Markaw 11

Yesuẁ jãn Serusalɛmgu, yuntaa'n tammã

(Mãtiyew 21.1-11 ; Lukaw 19.28-40 ; Yuhanãw 12.12-19)

Bà gáa ba bà kuganãã Serusalɛmgɩ nã gùú bǝ̃ǝ̃gu, Betɩfasɩ lǝri nǝ̃ Betani lǝ'n tuɔragu, Olivie tun'n tãnũũgu tuɔra, Yesuẃ tĩɛ̃ wù duunãtaaba hǝ̃ǝ̃lba,

2 nã̀ã waa nǝ̃-ba wà: «Kã́ã̀ lǝrii mãã yì yigagɩ nã, ɲi-ń ga yii ǹ-hi, ɲi ga da kǝkũmblɩdiɛ bàa vaa-yǝ, curo'n sáa hi ǹ-yugo wù drɔ ǹ-da, ɲí fɩr-yǝ, ɲi ji hã-m.

3 Curow-ń yugu-ɲã́ã̀ wà hamã nã-i, ɲí ba ɲì ce díɛ̀, wáalà nǝ̃-yǝ wà Yitii'n dugɔ-i wù nã.

Gùú bǝ̃ǝ̃gɩ dɩngu dàa, wù ga tĩɛ̃ wú jo nhlíɛ̀ nã.»

4 Duunãtaabá fǝ̃ǝ̃ ǹ-ta, bá kãã da kǝkũmblɩdiɛ vaamã nã taasǝ̃ǝ̃nǝ̃ǝ̃gu dũndɔ̃l'n nũɔ̃dagǝ nã, hlũũ'n tũɔ̃gɩ nã, bá fɩr-yǝ.

5 Gùú cwaabaa nǝ̃n yáá dàa bá yugu-ba wà: «Danii ɲi ba ɲì fɩr kǝkũmblɩ wáà?»

6 Yesuẁ wáalá dìí mãã nǝ̃-ba bá siɛ-ba nǝ̃ gɩ̀ cãwanĩɛ̃ga.

Cwaa báàbá fǝ̃ǝ̃ ǹ-ya bá ta.

7 Bá fǝ̃ǝ̃ ǹ-kã nǝ̃ kǝkũmblɩw Yesuw nãã, nã̀ã hiil bà kuulanãmba ǹ-piɛ kǝkũmblɩw drɔ, nǝ̃ Yesuẃ yugo ǹ-jiraa wù drɔ.

8 Cocindɩ́ fa bà kuulanãmba hlũũgɩ nã, nã̀ã ka pɩpɩrãbirɛ̃nɲã jierɩ nã ǹ-firiɛ ɲã̀ nã hlũũgɩ nã.

9 Bàá nǝ̃n yáá Yesu yigagɩ nã, nǝ̃ bàá nǝ̃n yáá bà duu wù nã, bà yáá bà kaasǝraa wà: «Dũnnũ yiirɩ́ bũũ!

Wùú mãã wù jo Yitii'n yiirɩ nã nnĩĩ, Dũnnũẃ piɛ wù nãkrɔfɩnfaagu wù drɔ!

10 Gùú yuuntasǝrii mãã dɩ̀ jo wù yiirɩ nã, Dũnnũẃ piɛ wù nãkrɔfɩnfaagu dɩ̀ nã, wú piɛ wù nãkrɔfɩnfaagu yì tǝvũnvũɔ̃ Dawuda yuuntasǝrɩ nã.

Dũnnũw mãã drɔkuɔlɩ nã, wù yiirɩ́ bũũ!»

11 Yesuẃ juo hi Serusalɛmgu, wú jãn Dũnnũ bũũsuɔgɩ nã.

Bǝ̃ǝ̃gɩ̀ mãã gɩ̀ yáá gùu tã ǹ-tã, wù gá waaraa ǹ-ne Dũnnũ bũũsuɔ'n ɲinɲã min, wú hlǝ ǹ-ta Betani lǝri nǝ̃ wù duunãtaa nũɔ̃sɔ̃ nǝ̃ bà hǝ̃ǝ̃lba.

Yesuẁ piɛ wù nãkrɔbɩblaagu figie tuudagǝ drɔ

(Mãtiyew 21.18-19)

12 Gɩ̀ taakaalgu, bà gáa ba bà hlǝ Betani lǝri, nũmmã́ blǝ Yesuw.

13 Wú ne ǹ-da figie tuudagǝ halbaa pɩpɩrãnɲã̀ã suu gɩ̀ nã, wú kuganãã wa wú kãã ne nã́ã́ fíí wu ga da figiebiidaga yo, wù gáa hi, wú kãã da, pɩpɩrãkwanɲã dɩn.

Figiebii'n ŋmǝ̃ǝ̃m'n bǝ̃ǝ̃ sáá.

14 Gɩ̀-i, Yesuẃ fǝ̃ǝ̃ ǹ-waa wà: «Halle curo'n báa wuu ǹ biiga ǹ-da hlo gbal!»

Wù duunãtaabá nɔ̃ wù cãwandi.

Yesuẁ per Dũnnũ bũũsuɔgɩ nã

(Mãtiyew 21.12-17 ; Lukaw 19.45-48 ; Yuhanãw 2.13-22)

15 Bà kãã hi Serusalɛmgu, Yesuẁ gáa yii ǹ-jãn Dũnnũ bũũsuɔgu, wú kãã ba wù ɲǝ̃ǝ̃ wù hiil cǝrcieraaba nǝ̃ ɲããsǝ̃ǝ̃rǝ̃ǝ̃ba gɩ̀ kusuugɩ nã.

Wú kãã juu ǹ-tĩɛ̃ jiihwarriɛ'n tabalaaba nǝ̃ tǝbuhũɔ̃rɔ̃nãm'n suurtaa'n ɲããjiraɲinɲã.

16 Wù sáa ya curoẃ ta ǹ-hlǝ Dũnnũ bũũsuɔgɩ nã nǝ̃ tuul wù saa.

17 Wù yáá wù kal-ba nã̀ã ba wù waa wà: «Dɩ̀ sɩraa dìi yal wa: “Mǝ̃̀ duugɩ̀ ji ba gùú sùɔ́guu mãã coplaaga min gà jo gà cirǝ̃ǝ̃ mǝ̃̀ nã.”

Nǝ̃ ɲimãã juo ce-gǝ ba ŋmãllãã'n kuruu.»

18 Yahudyaba puruɔntaa'n yuntaaba, nǝ̃ Musa hlũũ'n yuntaabà gáa nɔ̃-dǝ, bá ba bà caa, bà mãã bà ji ko Yesuw gùú tammãã mãã.

Sulammã nã, Yesu cɔ̃mmã̀ yáá nǝ̃ gbǝrsǝri bà nã, nã̀ã wa wù yáá wù kal cocindi nǝ̃ dìí mãã, dɩ̀ yáá dɩ̀ tugulǝǝ bà nã.

19 Bǝ̃ǝ̃gɩ̀ jáa blariɛ, Yesuba nǝ̃ wù duunãtaabá hlǝ lǝ'n kusuugɩ nã.

Yesuba nǝ̃ figietukuulagǝgu

(Mãtiyew 21.20-22)

20 Gɩ̀ taakaalgu, duunãtaabà gáa ba bà ta, bá da figie tuugùu kuul ǹ-maar ǹ-ga hlǝ gɩ̀ ɲũmǝ̃nǝ̃ǝ̃ba nã.

21 Piɛrẃ fǝ̃ǝ̃ ǹ-kãnãã, wú waa wà: «Kaltii, ne ǹ plã ǹ nɔ̃bɩblaagu nǝ̃ gùú figie tuuguu mãã, gɩ̀ min gɩ̀ kúulá.»

22 Yesuẃ fǝ̃ǝ̃ ǹ-waa nǝ̃-ba wà: «Cúwǝ̀ Dũnnũ furũũgɩ nã.

23 Yáalà mǝ̃́ waa sulammã nǝ̃-ɲã́ã̀, curow-ń waa nǝ̃ tãnũũ gúɔ̀ wà gɩ́ suro ǹ-dũ nã lwaakɩnkandɩ nã, dɩ̀ ce-i, cincaruugɩ-ń ba gɩ̀ sǝ gɩ̀ tii'n hiɛga nã, nǝ̃ wú ba yà hũɔ̃ wà wu wáalá dìí mãã dɩ ji ce.

24 Gùú cɔ̃mmã-i, mǝ̃́ ba mǝ̃̀ waa-dǝ nǝ̃-ɲã́ã̀ mǝ̃́ wa kuu wo kuu mãã ɲì cirǝ̃ǝ̃ gɩ̀ nã Dũnnũ saa, hṹɔ̃lã́ wà ɲì díɛ́-gǝ ǹ-tã, Dũnnũ ji hã-ɲã́ã̀ nǝ̃-gǝ.

25 Nǝ̃ gùú bǝ̃ǝ̃gɩ nã mãã ɲi-ń ba hirammã nã ɲì cirǝ̃ǝ̃ Dũnnũw nã, nǝ̃ gùú bǝ̃ǝ̃gɩ dɩngu dàa ɲí da wà cɔ̃mmã́ nìɛ ɲì sǝ̃ǝ̃gɩ nã nǝ̃ wudiɛ, cíyà wù dũndɔw, gùú ji ce ɲì Tǝ Drɔ-Dũnnũ yo wú pyar ɲì gaacĩɛ̃yaga ɲì yuunã.

26 [Ɲi-ń ba ɲì sǝ̃n ce dũndɔw, ɲì Tǝ Drɔ-Dũnnũw síì pyar ɲì gaacĩɛ̃yaga ɲì yuunã.»]

Cwaabà yugu Yesuw wà halii hlã́ã̀-yǝ nǝ̃ wù gaacie'n hlũũgu

(Mãtiyew 21.23-27 ; Lukaw 20.1-8)

27 Bá ver ǹ-kã Serusalɛmgu, ǹ-ya Yesuẃ ba waalɩ nã Dũnnũ bũũsuɔgu kusunã, Yahudyaba puruɔntaa'n yuntaaba, nǝ̃ Musa hlũũ'n yuntaaba, nǝ̃ vũnvãnããbá kãã jo wù nãã,

28 ǹ-juo yugu-yǝ wà: «Ǹ díɛ́ gaacie gáàgà hlũũgu haa-ì?

Halii hlã-n nǝ̃ gà hlũũgu?»

29 Yesuẃ fǝ̃ǝ̃ ǹ-yugu-ba wà: «Mã́ã yo, mǝ̃̀ ji yugu-ɲã́ã̀ nǝ̃ cɔ̃mmã dɩndɩn, síɛlà mǝ̃̀ yugummã, gɩ̀-lǝ gɩ̀ nã, mã́ã yo mǝ̃̀ ji pɩgaa-ɲã́ã̀ nǝ̃ mǝ̃̀ gaacie gáàga hlũũ'n dal'n sùɔ́gu.

30 Yuhanãw mãã wù yáá wù ɲĩɛ̃ cwaaba, Dũnnũ yáá wùu tĩɛ̃ wú jo, dàa cwaa yáá?

Síɛlà-m kɛ-i!»

31 Bá ver ǹ-ba bà waa nǝ̃ bà ɲĩɛ̃ wà: «Yi-ń wa Dũnnũ yáá wùu tĩɛ̃-yǝ, wù ji waa nǝ̃-yáà wà nǝ̃ bii cíé yí ba yì sáa hũɔ̃ wù cãwandi.

32 Nǝ̃ yi-ń waa wà cwaa yáá bàa tĩɛ̃-yǝ… » (Bà yáá bà sɔ̃ cocindɩ nã mãã dɩ̀ yáá dàa, nã̀ã wa cwaaba min bà yáá bàa blǝ Yuhanãẃ ba Dũnnũ tanhiilhuhoryǝ-i.)

33 Gɩ̀-i, bá fǝ̃ǝ̃ ǹ-siɛ Yesuw wà: «Yi sáa fǝ̃ǝ̃.»

Gɩ̀-i, Yesu yo, wú fǝ̃ǝ̃ ǹ-siɛ-ba wà: «Nĩĩguu nǝ̃n ba, mã́ã yo, gùú tiiw nǝ̃n hlã-m nǝ̃ hlũũgu, mǝ̃́ ba mǝ̃̀ ce gaacie gáà, mǝ̃̀ síì pɩgaa-yǝ ǹ-ja-ɲã́ã̀.»