Lukaw 15

Tũnvaalaayǝ'n dal'n cɔ̃mmã

Nãnhũɔ̃rããba nǝ̃ diicĩɛ̃rǝntaaba min, bá ba bà kuganãã Yesuw nã, bà nɔ̃ wù cãwanĩɛ̃ga.

2 Farisĩɛ̃ba nǝ̃ Musa hlũũ'n yuntaabá ba bà hugɔ̃nãã, nã̀ã ba bà waa wà: «Biɛ wáà, wù hyar diicĩɛ̃rǝntaaba, nã̀ã ba wù wuu wuuri nǝ̃-ba.»

3 Gùú nã-i, Yesuẃ fǝ̃ǝ̃ ǹ-waa cãwaadũũm mã́ã̀ nǝ̃-ba wà:

4 «Halii ɲimãã sǝ̃ǝ̃nã, wu-ń ba nǝ̃ tũmãm gundiiw, nǝ̃ wù dɩnẁ vaalaa, wù síì ya bà dɩgaliɛẃ ba, wuuram'n sùɔ́gɩ nã, nã̀ã kãã caa wùú mãã wù váaláa, ǹ-da-yǝ haasǝ?

5 Wu-ń gáa da-yǝ, gɩ́ dwal wù nã, wú tuu ǹ-taa-yǝ wù bũɔ̃gɩ nã, ǹ-ver nǝ̃-yǝ.

6 Wù gáa hi wù suɔgu, wú be wù jambliɛba, nǝ̃ wù tuɔrataaba, ǹ-waa nǝ̃-ba wà: “Jówà yí ce kweyi-kweyiw, mǝ̃̀ tũmũũw mãã wù yáá wùu vaalaa, mǝ̃̀ gáa da-yǝ.”

7 Mǝ̃̀ waa-dǝ nǝ̃-ɲã́ã̀: dɩ́ nǝ̃ nĩĩgɩ-i, diicĩɛ̃rǝntii dɩnw-ń nǝ̃nǝ̃ǝ̃ wù gaacĩɛ̃yaga nã, nã̀ã tuu ǹ-tu, gɩ̀ dudwalɩmmã́ bũũ Dũnnũ suɔgu, ǹ-ɲǝ̃ǝ̃ cocindɩ nã mãã, bà ne wà ba sṹɔ̃lã́, ba sǝ̃n caa verɩmdamã hlo.

Worblɩvaalaadǝ'n dal'n cɔ̃mmã

8 «Dàa, cijal hawɩ-i, wu-ń ba nǝ̃ gɩ̀ bǝ̃ǝ̃'n worbii nũɔ̃sɔ̃w, nǝ̃ dɩ̀ dɩndɩ vaalaa, wù síì tii fitɩnw, nã̀ã per duugu, ǹ-da ǹ-caa-dǝ, fuwɔ ǹ-ga da-dǝ.^a

9 Wu-ń ga da-dǝ, wú be wù jambliɛba, nǝ̃ wù tuɔrataaba, nã̀ã waa nǝ̃-ba wà: “Jówà yí ce kweyi-kweyiw, mǝ̃̀ jáa da mǝ̃̀ worblɩrii mãã dɩ̀ yáá dìi vaalaa.”

10 Mǝ̃̀ waa nǝ̃-ɲã́ã̀, diicĩɛ̃rǝntii dɩndɩnw-ń nǝ̃nǝ̃ǝ̃ wù gaacĩɛ̃yaga nã nã̀ã tuu ǹ-tu, gɩ̀ dudwalɩmmã ba nĩĩgɩ-i Dũnnũ mɛlɛgɛbaa saa.»

Tãnkuuraaba hǝ̃ǝ̃lbaa nǝ̃n yáá bàa vaalaa, bà dal'n cɔ̃mmã

11 Yesuẃ fǝ̃ǝ̃ ǹ-waa hlo wà: «Biɛdiɛẁ yáá nǝ̃ tãnkuuraaba hǝ̃ǝ̃l.

12 Yuudagǝ, wuusaalẃ fǝ̃ǝ̃ ǹ-waa nǝ̃-yǝ wà: “Tɩtii, hã mã́ã̀ nǝ̃ mǝ̃̀ sùɔ́'n yuɔri.”

Tiiyǝẃ fǝ̃ǝ̃ ǹ-yuɔ wù nãkruɔɲinɲã, ǹ-hã wuusaalw nǝ̃ wù yuɔri.^b

13 Bãndaɲã gɩ̀ furũũgɩ nã, wuusaalẃ suur wù yuɔri, nã̀ã tuu gɩ̀ jinɲã, ǹ-ta ǹ-maar sɔhaluudagǝ nã, ǹ-kãã bǝ̃ǝ̃lǝ̃ǝ̃ wù jinɲã min nã, tɔ̃njãnsǝrɩ nã.

14 Wù gáa bǝ̃ǝ̃lǝ̃ǝ̃ ɲã̀ min nã ǹ-tã, nũmdaamã́ kãã jãn gɩ̀ sùɔ́gɩ nã, wú kãã ba wù síì da wuur yo ǹ-wuu, ǹ-ba ywaruugɩ nã.

15 Wú kãã dii wù hla ǹ-hã gɩ̀ sùɔ́'n biɛdiɛ, wù-lǝ wú tĩɛ̃ wú maar jierɩ nã, ǹ-kãã ba wù cii wù pyariɛba.

16 Nũmmã́ kãã ba mã-ń ce mã́ huu wù yigagu, wú ba wù ne wà wu nã́ã̀ da pyariɛ'n wuuri wú wuu, nǝ̃ curo'n síì hã-yǝ nǝ̃ dìí yo.

17 Gùú nã-i, wú kãã jiraa ǹ-blǝ-dǝ ǹ-ne, ǹ-ji waa wà: “Mǝ̃̀ tǝ mããcieraaba min bà da wuuri bà wuu nǝ̃ dɩ̀ yanãã, nǝ̃ mǝ̃n ba mǝ̃̀ ku nũmmãã nhlíɛ̀.

18 Mǝ̃̀ ji ver ǹ-kã ǹ-ga pɩgaa mǝ̃̀ hla nǝ̃ mǝ̃̀ tǝw, nã̀ã waa nǝ̃-yǝ wà: tɩtii, mǝ̃̀ cíé ǹ-jãn Dũnnũw nã, nã̀ã ce ǹ-jãn yíi yo ǹ nã.

19 Mǝ̃n sǝ̃n saa ń blǝ-m ǹ tãnkuur hlo.

Tuu-m mǝ̃́ ba nã́ã́ ǹ mããcier-i.”

20 Nã̀ã fǝ̃ǝ̃ ǹ-tuu wù tǝ suɔ'n hlũũgu, ǹ-ba wù maar.

Wù tǝẁ gáa maa ǹ-da-yǝ halbaa, wù hujãndɩ́ blǝ-yǝ ǹ-car, wú suro ǹ-sɔ̃ ǹ-jǝ̃ǝ̃lǝ̃ǝ̃-yǝ, ǹ-kãã pɩpɩrĩɛ̃ wù nã ǹ-ba wù mũɔ̃sǝrãã wù nã.

21 Biɛnĩĩẃ fǝ̃ǝ̃ ǹ-waa nǝ̃-yǝ wà: “Tɩtii, mǝ̃̀ cíé ǹ-jãn Dũnnũw nã, nã̀ã ce ǹ-jãn yíi yo ǹ nã, mǝ̃̀ sǝ̃n saa ń blǝ-m ǹ tãnkuur hlo.”

22 Nǝ̃ bà hillɩ nã suɔgɩ nã, tiiyǝẃ waa nǝ̃ wù mããcieraaba wà: “Sṹwã̀ ɲi ga tuu kuulaadiiyǝpɩpuɔlayǝw mãã wù fa ǹ-ɲǝ̃ǝ̃ bà min, ɲi ji dii-yǝ ɲí hã mǝ̃̀ bíɛ́w, nǝ̃ ɲí dii mǝ̃myãri wù nǝ̃blɩrɩ nã, nǝ̃ viɛtaanɲã wù vyanɲã nã, ɲí hã-yǝ.

23 Nǝ̃ ɲí blǝ nǝ̃ǝ̃valɩyǝw, ɲí ko-yǝ, yí ba yì wuu, nã̀ã ba yì ce paaruugu.

24 Ɲi díɛ́ mǝ̃̀ bíɛ́ mãã nnĩĩ, wù yáá wùu ku-i, nã̀ã ji ver ǹ-ba nũmǝ̃nãw.

Wù yáá wùu vaalaa-i, nǝ̃ mǝ̃̀ jáa da-yǝ.”

Gɩ̀-lǝ gɩ̀ nã, bá du paaruugɩ nã.

25 «Gɩ̀-lǝ gɩ̀ bǝ̃ǝ̃gu, wù byadĩɛ̃lẁ yáá dàa fugagɩ nã.

Wù gáa ba wù jo, ǹ-juo kuganãã suɔgɩ nã, wú ba wù nɔ̃ ɲããmǝ̃ǝ̃l'n dullɩ nã, nǝ̃ cwaa'n kweyi-kweyiw.

26 Wú fǝ̃ǝ̃ ǹ-be bà mããcierdiɛ, ǹ-yugu-yǝ, wà bincɔ̃m cíé.

27 Mããcierẃ waa nǝ̃-yǝ wà: “Ǹ hǝ̃ǝ̃ẁ vérrá ǹ-jo.

Nǝ̃ ǹ tǝẁ mãã wù jáa da-yǝ hinnǝ̃, wú ce bá ko nǝ̃ǝ̃valɩyǝw ǹ-hã-yǝ.”

28 Gùú nã-i, wù hiɛgá dũ, wú cĩĩnǝ̃ǝ̃ suɔgɩ nã.

Wù tǝẃ fǝ̃ǝ̃ ǹ-hlǝ ǹ-kãã ba wù jiɛriɛ nǝ̃-yǝ wà wú jãn suɔgu.

29 Biɛnĩĩẃ hla, nã̀ã waa nǝ̃ wù tǝw wà: “Mǝ̃n nìɛ ǹ mããcemmã nã gɩ̀ biiga nĩɛ̃-i nnĩĩ?

Mǝ̃̀ sáa hi ǹ-hla ǹ cɔ̃m ǹ-da.

Nǝ̃, ǹ sáa hi ǹ-hã-m nǝ̃ halle wurɔblɩw mã́ã yo, mǝ̃́ ko-yǝ yí paaraa nǝ̃ mǝ̃̀ jambliɛba.

30 Nǝ̃ ǹ bíɛ́ wáà mãã wù kã́ã́ ǹ-ga bǝ̃ǝ̃lǝ̃ǝ̃ ǹ nãkruɔgɩ nã nǝ̃ canããba, wù-lǝ wù gáa ver ǹ-jo, ń fǝ̃ǝ̃ ǹ-ko nǝ̃ǝ̃valɩyǝw ǹ-hã-yǝ.”

31 Tiiyǝẃ fǝ̃ǝ̃ ǹ-waa nǝ̃-yǝ wà: “Mã́ã bíɛ́, yíǹ nìɛ fɩraa mǝ̃̀ tuɔra, mǝ̃̀ nãkruɔɲinɲã min yíi ɲin-i!

32 Nǝ̃, ǹ hǝ̃ǝ̃w mãã nnĩĩ, wù yáá wùu ku-i, nã̀ã ji nĩĩ.

Wù yáá wùu vaalaa-i, nǝ̃ yi ji da-yǝ.

Gùú cɔ̃mmã nã-i, yi saa yí ce paaruugu ɲĩɛ̃gɩ nã.”»