Mãtiyew 6

Bà hã curow nǝ̃ kuu tam hamã-i?

Gɩ̀ furũũgɩ nã, Yesuẃ waa wà: «Blǝ́rà ɲì hla nã, bláá wa ɲi ce gaasũɔ̃lĩɛ̃ga cwaa'n yinɲã nã; nã̀ã wa ɲì Tǝ Drɔ-Dũnnũẁ sɩga pã-ɲã́ã̀.

2 Nǝ̃-ń ba ǹ-hã kwokuow nǝ̃ kuu, báa hul-dǝ nǝ̃ tɩraagu, nã́ã́ kusunɲãhǝ̃nhãltaabaa mãã bà ce-dǝ nĩĩgu Yahudyaba tɩgim'n donɲã nã nǝ̃ lǝ'n kusuugɩ nã; cwaabá da ǹ-ba bà bɩnǝ̃ǝ̃ bà nã.

Yáalà mǝ̃́ waa sulammã nǝ̃-ɲã́ã̀: bàá mãã bà ce dɩ̀-lǝ, bà díɛ́ bà pãlli ǹ-tã.

3 Nǝ̃ yíì, nǝ̃-ń wa ń hã kwokuow nǝ̃ ǹ nãdĩĩgu, báa ya ǹ ɲiɲũɔ̃gɩ́ fǝ̃ǝ̃ dɩ̀ nã.

4 Gɩ̀-lǝ gɩ̀ tammã, curo'n báa da ǹ-fǝ̃ǝ̃ ǹ guuhãgǝ'n cɔ̃mmã nã, nǝ̃ ǹ Tǝw mãã wù da cɔ̃mmã min, wù ji pã-n.»

Yesu diiwaarǝdi ǹ-kã Dũnnũ cirǝ̃m'n yiɛgu

5 «Ɲi-ń wa ɲi cirǝ̃ǝ̃ Dũnnũw nã bláá ba ɲì ce nã́ã́ kusunɲãhǝ̃nhãltaabaa mãã gɩ̀ dwal bà nã, bá ba ba-ń ce bá suro ǹ-hiraa Yahudyaba tɩgim'n donɲã nã, nǝ̃ lǝ'n kusuugɩ nã, wà bá cirǝ̃ǝ̃ Dũnnũ nã-i, cwaabá da ǹ-ba bà da-ba.

Yáalà mǝ̃́ waa sulammã nǝ̃-ɲã́ã̀: bàá mãã bà ce dɩ̀-lǝ, bà díɛ́ bà pãlli ǹ-tã.

6 Nǝ̃ yíi, nǝ̃-ń wa ń cirǝ̃ǝ̃ Dũnnũw nã, jãn ǹ docɔgǝgɩ nã nǝ̃ ń suu ǹ hla nã, nǝ̃ ń cirǝ̃ǝ̃ ǹ Tǝw nã mãã sɔŋmǝ̃ǝ̃rǝ̃ǝ̃gǝgɩ nã.

Ǹ Tǝw mãã wù da cɔ̃nŋmǝ̃ǝ̃rǝ̃mmã min, wù ji pã-n.»

7 «Ɲi-ń ba ɲì cirǝ̃ǝ̃ Dũnnũw nã, bláá ba mǝ̃ǝ̃lǝ̃ǝ̃ cãwaacindɩ nã, nã́ã́ bàá mãã bà sǝ̃n fǝ̃ǝ̃ Dũnnũw, bà mãã bà ce nĩĩguu mãã.

Bà-lǝ bà ne wà ba-ń ba cãwaacindɩ nã gɩ̀-lǝ gùú cíyà Dũnnũẃ nɔ̃ bà nũɔ̃gu.

8 Bláá tuu bà nǝ̃ǝ̃li; ɲì Tǝẁ fǝ̃́ǝ̃lã́ ɲì dugɔ ɲinɲã nǝ̃ ɲi sáa hi ǹ-haa ɲì nɔ̃nɲã ǹ-cirǝ̃ǝ̃ kuu nã wù saa.»

(Lukaw 11.2-4)

9 «Gɩ̀-lǝ gɩ̀ tammã, círǝ̃̀ǝ̃ Dũnnũw nã nnĩĩ tammã: “Tɩtii yíi mãã drɔgu, ǹ yiirɩ́ bũũ.

10 Ce ǹ yuuntasǝrɩ́ jo ǹ-ji ba dìɛ.

Ya ǹ kusunã cɔ̃mmã ba mã̀ ce cuuw nã, nã́ã́ mã̀ mãã mã̀ ce nĩĩguu mãã drɔgu.

11 Hã-yáà nǝ̃ yì bǝ̃ǝ̃nã wuuri jimããgu.

12 Hãmĩĩ mãã yì ce gaacĩɛ̃ya'n dũndɔw gùú tuugu, yíi yo, ce yì gaacĩɛ̃ya'n dũndɔw gùú tammã-i.

13 Báa ya kuugɩ́ vuu ǹ-dii-yáà diicĩɛ̃rǝdɩ nã, cii yì nã nǝ̃ Diibɩblarǝntiiw.

[Nã̀ã wa Yuuntasǝri, fãngããgu, nǝ̃ bũũmã nǝ̃ yíi saa-i fɩraa.

Kwaya.]”»

14 «Nã̀ã wa, ba-ń ce ǹ-jãn ɲì nã nǝ̃ ɲí ce bà dũndɔw, ɲimãã yo ɲi-ń ce ǹ-jãn ɲì Tǝ Drɔ-Dũnnũw nã, wù ji ce ɲì dũndɔw.

15 Nǝ̃ curow-ń ce ǹ-jãn ɲì nã nǝ̃ ɲí hla wà ɲi síì ce wù dũndɔw, ɲì Tǝẁ síì ce ɲimãã yo ɲì dũndɔw.»

Yesu diiwaarǝdi ǹ-kã sũũ cɔ̃mmã nã

16 «Ɲi-ń dii sũũw, bláá ɲǝ̃ǝ̃ ɲì yigasǝri nã́ã́ kusunɲãhǝ̃nhãltaabaa mãã bà ce nĩĩguu mãã.

Kusunɲãhǝ̃nhãltaaba-ń dii sũũw, ba-ń ce bá ɲǝ̃ǝ̃ bà yigasǝri cwaabá da ǹ-fǝ̃ǝ̃ wà bà-lǝ ba díilá sũũw.

Yáalà mǝ̃́ waa sulammã nǝ̃-ɲã́ã̀: bàá mãã bà ce dɩ̀-lǝ, bà díɛ́ bà pãlli ǹ-tã.

17 Nǝ̃ yíǹ-lǝ, nǝ̃-ń dii sũũw, mǝ̃gaa ǹ yukwaasǝrí ba dɩ̀ fa, nǝ̃ ń saar ǹ yigagɩ́ ba yalla,

18 gɩ̀-lǝ gɩ̀ nã curo'n síì fǝ̃ǝ̃ wà n díilá sũũw.

Nǝ̃ ǹ Tǝw mãã sɔŋmǝ̃ǝ̃rǝ̃ǝ̃gǝgɩ nã, wù-lǝ wù ji fǝ̃ǝ̃ dɩ̀ nã.

Ǹ Tǝ mãã wù da cɔ̃nŋmǝ̃ǝ̃rǝ̃mmã, wù ji pã-n.»

Cíyà Dũnnũ mããcemmã, bláá sɔ̃ gbaasǝri

(Lukaw 12.33-34)

19 «Bláá ba ɲì tɩgii gbaasǝri ɲì kra cuu wáá nã.

Ɲãlw nǝ̃ sĩɛ̃rɩmmã̀ ji gbǝ̃ǝ̃ ǹ-wuuraa ǹ-bǝ̃ǝ̃lǝ̃ǝ̃ dɩ̀ nã yindagǝ nã ŋmãllããbà ji gbǝ̃ǝ̃ ǹ-ka fieri ǹ-tuu-dǝ.

20 Nǝ̃ ɲi saa ɲí ba ɲì tɩgii gbaasǝri ɲì kra Dũnnũ suɔgɩ-i.

Ɲãlw nǝ̃ sĩɛ̃rɩmmã sɩga gbǝ̃ǝ̃ ǹ-wuuraa ǹ-bǝ̃ǝ̃lǝ̃ǝ̃ dɩ̀ nã, yindagǝ nã ŋmãllããba sɩga gbǝ̃ǝ̃ ǹ-ka fieri ǹ-tuu-dǝ.

21 Nã̀ã wa curo ǹ gbaasǝrɩ-ń ba gùú sùɔ́gu, ǹ hiɛ yo, gà ba gùú sùɔ́gɩ-i.»

(Lukaw 11.34-36)

22 «Curo'n yinɲã nǝ̃ nã́ã́ wù cãn'n lampa-i.

Wù yinɲã-ń ba ɲã̀ fa, wù cãndɩ min dɩ̀ ba gbɩgbaamã nã-i.

23 Nǝ̃ wù yinɲã-ń ba ɲã̀ sǝ̃n fa, wù cãndɩ min dɩ̀ ba dudũũmã nã-i.

Gùú mãã gɩ̀ hiil gbɩgbaamã gɩ̀ hã yíì, gɩ̀-lǝ gɩ-ń dĩĩ ǹ saa, ǹ dudũũmã̀ síì ba dudũũm sǝ?»

(Lukaw 16.13)

24 «Curo'n síì gbǝ̃ǝ̃ ǹ-ba cwaaba hǝ̃ǝ̃l tasǝrɩ nã.

Dɩ-ń ce, wudiɛ'n cɔ̃mmã̀ ji bla wù nã, nǝ̃ wudiɛ'n cɔ̃mmã́ ba mã̀ dwal wù nã.

Yindagǝ nã, wú ba wù nɔ̃ wù hã wudiɛw, nã̀ã ba wù diɛ wudiɛw.

Curo'n síì gbǝ̃ǝ̃ ǹ-ba Dũnnũ tasǝrɩ nã, nã̀ã ver ǹ-ba jin'n tasǝrɩ nã.»

Yesuẁ wa yi báa jã cɔ̃m

(Lukaw 12.22-31)

25 «Gùú cíé mǝ̃́ waa nǝ̃-ɲã́ã̀ mǝ̃́ wa, bláá ba ɲì jã ɲì bal'n cɔ̃mmã cuu nã, yindagǝ nã, ǹ-ba ɲì jã ɲì hla'n valɩm'n cɔ̃mmã, yindagǝ nã wà ɲi ji da kuulanãmba danii ǹ-suu ɲì cãndɩ nã.

Nã́ã́ ɲì balli cuu wáá nã dɩ sáa buɔ wuurɩ nã-ì?

Yindagǝ nã ɲì cãn yo, dɩ́ buɔ kuulanãmba nã-ì?

26 Níyà tafyãmba ɲí ne, bà sǝ̃n ce sɩra, bà sǝ nǝ̃ dǝbɩr, nǝ̃ ɲì Tǝ Drɔ-Dũnnũẁ val-ba!

Ɲimãã sǝ̃n buɔ bà-lǝ bà nã-ì?

27 Ɲimãã nã, halǝmblǝ-i nǝ̃ wù mããjãmmã min wù ji gbǝ̃ǝ̃ ǹ-piɛ halle yuugɩ dɩn-i yo wù bãnɲã nã cuu wáá nã?

28 Bii cíé ɲí ba ɲì jã ɲì kuulanãm'n cɔ̃mmã?

Níyà plummãã mãã jierɩ nã, mã̀ mãã mã̀ vãnãã nĩĩgu mãã!

Mã̀ sǝ̃n ce mããcemmã, mã̀ sǝ̃n sɔ̃ kuulanãm.

29 Nǝ̃ mǝ̃̀ waa nǝ̃-ɲã́ã̀, Isɩrayɛl yiɛ'n yuuntii Solmãnw nǝ̃ wù gbaasǝrɩ min, wù sáa da kuulaa mãã yà fa ǹ-hi plum mã́ã̀.

30 Hĩɛ̃guu mãã hĩɛ̃gu, Dũnnũw-ń ba wù par-gǝ nǝ̃ plummã jimããgu nnĩĩ tammã, nǝ̃ cicuɔgu bá ba bà ji tii-gǝ, wù ji ba danii wù ba wù síì par ɲimãã nǝ̃ kuulanãmba ǹ-maa gɩ̀-lǝ?

Ɲì cɔ̃nhũɔ̃gǝgɩ̀ kóllá ǹ-car!

31 Gɩ̀-lǝ gɩ̀ nã, bláá ba ɲì jã wà: “Ɲi ji wuu bii?”

Wà: “Ɲi ji ɲũɔ̃ bii?”

Yindagǝ nã wà: “Ɲi ji dii bii?”

32 Bàá mãã bà sǝ̃n fǝ̃ǝ̃ Dũnnũw, bà-lǝ bàá sṹwã̀ ɲã̀-lǝ ɲã̀ yuunã.

Nǝ̃ ɲimãã Tǝ Drɔ-Dũnnũẁ fǝ̃́ǝ̃lã́ wà ɲì dugɔẃ nàa gɩ̀-lǝ gɩ̀ ɲinɲã min nã.

33 Nǝ̃ ɲimãã bláà ɲì sɔ̃ Dũnnũ yuuntasǝ'n cɔ̃mmã, nǝ̃ sũɔ̃lɩm'n cɔ̃mmã yuunã-i haasǝ, dɩ̀-lǝ dɩ-ń ce wù ji hã-ɲã́ã̀ nǝ̃ ɲã-lǝ ɲã̀ min ǹ-pya nã.

34 Gɩ̀-lǝ gɩ̀ nã, bláá ba ɲì jã cicuɔ'n cɔ̃mmã, nǝ̃́nǝ̃̀ǝ̃ mã̀ nã ɲí hã cicuɔgu.

Yuu wo yuugɩ̀ vaa nǝ̃ gɩ̀ yuunã cɔ̃m-i.»