Lukaw 18

Curo'n báa ywar Dũnnũcirǝ̃ǝ̃gǝgɩ nã

Yesuẃ waa cãwaadũũmã, ǹ-pɩgaa wù duunãtaaba wà ba saa bá ba bà cirǝ̃ǝ̃ Dũnnũw nã fɩraa, ba báa ywar.

2 Wú waa nǝ̃-ba wà: «Sugojarradiɛẁ yáá dàa lǝdarǝ, wù sǝ̃n sɔ̃ Dũnnũw nã, nã̀ã ji wa curo.

3 Nǝ̃ blakuuciɛdiɛẁ yáá dàa gɩ̀ lǝrɩ dɩndɩ nã, bàa da cɔ̃mmã nã nǝ̃ biɛdiɛ, wú ba wù kã wù sugulǝ sugojarra wáà cãndi, wà wú hũɔ̃ wù nũɔ̃gu, ǹ-hã-yǝ nǝ̃ wù diidwaldǝdi.

4 Sugojarraẁ sáá wù caa wú pɛ wù nã gɩ̀ ji hǝ̃ǝ̃sǝ, gɩ̀ furũũgɩ nã, wú waa wà: “Halle mǝ̃n ba mǝ̃̀ sǝ̃n sɔ̃ Dũnnũw nã, nã̀ã ba mǝ̃̀ sǝ̃n sɔ̃ cwaaba nã-i yo,

5 cijal wáà mãã wù jáa ba wù ywar-m, mǝ̃̀ ji hã-yǝ nǝ̃ wù diidwaldǝdi, wu báa da ǹ-ba wù huul mǝ̃̀ cãndi.”»

6 Nǝ̃ Yitiiẃ fǝ̃ǝ̃ ǹ-waa wà: «Sugojarra wáà mãã wù sáa sũɔ̃l, ɲi nṹɔ̃́ wù mãã wù wáalá dìí mãã!

7 Nǝ̃ Dũnnũẁ níé ǹ-hiil bàá mãã, ba-ń ba bà be-yǝ fɩraa, bà cirǝ̃ǝ̃ wù nã, ɲi kãn wà wu ji ya bá fennãã, wu síì hũɔ̃ bà nɔ̃nɲã-ì?

8 Mǝ̃̀ waa-dǝ nǝ̃-ɲã́ã̀, wù ga hiil bà wuɔlaaba kaliɛ.

Nǝ̃ Curonbiɛw-ń ga ver ǹ-jo, nã́ã́ wu ga juo hi cwaaba hũɔ̃ wù cɔ̃mmã-ì?»

Farisĩɛ̃biɛw, bá nǝ̃ nãnhũɔ̃r'n cɔ̃mmã

9 Gɩ̀ furũũgɩ nã, Yesuẃ juo waa cãwaadũũm mã́ã̀, ǹ-ja gùú cwaabaa mãã bà yáá bà ne wà bà-lǝ ba sṹɔ̃lã́ Dũnnũ hlũũgɩ nã, nã̀ã ba bà diɛ cwaa'n dɩgaliɛw.

10 Wà: «Cwaaba hǝ̃ǝ̃ldaba yáá bàa kã Yahudyaba tɩgim'n duugɩ nã, bà kã bà ga cirǝ̃ǝ̃ Dũnnũw nã, wù dɩnẁ yáá Farisĩɛ̃biɛ-i, nǝ̃ wudiɛẃ bà nãnhũɔ̃rw.

11 Farisĩɛ̃biɛẃ kãã suro ǹ-hiraa, ǹ-ba wù waa cãwanĩɛ̃ gáà nǝ̃ Dũnnũẁ wù hiɛga nã wà: “Dũnnũ, mǝ̃̀ dũũ kwayaw mǝ̃̀ hã-n, mǝ̃n mãã mǝ̃̀ sǝ cwaa'n dɩgaliɛ tammã: bà duruu cwaaba nã, bà sǝ bàa sũɔ̃l, bà puɔr canããba.

Mǝ̃̀ dũũ kwayaw mǝ̃̀ hã-n ǹ-tu hlo, mǝ̃̀ fǝ̃́ǝ̃lã́ wà mǝ̃ sǝ nãnhũɔ̃r wáà tammã.

12 Saajaluu wo saajaluu, mǝ̃̀ dii sũũw bãnɲã hǝ̃ǝ̃l, nã̀ã ba mǝ̃̀ hiil mǝ̃̀ dalaagɩ min jagaw.”

13 Nãnhũɔ̃r-lǝ, wú suro ǹ-hiraa halbaa, ǹ-ba síì gbǝ̃ǝ̃ ǹ-haar wù yuugu ǹ-ne drɔgu, ǹ-ba wù ne wà wù-lǝ wu sǝ̃n saa wú cirǝ̃ǝ̃ Dũnnũw nã, nã̀ã ji fǝ̃ǝ̃ ǹ-ba wù jiɛriɛ nǝ̃ Dũnnũw wà: “Eh Dũnnũ, ne mǝ̃̀ hujãndi, diicĩɛ̃rǝntii nǝ̃ mã́ã̀.”

14 Nǝ̃ mǝ̃̀ waa nǝ̃-ɲã́ã̀: biɛ wáà ver ǹ-ba wù kũũ, Dũnnũ yà hũɔ̃ ǹ-ce wú ba cosũɔ̃lyǝw, nǝ̃ Farisĩɛ̃biɛ ba.

Gùú cíé yíi nǝ̃n wa ń yuguraa ǹ hla nã, Dũnnũw hɩr-n-i, yíi nǝ̃n hɩr ǹ hla, Dũnnũẁ yuguraa ǹ nã-i.»

Bàá mãã tãnkuurbii'n tammã, Dũnnũ yuuntasǝrɩ nǝ̃ bàá saa-i

(Mãtiyew 19.13-15 ; Markaw 10.13-16)

15 Halle tãnkuurbii yo, cwaabà yáá bà jo nǝ̃-ba Yesuw nãã, wà wu piɛ wù nãkruɔgu bà drɔ.

Wù duunãtaabà gáa da-ba, bá ba bà gãnãã nǝ̃-ba.

16 Yesuẃ hla nã̀ã ce bá jo nǝ̃-ba wù nãã, nã̀ã fǝ̃ǝ̃ ǹ-waa nǝ̃ wù duunãtaaba wà: «Yáalà bá jo mǝ̃̀ nãã, bláá ɲǝ̃ǝ̃-ba!

Gùú tii mãã wu-ń ba tãnkuuraa báàbà tammã, wù nũɔ̃gɩ nàa Dũnnũ yuuntasǝ'n cɔ̃mmã nã.

17 Yáalà mǝ̃́ waa sulammã nǝ̃-ɲã́ã̀: yíi nǝ̃n ba ǹ sáa hũɔ̃ Dũnnũ yuuntasǝ'n cɔ̃mmã tãnkuurblɩ'n tammã, ǹ síì da ǹ-jãn dɩ̀ nã.»

Gbaalw nǝ̃ Dũnnũ yuuntasǝ'n cɔ̃mmã

(Mãtiyew 19.13-15 ; Markaw 10.13-16)

18 Yahudyaba yuuntiidiɛẃ yugu Yesuw wà: «Kaltiihuhoryǝ, mǝ̃̀ saa mǝ̃́ ce hadi nã̀ã da fɩraa nũmǝ̃nãsǝri?»

19 Yesuẃ waa nǝ̃-yǝ wà: «Danii ń ba ǹ be-m cohuhor?

Cohuhor'n sɩriɛ, nã́ã́ Dũnnũ dɩn sǝ.

20 Ǹ mãã ǹ fǝ̃́ǝ̃lã́ Dũnnũẁ kárrá dìí nã mãã wà: “N sǝ̃n saa ń mǝ̃rǝ̃ǝ̃ curodiɛ nã́ã́ ǹ hla'n ciɛ yindagǝ nã ǹ hla'n bla sǝ, n báa ko curo, n báa ŋmã, n báa bǝr ǹ-dii curo nã, nǝ̃ ń bũũ ǹ tǝba nǝ̃ ǹ ɲũw.”»

21 Biɛẃ siɛ-yǝ wà: «Mǝ̃n cíé gà-lǝ gà min mǝ̃̀ yigakaalagǝ'n bǝ̃ǝ̃gu dìi.»

22 Yesuẁ gáa nɔ̃ gɩ̀ cãwandi, wú waa nǝ̃-yǝ wà: «Cɔ̃mmã dɩn yánã́ã ǹ saa: Kã n ga suur ǹ nãkruɔɲinɲã min, nǝ̃ ń yuɔ gɩ̀ jinɲã ń hã kokwaaba.

Dũnnũẁ ga hã-n nǝ̃ gbaasǝri wù suɔgu.

Nǝ̃ ń jo n ji ba ǹ duu mǝ̃̀ nã.»

23 Biɛẁ mãã wù yáá wùu gbaala ǹ-car, wù gáa nɔ̃ dɩ̀-lǝ, wù cãndɩ́ karaa.

24 Yesuẁ gáa da biɛ'n cãndìi karaa, wú fǝ̃ǝ̃ ǹ-waa nǝ̃-yǝ wà: «Dũnnũ yuuntasǝ'n jãnɩmmã̀ ga ca gbaalaaba nã!

25 Ɲũgɔ̃mĩĩ jãnɩmmã̀ dwal mǝ̃sãnfuugɩ nã, ǹ-ɲǝ̃ǝ̃ gbaal'n jãnɩmmã Dũnnũ yuuntasǝrɩ nã!»

26 Bàá mãã bà yáá bà nɔ̃ wù cãwanĩɛ̃ga, bá yugu-yǝ wà: «Dɩ-ń ba gɩ̀-lǝ gɩ̀ tammã, halii yuu ga hlǝ dɩ̀ nã?»

27 Yesuẃ fǝ̃ǝ̃ ǹ-siɛ-ba wà: «Dìí mãã cwaaba sǝ̃n ǹ-gbǝ̃ǝ̃ ǹ-ce-dǝ, Dũnnũẁ gbǝ̃ǝ̃ ǹ-ce-dǝ-i.»

28 Piɛrẃ fǝ̃ǝ̃ ǹ-waa wà: «Ne, hãmĩĩ-lǝ, yi nǝ̃́nǝ̃́ǝ̃ yì cɔ̃mmã min nã, nã̀ã ba yì duu ǹ nã.»

29 Yesuẃ fǝ̃ǝ̃ ǹ-siɛ-ba wà: «Yáalà mǝ̃́ waa sulammã nǝ̃-ɲã́ã̀: curo wo curo, wu-ń ya wù suɔgɩ ba, wù ciɛ-i wo, wù ɲũũnãtaa-i wo, wù cwanãã-i wo, wù tãnkuuraa-i wo, bá ba Dũnnũ yuuntasǝ'n cɔ̃mmã nã,

30 wù ji da ɲãdaɲã piyɛ̃ jimãã'n cuuw nã, ǹ-maa wù yíɛ́ ɲã̀ã́ mãã ɲã́ ba.

Nã̀ã ga ver ǹ-da fɩraa nũmǝ̃nãsǝ yo cicuɔ'n cuuw nã.»

Yesuẁ waa wù kukwogaa nǝ̃ wù nĩĩm'n cɔ̃mmã wù tu hlo

(Mãtiyew 20.17-19 ; Markaw 10.32-34)

31 Yesuẃ be Nũɔ̃sɔ̃nǝ̃bahǝ̃ǝ̃lba bà dǝ, nã̀ã waa nǝ̃-ba wà: «Ɲi díɛ́-ì!

Yi jo yì ji maar Serusalɛmgɩ-i.

Nǝ̃ Dũnnũ tanhiilaabà yállá cɔ̃m wo cɔ̃m Curonbiɛ cɔ̃mmã nã, mã̀ min mã̀ ga suu gùú sùɔ́gɩ-i.

32 Bàá mãã bà sǝ̃n fǝ̃ǝ̃ Dũnnũw, bà ga dii-yǝ bàá nãkrɔnɲã nã-i, bá hiil wù kwãmmã nã, ǹ-kãnãã-yǝ, nã̀ã tɔ tɔlunɲã ǹ-tũn wù nã.

33 Bà ga mũũ-yǝ nǝ̃ cãmblɩri, nã̀ã ko wú ku, nǝ̃ gɩ̀ bãnɲã siɛlnã yuugu, wú nĩĩ.»

34 Nǝ̃ duunãtaabà sáa fǝ̃ǝ̃ cãwanĩɛ̃ gáàgà tam.

Gá ba gà sáa kaalaa bà saa, bà sáa fǝ̃ǝ̃ Yesuw mãã wù yáá wa wú waa dìí mãã.

Yesuẁ cugur yɩrnĩĩdiɛ yin

(Mãtiyew 20.29-34 ; Markaw 10.46-52)

35 Yesuẁ gáa ba wù kuganãã Seriko lǝrɩ nã, ǹ-saa nǝ̃ yɩrnĩĩdiɛ yà jiraa hlũũ'n nũɔ̃gɩ nã, wù cirǝ̃ǝ̃ ɲinɲã nã.

36 Gɩ̀ yɩrnĩĩẁ gáa nɔ̃ cohuɔgɩ̀ du gɩ̀ ta, wú fǝ̃ǝ̃ ǹ-yugu-ba wà: «Bincɔ̃m cíé?»

37 Bá waa nǝ̃-yǝ wà Nasarɛtɩ lǝntaa'n Yesuw tíyà.

38 Wú dii ǹ-kaasǝ wà: «Yesu, Dawuda bíɛ́, ne mǝ̃̀ hujãndi!»

39 Bàá mãã bà yáá bà wáà yiganãyiɛgu, bá ba bà wanãã nǝ̃-yǝ, wà wú suu wù nũɔ̃gɩ nã, wú hla, nã̀ã ver ǹ-ba wù kaasǝ dugɔ hlo wà: «Dawuda bíɛ́, ne mǝ̃̀ hujãndi!»

40 Yesuẃ fǝ̃ǝ̃ ǹ-hiraa, nã̀ã ce wà bá jo nǝ̃ yɩrnĩĩw wù nãã.

Bà gáa jo nǝ̃-yǝ, wú yugu-yǝ wà:

41 «Ǹ wa mǝ̃́ ce bii ǹ-hã-n?»

Yɩrnĩĩẃ fǝ̃ǝ̃ ǹ-siɛ-yǝ wà: «Yitii, ce mǝ̃́ daraa hlo.»

42 Yesuẃ fǝ̃ǝ̃ ǹ-waa nǝ̃-yǝ wà: «Daraa!

Ǹ hũɔ̃mã̀ cíé ń buɔ.»

43 Gùú bǝ̃ǝ̃gɩ dɩngu dàa, wù yinɲã́ cugurǝǝ, wú paa ǹ-ba wù daraa.

Wú fǝ̃ǝ̃ ǹ-ba wù duu Yesuw nã, nã̀ã ba wù bũũ Dũnnũw.

Cocin díɛ̀dɩ̀ gáa da dɩ̀-lǝ, bàá yo, bá ba bà bɩnǝ̃ǝ̃ Dũnnũw nã.