Mãtiyew 19

Yesuẁ wa bàá nǝ̃n taa bà ɲĩɛ̃, bá sǝ̃n saa bá buruɔ

Yesuẁ gáa kal cwaaba ǹ-tã gùú bǝ̃ǝ̃gu, wú suro Galile yiɛgu, ǹ-ta kãã ba Surdɛ̃ lwaa'n maalɩ nã, Suude yiɛgu.

2 cohuɔdaagɩ́ duu wù nã, wú ce hlɔnããbá buɔ bà sǝ̃ǝ̃nã.

3 Farisĩɛ̃bá kãã jo, ǹ-juo ce yugumdamã wà ba dǝ̃ǝ̃-yǝ.

Bà yúgurǝ́-yǝ wà: «Gɩ ba nã́ã́ gɩ-ń ba gùú ba hamã-i yo, gɩ sáalá bibiɛẃ ɲǝ̃ǝ̃ ǹ-tĩɛ̃ wù ciɛw-ì?»

4 Yesuẃ siɛ-ba wà: «Ɲi sáa kal gɩ̀ sùɔ́gu Dũnnũ cãwan'n sɛbɛba nã-i?

Dɩ̀ wáalá wà: “Nǝ̃ gɩ̀ dullɩ nã cuu nǝ̃ǝ̃m'n bǝ̃ǝ̃gu, Dũnnũẁ cíé-ba bibiɛ nǝ̃ cijal.^a”

5 Nã̀ã waa wà: “Gùú cíé, bibiɛẁ ji ba wu-ń ce wú pyar wù tǝw bá nǝ̃ wù ɲũw nã, ǹ-ga ɲǝ̃gãr wù ciɛw nã^b, gɩ̀ cwaaba hǝ̃ǝ̃lbà bá ba sùɔ́gɩ dɩngu.”

6 Gùú ji ce bá ba bà síì ba cwaaba hǝ̃ǝ̃lba, nǝ̃ bà ji plii ǹ-ba curow dɩnw.

Gɩ̀ sùɔ́gɩ nã, Dũnnũ wu-ń gbǝ gùú nã mãã, curo'n sǝ̃n saa wú buruɔ gɩ̀ nã.»

7 Farisĩɛ̃bá gbãl ǹ-yugu-yǝ wà: «Nǝ̃ dɩ̀ bla danii, Musaẃ kra dɩ̀ nã ǹ-hã-yáà wà wùú nǝ̃n ɲǝ̃ǝ̃ ǹ-tĩɛ̃ wù ciɛw, wú ce burɔm'n sɛbɛw ǹ-hã-yǝ^c?»

8 Yesuẃ siɛ-ba wà: «Gɩ̀ dullɩ nã, dɩ̀ sáá nnĩĩ, nǝ̃ ɲimãã yugbǝ̃ǝ̃gǝ'n cɔ̃mmã cíé Musaẃ hã-ɲã́ã̀ hlũũgu wà ɲí ba ɲì ɲǝ̃ǝ̃ ɲì tĩɛ̃ ɲì canããba nã.

9 Nǝ̃ mǝ̃̀ tu nǝ̃-ɲã́ã̀: gùú tii'n ciɛ wu-ń ba wù sáa ce durkũmsǝri, nǝ̃ wú ɲǝ̃ǝ̃ ǹ-tĩɛ̃-yǝ, nã̀ã taa wudiɛ, gɩ́ nǝ̃ nã́ã́ wù mǝ̃rǝ̃ǝ̃ nǝ̃ curo-i, wùú mãã bà sáa taa.

[Nǝ̃ gùú tii nǝ̃n taa cijalw mãã bà ɲǝ̃́ǝ̃lã́ ǹ-tĩɛ̃-yǝ, wùú yo gɩ́ nǝ̃ nã́ã́ wù mǝ̃rǝ̃ǝ̃ nǝ̃ curo-i, wùú mãã bà sáa taa.]»

10 Wù gáa waa dɩ̀-lǝ wù duunãtaaba waa wà: «Dɩ-ń ba gɩ̀-lǝ gɩ̀ tammã ǹ-kã bibiɛw nǝ̃ cijal'n yiɛgu, curo nǝ̃-ń yaala nã̀ã ba nǝ̃nkũũw, gùú sáa buɔ nã-ì?»

11 Yesuẃ waa wà: «Dũnnũ wu-ń hã bàá mãã nǝ̃ gɩ̀ fãngããgu bà-lǝ bàá ji gbǝ̃ǝ̃ ǹ-fǝ̃ǝ̃ cãwan díɛ̀dɩ yuugu, nã̀ã wa cwaabà min diifǝ̃ǝ̃rǝ sǝ.

12 Cɔ̃ncindɩ́ nìɛ dìi ce bibyanããbá ba bà sǝ̃n taa canããba: badaabà húulá nǝ̃ bà cɔ̃m'n min nã-i, bà sǝ̃n fǝ̃ǝ̃ yiɛ, badaaba cwaa kúulǝ́-ba, nǝ̃ badaa-lǝ, Dũnnũ yuuntasǝ'n cɔ̃m nã-ì bá hla cataagǝgu.

Gùú tii nǝ̃n ba wù ji hũɔ̃-dǝ, wú hũɔ̃-dǝ.»

Yesuẁ piɛ wù nãkrɔfɩnfaagu tãnkuuraaba drɔ

(Markaw 10.13-16 ; Lukaw 18.15-17)

13 Gɩ̀ furũũgɩ nã, bá jo nǝ̃ tãnkuurbiidaba wà Yesuẃ piɛ wù nãkrɔnɲã bà drɔ, nã̀ã cirǝ̃ǝ̃ Dũnnũw nã ǹ-hã-ba, wù duunãtaabá suro ǹ-ba bà gãnãã nǝ̃-ba.

14 Yesuẃ waa wà: «Yáalà bá jo mǝ̃̀ nãã, bláá ɲǝ̃ǝ̃-ba!

Gùú tii mãã wu-ń ba tãnkuuraa báàbà tammã, wù nũɔ̃gɩ́ nàa Dũnnũ yuuntasǝ'n cɔ̃mmã nã.»

15 Nã̀ã piɛ wù nãkrɔnɲã bà drɔ nã̀ã cirǝ̃ǝ̃ Dũnnũw nã ǹ-hã-ba.

Wù gáa ce dɩ̀-lǝ, wú hlǝ gɩ̀ sùɔ́gɩ nã ǹ-ta.

Gbaalw nǝ̃ Dũnnũ yuuntasǝ'n cɔ̃mmã

(Markaw 10.17-31 ; Lukaw 18.18-30)

16 Bà gáa ba bà maar, biɛdiɛ kuganãã ǹ-ba wù yugu Yesuw wà: «Kaltii, mǝ̃̀ sáalá mǝ̃́ ce diifɩnfar hadi ǹ-da ǹ-da fɩraa nũmǝ̃nãsǝri?»

17 Yesuẃ siɛ-yǝ wà: «Bii cíé ń ba ǹ yugu-m nǝ̃ cohuhor'n cɔ̃mmã?

Curoẁ dɩndɩn-i dìɛ wùú mãã cohuhorw; wɩ̀-i Dũnnũw.

Nǝ̃-ń ba ǹ caa ń ga ba nũmǝ̃nãw, ǹ sáalá ń ba ǹ wáà wù hlũsǝri.»

18 Biɛẃ waa wà: «Dɩ̀-i hadɩ-i?»

Yesuẃ waa nǝ̃-yǝ wà: «N báa ko curo, ǹ sǝ̃n saa ń mǝ̃rǝ̃ǝ̃ nǝ̃ curodiɛ nã́ã́ ǹ hla'n ciɛ yindagǝ nã ǹ hla'n bla sǝ, n báa ŋmã, n báa bǝr ǹ-dii curo nã,

19 nǝ̃ ń bũũ ǹ tǝba nǝ̃ ǹ ɲũw.

Ǹ saa ń ya ǹ nãcuro'n cɔ̃mmã́ dwal ǹ nã nã́ã́ ǹ hla-i^d.»

20 Biɛẃ waa wà: «Dɩ̀-lǝ dɩ̀ min mǝ̃n cíé-dǝ ǹ-tã.

Mǝ̃̀ sáalá mǝ̃́ ver ǹ-ce hadɩ-i ǹ-pya nã?»

21 Yesuẃ waa wà: «Nǝ̃-ń ba ǹ caa ń jalliɛ, kã n ga suur ǹ nãkruɔɲinɲã min, nǝ̃ ń yuɔ gɩ̀ jinɲã ń hã kokwaaba.

Dũnnũẁ ga hã-n nǝ̃ gbaasǝri wù suɔgu.

Nǝ̃ gɩ̀ furũũgɩ nã, ń jo n ji ba ǹ duu mǝ̃̀ nã.»

22 Nǝ̃ biɛẁ mãã wù yáá wùu gbaala ǹ-car nnĩĩ nã, wù gáa nɔ̃ dɩ̀-lǝ, wú paa ǹ-ɲǝ̃ǝ̃ wù yigagu nã̀ã suro ǹ-ta gbɩla.

23 Gɩ̀-i Yesuẃ fǝ̃ǝ̃ ǹ-waa nǝ̃ wù duunãtaaba wà: «Yáalà mǝ̃́ waa sulammã nǝ̃-ɲã́ã̀: gbaal'n jãnɩmmã̀ ga ca Dũnnũ yuuntasǝrɩ nã.

24 Mǝ̃̀ waa nǝ̃-ɲã́ã̀, ɲũgɔ̃mĩĩ jãnɩmmã̀ dwal mǝ̃sãnfuugɩ nã, ǹ-ɲǝ̃ǝ̃ gbaal'n jãnɩmmã Dũnnũ yuuntasǝrɩ nã!»

25 Wù duunãtaaba gáa nɔ̃ dɩ̀-lǝ, dɩ́ tugulǝǝ bà nã dugɔ!

Bá ba bà waa wà: «Dɩ-ń ba gɩ̀-lǝ gɩ̀ tammã, halii yuu ga hlǝ dɩ̀ nã?»

26 Yesuẃ ne-ba nã̀ã waa wà: «Cwaaba saa, dɩ̀ síì gbǝ̃ǝ̃ ǹ-ce, nǝ̃ Dũnnũw nǝ̃ fãngããgu, wù gbǝ̃ǝ̃ wù ce mã̀ min.»

27 Gɩ̀-i Piɛrẃ fǝ̃ǝ̃ ǹ-waa nǝ̃-yǝ wà: «Nǝ̃ hãmĩĩ-lǝ, yí nǝ̃nǝ̃ǝ̃ yì cɔ̃mmã min nã, nã̀ã ba yì duu ǹ nã?

Hãmĩĩ dǝllɩ ga ba danii?»

28 Yesuw fǝ̃ǝ̃ ǹ-waa nǝ̃-ba wà: «Yáalà mǝ̃́ waa sulammã nǝ̃-ɲã́ã̀: Dũnnũw mãã wù ji ver ǹ-ce cuuẃ ba wù wuuflãmw gùú nã mãã, Curonbiɛẁ ji jiraa wù yuuntasǝ'n guujirakuugɩ nã, nǝ̃ nũɔ̃sɔ̃ nǝ̃ ɲì hǝ̃ǝ̃l ɲimãã mãã ɲì dúulá mǝ̃̀ nã, ɲi ga jiraa curo wo curo wù fãngãtasǝ'n wanjirammã nã ǹ-ba ɲì jar Isɩrayɛl nũɔ̃ntaa nũɔ̃sɔ̃ nǝ̃ bà hǝ̃ǝ̃l sugolli.

29 Nǝ̃ curo wo curo mãã wù hṹɔ̃lã́ ǹ-hlǝ ǹ-ba wù duu mǝ̃̀ nã nã̀ã ya wù suɔgu, wù hãmba, wù vũnvãnããba, wù tǝ̃ǝ̃ba, wù tǝba, wù ɲũba, wù tãnkuuraaba, wù fugasǝrɩ́ ba mã́ã cɔ̃mmã nã, wù tíɛ́ nã̀ã ya ɲã̀ã́ mãã ɲã́ ba, wù ga da ɲã̀ tuugu yin gundii.

Nã̀ã ba wù ga ver ǹ-da fɩraa nũmǝ̃nãsǝri.

30 Gùú nã-i, yigantaacindɩ̀ ga ba furũũgɩ nã, nǝ̃ furũntaacindɩ́ ba yigagɩ nã.»