Lukaw 13

Yesuẁ waa nǝ̃ bàá mãã bà nɔ̃ wù cãwanĩɛ̃ga, wà bá nǝ̃nǝ̃ǝ̃ bà gaacĩɛ̃yaga nã, nã̀ã tuu ǹ-tu

Gɩ̀-lǝ gɩ̀ bǝ̃ǝ̃gu, bluudaabá juo waa nǝ̃ Yesuw wà, Galile yiɛntaadaabà yáá bà hiil siimã bà hã Dũnnũw, Pilatɩẃ ce bá ko-ba.

2 Yesuẃ fǝ̃ǝ̃ ǹ-waa nǝ̃-ba wà: «Ɲi kãn wà ba kúó gùú Galile yiɛntaabaa mãã nnĩĩ bà tuugu, bà-lǝ bà gaacĩɛ̃yagà ta Galile yiɛntaaba min yaga nã-ì?

3 Nĩĩgu sǝ!

Mǝ̃̀ waa nǝ̃-ɲã́ã̀, ɲi-ń ba ɲì sáa nǝ̃nǝ̃ǝ̃ ɲì gaacĩɛ̃yaga nã, nã̀ã tuu ǹ-tu, ɲimãã yo, ɲì min ɲi ji kurǝǝ bàá tammã-i.

4 Siluwe dodɩdaalaagɩ́ duruu ǹ-ko gùú cwa nũɔ̃sɔ̃ nɩrsiɛlw mãã Serusalɛmgu, ɲi kãn wà bà-lǝ bà yáá bàa ce gaacĩɛ̃yaga ǹ-ɲǝ̃ǝ̃ Serusalɛm taaba min min-ì?

5 Nĩĩgu sǝ!

Mǝ̃̀ waa nǝ̃-ɲã́ã̀, ɲi-ń ba ɲì sáa nǝ̃nǝ̃ǝ̃ ɲì gaacĩɛ̃yaga nã, nã̀ã tuu ǹ-tu, ɲì min ɲi ji kurǝǝ bàá tammã-i.»

6 Gùú nã-i, Yesuẃ fǝ̃ǝ̃ ǹ-waa cãwaadũũm mã́ã̀ wà: «Biɛdiɛẁ yáá wùu so puugu wù ɛrsɛ̃ tun'n fugagɩ nã.

Yuudagǝ, wú kãã jo wà wú juo jar biiga, wù sáa ji da.

7 Wú waa nǝ̃ fuga'n tayigantiiw wà: “Biiga siɛlga-i nnĩĩ, mǝ̃̀ sǝ̃n da blɩ mǝ̃̀ jar puu gúɔ́ nã.

Juu-gǝ.

Báa ya gɩ́ ba gɩ̀ bǝ̃ǝ̃lǝ̃ǝ̃ hlɔ̃mmã nã.”

8 Fuga'n tayigantiiẃ siɛ-yǝ wà: “Yuuntii, ya gɩ́ ba juɲũũgu hlo.

Mǝ̃̀ ji kuɔsǝ ǹ-caliɛ gɩ̀ nã, nã̀ã dii sãmmã.

9 Gɩnhyãl, cuudiɛnãgu, gɩ̀ ji ŋmǝ̃ǝ̃.

Gɩ-ń ba gɩ̀ sáa ŋmǝ̃ǝ̃, ń juu-gǝ.”»

Yesuẁ buɔ cijaldiɛ Yahudyaba fiisaa'n yuugu

10 Yahudyaba fiisaa'n yuudagǝ, Yesuẁ yáá wù kal cwaaba tɩgim'n duugɩ nã.

11 Cijaldiɛẁ yáá dàa, tãntũɔ̃ẁ yà bǝ̃ǝ̃lǝ̃ǝ̃ wù nã ǹ-kra fuwɔ bii nũɔ̃sɔ̃ nǝ̃ nɩrsiɛl.

Wù yáá curǝmmã nã-i, wù sǝ̃n gbǝ̃ǝ̃ ǹ-ciir tǝm.

12 Yesuẁ gáa da-yǝ, wú be-yǝ, ǹ-waa nǝ̃-yǝ wà: «Cijal, ǹ hlǝ́rá ǹ hlɔmmã nã jimããgu.»

13 Nã̀ã fǝ̃ǝ̃ ǹ-piɛ wù nãkruɔgu wù drɔ, gùú bǝ̃ǝ̃guu dàa, wú ciir tǝmm, ǹ-ba wù bũũ Dũnnũw.

14 Dɩ̀ gáa ce nnĩĩ, tɩgim'n duu'n yuuntii'n hiɛgá dũ, wà danii Yesuẃ ce hlɔnĩĩẃ buɔ Yahudyaba fiisaa'n yuugu.

Wú fǝ̃ǝ̃ ǹ-ba wù waa nǝ̃ cocindii mãã dɩ̀ yáá dàa gɩ̀ sùɔ́gɩ nã wà: «Bãn nãndien-i mããcem'n yunɲã.

Yíi nǝ̃n ba ǹ-caa ń buɔ, gɩ̀ saa ń jo gùú yunɲã-i, curo'n báa jo Fiisaa'n yuugu.»

15 Yitiiẃ fǝ̃ǝ̃ ǹ-siɛ-yǝ wà: «Kusunɲãhǝ̃nhãltaa ɲimãã, halii wù sǝ̃n fɩr wù nǝ̃ǝ̃w, yindagǝ nã wù kǝkũmw, fiisaa'n yuugu, ǹ-kã nǝ̃-yǝ kwaagɩ nã wu ga ɲũɔ̃ hũmmã?

16 Nǝ̃ cijal wáà mãã Ibramã furũntiiw, Sɩtãnẁ yà vaa-yǝ ǹ-kra fuwɔ bii nũɔ̃sɔ̃ nǝ̃ nɩrsiɛlw, gɩ̀ sáa saa curo ń fɩr-yǝ fiisaa'n yuugu-ì?»

17 Yesuẁ gáa siɛ-ba gɩ̀ tammã, ciirɩ́ blǝ wù kuurǝǝba min.

Nǝ̃ Yesuẁ yáá wù ce gùú cɔ̃nnurommãã mãã, mã́ ba mã̀ dwal cocin díɛ̀ nã.

Dũnnũ yuuntasǝ'n cɔ̃mmã

(Mãtiyew 13.31-33 ; Markaw 4.30-32)

18 Yesuẃ fǝ̃ǝ̃ ǹ-waa wà: «Ɲi fǝ̃́ǝ̃lã́ Dũnnũ yuuntasǝrɩ mãã dɩ̀ hlǝ gùú kuugɩ-ì?

Mǝ̃̀ ji pɩgaa ǹ-ja-ɲã́ã̀ nǝ̃-gǝ.

19 Dɩ́ nǝ̃ nã́ã́ tuudagǝblɩ-i, bà be-dǝ wà mutardɩ, dìi kol nã́ã́ fom blɩ-i.

Curow, yà dũũ-dǝ wù yugun'n fugagɩ nã.

Dɩ̀ jáa pa, dɩ́ ba tugǝ̃ngããgu, tafyãmbá ba bà sa bà hiɛsunɲã gɩ̀ nɔ̃́ǹɲã nã.»

20 Nã̀ã fǝ̃ǝ̃ ǹ-waa wà: «Mǝ̃̀ ji gbǝ̃ǝ̃ ǹ-fi Dũnnũ yuuntasǝri nǝ̃ bii hlo?

21 Dɩ́ nǝ̃ nã́ã́ leviir-i, cijalẁ yà du jũmmã tasaba yisɩri, nã̀ã tuu-yǝ ǹ-dii mã̀ nã, fuwɔ mã̀ min, mã̀ ji ɲǝ̃ǝ̃.»

(Mãtiyew 7.13-14, 21-23)

22 Yesuẃ ba wù maar Serusalɛmgu, nã̀ã ba wù ta wù hlǝ liɛgǝ̃ngĩɛ̃ga nã, nǝ̃ liɛbiiga nã wù kal cwaaba wù maar.

23 Curodiɛẃ yugu-yǝ wà: «Yitii Dũnnũw mãã wù ga kor bàa, bà síì kol ǹ-car-i?»

Yesuẃ siɛ-ba wà:

24 «Gbǝ̃́ǝ̃lã̀ ɲí jãn nǝ̃ dũndɔ̃lsaalaarǝdi.

Mǝ̃̀ waa nǝ̃-ɲã́ã̀, cocindɩ̀ ji ba dɩ̀ caa dɩ́ jãn, nǝ̃ dɩ̀ síì gbǝ̃ǝ̃.

25 Suɔntiiw-ń ga suro ǹ-gbǝ fieri, nǝ̃ ɲi ba taasǝ̃ǝ̃nǝ̃ǝ̃gu, ɲi ga ba ɲì dǝ̃ǝ̃-dǝ, nã̀ã ba ɲì waa wà: “Yuuntii, ciɛl yí jãn.”

Wù ga siɛ-ɲã́ã̀ wà: “Mǝ̃̀ sǝ̃n fǝ̃ǝ̃ ɲimãã wanhlǝm'n sùɔ́.”

26 Gùú nã-i, ɲi ga ba ɲì waa wà: “Yi yáá yì wuu wuuri nã̀ã ba yì ɲũɔ̃ ɲinɲã yì min nǝ̃-n.

Ǹ yáá ǹ kal cwaaba hãmĩĩ lǝ'n hlũnɲã nã-i.”

27 Wù ga ver ǹ-waa nǝ̃-ɲã́ã̀ wà: “Mǝ̃̀ sǝ̃n fǝ̃ǝ̃ ɲì hlǝm'n sùɔ́.

Hállà mǝ̃̀ tuɔra, ɲimãã mãã ɲì ce gaabɩbliɛga.”

28 Ɲi-ń ga ba ɲì da Ibramãba nǝ̃ Isiyagaw, nǝ̃ Yakubaw, nǝ̃ Dũnnũ tanhiilaaba, bàa jiraa Dũnnũ yuuntasǝrɩ nã, nǝ̃ ɲimãã ba taasǝ̃ǝ̃nǝ̃ǝ̃gu, gùú nã-i, kaaluugu nǝ̃ ɲirãn'n wuumã̀ ga ba dàa.

29 Gɩ̀-lǝ gɩ̀ nã, cwaadaabà ga hlǝ bǝ̃ǝ̃'n pal'n yiɛgu, badaabá hlǝ bǝ̃ǝ̃'n jãnɩm'n yiɛgu, badaabá hlǝ cuu yanɲã min nã, ǹ-kãã jiraa juwuukaagɩ nã, ǹ-wuu parwugǝ̃ngããri Dũnnũ yuuntasǝrɩ nã.

30 Gùú nã-i, furũntaadaabà ga ba yigantaaba, nǝ̃ yigantaadaabá ba furũũgɩ nã.»

Yesuẁ hiraa kúúcɔ̃mmã nã

(Mãtiyew 23.37-39)

31 Gɩ̀-lǝ gɩ̀ bǝ̃ǝ̃gu, Farisĩɛ̃daabá juo waa nǝ̃-yǝ wà: «Hlǝ, ń maar ń hal nìɛ, nã̀ã wa, jãmãtigi Erodɩẃ nìɛ wù caa wú ce bá ko-n.»

32 Wú fǝ̃ǝ̃ ǹ-waa nǝ̃-ba wà: «Kã́ã̀ ɲi ga waa nǝ̃ gɩ̀ kwalw, wà mǝ̃ nìɛ mǝ̃̀ ɲǝ̃ǝ̃ tãntɔ̃nããba, nã̀ã ba mǝ̃̀ buɔ hlɔnããba, jimããgu nǝ̃ cicuɔgu.

Cicuɔ'n taakaalgu, mǝ̃̀ ji ce mǝ̃̀ mããcemmã́ suu.

33 Nǝ̃ gɩ̀ saa mǝ̃́ duu mǝ̃̀ hlũũgɩ nã, jimããgu, nǝ̃ cicuɔgu, nǝ̃ cicuɔ'n taakaalgu.

Nã̀ã wa, bà síì gbǝ̃ǝ̃ ǹ-ko Dũnnũ tanhiil yiɛdagǝ, nã́ã́ Serusalɛm sǝ.»

Yesuẁ kaal Serusalɛm cɔ̃mmã nã

34 «Serusalɛmtaa, Serusalɛmtaa, ɲimãã mãã ɲì ko Dũnnũ tanhiilaaba, nǝ̃ Dũnnũw-ń tĩɛ̃ curo ɲì nãã, ɲí juo nǝ̃ǝ̃ ǹ-ko gɩ̀ tii nǝ̃ tɩntrãga.

Mǝ̃̀ wáalá mǝ̃́ tɩgii-ɲã́ã̀ ǹ-gbãlãã, nã́ã́ kunɲũw mãã wù dii wù biibaa wù tãmpɩrãnɲã taara gùú tuugu, ɲi sáa hũɔ̃.

35 Gùú cíé, Dũnnũẁ ji pyar wù nãkruɔgu ɲì suɔgu drɔ.

Nǝ̃ mǝ̃̀ waa nǝ̃-ɲã́ã̀, ɲi síì da-m hlo, fuwɔ gùú bǝ̃ǝ̃guu mãã ɲi-ń ji ba ɲì waa wà wùú mãã wù jo Yitii Dũnnũ yiirɩ nã nnĩĩ, Dũnnũẃ piɛ wù nãkrɔfɩnfaaguu wù drɔ.»