Mãtiyew 7

Yesu diiwaarǝdi ǹ-kã cwaa'n mããdam'n yiɛgu

«Bláá da curo'n mããdam, gùú ji ce Dũnnũ yo, wù síì da ɲimãã mǝ̃gãmmã.

2 Nã̀ã wa ɲi mãã ɲã̀ da cwaa'n mããdammã gùú tammã, Dũnnũẁ ga da ɲimãã yo ɲì mǝ̃gãmmã nnĩĩ-i.

Ɲi mãã ɲì fi cwaaba nǝ̃ gùú kuuguu mãã, Dũnnũẁ ga fi ɲimãã yo, nǝ̃ gɩ̀-lǝ gɩ̀-i.

3 Yíǹ bla danii nã̀ã ba ǹ-da hiɛgǝgu ǹ nãcuro'n yisɩrɩ nã, nǝ̃ dabuorii mãã yíǹ yisɩrɩ nã ǹ ba ǹ sǝ̃n da dɩ̀-lǝ?

4 Dàa yíǹ ji waa nǝ̃ ǹ nãcurow danii wà wú yaala ń hiil hiɛgǝguu mãã wù yisɩrɩ nã, nǝ̃ dabuorɩ́ ba yíǹ dǝllɩ nã?

5 Kusunɲãhǝ̃nhãltii yíí!

Hiil dabuori ǹ hla'n yisɩrɩ nã haasǝ, gùú ji ce ń mǝ̃gaa ǹ-daraa ǹ-hiil hiɛgǝguu mãã ǹ nãcuro'n dǝllɩ nã.

6 «Bláá ba ɲì hã vamba nǝ̃ Dũnnũ ɲinɲã.

Ɲi-ń ba ɲì hã-ba nǝ̃-ɲã, ba báa ji ver ǹ-suro ɲì yuunã, ǹ-fa jãrãã ɲì nã.

Bláá ba ɲì nǝ̃nǝ̃ǝ̃ ɲì kɩɲǝ̃mbiiga nã pyariɛba sǝ̃ǝ̃nã, ba báa ji sa ǹ-muguraa ga nã mǝ̃ga-mǝ̃ga ǹ-hã-ɲã́ã̀.»

Dũnnũ cirǝ̃m'n tammã

(Lukaw 11.9-13)

7 «Círǝ̃̀ǝ̃, bà ji hã-ɲã́ã̀.

Cáalà, ɲi ji da.

Bíyà, bà ji siɛ-ɲã́ã̀.

8 Ɲi sáa da, curo wo curo mãã wu-ń cirǝ̃ǝ̃, bà hã-yǝ; wùú nǝ̃n caa, wù da-i; nǝ̃ wùú nǝ̃n be, bà siɛ-yǝ.

9 Dàa ɲimãã sǝ̃ǝ̃nã, halii bíɛ́-i wu-ń cirǝ̃ǝ̃ burw nã wù saa, wú tuu tɩntãndi ǹ-hã-yǝ?

10 Yindagǝ nã, wu-ń cirǝ̃ǝ̃ tɩtrow nã, wú blǝ waalw ǹ-hã-yǝ?

11 Ɲimãã mãã cobɩbliɛba, ɲi-ń ba ɲì fǝ̃ǝ̃ ɲããfɩnfanɲã ɲì hã ɲì tãnkuuraaba nǝ̃-ɲã, gɩ̀ ji ba danii ɲì Tǝ Drɔ-Dũnnũw ba wù síì hã bàá mãã bà cirǝ̃ǝ̃ wù nã nǝ̃ ɲããfɩnfanɲã?

12 «Dɩ-ń ba gɩ̀-lǝ gɩ̀ tammã, yíǹ mãã ǹ caa cwaabá ba bà ce dìí mãã bà hã-n, yíi yo ba-ń ce dìí tuugɩ-i ǹ hã-ba.

Musa hlũũ'n sɛbɛba nǝ̃ Dũnnũ tanhiilaa'n sɛbɛbaba wa yí ba yì ce dɩ̀-i.

Hlũsǝrɩ hǝ̃ǝ̃l cɔ̃mmã

(Lukaw 13.24)

13 «Jã́nnã̀ nǝ̃ dũndɔ̃lsaalaarǝdi Dũnnũ yuuntasǝrɩ nã, nã̀ã wa gùú dũndɔ̃lli mãã dìi hanãã nǝ̃ gùú hlũũguu mãã gùu hanãã, ɲã̀-lǝ ɲã̀ã́ kã́ã̀ nǝ̃ cwaaba guum'n sùɔ́gɩ nã.

Cocindɩ̀ ta nǝ̃ ɲã̀-lǝ ɲã̀-i.

14 Nǝ̃ dũndɔ̃lsaalaarǝ kã́ã̀ nǝ̃ cwaaba nũmǝ̃nãsǝrɩ nã, nǝ̃ dɩ̀ hlũũ yo gɩ̀ sǝ gùu hanãã.

Bàá mãã bà da-ɲã, bà sǝ bàa ɲũrũɔ̃ dugɔ.

Tubikuuguu nǝ̃ gɩ̀ biiga

(Lukaw 6.43-44)

15 «Blǝ́rà ɲì hla nã nǝ̃ tanhiilaakwasǝnããbaa mãã bà jo ɲì nãã.

Sulammã nã, nǝ̃-ń da-ba, ǹ ba ǹ wa tũmãm-i, nǝ̃ jãn bà kusunɲã nã ń ne!

Bá nǝ̃ nã́ã́ mǝ̃yɩrǝǝ-i, bà ce bǝ̃ǝ̃lǝ̃mmã.

16 Ɲi ji fǝ̃ǝ̃-ba bà gaaciega nã-i.

Huɔtuugɩ̀ sǝ̃n ŋmǝ̃ǝ̃ fyããri, curo'n sáa hi ǹ-jar plǝnɲã jugapyɛ̃ntuugɩ nã ǹ-da.

17 Tubikufɩnfaagɩ̀ ŋmǝ̃ǝ̃ biifɩnfiɛga, nǝ̃ tubikuhãrããgɩ̀ ŋmǝ̃ǝ̃ biihãrĩɛ̃-i.

18 Tubikufɩnfaagɩ̀ síì gbǝ̃ǝ̃ ǹ-ba gɩ̀ ŋmǝ̃ǝ̃ biihãrĩɛ̃ga, nǝ̃ tubikuhãrãã yo gɩ̀ síì gbǝ̃ǝ̃ ǹ-ŋmǝ̃ǝ̃ biifɩnfiɛga.

19 Tubikuu wo tubikuu, gɩ-ń ba gɩ̀ sǝ̃n ŋmǝ̃ǝ̃ biifɩnfiɛga, bà ji juu-gǝ, ǹ-kãã nǝ̃ǝ̃ ǹ-dii-gǝ dǝ̃ǝ̃mã nã.

20 Gɩ̀ sùɔ́gɩ nã, ɲi ji fǝ̃ǝ̃ tanhiilaakwasǝnããba bà gaaciega nã-i.»

Ǹ-be Yesu yiiri, nã̀ã ce wù nũɔ̃gu, sùɔ́gɩ dɩn sǝ

(Lukaw 13.25-27)

21 «Bláá ba ɲì ne wà bàá mãã bà be-m Yitii Yitii, wà bà min ga jãn Dũnnũ yuuntasǝrɩ nã!

Bàá mãã bà ce mǝ̃̀ Tǝ Drɔ-Dũnnũw kusuugu, bàá dɩndɩn ga jãn.

22 Sugojaryuugɩ-ń ji hi, cocindɩ̀ ji waa wà: “Yitii, Yitii Dũnnũẁ díilá wù cãwandii mãã yì nɔ̃nɲã nã, yi sáa waa-dǝ yíi yiirɩ nã sǝ-ì?

Yi sáá yì ɲǝ̃ǝ̃ tãntɔ̃nããba yíi yiirɩ nã sǝ-i?

Dàa yi sáá yì ce cɔ̃nnurommã yíi yiirɩ nã sǝ-ì?”

23 Gɩ̀ sùɔ́gɩ nã, mǝ̃̀ ga waa nǝ̃-ba wà: “Gaabɩbliɛncieraa ɲimãã, hállà mǝ̃̀ tuɔra; mǝ̃̀ sáa hi da-ɲã́ã̀ ǹ-da!”»

Jaacieraaba hǝ̃ǝ̃l cɔ̃mmã

(Lukaw 6.47-49)

24 Yesuẃ waa wà: «Curow mãã wu-ń jo mǝ̃n nãã, ǹ-juo nɔ̃ mǝ̃̀ cãwanĩɛ̃ga, nã̀ã ba wù ce gà mããcemmã, mǝ̃̀ ji gbǝ̃ǝ̃ ǹ-fi gɩ̀ tiiw nǝ̃ cɔ̃nfǝ̃ǝ̃rw mãã wùu mã wù duugu tɩntalɩmmã drɔ.

25 Gɩ̀ mãã gɩ̀ mlã tɩntalɩmmã drɔ nnĩĩ nã, gɩ̀ hyárrá ǹ-fa.

Dũnnũẁ jáa nɔ̃ duɔgu, kwasǝrɩ́ yurǝǝ, saluugɩ́ suro, ɲã̀-lǝ ɲã̀ min ɲã́ suro ǹ-kãã juu duu gúɔ̀, gɩ̀ sáa duruu.

26 Nǝ̃ wùú mãã wu-ń nɔ̃ mǝ̃n cãwandi nã̀ã ba wù sǝ̃n ce-dǝ, gɩ̀ tiiẁ vaa nǝ̃ wuuhãrw mãã wù mlã wù duugu hlɔ̃mpieri drɔ.

27 Dũnnũẁ jáa nɔ̃ duɔgu, kwasǝrɩ́ yurǝǝ, nǝ̃ saluugɩ́ suro, ɲã̀-lǝ ɲã̀ min ɲã́ suro ǹ-kãã juu gɩ́ duruu mǝ̃ga-mǝ̃ga!»

28 Yesuẁ gáa waa cãwanĩɛ̃ gáà ǹ-tã nǝ̃ cocindi, wù kállá-ba nĩĩguu mãã, gɩ́ tugulǝǝ bà nã.

29 Nã̀ã wa, wù yáá wù kal cwaaba nǝ̃ fãngããgu, gùú yáá gùu ce wù cãwanĩɛ̃ga ba gà yáá gà tugulǝǝ bà nã ǹ-car.

Wù sáá wù kal-ba nã́ã́ Musa hlũũ'n yuntaabà mãã bà kal-ba nĩĩgu mãã.