Mãtiyew 13

Dudũũrdiɛ cɔ̃m

(Markaw 4.1-9 ; Lukaw 8.4-8)

Gùú yuugɩ dɩngu dàa, Yesuẃ suro ǹ-hlǝ duugɩ nã, kãã jiraa lwaakɩnkan'n nũɔ̃gɩ nã.

2 Cocindaarɩ́ juo tɩgii ǹ-caliɛ wù nã, gɩ̀-i wú jãn viigǝdagǝ nã ǹ-jiraa nǝ̃ cwaabá ba bɩmblaagɩ nã.

3 Wù wáalá cɔ̃ncin nǝ̃-ba dũũmã nã.

Wù yáá wù waa wà: «Biɛdiɛ kã́ã́ wù ga nǝ̃ǝ̃ fomw wù fugagɩ nã.

4 Wù gáa ba wù nǝ̃ǝ̃-yǝ, fom biidaagá kãã duruu hlũũ'n nũɔ̃gɩ nã, tafyãmbá juo biɛriɛ ǹ-baal-ga.

5 Gadaagá kãã duruu tɩtalɩm'n sùɔ́gɩ nã mãã gɩ̀ sǝ nǝ̃ hlɔ̃nvĩĩm.

Hlɔ̃nvĩĩmmã̀ mãã mã̀ sáa dàa sǝ, gá paa ǹ-pa.

6 Gà gáa pa, gà sáa da ǹ-nǝ̃rǝ̃ǝ̃ ɲũmǝ̃nǝ̃ǝ̃ba nã, bǝ̃ǝ̃gɩ̀ gáa suro, gá hyã ǹ-kuulaa.

7 Gadaagá duruu huɔnɲã nã, huɔnɲã suro ǹ-tu ǹ-fĩɛ̃lĩɛ̃ ǹ-ko-ga.

8 Gadaagá duruu hlɔ̃nfɩnfammã nã, fomẃ juo suro ǹ-ce biiga, kãntii yiidaagá ŋmǝ̃ǝ̃ biiga ǹ-ce kãntii yii gundɩndi, ɲãdaaɲã kãntii yii gwasǝ̃nsal, ɲãdan-lǝ kãntii yii gur nǝ̃ nũɔ̃sɔ̃ nũɔ̃sɔ̃.

9 Wùú nǝ̃n ba wù ji nɔ̃, wú mǝ̃gaa ǹ-nɔ̃!»

Bii cíé Yesuẃ ba wù waa cãwaadũũmã?

(Markaw 4.10-12 ; Lukaw 8.9-10)

10 Wù duunãtaaba kuganãã wù nã ǹ-yugu-yǝ wà: «Bii cíé ń ba ǹ waa cãwaadũũmã nǝ̃ cwaaba?»

11 Yesuẃ siɛ-ba wà: «Dũnnũẁ pɩ́gará wù yuuntasǝ'n cɔ̃nŋmǝ̃ǝ̃rǝ̃mmã ǹ-ja ɲimãã-i.

Nǝ̃ cwaa'n dɩgaliɛ-lǝ bà saa, wù sáa pɩgaa-ba nǝ̃-mã.

12 Gùú tiiw mãã nǝ̃ kuu, bà ga hã wù-lǝ, ǹ-pya nã, wú da ǹ-ba nǝ̃-ɲã piyɛ̃.

Wùú mãã wù sǝ nǝ̃ kuu, halle gùú fiyãã mãã wù saa, bà ga hũɔ̃ gùú yo wù saa.»

13 Gùú cíé mǝ̃́ ba mǝ̃̀ waa cãwaadũũmã nǝ̃-ba.

Nã̀ã wa bà ne nǝ̃ bà sǝ̃n daraa; ba-ń jǝ̃ǝ̃ bà tɔ̃nɲã-i yo, bà sǝ̃n nɔ̃, nǝ̃ bà sǝ̃n fǝ̃ǝ̃ dɩ̀ tam.

14 Dũnnũ tanhiil Esayi wáalá dìí mãã dìí sǝ nnĩĩ-ì?

Esayi wáalá-dǝ wà Dũnnũw wáalá wà: Ɲi ji ba ɲì nɔ̃, nǝ̃ ɲi síì ba ɲì fǝ̃ǝ̃ dɩ̀ tam.

Ɲi ji ba ɲì ne, nǝ̃ ɲi síì ba ɲì daraa.

15 Nã̀ã wa bluu báà, bà cɔ̃nfǝ̃ǝ̃gǝgɩ̀ sǝ̃n duu-ba cɔ̃m nã, bà súulǝ́ bà tɔ̃nɲã nã nã̀ã suu bà yinɲã nã, bà yinɲã báa ji da ǹ-da kuu, nǝ̃ tɔ̃nɲã báa nɔ̃ cɔ̃m, nǝ̃ bà cɔ̃nfǝ̃ǝ̃gǝgɩ báa fǝ̃ǝ̃ cɔ̃m.

Gɩ̀-lǝ gɩ̀ tammã, bà sɩga ver ǹ-jo mǝ̃̀ nãã, wà mǝ̃́ buɔ-ba^a.

16 Yesuẃ fǝ̃ǝ̃ ǹ-waa nǝ̃ wù duunãtaaba wà: «Nǝ̃ ɲimãã-lǝ, ɲì yunɲã̀ dwállá; ɲí da nǝ̃ ɲì yinɲã nã̀ã ba ɲì nɔ̃ nǝ̃ ɲì tɔ̃nɲã.

17 Yáalà mǝ̃́ waa sulammã nǝ̃-ɲã́ã̀: Dũnnũ tanhiilaacin nǝ̃ cosũɔ̃lbacin, bà yáá bà caa bá da ɲimãã díɛ́ nã̀ã nɔ̃ dìi, nǝ̃ bà sáa da dɩ̀ dɩn, bà sáa nɔ̃ dɩ̀ dɩn.»

Yesuẁ fɩr fonnǝ̃ǝ̃r'n cãwaadũũmã

(Markaw 4.13-20 ; Lukaw 8.11-15)

18 Gɩ̀ furũũgɩ nã, Yesuẃ waa wà: «Mǝ̃n táalá cãwaadũũmã mãã, jǝ̃́ǝ̃lã̀ ɲì tɔ̃nɲã ɲí nɔ̃ mã̀ yuugu.

19 Ɲi sáa da, cwaadaba'n hiɛga nǝ̃ nã́ã́ hlũũ'n nũɔ̃-i; ba-ń nɔ̃ Dũnnũ yuuntasǝ'n cãwandi, bà sǝ̃n fǝ̃ǝ̃ dɩ̀ tam, bà ya Diibɩblarǝntiiẃ jo ǹ-ji hiil-dǝ bà hiɛga nã nã̀ã ya bá ba.

20 Badaa'n hiɛgá nǝ̃ nã́ã́ tɩntalɩm'n hlɔ̃m-i: ba-ń nɔ̃ Dũnnũ cãwandi, dɩ̀ paa ǹ-dwal bà nã-i,

21 nǝ̃ bàá nǝ̃ bà hla, bà sǝ̃n dii ɲũmǝ̃nǝ̃ǝ̃ba.

Cwaadaba-i, bà sǝ̃n hǝ̃ǝ̃sǝ.

Ywaruugu nǝ̃ cuɔlɩmmã-ń yii ǹ-jo Dũnnũ cãwan'n cɔ̃mmã nã, bà paa ǹ-ver furũũ-i.

22 Badaba'n hiɛgá nǝ̃ nã́ã́ huɔn-i; ba-ń nɔ̃ Dũnnũ cãwandi, cuu wáà mããjãmmã, nǝ̃ jin'n cɔ̃mmã-ń ce mã́ vuuraa ǹ-blǝ bà yunɲã, ɲã-lǝ ɲã-ń ce ɲã́ fĩɛ̃lĩɛ̃ ǹ-ko gɩ̀ cãwandi bà hiɛga nã, ɲã̀ sǝ̃n ya bá ŋmǝ̃ǝ̃ biigá vãnãã.

23 Nǝ̃ badaaba'n hiɛga nǝ̃ nã́ã́ fom biigaa mãã gà dúrúu hlɔ̃nfɩnfammã nã.

Bà-lǝ bà mãã ba-ń nɔ̃ Dũnnũ cãwandi, bà fǝ̃ǝ̃ dɩ̀ tammã-i, ǹ-ya dɩ́ ŋmǝ̃ǝ̃ biiga bà nã.

Gɩ́ nǝ̃ nã́ã́ gùú biigaa mãã bà nã, kãntii yisɩrɩ dɩndɩ-ń ce dɩ́ ŋmǝ̃ǝ̃ kãntii yin gundii, yindagǝ nã gwasiɛl, yindagǝ nã gur nǝ̃ nũɔ̃sɔ̃.»

Fugantiidiɛ nǝ̃ wù ɲããtiiw

24 Gɩ̀ furũũgɩ nã, Yesuẃ ver ǹ-taa cãwaadũũmdamã nǝ̃-ba wà: «Dũnnũ yuuntasǝrɩ nǝ̃ nã́ã́ curow mãã yà suro ǹ-kãã dũũ dudusǝhuhordǝdi wù fugagɩ nã.

25 Yisuɔdagǝ nã, wù ɲããtiidiɛ ya cwaaba jãnĩɛ̃ nã̀ã suro ǹ-kãã nǝ̃ǝ̃ hyãbɩblaa'n biiga dũmmã sǝ̃ǝ̃nã, nã̀ã ta.

26 Dũmmã̀ jáa ba mã̀ huu gùú bǝ̃ǝ̃gu, cwaabá da hyãbɩblaa gúɔ̀.

27 Fugantii'n mããcieraabá jo ǹ-ji ba bà yugu bà yuuntiiw wà: “Yuuntii, mǝ̃́ wa n dṹũlã́ dũm dɩndɩn-ì fugagɩ nã kɛ-ì?

Nǝ̃ hyãbɩblaagɩ̀ caa bii gɩ̀ sùɔ́gɩ nã?”

28 Fugantiiẃ waa nǝ̃-ba wà: “Curodiɛ sǝ, mǝ̃̀ fǝ̃́ǝ̃lã́ mǝ̃́ wa mǝ̃̀ ɲããtiidiɛ cíé dɩ̀-lǝ.”

Mããcieraabá waa nǝ̃-yǝ wà: “Ǹ caa yi kãã fɩr-gǝ ǹ-nǝ̃nǝ̃ǝ̃-ì?”

29 Fugantiiẃ waa nǝ̃-ba wà: “Yáalà gɩ́ ba, bláá fɩr-gǝ; ɲã-ń wa ɲi fɩr-gǝ, ɲi ga fɩr nǝ̃ dũmdaamã min.

30 Yáalà ɲã́ vãnãã ɲã̀ min.

Dũmmã-ń ji hi tɩgimmã nã, mǝ̃̀ ji waa nǝ̃ dũtɩgǝrǝǝbá fɩr gùú hyãbɩblaagɩ-i haasǝ ǹ-tɩgii-gǝ ǹ-ye-gǝ nã̀ã fǝ̃ǝ̃ bǝr mǝ̃̀ dũmmã ǹ-dii-mã dǝbɩrw nã ǹ-hã-m.”»

Mutardɩblɩ'n cãwaadũũmã

(Markaw 4.30-32 ; Lukaw 13.18-19)

31 Gɩ̀ furũũgɩ nã, Yesuẃ ver taa cãwaadũũmdamã nǝ̃-ba wà: «Dũnnũ yuuntasǝrɩ nǝ̃ nã́ã́ tuudagǝblɩ-i bà be-dǝ wà mutardɩ, biɛdiɛ yà tuu ǹ-dũũ-dǝ wù fugagɩ nã.

32 Dɩ́ nǝ̃ dìi kol ǹ-maa dudusǝ'n biiga min dɩ̀ dũũm'n bǝ̃ǝ̃gu hlɔ̃mmã nã.

Nǝ̃ ba-ń hi ǹ-dũũ-dǝ nǝ̃ dɩ́ pa, dɩ̀ juo ba nãnkuɔtur'n yugutunɲã nã, ɲã̀ min guugǝ̃ngããgu, fuwɔ ǹ-juo ba tugǝ̃ngããgu, tafyãmbá ba bà sa bà hiɛsunɲã gɩ̀ nɔ̃nɲã nã.»

Dũnnũ Yuuntasǝrɩ nǝ̃ nã́ã́ leviir-i

33 Nã̀ã ver ǹ-waa cãwaadũũmã hlo wà: «Dũnnũ yuuntasǝrɩ nǝ̃ nã́ã́ leviir-i, cijalw yà du jũmmã tasaba yisɩri, nã̀ã tuu-yǝ ǹ-dii mã̀ nã, fuwɔ mã̀ min, mã ji ɲǝ̃ǝ̃.»

Bii cíé Yesuẃ ba wù waa cãwaadũũmã?

(Markaw 4.33-34)

34 Yesuẁ wáalá cãwanĩɛ̃ gáà min nǝ̃ cocindi dũũm nã-i; wù sáá wù waa cɔ̃m nǝ̃-ba nã́ã́ cãwaadũũm sǝ.

35 Dɩ̀-lǝ dɩ̀ cíé ǹ-da ce Dũnnũ tanhiil'n cãnwanĩɛ̃gá suu.

Wù wáalá wà: Mǝ̃̀ ji ba mǝ̃̀ waa cɔ̃mmã nǝ̃-ba dũũm nã-i.

Mã̀ã́ mãã mã̀ yáá mã̀ã ŋmǝ̃ǝ̃rǝ̃ǝ̃ cuu nǝ̃ǝ̃m'n bǝ̃ǝ̃gu dìi, mǝ̃̀ ji waa-mã nǝ̃-ba.^b

Yesuẁ fɩr hyãbɩblaa'n cãwaadũũmã

36 Yesuẁ gáa waa cɔ̃mmã ǹ-tã, wú ya cocin díɛ̀dɩ́ ba, nã̀ã ba wù maar wù kũũ.

Wù duunãtaabá kã wù nãã ǹ-ga waa wà: «Ǹ wáalá gùú hyãbɩblaa'n cãwaadũũmãã mãã, ǹ síì fɩr-mã yuugu ǹ-ja-yáà-ì?»

37 Yesuẃ siɛ-ba wà: «Curonbiɛ-lǝ wùú dṹũlã́ dudusǝhuhordǝdi.

38 Wù fugagɩ-i cuuw.

Dudusǝhuhordǝdɩ-i Dũnnũ bluuba, nǝ̃ hyãbɩblaagɩ-i Diibɩblarǝntii'n bluuba.

39 Fugantii'n ɲããtii wɩ̀-i tiilǝtiiw.

Wùú kã́ã́ ǹ-ga nǝ̃ǝ̃ hyãbɩblaagu dũmmã sǝ̃ǝ̃nã.

Dũtɩgǝbǝ̃ǝ̃gɩ-i cuu tãllɩ bǝ̃ǝ̃gu nǝ̃ dũtɩgirǝǝba-i mɛlɛgɛba.

40 Bà mãã bà fɩr hyãbɩblaagu gùú tammãã mãã ǹ-kãã tii-gǝ, cuu tãl'n yuugu, dɩ̀ ji ba nnĩĩ-i.

41 Yuu gúɔ̀ nã, Curonbiɛẁ ga ce wù mɛlɛgɛbá jo ǹ-ji blǝ bàá mãã bà ce cwaabá ba bà ver furũũ, nǝ̃ bàá mãã bà ce gaabɩbliɛga, ǹ-hiil-ba wù yuuntasǝrɩ nã

42 ǹ-ga hyã-ba dǝ̃nkɩkandɩ nã.

Kaaluugu nǝ̃ ɲirãn'n wuumã̀ ga ba dàa.

43 Nǝ̃ gɩ̀-lǝ gɩ̀ nã, cosũɔ̃lbabà ga ba bà Tǝ yuuntasǝrɩ nã, ǹ-ba bà caalaa nã́ã́ bãhãn-i.

Wùú nǝ̃n ba wù ji nɔ̃, wú mǝ̃gaa ǹ-nɔ̃.»

Dũnnũ yuuntasǝrɩ́ nǝ̃ nã́ã́ gbaasǝ'n butuu-i

44 «Dũnnũ yuuntasǝrɩ nǝ̃ nã́ã́ gbaasǝ'n butuuguu mãã fuugɩ nã, bàa ŋmǝ̃ǝ̃rǝ̃ǝ̃ gɩ̀ nã fugadagǝ kusunã.

Biɛdiɛ fǝ̃ǝ̃ ǹ-kãã da-gǝ, wú ver ǹ-mǝ̃gaa ŋmǝ̃ǝ̃rǝ̃ǝ̃ gɩ̀ nã hlo, gɩ́ mǝ̃gaa ǹ-dwal wù nã, fuwɔ wú kãã suur wù nãkruɔɲinɲã min, ǹ-jo ǹ-ji sǝ̃ǝ̃ fuga gúɔ̀.»

Dũnnũ yuuntasǝrɩ́ nǝ̃ nã́ã́ kɩɲǝ̃mblɩ-i

45 «Dũnnũ yuuntasǝrɩ́ nǝ̃ dìi ver ǹ-ba nã́ã́ cǝrcierw mãã wù caaraa kɩɲǝ̃mbiiga nã wù sǝ̃ǝ̃.

46 Wù jáa da kɩɲǝ̃mblɩdarǝ dɩ̀ kuusǝ dugɔ, wú kã ǹ-ga suur wù nãkruɔɲinɲã min ǹ-sǝ̃ǝ̃-dǝ.»

Dũnnũ yuuntasǝrɩ́ nǝ̃ nã́ã́ jirǝ̃ǝ̃-i

47 «Dũnnũ yuuntasǝrɩ́ nǝ̃ dìi ver ǹ-ba hlorii nã́ã́ tɩtoblǝjirǝ̃ǝ̃-i.

Ba-ń nǝ̃ǝ̃ jirǝ̃ǝ̃gu hũmmã nã, gɩ-ń hi tɩtroplǝ wo tɩtroplǝ, gɩ̀ blǝ-yǝ-i.

48 Gɩ-ń yu, bá fa ǹ-hiil-ba hũmmã nã, ǹ-kãã tũɔ̃l-ba, ǹ-dii baafɩnfaaba barw nã nã̀ã nǝ̃nǝ̃ǝ̃ bàá mãã bà síì pyar dugɔ bà nã.

49 Cuu tãllɩ̀ ji ba nnĩĩ-i: mɛlɛgɛbà ga jo ǹ-ji tũɔ̃l cobɩbliɛba ǹ-hiil-ba cosũɔ̃lbaba nã,

50 ǹ-ga dii-ba ǝ̃rǝ̃ǝ̃gɩ nã.

Kaaluugu nǝ̃ ɲirãn'n wuumã̀ ga ba dàa.»

51 Yesuẁ wáalá dɩ̀-lǝ, wú yugu wù duunãtaaba wà: «Mǝ̃n wáalá dìí mãã, ɲi nṹɔ̃́ dɩ̀ min-ì?»

Bá siɛ-yǝ wà: «Ũwũũ, yi nṹɔ̃́-dǝ.»

52 Yesuẃ fǝ̃ǝ̃ ǹ-waa nǝ̃-ba wà: «Musa hlũũ'n yuuntii mãã wu-ń ga juo ba Dũnnũ yuuntasǝ'n duunãtiiw, wú nǝ̃ nã́ã́ suɔntii mãã wù hiil ɲinflãnɲã nǝ̃ ɲincũcurɔnɲã wù gbaasǝ'n butuugɩ nã.»

Nasarɛtɩ lǝntaabà cĩĩnǝ̃ǝ̃ Yesuw nã

(Markaw 6.1-6 ; Lukaw 4.16-30)

53 Yesuẁ gáa taa cãwaadũũm mã́ã̀ ǹ-tã, wú hlǝ gɩ̀ sùɔ́gɩ nã

54 ǹ-kãã ba, wù vǝ̃́ǝ̃lã́ gùú lǝri.

Wù gáa kãã hi, wú kãã ba wù kal cwaaba nǝ̃ Dũnnũ cãwandi Yahudyaba tɩgim'n duugɩ nã.

Gɩ́ cu cwaa'n kusunɲã.

Bá ba bà waa wà: «Wù-lǝ wù gáa hlǝ nǝ̃ cɔ̃nfǝ̃ǝ̃gǝ gúɔ̀ haa-ì?

Wù cíé danii nã̀ã juo ba wù gbǝ̃ǝ̃ wù ce cɔ̃nnurom mã́ã̀ tuugu?

55 Dapaal wáà bíɛ́ sǝ-ì?

Bà sǝ̃n be wù ɲũw Mariyam sǝ-ì?

Yakubaba nǝ̃ Yisefuw nǝ̃ Simɔ̃w nǝ̃ Sudeba ɲũũnãtii sǝ-ì?

56 Wù tǝ̃ǝ̃ba min bà sɩriɛ yì sǝ̃ǝ̃nã nhlíɛ̀ nã-i?

Wù-lǝ wù gáa hlǝ nǝ̃ cɔ̃m mã́ã̀ min haa-ì?»

57 Gɩ̀ cíé nnĩĩ nã, bá ver furũũ.

Yesuẃ waa nǝ̃-ba wà: «Badaba'n sǝ̃n diɛ Dũnnũ tanhiilw nã́ã̀ wù hla'n lǝntaa sǝ, nǝ̃ wù suɔntaaba.»

58 Bà mãã bà sáa hũɔ̃ wù cãwandi nnĩĩ nã, wù sáa ce cɔ̃nnuromcin bà yiɛgu.