo bà ji wanãã nǝ̃-yǝ.

Bà gáa juo da wù waa cɔ̃mmã nǝ̃ cwaaba nnĩĩ nã, bá hiraa taasǝ̃ǝ̃nǝ̃ǝ̃gu.

47 Curodiɛẃ fǝ̃ǝ̃ ǹ-juo waa nǝ̃ Yesuw wà: «Ǹ ɲũw nǝ̃ ǹ hãmbá nàa taasǝ̃ǝ̃nǝ̃ǝ̃gu, bà caa bá wanãã nǝ̃-n.»

48 Yesuẃ waa nǝ̃ biɛw wà: «Halǝmblǝ-i mǝ̃̀ ɲũw?

Halǝmblaa-i mǝ̃̀ hãmba?»

49 Nã̀ã ba wù pɩgaa biɛw nǝ̃ wù duunãtaaba nǝ̃ wù nãkruɔgu wù waa wà: «Níyà: mǝ̃̀ ɲũw nǝ̃ mǝ̃̀ hãmba, bà-i nhlíɛ̀;

50 Sulammã nã gùú tii mãã wù ce mǝ̃̀ Tǝ Drɔ-Dũnnũ kusunã cɔ̃mmã, wù-lǝ wɩ̀-i mǝ̃̀ hǝ̃ǝ̃w, wù-lǝ wɩ̀-i mǝ̃̀ tǝ̃̀ǝ̃́w, wù-lǝ wɩ̀-i mǝ̃̀ ɲũw.»