Lukaw 17

Yesuẁ wa curo'n báa dii wù nãcuroẁ diicĩɛ̃rǝdɩ nã, nã̀ã waa kafal cɔ̃mmã

Yesuẃ waa nǝ̃ wù duunãtaaba wà: «Cɔ̃mmãã mãã mã̀ ce cwaabá ba bà ver nǝ̃ furũũ, mã̀ síì ba mã̀ naa.

Nǝ̃ yíi mãã ǹ jo nǝ̃ gɩ̀ cɔ̃mmã, hujãncɔ̃mmã̀ ji hi-n.

2 Ba-ń nũũ nãmlãri gɩ̀ tuuntii'n bũɔ̃gɩ nã, nã̀ã nǝ̃ǝ̃ ǹ-dii-yǝ lwaakɩnkandɩ nã, gùú ji buɔ gɩ̀ tii nã, ǹ-ɲǝ̃ǝ̃ wú ce tãnkuurẁ dɩnẃ duruu Dũnnũ hlũũgɩ nã.

3 Blǝ́rà ɲì hla nã.

Ǹ cwanĩĩw-ń ce ǹ-jãn ǹ nã, waa dɩ́ gbǝ̃ǝ̃ nǝ̃-yǝ.

Wu-ń nɔ̃ ǹ-hã-n, nã̀ã nǝ̃nǝ̃ǝ̃ nã̀ã tuu ǹ-tu, ń ce wù dũndɔw.

4 Halle wu-ń ce ǹ-jãn ǹ nã ǹ-gbãlãã yuugɩ dɩn kusuugɩ nã, nǝ̃ bǝ̃ǝ̃ wo bǝ̃ǝ̃, wú juo hũɔ̃ wù yuɔrɔmmã, nã̀ã nǝ̃nǝ̃ǝ̃ nã̀ã tuu ǹ-tu, ń ce wù dũndɔw.»

Dũnnũ hũɔ̃mãã mãã mã̀ pyar gùú dugɔw

5 Yesu tĩɛ̃taabá waa nǝ̃-yǝ wà: «Yitii, ce kuugɩ́ piɛ yì hũɔ̃mã nã ǹ cɔ̃mmã nã.»

6 Yitiiẃ siɛ-ba wà: «Halle yíi mãã ǹ hũɔ̃mã-ń ba nã́ã́ fom blɩ-i yo, ǹ ji gbǝ̃ǝ̃ ǹ-waa nǝ̃ tubikuu gúɔ̀ wà gɩ́ fuur gɩ̀ ɲũmǝ̃nǝ̃ǝ̃ba, ǹ-ga so-ba lwaakɩnkandɩ nã, ǹ da dìi ce.»

Mããcierw mãã wù sáalá wú ce dìi

7 Yesuẃ fǝ̃ǝ̃ ǹ-waa nǝ̃ wù duunãtaaba wà: «Ɲimãã sǝ̃ǝ̃nã, halii lɔ ji hlǝ wancendɩ nã, yindagǝ nã fugagɩ nã ǹ-jo, wú waa wà: “Paa ń jiraa ǹ-wuu wuuri.”

8 Nã́ã́ wù síì ver ǹ-waa nǝ̃-yǝ wà: “Ta n ga hĩɛ̃ mǝ̃̀ wuurii, nǝ̃ ń kãã hiil ǹ kuulanãmba, nǝ̃ ń dii badaba, ǹ-juo tuu-dǝ ǹ-hã mǝ̃́ wuu nã̀ã ɲũɔ̃, mǝ̃-ń ji wuu ǹ-tã, yíǹ fǝ̃ǝ̃ ǹ-kãã wuu nã̀ã ɲũɔ̃.”

9 Lɔẁ cíé gùú mããcemmãã mãã ǹ-hã wù tiiw, wù tiiẁ ji naa wú fyãn-yǝ gɩ̀ mããcem'n cɔ̃mmã nã-ì?

10 Dɩ́ nǝ̃ nĩĩgɩ-i ɲimãã yo ɲì saa.

Yitii Dũnnũw-ń wa ɲí ce kuu wo kuu, ɲi-ń ce-gǝ ǹ-tã, wáalà wà ɲimãã-lǝ, lwɛ-i, gɩ́ sáa hi fyãnuu'n kuu, wà ɲi cíé ɲì mããcem-i.»

Yesuẁ buɔ sǝ̃nkũnãã nũɔ̃sɔ̃w

11 Gùú nã-i, Yesuẃ fǝ̃ǝ̃ ǹ-ba wù duu tɩrǝǝ mãã wù buruɔ Samari yiɛgɩ nã nǝ̃ Galile yiɛgu, ǹ-ba wù maar Serusalɛmgu.

12 Wù gáa ba wù hi lǝdarǝ, sǝ̃nkũnãã nũɔ̃sɔ̃daabá ba bà jǝ̃ǝ̃lǝ̃ǝ̃-yǝ, ǹ-juo hiraa halbaa,

13 nã̀ã ba bà maa bà waa nǝ̃-yǝ wà: «Yesu, Yigantii, ne yì hujãndi!»

14 Yesuẁ gáa da-ba, wú waa nǝ̃-ba wà: «Kã́ã̀ Yahudyaba puruɔntaaba nãã, bá ga ne-ɲã́ã̀ ǹ-ne!»

Bà gáa ba bà maar, bá buɔ hlũũgɩ nã.

15 Bà sǝ̃ǝ̃nã, wudiɛẁ gáa da yà buɔ, wú ver ǹ-hiil wù yalli, ǹ-ba wù bũũ Dũnnũẁ wù kã Yesuw nãã.

16 Wù gáa kãã hi, wú duruu ǹ-curǝǝ wù taaragu, ǹ-ba wù dũũ kwayaw wù hã-yǝ.

Samari yiɛntabiɛ yáá.

17 Yesuẃ fǝ̃ǝ̃ ǹ-waa wà: «Cwa nũɔ̃sɔ̃w min sáa buɔ-ì?

Nǝ̃ cwa densǝ dɩgaliɛ-lǝ, wɩ̀-i haa-ì?

18 Bà-lǝ bà sǝ̃ǝ̃nã, curo'n sáa ga da wù ga ver ǹ-juo dũũ kwayaw Dũnnũw nã, nã́ã́ niɛrabiɛ wáà sǝ?»

19 Nã̀ã fǝ̃ǝ̃ ǹ-waa nǝ̃-yǝ wà: «Suro ń maar, ǹ hũɔ̃mã̀ kórrá-n.»

Dũnnũ yuuntasǝ'n hil'n cɔ̃mmã

(Mãtiyew 24.23-28, 37-41)

20 Yuudagǝ, Farisĩɛ̃bá yugu Yesuw wà Dũnnũw ji kra wù yuuntasǝrɩ nã bii bǝ̃ǝ̃-i?

Wú siɛ-ba wà: «Kuu'n síì ce curoẃ da Dũnnũ yuuntasǝ'n hil'n bǝ̃ǝ̃gu.

21 Curo'n síì waa nǝ̃-ɲã́ã̀ wà: “Dɩ̀-i nhlíɛ̀, yindagǝ nã, dɩ̀-i náà.”

Nǝ̃ ɲi saa ɲí fǝ̃ǝ̃ wà Dũnnũ yuuntasǝrɩ́ nìɛ ɲì sǝ̃ǝ̃nã ǹ-tã.»

22 Nã̀ã fǝ̃ǝ̃ ǹ-waa nǝ̃ wù duunãtaaba wà: «Yuudaagɩ́ nàa gɩ̀ jo, ɲi ji ba ɲì caa ɲi nã́ã̀ da Curonbiɛw, halle yuugɩ dɩngu dɩn, nǝ̃ ɲi síì da-yǝ.

23 Gɩ̀-lǝ gɩ̀ nã, bà ji ba ba-ń ce bá waa nǝ̃-ɲã́ã̀ wà: “Wɩ̀-i nhlíɛ̀, wɩ̀-i náá.”

Bláá duu bà nã.

24 Curonbiɛ'n jol'n yuugu, wù ga jo nã́ã́ Dũnnũẁ mãã wu-ń ce wú ɲĩɛ̃sǝ, nǝ̃ gɩ̀ gbɩgbaamã́ hlǝ ǹ-tuu drɔkuɔl'n yuugɩ nã ǹ-ga kra gɩ̀ mlãrɩ nã.

25 Nǝ̃ gɩ̀ saa wú ywar dugɔ haasǝ, nǝ̃ kuɔkuɔtaa yo, bá hla-yǝ, nǝ̃ wu ga fǝ̃ǝ̃ ǹ-ver ǹ-jo.

26 «Dìí mãã dɩ̀ yáá dɩ̀ ce Nũhũ bǝ̃ǝ̃gu, dìí tuugu ji ba dɩ̀ ce Curonbiɛ'n jol'n bǝ̃ǝ̃ yo.

27 Cwaabà bla ɲããwuugɩ nã, nã̀ã ba ɲããɲũɔ̃ɲã nã, bà taa canããba, nã̀ã ba bà taa bà hiil bà bisiiba, fuwɔ gùú yuuguu mãã Nũhũw ji jãn batow kusunã.

Dɔkɩnkandɩ́ fǝ̃ǝ̃ ǹ-jo ǹ-juo ko bà min.

28 Dɩ̀ ji ba nã́ã́ cwaabà yáá bà ce gùú tuuguu Lɔtɩ bǝ̃ǝ̃ yo.

Bà bla ɲããwuugɩ nã, nã̀ã ba ɲããɲũɔ̃nɲã nã, bà suur ɲinɲãã bà hã bà ɲĩɛ̃, bà kɔ̃ dũmmã, nã̀ã ba bà mã donɲã.

29 Nǝ̃ gùú yuuguu mãã Lɔtɩẁ gáa hlǝ Sodɔm lǝ'n kusuugɩ nã, Dũnnũẃ ce hlɔ̃mmãã mãã mã̀ ye, nǝ̃ dǝ̃ǝ̃mdaamã́ hlǝ drɔgu, nã́ã́ duɔ-i, ǹ-juo nɔ̃ ǹ-ko bà min.

30 Curonbiɛẁ mãã wù ji pa gùú yuugu, dɩ̀ ji ce nĩĩgɩ-i.

31 «Gɩ̀-lǝ gɩ̀ yuugu, yíi nǝ̃n ba taasǝ̃ǝ̃nǝ̃ǝ̃gu, n báa jãn duugu n ga tuu ǹ wariɛga.

Yíi nǝ̃n ba fugagɩ nã, n báa ver ń kũũ suɔgɩ nã.

32 Kã́nã̀ã ɲí ne, dìí nǝ̃n híí Lɔtɩ ciɛw.

33 Gùú tii nǝ̃n wa wú cii wù yuugɩ nã, wù ji naa-gǝ, nǝ̃ gùú tii mãã wu-ń hũɔ̃ kuugu mã́ã cɔ̃mmã nã, wù ji ɲãl gɩ̀ nã.

34 Mǝ̃̀ waa-dǝ nǝ̃-ɲã́ã̀, gɩ̀-lǝ gɩ̀ yuugu, cwaaba hǝ̃ǝ̃lbà-ń ba bàa mǝ̃rǝ̃ǝ̃ guumǝ̃rãkuugɩ dɩngɩ nã, bà ga tuu wù dɩnw ǹ-ta nǝ̃-yǝ, nǝ̃ wudiɛẃ ba.

35 Canããba hǝ̃ǝ̃lbà-ń ba bà jasǝ jũmmã bà min, bà ga tuu wù dɩnw ǹ-ta nǝ̃-yǝ nǝ̃ wudiɛẃ ba.

36 [Bibyanããba hǝ̃ǝ̃lbà-ń ba fugagɩ nã, bà ga tuu wù dɩnw ǹ-ta nǝ̃-yǝ, nǝ̃ wudiɛẃ ba.]»

37 Gùú nã-i, Yesu duunãtaabá fǝ̃ǝ̃ ǹ-yugu-yǝ wà: «Yitii, dɩ̀-lǝ dɩ̀ ga ce haa yiɛ?»

Wú siɛ-ba nǝ̃ cãwaadũũm mã́ã̀ wà: «Pĩɛ̃ndɩ-ń ba gùú sùɔ́guu mãã, dũnǝ̃ǝ̃bà ga tɩgii gùú sùɔ́gɩ-i.»