Markaw 10

Yesuẁ wa bàá nǝ̃n taa bà ɲĩɛ̃ bà sǝ̃n saa bá buruɔ

Yesuẃ suro gɩ̀ sùɔ́gɩ nã ǹ-ta Suude yiɛgu, Surdɛ̃ lwaa'n maalɩ nã.

Cocindɩ́ juo tɩgii ǹ-caliɛ wù nã hlo, wú fǝ̃ǝ̃ ǹ-du nã ǹ-ba wù kal-ba nã́ã́ wù mãã wù hi wù ce-dǝ nĩĩguu mãã.

2 Farisĩɛ̃bá kãã jo, ǹ-juo ce yugumdamã wà ba dǝ̃ǝ̃-yǝ.

Bà yúgurǝ́-yǝ wà: «Gɩ ba nã́ã́ gɩ sáalá bibiɛẃ ɲǝ̃ǝ̃ ǹ-tĩɛ̃ wù ciɛw-ì?»

3 Wú siɛ-ba wà: «Musa hlũũgɩ̀ kárrá hadi nã-i ǹ-hã-ɲã́ã̀?»

4 Bá siɛ-yǝ wà: «Musa hlũũgɩ̀ kárrá dìí ǹ-hã-yáà, dɩ̀-i ń yal burɔm'n sɛbɛw ń hã cijalw, nǝ̃ ń ɲǝ̃ǝ̃ ń tĩɛ̃-yǝ.»

5 Yesuẃ fǝ̃ǝ̃ ǹ-waa nǝ̃-ba wà: «Ɲimãã yugbǝ̃ǝ̃gǝ'n cɔ̃mmã nã-i Musaẃ kra gɩ̀ hlũũ'n nǝ̃ǝ̃lɩ nã ǹ-hã-ɲã́ã̀.

6 Nǝ̃ gɩ̀ dullɩ nã cuu nǝ̃ǝ̃m'n bǝ̃ǝ̃gu, Dũnnũẁ “cíé-ba bibiɛ nǝ̃ cijal.”^a

7 “Gùú cíé, bibiɛẁ ji ba wu-ń ce wú pyar wù tǝw bá nǝ̃ wù ɲũw nã, ǹ-ga ɲǝ̃gãr wù ciɛw nã,

8 Gɩ̀ cwaaba hǝ̃ǝ̃lbà bá ba sùɔ́gɩ dɩngu^b.”

Gùú ji ce bá ba bà síì ba cwaaba hǝ̃ǝ̃lba, nǝ̃ bà ji plii ǹ-ba curow dɩnw.

9 Gɩ̀ sùɔ́gɩ nã, Dũnnũ wu-ń gbǝ gùú nã mãã, curo'n sǝ̃n saa wú buruɔ gɩ̀ nã.»

10 Bà gáa kũũ suɔgɩ nã, wù duunãtaabá kãã du nã ǹ-ba bà yugu-yǝ hlo nǝ̃ gɩ̀ cɔ̃mmã.

11 Wú waa nǝ̃-ba wà: «Yíi nǝ̃n ɲǝ̃ǝ̃ ǹ-tĩɛ̃ ǹ ciɛw, nã̀ã ver ǹ-taa wudiɛ, gɩ́ nǝ̃ nã́ã́ ǹ mǝ̃rǝ̃ǝ̃ nǝ̃ curo-i, wùú mãã ɲi sáa taa.

12 Nǝ̃ gùú cijalw-ń ɲǝ̃ǝ̃ ǹ-tĩɛ̃ wù blaw, nã̀ã kãã ver ǹ-tuu blanĩĩdiɛ, gɩ́ nǝ̃ nã́ã́ wù mǝ̃rǝ̃ǝ̃ nǝ̃ curo-i, wùú mãã bà sáa taa.»

Yesuẁ piɛ wù nãkrɔfɩnfaagu tãnkuuraaba drɔ

(Mãtiyew 19.13-15 ; Lukaw 18.15-17)

13 Cwaabá ba bà jo nǝ̃ tãnkuurbiiba Yesuw nãã, wà wú piɛ wù nãkrɔnɲã bà drɔ, wù duunãtaabá ba bà gãnãã nǝ̃-ba.

14 Yesuw gáa ba wù da dɩ̀-lǝ, wù hiɛgá dũ wú waa nǝ̃-ba wà: «Yáalà bá jo mǝ̃̀ nãã, bláá ɲǝ̃ǝ̃-ba!

Gùú tii mãã wu-ń ba tãnkuuraa báàbà tammã, wù nũɔ̃gɩ́ nàa Dũnnũ yuuntasǝ'n cɔ̃mmã nã.

15 Yáalà mǝ̃́ waa sulammã nǝ̃-ɲã́ã̀: yíi nǝ̃n ba ǹ sáa hũɔ̃ Dũnnũ yuuntasǝ'n cɔ̃mmã tãnkuurblɩ'n tammã, ǹ síì da ǹ-jãn dɩ̀ nã.»

16 Yesuw nã̀ã fǝ̃ǝ̃ ǹ-juo tuu ǹ-fuɔ bà nã, nã̀ã piɛ nãkrɔnɲã bà drɔ, nã̀ã cirǝ̃ǝ̃ Dũnnũw nã ǹ-hã-ba.

Gbaalw nǝ̃ Dũnnũ yuuntasǝ'n cɔ̃mmã

(Mãtiyew 19.16-30 ; Lukaw 18.18-30)

17 Yesuẁ gáa ba wù jo wù ji tuu hlũũgu, biɛdiɛ sɔ̃ ǹ-juo duruu ǹ-kuulǝǝ wù yigagɩ nã, nã̀ã waa nǝ̃-yǝ wà: «Kaltiihuhoryǝ, mǝ̃̀ saa mǝ̃́ ce hadi nã̀ã da fɩraa nũmǝ̃nãsǝri?»

18 Yesuẃ waa nǝ̃-yǝ wà: «Danii ń ba ǹ be-m cohuhor?

Cohuhor'n sɩriɛ, nã́ã́ Dũnnũ dɩn sǝ.

19 Ǹ mãã ǹ fǝ̃́ǝ̃lã́ Dũnnũẁ kárrá dìí nã mãã wà: “Ǹ sǝ̃n saa ń mǝ̃rǝ̃ǝ̃ nǝ̃ curodiɛ nã́ã́ ǹ hla'n ciɛ yindagǝ nã ǹ hla'n bla sǝ, n báa ko curo, n báa ŋmã, n báa bǝr ǹ-dii curo nã, n báa ce curo nǝ̃ diibɩblar, nǝ̃ ń bũũ ǹ tǝba nǝ̃ ǹ ɲũw.”»

20 Biɛẃ siɛ-yǝ wà: «Kaltii, mǝ̃n ce gà-lǝ gà min mǝ̃̀ yigakaalagǝ'n bǝ̃ǝ̃gu dìi.»

21 Yesuẃ fǝ̃ǝ̃ ǹ-ba wù ne-yǝ kullǝ, wù cɔ̃mmã́ juo dwal wù nã, wú waa nǝ̃-yǝ wà: «Cɔ̃mmã dɩn yánã́ã ǹ saa: Kã n ga suur ǹ nãkruɔɲinɲã min, nǝ̃ ń hã kokwaaba nǝ̃ gɩ̀ jinɲã.

Dũnnũẁ ga hã-n nǝ̃ gbaasǝri wù suɔgu.

Nǝ̃ [ń jo ń tuu ǹ gbǝl'n daagu] ń ba ǹ duu mǝ̃̀ nã.»

22 Biɛ wáà gáa nɔ̃ cãwan díɛ̀, wù yigagɩ́ paa bǝ̃ǝ̃lǝ̃ǝ̃.

Wù mãã wù yáá wùu mǝ̃gaa ǹ-gbaala dugɔ, wú ta ǹ-ba wù maar yigagu ɲǝ̃ǝ̃mã nã.

23 Yesuẁ gáa ne ǹ-waaraa, wú waa nǝ̃ wù duunãtaaba wà: «Dũnnũ yuuntasǝ'n jãnɩmmã̀ ga ca gbaalaaba nã!»

24 Yesu cãwan díɛ̀dɩ́ cu wù duunãtaa'n kusunɲã.

Nǝ̃ Yesu-lǝ, wú kã nǝ̃ yiga ǹ-ba wù waa wà: «Mã́ã bluu ɲimãã, Dũnnũ yuuntasǝ'n jãnɩmmã ca [bàá nã mãã bàa piɛ bà nãkruɔgu bà gbaasǝrɩ nã]!

25 Ɲũgɔ̃mĩĩ jãnɩmmã̀ dwal mǝ̃sãnfuugɩ nã, ǹ-ɲǝ̃ǝ̃ gbaal'n jãnɩmmã Dũnnũ yuuntasǝrɩ nã!»

26 Dɩ́ tugulǝǝ wù duunãtaaba ǹ-pya nã, bá ba bà waa nǝ̃ bà ɲĩɛ̃ wà: «Dɩ-ń ba gɩ̀-lǝ gɩ̀ tammã, halii yuu ga hlǝ dɩ̀ nã?»

27 Yesuẃ ne-ba nã̀ã waa nǝ̃-ba wà: «Cwaanbiiba saa, dɩ̀ síì gbǝ̃ǝ̃ ǹ-ce, nǝ̃ Dũnnũ-lǝ, wù ji gbǝ̃ǝ̃ ǹ-ce-dǝ.

Nã̀ã wa Dũnnũ nǝ̃ fãngããgu wù gbǝ̃ǝ̃ wù ce mã̀ min.»

28 Gɩ̀-i, Piɛrẃ waa nǝ̃-yǝ wà: «Nǝ̃ hãmĩĩ-lǝ, yí nǝ̃nǝ̃ǝ̃ yì cɔ̃mmã min nã nã̀ã ba yì duu ǹ nã.»

29 Yesuẃ fǝ̃ǝ̃ ǹ-siɛ-ba wà: «Yáalà mǝ̃́ waa sulammã nǝ̃-ɲã́ã̀: curo wo curo, wu-ń ya wù suɔgɩ́ ba, wù vũnvãnããba nǝ̃ wù hãmba-i wo, wù tǝ̃ǝ̃ba-i wo, yindagǝ nã wù ɲũw nǝ̃ wù tǝ-i wo, [yindagǝ nã wù ciɛ-i wo], yindagǝ nã wù tãnkuuraa-i wo, wù fugasǝrɩ min-i wo, ɲã̀-lǝ ɲã̀ min ɲã́ ba mã́ã cɔ̃mmã nã, nǝ̃ Yesu cɔ̃ndudwalɩm'n cɔ̃mmã nã,

30 wù ji da ɲãdaɲã piyɛ̃ fuwɔ yin gundiiw jimãã'n cuuw nã, ǹ-maa wù yíɛ́ ɲã̀ã́ mãã ɲã́ ba: wù ga da swammã, vũnvãnããba nǝ̃ hãmba, tǝ̃ǝ̃baba, ɲũũbaba, tãnkuuraaba, nǝ̃ fugasǝ yo, nǝ̃ cuɔlɩmmã, nã̀ã ba wù ga ver ǹ-da fɩraa nũmǝ̃nãsǝ yo cicuɔ'n cuuw nã.

31 Gùú nã-i, yigantaacindɩ̀ ga ba furũũgɩ nã, nǝ̃ furũntaacindɩ́ ba yigagɩ nã.»

Yesuẁ waa wù kuugu nǝ̃ wù nĩĩm'n cɔ̃mmã yinsiɛlnãw

(Mãtiyew 20.17-19 ; Lukaw 18.31-34)

32 Bà gáa suro ǹ-tuu hlũũgu ǹ-ba bà maar Serusalɛmgu, Yesuẁ yáá bà yigagɩ nã.

Bà kusunɲã́ cu, nǝ̃ bàá nǝ̃n yáá bà duu bà nã, gbǝrsǝrɩ́ blǝ-ba.

Wú fǝ̃ǝ̃ ǹ-be Nũɔ̃sɔ̃nǝ̃bahǝ̃ǝ̃lbá kuganãã wù nã, ǹ-juo ba wù waa dìí mãã dɩ̀ ji hi-yǝ nǝ̃-ba.

33 Wù yáá wù waa nǝ̃-ba wà: «Yi yuguraa yì kã Serusalɛmgɩ-i nnĩĩ, bà ga dii Curonbiɛw Yahudyaba puruɔntaa'n yuntaaba nǝ̃ Musa hlũũ'n yuntaa'n nãkrɔnɲã nã, bá jar wù sugolli ǹ-ba bà ji ko-yǝ, nã̀ã dii-yǝ bàá mãã bà sǝ̃n fǝ̃ǝ̃ Dũnnũw bà nãkruɔgɩ nã,

34 bà ji ba bà hiil wù kwãmmã nã, bà ga ba bà tɔ tɔlunɲã bà tũn wù nã, bà mũũ-yǝ nǝ̃ cãmblɩri nã̀ã ko-yǝ, nǝ̃ gɩ̀ bãnɲã siɛlnã yuugu, wù ji nĩĩ.»

Yakubaba nǝ̃ Yuhanãw, bà mãã bà cirǝ̃ǝ̃ dìí nã Yesuw saa

(Mãtiyew 20.20-28)

35 Sebede byanããbaa mãã Yakubaw bá nǝ̃ wù hǝ̃ǝ̃ Yuhanãw, bá juo waa nǝ̃-yǝ wà: «Kaltii, yi mãã yì ji cirǝ̃ǝ̃ dìí nã mãã ǹ saa, yi caa ń ce-dǝ ń hã-yáà.»

36 Wú yugu-ba wà: «Ɲi caa mǝ̃́ ce hadɩ-i ǹ-hã-ɲã́ã̀?»

37 Bá waa nǝ̃-yǝ wà: «Ya ǹ yuuntasǝ'n gbɩgbaamã nã, yí ba wudiɛw ǹ nãdĩĩyiɛgu, nǝ̃ wudiɛẃ ba ǹ ɲiɲũɔ̃ yiɛgu.»

38 Nǝ̃ Yesuẃ fǝ̃ǝ̃ ǹ-waa nǝ̃-ba wà: «Ɲi mãã ɲì cirǝ̃ǝ̃ dìí nã mãã, ɲi sáa fǝ̃ǝ̃-dǝ.

Mǝ̃̀ mãã mǝ̃̀ jo mǝ̃̀ ji ɲũɔ̃ gùú ywaruu'n guuɲũɔ̃kuugɩ nã, nã̀ã ba mǝ̃̀ jo mǝ̃̀ ji jãn gùú ywaruu'n ɲĩɛ̃mã nã mãã, nã́ã́ ɲi ji hi ɲã̀ nã-i?»

39 Bá siɛ-yǝ wà: «Yi ji hi dɩ̀ nã.»

Yesuẃ waa nǝ̃-ba wà: «Sulammã nã, mǝ̃̀ mãã mǝ̃̀ ji ɲũɔ̃ gùu, ɲi ji ɲũɔ̃-gǝ, mǝ̃̀ mãã mǝ̃̀ ji jãn gùú ɲĩɛ̃mã nã, ɲi ji jãn mã̀ nã.

40 Nǝ̃ dìí mãã ǹ-kã mǝ̃̀ nãdĩĩ'n yiɛ'n jirammã nã, yindagǝ nã mǝ̃̀ ɲiɲũɔ̃'n yiɛ'n jiram'n cɔ̃mmã nã, mǝ̃n sáa da gɩ̀ fãngããgu ǹ-ba mǝ̃̀ ji hã cwaaba nǝ̃ gɩ̀ jirammã.

Dũnnũẁ tɩ́gɩnǝ̃́ǝ̃ mã̀ nã ǹ-ba wù fennãã cwaadaba nã-i, bà-lǝ bàá ga da gɩ̀ wanjirammã.»

41 Duunãtaa nũɔ̃sɔ̃ dɩgaliɛ wáà gáa nɔ̃ dɩ̀-lǝ, bà hiɛgá dũ nǝ̃ Yakubaba nǝ̃ Yuhanãw.

42 Yesuẃ be-ba ǹ-juo ba wù waa nǝ̃-ba wà: «Ɲi fǝ̃́ǝ̃lã́ wà coplaa'n yuntaabá yiirǝǝ bà nã nǝ̃ bà fãngããgu, nǝ̃ cogǝ̃ngĩɛ̃bá ba bà ɲirǝ̃ǝ̃ bà piɛ bà fãngããgu cwaa'n dɩgaliɛw drɔ.

43 Ɲimãã sǝ̃ǝ̃nã dɩ̀ sǝ nnĩĩ sǝ, gùú tii nǝ̃n ba wù caa wú ba cogǝ̃ngãw ɲì sǝ̃ǝ̃nã, wù saa wú ba ɲì mããcierw.

44 Nǝ̃ wùú nǝ̃n ba wù caa wú ba yigantiiw ɲì sǝ̃ǝ̃nã, wù saa wú ba ɲì min lɔw.

45 Sulammã nã Curonbiɛw sáa jo wù ji ce cwaabá ba wù mããcieraa sǝ, nǝ̃ wù júó nã́ã́ mããcier-i ǹ-juo hã-ba nǝ̃ wù yuugu ǹ-da ǹ-pã ǹ-hiil cocindi wasǝrɩ nã.»

Yesuẁ cugur yɩrnĩĩdiɛ'n yinɲã, bà be-yǝ wà Bartime

(Mãtiyew 20.29-34 ; Lukaw 18.35-43)

46 Bá juo hi Seriko lǝri.

Yesuba nǝ̃ wù duunãtaaba nǝ̃ cohuɔdagǝ, bà gáa ba bà hlǝ lǝrɩ nã gùú nã, yɩrnĩĩdiɛẁ yáá dàa wùu jiraa hlũũ'n nũɔ̃gɩ nã ǹ-ba ɲããcirǝ̃ǝ̃gǝgɩ nã, Time bíɛ́ Bartimew yáá.

47 Wú nɔ̃ wà Nasarɛtɩ lǝntaa Yesu-i, wú du nã ǹ-ba wù kaasǝ wà: «Yesu, Dawuda bíɛ́, ne mǝ̃̀ hujãndi!»

48 Cocindɩ́ ba bà ganãã nǝ̃-yǝ, wà wú suu wù nũɔ̃gɩ nã, nǝ̃ yɩrnĩĩẃ hla nã̀ã ver ǹ-ba wù kaasǝ fãngããgɩ nã wà: «Dawuda bíɛ́, ne mǝ̃̀ hujãndi!»

49 Yesuẃ fǝ̃ǝ̃ ǹ-hiraa nã̀ã waa nǝ̃-ba wà: «Bíyà wú jo.»

Bá be yɩrnĩĩw ǹ-waa nǝ̃-yǝ wà: «Báa sɔ̃ cɔ̃m nã!

suro, wú nàa wù be-n.»

50 Wú tĩɛ̃ ǹ-nǝ̃nǝ̃ǝ̃ wù kuulaadiiyǝpɩpuɔlayǝw nã, nã̀ã sãl ǹ-suro ǹ-kã Yesuw nãã.

51 Yesuẃ fǝ̃ǝ̃ ǹ-yugu-yǝ wà: «Ǹ wa mǝ̃́ ce bii ǹ-hã-n?»

Yɩrnĩĩẃ fǝ̃ǝ̃ ǹ-siɛ-yǝ wà: «Kaltii, ce mǝ̃́ daraa hlo.»

52 Yesuẃ fǝ̃ǝ̃ ǹ-waa nǝ̃-yǝ wà: «Maar, ǹ hũɔ̃mã̀ cíé ń buɔ.»

Gùú bǝ̃ǝ̃gɩ dɩngu dàa, wù yinɲã́ cugurǝǝ, wú paa ǹ-ba wù daraa, wú tuu hlũũgu ǹ-ba wù duu Yesuw nã.