Lukaw 16

Biɛfǝ̃ǝ̃rǝ̃tii'n cɔ̃mmã

Gɩ̀ furũũgɩ nã, Yesuẃ fǝ̃ǝ̃ ǹ-waa nǝ̃ wù duunãtaaba wà: «Gbaaldiɛẁ yáá wùu kra biɛdiɛ nã wù nãkruɔɲin'n yuugɩ nã, wà wú ba wù ɲãl ɲã̀ nã.

Bá juo taa ǹ-ja-yǝ, wà biɛ wáà, wú nàa wù bǝ̃ǝ̃lǝ̃ǝ̃ wù nãkruɔɲinɲã nã.

2 Gbaalẃ fǝ̃ǝ̃ ǹ-be-yǝ, ǹ-waa nǝ̃-yǝ wà: “Mǝ̃̀ mãã mǝ̃̀ nɔ̃ dìí mãã ǹ-kã ǹ yiɛgu, ǹ síì gbǝ̃ǝ̃ ǹ-ba mǝ̃̀ nãkruɔɲin'n yuugɩ nã hlo, jí pɩgaa-m nǝ̃ ɲã̀ fosǝri.”

3 Biɛẃ ba wù jã-mã wà: “Mǝ̃̀ yuuntiiẁ mãã wù ji nǝ̃nǝ̃ǝ̃ mǝ̃̀ nã mããcemmã nã, mǝ̃̀ ji ce danii?

Mǝ̃̀ ji kãã ba mǝ̃̀ ce sɩra-ì dàa?

Mǝ̃̀ sǝ nǝ̃ gɩ̀ pyãluu.

Dàa, mǝ̃̀ ji kãã ba mǝ̃̀ cirǝ̃ǝ̃ ɲin nã-ì?

Dìí yo, dɩ̀ ce cir mǝ̃̀ nã.

4 Mǝ̃̀ fǝ̃́ǝ̃lã́ mǝ̃̀ mãã mǝ̃̀ ji ce dìí mãã nǝ̃ cwaaba, nǝ̃ mǝ̃̀ tiiw-ń ji nǝ̃nǝ̃ǝ̃ mǝ̃̀ nã, bá da ǹ-hyar-m bà swammã.”

5 Wù yuuntii'n cãmlãrɩ̀ yáá curo wo curo nã, wú fǝ̃ǝ̃ ǹ-ba wù be-ba cwaaba denden.

Wùú nǝ̃n júó dĩɛ̃lãmmã nã, wú yugu-yǝ wà: “Mǝ̃̀ yuuntii'n cãmlãrii mãã ǹ nã nĩɛ̃-ì?”

6 Wú siɛ-yǝ wà: “Nɔ̃m'n gbafiɛ gundii-i.”

Gbaal'n mããcierẃ waa nǝ̃-yǝ wà: “Ǹ cãmlã'n sɛbɛ wɩ̀-i nnĩĩ.

Jiraa kuɔkuɔdiɛgu, ń yal gwaahǝ̃ǝ̃l nǝ̃ nũɔ̃sɔ̃.”

7 Nã̀ã fǝ̃ǝ̃ ǹ-yugu wudiɛw wà: “Yíǹ-lǝ, ǹ saa ń pã nĩɛ̃-ì?”

Wú siɛ-yǝ wà: “Dũm'n bɩgatãnãã gundii.”

Gbaal'n mããcierẃ hã-yǝ nǝ̃ wù cãmlã'n sɛbɛw, nã̀ã waa nǝ̃-yǝ wà wú yal jiɛtuu.

8 Halle ǹ-da wà mããcier wáà, wu sáa sũɔ̃l yo, wù yuuntiiẃ bɩnǝ̃ǝ̃ wù nã wù fǝ̃ǝ̃rǝ̃m'n cɔ̃mmã nã.

Bàá mãã bà nũɔ̃sǝn cɔ̃mmã min wɩ̀-i, cuu wáà cɔ̃mmã, bà-lǝ bà fǝ̃ǝ̃ bà ɲĩɛ̃ blǝm'n tammã, ǹ-ɲǝ̃ǝ̃ bàá mãã gbɩgbaamã nã.

9 «Nǝ̃ mǝ̃n-lǝ, mǝ̃̀ waa nǝ̃-ɲã́ã̀ wà: Blǝ́rà ɲì jambliɛba nǝ̃ cuu wáà gbaasǝrii mãã nã́ã́ ɲãluu-i, nǝ̃ ɲí ba ɲì kãnãã cicuɔ'n cɔ̃mmã nã, dɩ-ń ji hlǝ ɲì nãkrɔnɲã nã, bà ga hyar-ɲã́ã̀ Dũnnũ suɔgu fɩraa.

10 Gùú tii mãã wu-ń mǝ̃gaa ǹ-sũɔ̃l cɔ̃nsaalammã nã, wù ji sũɔ̃l cɔ̃ngǝ̃ngãm yo mã̀ nã.

Gùú tii mãã wu-ń ba wù sáa sũɔ̃l cɔ̃nsaalammã nã, wù síì sũɔ̃l mããgǝ̃ngãm yo mã̀ nã.

11 Gùú cɔ̃mmã-i, ɲi-ń ba ɲì sáa mǝ̃gaa ǹ-sũɔ̃l nǝ̃ cuu wáà gbaasǝri, halii ji hã-ɲã́ã̀ nǝ̃ diihuhordǝdi?

12 Nǝ̃ ɲi-ń ba ɲì sáa mǝ̃gaa ǹ-sũɔ̃l, nǝ̃ Dũnnũẁ hlã-ɲã́ã̀ nǝ̃ gùú gbaasǝrii mãã cuu wáá nã, nã́ã́ wu ga hã-ɲã́ã̀ nǝ̃ ɲì hla'n ɲinɲãã-ì?

13 Mããcierẁ síì gbǝ̃ǝ̃ ǹ-ba cwaaba hǝ̃ǝ̃l tasǝrɩ nã.

Dɩ-ń ce, wudiɛ'n cɔ̃mmã̀ ji bla wù nã, nǝ̃ wudiɛ'n cɔ̃mmã́ ba mã̀ dwal wù nã.

Yindagǝ nã, wú ba wù nɔ̃ wù hã wudiɛw, nã̀ã ba wù diɛ wudiɛw.

Curo'n síì gbǝ̃ǝ̃ ǹ-ba Dũnnũ tasǝrɩ nã, nã̀ã ver ǹ-ba jin'n tasǝrɩ nã.»

Gùú tii mãã cosũɔ̃lyǝw Dũnnũ yinɲã nã

14 Farisĩɛ̃bà mãã bà jin'n cɔ̃mmã̀ yáá mã̀ã gbǝ̃ǝ̃, bà gáa nɔ̃ gɩ̀-lǝ gɩ̀ cãwanĩɛ̃ga, bá ba bà hiil Yesu kwãmmã nã.

15 Yesuẃ fǝ̃ǝ̃ ǹ-waa nǝ̃-ba wà: «Ɲimãã ce cwaa'n yinɲã nã, bá da ǹ-waa wà ɲi sṹɔ̃lã́.

Nǝ̃ Dũnnũ-lǝ, wú nàa wù da ɲì kusunɲã.

Cwaabà mãã bà ne gùú mãã nũɔ̃sǝn kuugu, Dũnnũẁ sǝ̃n caa wú da gɩ̀-lǝ nǝ̃ wù yinɲã.

16 Musa hlũũ'n sɛbɛbà yáá bàa kra dìí nã mãã, nǝ̃ Dũnnũ tanhiilaa'n sɛbɛbà yáá bà waa dìi, cwaabà yáá bà wáà dɩ̀-lǝ dɩ̀-i fuwɔ ǹ-ga kra Yuhanãw mãã wù ɲĩɛ̃ cwaaba, wù jollɩ nã.

Nǝ̃, ǹ-tuu wù jollɩ nã, ǹ-ji hi jimããgu, Dũnnũ yuuntasǝ'n cɔ̃ndudwalɩm wáalà.

Nǝ̃ curo wo curo, wú ba wà wu nã́ã̀ gbǝ̃ǝ̃ ǹ-jãn gɩ̀ yuuntasǝrɩ nã.

17 Drɔkuɔli nǝ̃ ɲũũrũũ'n guumã̀ ji dwal, ǹ-ɲǝ̃ǝ̃ Musa hlũũ'n cãwaablɩri dɩn durummã.

18 Yíi nǝ̃n ɲǝ̃ǝ̃ ǹ-tĩɛ̃ ǹ ciɛw, nã̀ã ver ǹ-taa wudiɛ, gɩ́ nǝ̃ nã́ã́ wù mǝ̃rǝ̃ǝ̃ nǝ̃ curo-i, wùú mãã bà sáa taa.

Nǝ̃ gùú tiiw nǝ̃n taa ciɛw mãã wù bla yà ɲǝ̃ǝ̃ ǹ-tĩɛ̃-yǝ, gɩ́ nǝ̃ nã́ã́ wù mǝ̃rǝ̃ǝ̃ nǝ̃ curo-i, wùú mãã bà sáa taa.»

Gbaalw nǝ̃ kuokuo Lasaar cɔ̃mmã

19 Yesuẃ ver ǹ-waa hlo wà: «Biɛgbaaldiɛẁ yáá dàa, wu-ń ce wú dii kuulaafɩnfaabaa mãã bà kuusǝ, nã̀ã bà yunɲã min, wu-ń ce wú ce bá hĩɛ̃ nũɔ̃sǝn wuuri wù suɔgu, bá ba bà wuu, nã̀ã ba bà ce paaruugu.

20 Nǝ̃ kuokuodiɛẁ yáá dàa, pɩ̀rãnɲã̀ã bǝ̃ǝ̃lǝ̃ǝ̃ wù cãndɩ nã, wu-ń ce wú ba mǝ̃rãmmã nã gɩ̀ gbaal'n fugaa'n nũɔ̃gɩ nã, bà be-yǝ wà Lasaar.

21 Jugugwaagaa mãã gà yáá gà duruu gbaal'n wuur'n sùɔ́gɩ nã, wu-ń ce wú ba wù ne, wà wu nã́ã̀ da wú yiirǝǝ wù nũmmã nã nǝ̃ gà-lǝ.

Nǝ̃ halle vambà yáá ba-ń ce bá juo ba bà nãn wù pɩ̀rãnɲã.

22 Yuudagǝ, kuokuoẃ juo ku, mɛlɛgɛbá tuu-yǝ, ǹ-kã nǝ̃-yǝ ǹ-kãã kra wù nã Ibramãw taara.

Gbaal yo, wú juo ku, bá dii wù pĩɛ̃ndi.

23 Wú kãã ba cugutaa'n wanjiram'n sùɔ́gɩ nã.

Ǹ-ya wú ba ywaruugɩ nã, wù gáa ciir wù yuugu, wú maa ǹ-da Ibramãw halbaa nǝ̃ Lasaarẁ yà jiraa wù taara.

24 Gbaalẃ dii ǹ-hiil wù yalli wà: “Mǝ̃̀ tǝ Ibramã, mǝ̃̀ ywárrá ǹ-car dǝ̃ǝ̃m mã́ã̀ nã nhlíɛ̀, ne mǝ̃̀ hujãndi, nǝ̃ ń tĩɛ̃ Lasaarẃ kãã dii wù nǝ̃blɩri hũmmã nã, ǹ-juo piɛ-dǝ mǝ̃̀ nãmbendɩ nã.”

25 Ibramãẃ siɛ-yǝ wà: “Mǝ̃̀ bíɛ́, kãnãã ń ne: yíǹ díɛ́ ǹ mããfɩnfammã cuuw nã, nǝ̃ Lasaar-lǝ, wú ba wù yáá hujãncɔ̃mmã nã.

Nǝ̃ kuɔkuɔ-lǝ, wù hiɛgà sã́rrã́ nhlíɛ̀, nǝ̃ yíǹ ba ywaruugɩ nã.

26 Ǹ pya dɩ̀-lǝ dɩ̀ drɔ, jũɔ̃kɩnkandaarɩ́ nìɛ dìi buruɔ hãmĩĩ nã nǝ̃ ɲimãã.

Gùú cíé curo'n síì gbǝ̃ǝ̃ ǹ-hlǝ hãmĩĩ nãã, ǹ-huɔl jũɔ̃ gúɔ̀, ǹ-kã ɲimãã nãã.

Curo'n síì gbǝ̃ǝ̃ ǹ-hlǝ ɲimãã yo ɲì nãã, ǹ-huɔl ǹ-jo hãmĩĩ nãã.”

27 Gbaalẃ ver ǹ-waa nǝ̃-yǝ wà: “Mǝ̃̀ tǝ, gɩ-ń ba gɩ̀-lǝ gɩ̀ tammã, mǝ̃̀ cirǝ̃ǝ̃ ǹ nã, tĩɛ̃ Lasaarẃ kã mǝ̃̀ tǝ suɔgu,

28 mǝ̃̀ hãmba ndii bá nàa, wú kãã gbǝ bà nã, bàá yo, ba báa ga jo ywaruu'n sùɔ́ gúɔ́ nã.”

29 Ibramãẃ siɛ-yǝ wà: “Musa hlũũ'n sɛbɛba nǝ̃ Dũnnũ tanhiilaa'n sɛbɛbá nàa bà saa, bà saa bá nɔ̃ ǹ-hã-ba!”

30 Gbaalẃ ver ǹ-waa nǝ̃-yǝ wà: “Mǝ̃̀ tǝ Ibramã, bà sǝ̃n caa bá nɔ̃ ǹ-hã bà-lǝ, nǝ̃ curow-ń hlǝ cugutaa'n lǝri ǹ-kã bà nãã, bà ga nǝ̃nǝ̃ǝ̃ bà gaacĩɛ̃yaga nã, nã̀ã tuu ǹ-tu.”

31 Gùú nã-i, Ibramãẃ fǝ̃ǝ̃ ǹ-waa nǝ̃-yǝ wà: “Ba-ń ba bà sáa nɔ̃ ǹ-hã Musaw, nǝ̃ Dũnnũ tanhiilaaba, halle curow-ń nĩĩ ǹ-hlǝ cugutaaba sǝ̃ǝ̃nã yo, bà sɩga nɔ̃ ǹ-hã-yǝ.”»