Lukaw 19

Yesuba nǝ̃ Sake cɔ̃mmã

Yesuẃ kãã jãn Seriko lǝ'n kusuugɩ nã, ǹ-ba wù ta.

2 Biɛdiɛẁ yáá dàa gɩ̀ lǝrɩ nã, bà be-yǝ wà Sake.

Wùú yáá nãnhũɔ̃rãã'n yuuntiiw, kuuntii yáá.

3 Wú ba wù caa wu nã́ã̀ da wú fǝ̃ǝ̃ gùú tiiw mãã Yesuw, nǝ̃ wù mãã wù sáá yà daa, nǝ̃ cocin yo, dɩ́ ba dɩ̀ yáá dàa, wù sáa ba wù ji gbǝ̃ǝ̃ ǹ-da-yǝ.

4 Wú fǝ̃ǝ̃ ǹ-sɔ̃ ǹ-maar yiganãyiɛgu.

Bɩmblantuudaagɩ̀ yáá dàa hlũn'n tũɔ̃gɩ nã, wú kãã yugo-gǝ.

Yesuw-ń ba wù ta gɩ̀ sùɔ́gɩ nã, wú da ǹ-da-yǝ.

5 Yesuẁ gáa hi gɩ̀ bɩmblantuugu taara, wú haar wù yuugu, nã̀ã waa nǝ̃ Sakew wà: «Sake, hiirǝǝ ǹ gbɩraanã, mǝ̃̀ saa mǝ̃́ hyar yíi suɔ-i jimããgu.»

6 Sakeẃ fǝ̃ǝ̃ ǹ-gǝǝraa ǹ-hiirǝǝ, ǹ-kũũ nǝ̃ Yesuw ǹ-kãã hyar-yǝ, dudwalɩmmã nã wù suɔgu.

7 Cwaabà gáa da dɩ̀-lǝ, bà min bá fǝ̃ǝ̃ ǹ-ba bà hugɔ̃nãã bà waa Yesu cɔ̃mmã wà: «Níyà!

Biɛ wáà kã́ã́ ǹ-ga hyar diicĩɛ̃rǝntii wáà suɔgu.»

8 Nǝ̃ Sake-lǝ, wú fǝ̃ǝ̃ ǹ-suro ǹ-hiraa Yitii'n yigagɩ nã, nã̀ã waa nǝ̃-yǝ wà: «Mǝ̃̀ tii, mǝ̃̀ ji yuɔ mǝ̃̀ nãkruɔɲinɲã nã tiɛmã hǝ̃ǝ̃lmã, ǹ-hã kokwaaba nǝ̃ buordaari, nã̀ã ba nǝ̃ dɩdaari.

Nǝ̃ mǝ̃-ń ba mǝ̃̀ yáá mã̀ã dugurǝǝ gùú tii nã mãã, ǹ-hũɔ̃ kuu wù saa, mǝ̃̀ ji hã-yǝ nǝ̃ gɩ̀ kuu'n tuugu yin nnǝ̃ǝ̃.»

9 Yesuẃ fǝ̃ǝ̃ ǹ-waa nǝ̃-yǝ wà: «Yíi yo, ǹ mãã Ibramã nũɔ̃ntihuhoryǝw, korɩmmã̀ jã́nnã́ ǹ suɔgu jimããgu.

10 Gùú cwaabaa nǝ̃n váaláa, Curonbiɛ mã́ã̀, mǝ̃̀ júó mǝ̃̀ ji caa ba-i, ǹ-kor-ba.»

Mũɔ̃ridiɛ, bá nǝ̃ wù mããcieraaba

(Mãtiyew 25.14-30)

11 Cwaabá ba bà nɔ̃ bà hã Yesuw.

Bà gáa ba bà kuganãã Serusalɛmgɩ nã, cwaabá ba bà kãn wà Dũnnũ yuuntasǝrɩ jo dɩ̀ ji jiraa gùú bǝ̃ǝ̃gɩ-i.

Gɩ̀-i, Yesuẃ fǝ̃ǝ̃ ǹ-waa cãwaadũũm mã́ã̀ nǝ̃-ba wà:

12 «Biɛdiɛẁ yáá mũɔ̃rãã'n nũɔ̃gɩ nã, wú juo suro ǹ-maar lǝhaldǝdarǝ nã, wù kã wù ga caa yuuntasǝri, ǹ-ver ǹ-juo jiraa wù yiɛntaa'n yuugɩ nã.

13 Wù gáa wa wu ta gùú nã mãã, wú be wù mããcieraa nũɔ̃sɔ̃w, ǹ-juo hã curo wo curo nǝ̃ sãnã yiɛgɩ dɩn, nã̀ã waa nǝ̃-ba wà: “Bláà ɲì veraa ɲì nãkrɔnɲã nã nǝ̃-ga nɩnɩgãn, nǝ̃ mǝ̃́ ga da mǝ̃́ ver ǹ-jo.”

14 Nǝ̃ wù cɔ̃mmã̀ sáá mã̀ dwal wù yiɛntaaba nã, bà-lǝ bá fǝ̃ǝ̃ ǹ-tĩɛ̃ cwaabá duu wù nã, ǹ-kãã waa wà bà-lǝ ba sǝ̃n caa gɩ̀ biɛẃ juo jiraa bà yuugɩ nã.

15 Bá kãã hla nã̀ã kra wù nã, wù yiɛntaa'n yuugɩ nã.

Wù gáa ver ǹ-kã, wú fǝ̃ǝ̃ ǹ-be bàá mãã wù yáá wùu hã-ba nǝ̃ jinɲã, ǹ-juo waa nǝ̃-ba wà ba gáa veraa ǹ-da gùú mãã, bá juo pɩgaa-gǝ ǹ-ja-yǝ.

16 Wuudĩɛ̃lẃ juo waa nǝ̃-yǝ wà: “Mǝ̃̀ tii, ǹ yáá nã̀ã hã-m nǝ̃ gùú sãnã yiɛguu mãã, mǝ̃̀ gáa veraa gɩ̀ nã, ǹ-da yan nũɔ̃sɔ̃.”

17 Yuuntiiẃ waa nǝ̃-yǝ wà: “Mããcierhuhoryǝ, gɩ̀ sáalá.

Ǹ mãã bla yalntiiw cɔ̃nsaalammã nã, mǝ̃̀ kra ǹ nã liɛ nũɔ̃sɔ̃ mũɔ̃rsǝrɩ nã.”

18 Mããcieraaba hǝ̃ǝ̃lnãẃ juo waa nǝ̃-yǝ wà: “Mǝ̃̀ tii, mǝ̃̀ gáa veraa ǹ-da yanɲã ndii.”

19 Yuuntiiẃ waa nǝ̃ wùú yo wà: “Yíǹ-lǝ, mǝ̃̀ kra ǹ nã liɛga ndii mũɔ̃rsǝrɩ nã-i.”

20 Mããcierdiɛẃ vã, ǹ-juo waa nǝ̃-yǝ wà: “Yitii, ǹ sãnã yiɛgɩ-i nnĩĩ.

Mǝ̃̀ váalá-gǝ kuulaayiɛgɩ nã, nã̀ã kãã mǝ̃gaa ǹ-ŋmǝ̃ǝ̃rǝ̃ǝ̃ gɩ̀ nã.

21 Ǹ cɔ̃mmã̀ mãã mã̀ ca ǹ-car, gùú cíé mǝ̃́ ba mǝ̃̀ sɔ̃ ǹ nã.

Ǹ mãã ǹ sáa kra gùú kuugɩ nã mãã, ǹ tuu-gǝ-i.

Ǹ mãã ǹ sáa dũũ gùú dũmmãã mãã, ǹ tɩgii mã̀-i.”

22 Yuuntiiẃ waa nǝ̃ wù-lǝ wà: “Mããcierbɩblayǝdiɛ dɛ!

Mǝ̃̀ ji blǝ-n, nǝ̃ ǹ nũɔ̃nãcãwandɩ-i.

Ǹ fǝ̃́ǝ̃lã́ wà mǝ̃̀ cɔ̃mmã ca ca, wà mǝ̃ sáa kra gùú kuugɩ nã, mǝ̃́ tuu-gǝ-i, wà mǝ̃ sáa dũũ gùú dũmmãã mãã, mǝ̃́ tɩgii mã-i.

23 Gɩ̀-lǝ gɩ̀ nã, bii cíé ń ba ǹ sáa kra mǝ̃̀ jinɲã nã lǝ'n jiikrasuɔgɩ nã, mǝ̃-ń ga ver, mǝ̃́ juo hi kuugu piɛ ɲã̀ nã?”

24 Nã̀ã fǝ̃ǝ̃ ǹ-waa nǝ̃ gùú cwaabaa nǝ̃n yáá wù tuɔra wà: “Hṹɔ̃lã̀ wù sãnã yiɛgu, ɲí hã wùú mãã wù cíé ǹ-da nũɔ̃sɔ̃w.”

25 Bá waa nǝ̃-yǝ wà: “Yitii, yan nũɔ̃sɔ̃w nàa wù-lǝ wù saa!”

26 Yuuntiiẃ fǝ̃ǝ̃ ǹ-waa wà: “Mǝ̃̀ waa nǝ̃-ɲã́ã̀: gùú tiiw mãã nǝ̃ kuu, bà ga hã wù-lǝ, ǹ-pya nã.

Wùú mãã wù sǝ nǝ̃ kuu, halle gùú fiyãã mãã wù saa, bà ga hũɔ̃ gùú yo wù saa.

27 Nǝ̃ mǝ̃̀ ɲããtaabaa mãã bà sáá bà caa mǝ̃n ba yuuntiiw, blǝ́rà ɲí jo nǝ̃-ba nhlíɛ̀, ɲi ji ko-ba mǝ̃̀ yinɲã nã.”»

Yesuẁ jãn Serusalɛmgu, yuntaa'n tammã

(Mãtiyew 21.1-11 ; Markaw 11.1-11 ; Yuhanãw 12.12-19)

28 Yesuẁ gáa waa gɩ̀-lǝ gɩ̀ cãwandi ǹ-tã, wú fǝ̃ǝ̃ ǹ-ta cwaa'n yigagɩ nã, ǹ-ba wù maar Serusalɛmgu.

29 Bà gáa ba bà kuganãã Betɩfasɩ lǝri nǝ̃ Betani lǝrɩ nã gùú bǝ̃ǝ̃gu, Olivie tun'n tãnũũgu tuɔra, Yesuẃ tĩɛ̃ wù duunãtaaba hǝ̃ǝ̃lba, nã̀ã waa nǝ̃-ba wà:

30 «Kã́ã̀ lǝrii mãã yì yigagɩ nã, ɲi ga da kǝkũmblɩdiɛ bàa vaa-yǝ, curo'n sáa hi ǹ-yugo wù drɔ ǹ-da, ɲí fɩr-yǝ, ɲi ji hã-m.

31 Nǝ̃ gùú tiiw nǝ̃n yugu-ɲã́ã̀ wà danii ɲí ba ɲì fɩr-yǝ, wáalà nǝ̃-yǝ wà Yitii'n dugɔ-i wù nã.»

32 Yesuẁ pɩ́gará-dǝ gùú tuugu, tĩɛ̃taabá kãã da dɩ̀ min nĩĩgu.

33 Bà gáa ba bà fɩr kǝkũmblɩw, wù taabá fǝ̃ǝ̃ ǹ-ba bà yugu-ba wà danii bá ba bà fɩr-yǝ?

34 Duunãtaabá fǝ̃ǝ̃ ǹ-siɛ-ba wà Yitii cáalà-yǝ.

35 Bà gáa kã nǝ̃ kǝkũmblɩẁ Yesuw nãã, bá fǝ̃ǝ̃ ǹ-piɛ bà kuulanãmba wù drɔ, nã̀ã ce Yesuẃ yugo ǹ-jiraa,

36 bá ba bà maar, cwaabá fǝ̃ǝ̃ ǹ-ba bà fa bà kuulanãmba hlũũgɩ nã, wú ba wù wáà bà drɔ.

37 Bà gáa ba bà kuganãã Serusalɛmgɩ nã, nǝ̃ hlũũguu mãã gɩ̀ hɩr Olivie tun'n tãnũũgu, Yesuẁ cíé gùú cɔ̃nnurommãã mãã, duunãtaa'n huɔ gúɔ̀gɩ̀ díɛ́ gàá mãã gà min, dudwalɩmmã́ ba bà nã, bá ba bà bũũ Dũnnũw huuu, wù diifɩnfar'n cɔ̃mmã nã.

38 Nã̀ã ba bà waa wà: «Yitii Dũnnũẁ tĩ́ɛ̃lã́ gùú yuuntiiw mãã wú ba wù jo wù yiirɩ nã, Dũnnũẃ piɛ wù nãkrɔfɩnfaagu wù drɔ, hyasɩrãgǝgɩ́ ba drɔkuɔlɩ nã, nǝ̃ Drɔ-Dũnnũ yiirɩ́ bũũ.»

39 Farisĩɛ̃daabà yáá dàa cocindi sǝ̃ǝ̃nã, bá fǝ̃ǝ̃ ǹ-waa nǝ̃ Yesuw wà: «Kaltii, waa dɩ́ gbǝ̃ǝ̃ nǝ̃ ǹ bluuba, wà bá suu bà nɔ̃nɲã nã.»

40 Yesuẃ fǝ̃ǝ̃ ǹ-siɛ-ba wà: «Mǝ̃̀ waa nǝ̃-ɲã́ã̀: bà-lǝ ba-ń ba ciyɛ̃ ciyɛ̃, tɩntrãgaa ji ba gà kaasǝraa bà suɔnãw.»

Yesuẁ kaal Serusalɛm cɔ̃mmã nã

41 Yesuẁ gáa ba wù kuganãã Serusalɛmgɩ nã, wú ba wù ne-gǝ, ǹ-ji ba wù kaal,

42 nã̀ã ba wù waa wà: «Eh!

Serusalɛmtaa ɲimãã, ɲi nã́ã̀ ba ɲĩ̀ĩ fǝ̃ǝ̃ jimããgu gùú mãã gɩ̀ ji hã-ɲã́ã̀ nǝ̃ hyasɩrãgǝgu, gɩ̀ yáá gùu saa, nǝ̃ gɩ́ nǝ̃ gùú ŋmǝ̃ǝ̃rǝ̃ǝ̃ ɲì nã kuɔkuɔ-lǝ, ɲi síì gbǝ̃ǝ̃ ǹ-da-gǝ.

43 Bǝ̃ǝ̃daagɩ́ nàa gɩ̀ jo, ɲì ɲããtaabà ga juo nǝ̃ǝ̃ gũnguɔgu ǹ-caliɛ ɲì nã, nã̀ã suu ɲì nã lǝ'n kusuugɩ nã.

Wantammã min mãã mã̀ jãn lǝ'n kusuugu, bà ji suu mã̀ min.

44 Ɲì ɲããtaabà ga juo kuul lǝrɩ min curɔcurɔ, bà síì ya jaablɩrɩ dɩndɩn, dɩ́ ba dɩdaarii drɔ.

Bà ji ko ǹ-guu ɲì nã, curow dɩn yo wù síì yanãã.

Gɩ̀-lǝ gɩ̀ nã, ɲi mãã ɲi sáa hũɔ̃ ǹ-nɔ̃ ǹ-hã Dũnnũw, wù júó wù ji pɛ ɲì nã gùú bǝ̃ǝ̃gu, gùú cíé gáàgà min gá ba gà ji hi-ɲã́ã̀.»

Yesuẁ per Dũnnũ bũũsuɔgɩ nã

(Mãtiyew 21.12-17 ; Markaw 11.15-19 ; Yuhanãw 2.13-22)

45 Yesuẃ kã ǹ-kãã jãn Dũnnũ bũũsuɔgɩ nã, ǹ-ba wù ɲǝ̃ǝ̃ wù hiil cǝrcieraaba,

46 nã̀ã ba wù waa nǝ̃-ba wà: «Dɩ̀ yállá wà: “Mǝ̃̀ duugɩ̀ ji ba gùú sùɔ́guu mãã cwaabà kã bà cirǝ̃ǝ̃ mǝ̃̀ nã.”

Ɲimãã juo ce-gǝ ba ŋmãllãã'n kuruu.»

47 Gɩ̀ furũũgɩ nã, Yesuẃ ba wù kã wù kal cwaaba gɩ̀ kusunã nã yuu wo yuu.

Yahudyaba puruɔntaa'n yuntaaba, nǝ̃ Musa hlũũ'n yuntaaba, nǝ̃ lǝ'n yigantaabá ba bà caa, bà mãã bà ji ko Yesuw gùú tammãã mãã.

48 Yesu cɔ̃mmã̀ yáá mã̀ã blǝ cwaa'n yunɲã, bà min bá mǝ̃gaa ǹ-jǝ̃ǝ̃ bà tɔ̃nɲã ǹ-ba bà nɔ̃ bà hã-yǝ.

Bàá nǝ̃n yáá bà caa bá ko-yǝ, bá ba bà ne, bà sáa fǝ̃ǝ̃ bà mãã bà ji ce nĩĩgu.