Mãtiyew 25

Pǝǝbiinãã nũɔ̃sɔ̃ cɔ̃mmã

Gɩ̀ furũũgɩ nã, Yesuẃ taa cãwaaduum mã́ã̀ nǝ̃-ba wà: «Dũnnũ yuuntasǝrɩ̀ ga ba nã́ã́ pǝǝbinããnũɔ̃sɔ̃ báà cɔ̃m-i: bà sórrá yisuɔdagǝ nã ǹ-tuu bà fitɩnɩba wà ba kãã jǝ̃ǝ̃lǝ̃ǝ̃ blanĩĩ.

2 Bà sǝ̃ǝ̃nã, bà ndiibà yáá baahããrãã-i nǝ̃ bà ndiidaabá ba cɔ̃nfǝ̃ǝ̃rããba.

3 Pǝǝbihãrããbá tuu bà fitɩnɩba nǝ̃ bà sáa tuu nɔ̃m ǹ-blǝ bà nãkruɔ nã.

4 Nǝ̃ bàá mãã cɔ̃nfǝ̃ǝ̃rǝ̃ǝ̃ba, bà-lǝ bá tuu bà bɩgaaba, nã̀ã tuu nɔ̃mmã ǹ-blǝ bà nãkruɔ nã.

5 Bà gáa kã, blanĩĩ sǝ nǝ̃ wù jo wú jo, duɔsǝmmã́ blǝ-ba, bà min bá kãã duruu duɔsǝmmã nã.

6 Taaga jáa vǝ̃ǝ̃, bá nɔ̃ curodiɛẁ hiil wù yalli wà: “Blanĩĩ jówà nnĩĩ!

Hlǝ́rà ɲí jǝ̃ǝ̃lǝ̃ǝ̃-yǝ!”

7 Bá suro gɩ̀-lǝ gùú nã-i bà min, ǹ-ba bà mǝ̃gaa bà fitɩnɩba.

8 Pǝǝbihãrãã báàbá fǝ̃ǝ̃ ǹ-ba bà waa nǝ̃ cɔ̃nfǝ̃ǝ̃rǝ̃ǝ̃ba wà: “Yì fitɩnǝ̃ǝ̃bá nìɛ bà dĩĩ, hlã́ã̀-yáà nǝ̃ nɔ̃mdamã!”

9 Cɔ̃nfǝ̃ǝ̃rǝ̃ǝ̃bá siɛ-ba wà: “Hãmĩĩ túulá mã̀ã́ mãã mã̀ síì ce yí buruɔ mã̀ nã; kã́ã̀ ɲi ga sǝ̃ǝ̃ mãdamã nɔ̃nsuuraaba nã, gùú ji buɔ nã.”

10 Bà gáa suro gùú nã mãã wà bá kãã sǝ̃ǝ̃ nɔ̃mmã, blanĩĩẃ kãã jo.

Bàá mãã bà yáá bàa tɩgɩnǝ̃ǝ̃ ǹ-tã, bá jãn nǝ̃ blanĩĩẁ cataaduugɩ nã, nã̀ã gbǝ fieri.

11 Gɩ̀ furũũgɩ nã, báàbà gáa jo, bá juo ba bà, waa wà: “Yuuntii, yuuntii, ciɛl yí jãn!”

12 Blanĩĩẃ waa nǝ̃-ba wà: “Yáalà mǝ̃́ waa sulammã nǝ̃-ɲã́ã̀, mǝ̃n sǝ̃n fǝ̃ǝ̃-ɲã́ã̀!”»

13 Yesuw nã̀ã yiil ǹ-waa wù duunãtaaba wà: «Gɩ̀ sùɔ́gɩ nã, bláà nũmǝ̃nãw, nã̀ã wa ɲi sǝ̃n fǝ̃ǝ̃ Curonbiɛ'n jol'n yuugu, yindagǝ nã gɩ̀ bǝ̃ǝ̃gu.»

Mããcieraaba siɛl cɔ̃mmã

(Lukaw 19.11-27)

14 «Gɩ̀ ji ba nã́ã́ biɛw mãã wù maar waali, nã̀ã be wù mããcieraaba ǹ-ji hã-ba wù nãkruɔɲinɲã.

15 Wú hã wudiɛw nǝ̃ sãnã gugwaga ndii, wudiɛw sãnã gugwaga hǝ̃ǝ̃l, nǝ̃ bà siɛlnãw sãnã guguor dɩn.

Wù hlã-ba nǝ̃-ɲã gɩ̀-lǝ gɩ̀ tammã ǹ-vaa nǝ̃ bà fãngãnɲã mãã ɲã̀ hi dìí nã nã̀ã ta.

16 Wùú nǝ̃n díɛ́ sãnã gugwaga ndiiga, wu paa ǹ-kãã du nã ǹ-ba wù veraa wù nãkruɔgɩ nǝ̃ gɩ̀ jinɲã ǹ-ji da sãnã gugwaga ndiidaga hlo.

17 Wùú nǝ̃n díɛ́ sãnã gugwaga hǝ̃ǝ̃lga wùú yo wú ce gùú tammã dɩnmã-i ǹ-da sãnã gugwaga hǝ̃ǝ̃ldaga.

18 Nǝ̃ wùú nǝ̃n díɛ́ sãnã guguor dɩndi, wù-lǝ wú ver kãã ka fuugɩ ǹ-ŋmǝ̃ǝ̃rǝ̃ǝ̃ wù yuuntii'n jinɲã nã.

19 Gɩ̀ gáa hǝ̃ǝ̃sǝ, bà yuuntiiẃ kãã ver ǹ-jo.

Wú juo be-ba wà bá pɩgaa-yǝ nǝ̃ ɲã̀ fosǝri.

20 Wù yáá wùu hã wùú mãã nǝ̃ sãnã gugwaga ndiiga, wú kuganãã pɩgaa-yǝ nǝ̃ sãnã gugwaga ndiidaa gáà mãã wù díɛ́-ga ǹ-pya nã nã̀ã waa wà: “Yuuntii, ǹ yáá nã̀ã hã-m nǝ̃ sãnã gugwaga ndiidagaa mãã, mǝ̃̀ veraa ǹ-da sãnã gugwaga ndiidaga ǹ-pya nã, gà-i nnĩĩ nã.”

21 Wù yuuntiiẃ waa nǝ̃-yǝ wà: “Mããcierhuhoryǝ, gɩ̀ sáalá, yalntii-i nǝ̃-n.

Ǹ mãã bla yalntiiw cɔ̃nsaalammã nã, mǝ̃̀ ji hã-n mããgǝ̃ngãmmã.

Jo yí ji ba yì ce kweyi-kweyiw yì min.”

22 Wùú nǝ̃n yáá wùu da sãnã gugwaga hǝ̃ǝ̃lga, wú vã ǹ-kuganãã nã̀ã waa wà: “Yuuntii, ǹ yáá nã̀ã hã-m nǝ̃ sãnã gugwaga hǝ̃ǝ̃lgaa mãã, mǝ̃̀ veraa ǹ-da sãnã gugwaga hǝ̃ǝ̃ldaga ǹ-pya nã, gà-i nnĩĩ nã.”

23 Wù yuuntii waa nǝ̃-yǝ wà: “Gɩ̀ sáalá, mããcierhuhoryǝ, yalntii-i nǝ̃-n.

Ǹ mãã bla yalntiiw cɔ̃nsaalammã nã, mǝ̃̀ ji hã-n nǝ̃ mããgǝ̃ngãmmã.

Jo yí ji ba yì ce kweyi-kweyiw yì min.”

24 Wù yáá wùu hã wùú mãã nǝ̃ sãnã guguor dɩndi, wú kuganãã nã̀ã waa wà: “Yuuntii, mǝ̃̀ fǝ̃́ǝ̃lã́ mǝ̃́ wa yíǹ cɔ̃mmã ɲũgɔ̃nãã ǹ-car, ǹ mãã ǹ sáa dũũ gùú dũmmãã mãã, ǹ tɩgii mã-i, nǝ̃ ǹ mãã ǹ sáa so gùú, ǹ biɛriɛ gùú biiga nã-i.

25 Gùú cíé gbǝrsǝrɩ́ blǝ-m, mǝ̃́ kãã ka fuugu ǹ-ŋmǝ̃ǝ̃rǝ̃ǝ̃ ǹ sãnã guguorɩ nã, ne ǹ dɩ̀-i nnĩĩ: hũɔ̃ gùú mãã ǹ kuugu.”

26 Wù yuuntiiẃ waa nǝ̃-yǝ wà: “Mããcierbɩblayǝdiɛ dɛ!

Lonĩĩ yíì!

Ǹ yáá nã̀ã fǝ̃ǝ̃ wà mǝ̃-ń ba mǝ̃̀ sáa dũũ gùú dũmmã mãã mǝ̃̀ tɩgii mã-i nǝ̃ mǝ̃ mãã mǝ̃̀ sáa so gùú mãã mǝ̃́ biɛriɛ gùú biiga nã-i,

27 bii cíé ń sáa kã ǹ-ga kra mǝ̃̀ jinɲã nã lǝ'n jiikrasuɔgɩ nã?

Mǝ̃-ń ga ver, mǝ̃́ juo da kuugu piɛ ɲã nã, mǝ̃́ hũɔ̃-ɲã-ì?”

28 Nã̀ã waa wà: “Hṹɔ̃lã̀ sãnã guguori mãã wù saa ɲí hã wùú mãã wù díɛ́ sãnã gugwa nũɔ̃sɔ̃w!

29 Gùú tiiw mãã nǝ̃ kuu, bà ga hã wù-lǝ ǹ-pya nã, wú da ǹ-ba nǝ̃-ɲã piyɛ̃.

Nǝ̃ wùú mãã wù sǝ nǝ̃ kuu, halle gùú fiyãã mãã wù saa, bà ga hũɔ̃ gùú yo wù saa.

30 Nǝ̃ mããcierẁ wáà mãã nnĩĩ, wù síì gbǝ̃ǝ̃ ǹ-duruu mũũ ciraa, nǝ̃́ǝ̃lã̀ ɲí hiil-yǝ curũɔ̃gɩ nã cɩnkaaraagu wú ba dudũũmã nã.

Wu-ń ba dàa gɩ̀ sùɔ́gɩ nã, kaaluugu nǝ̃ ɲirãn'n wuumã̀ ga ba dàa.”

Curonbiɛẁ mãã wù ga juo jar sugolli gùú yuugu

31 «Curonbiɛẁ wu-ń ga jo wù yuuntasǝ'n gbɩgbaamã nã nǝ̃ mɛlɛgɛba min, wù ji jiraa wù yuuntasǝ'n guujirakuugɩ nã,

32 bà ji tɩgii coplaaga min wù yigagɩ nã.

Wù ji ǹ-tũɔ̃l cwaaba ǹ-pyariɛ bà nã, nã́ã́ wanciinẁ mãã wù ǹ-tũɔ̃l tũmba gùú tammã wù pyariɛ bà nã nǝ̃ wuramba:

33 ǹ-kra tũmba wù nãdĩĩyiɛgu nǝ̃ wuramba wù ɲiɲũɔ̃yiɛgu.

34 Gɩ̀-lǝ gɩ̀ nã yuuntiiw gà waa nǝ̃ bàá mãã wù nãdĩĩyiɛgu, wà: “Jówà, ɲimãã mãã mǝ̃̀ Tǝẁ píɛlá wù nãkrɔfɩnfaagu ɲì drɔ; Dũnnũ yuuntasǝrɩ tɩ́gɩnǝ̃́ǝ̃ cuu nǝ̃ǝ̃m'n bǝ̃ǝ̃gu dìi ǹ-ba dɩ̀ fennãã ɲì nã, jówà ɲi ji da ɲì yuɔri dɩ̀ nã.

35 Ɲi sáa da, nũmmã̀ yáá mã̀ ko-m, ɲí hã-m nǝ̃ wuuri mǝ̃́ wuu; hũnɲũɔ̃sǝrì yáá mǝ̃̀ nã, ɲí hã-m nǝ̃ hũmmã mǝ̃́ ɲũɔ̃.

Mǝ̃̀ yáá norii-i, nǝ̃ ɲí hũɔ̃ ǹ-hyar-m ɲì nãã;

36 mǝ̃̀ sáá nǝ̃ kuulanãm, ɲí hã-m nǝ̃-ba mǝ̃́ cĩĩ mǝ̃̀ cãnkũɔ̃mã; mǝ̃̀ yáá mǝ̃̀ jaa, ɲí kãã dǝ̃ǝ̃-m; mǝ̃̀ yáá kasow nã, ɲí kãã dǝ̃ǝ̃-m.”

37 Wu-ń waa dɩ̀-lǝ, cosũɔ̃lbabà ga ver ǹ-yugu-yǝ wà: “Yitii, yi díɛ́ nũmmã̀ ko-n bii bǝ̃ǝ̃-i nã̀ã hã-n nǝ̃ wuuri ń wuu?

Bii bǝ̃ǝ̃-i hũnɲũɔ̃sǝrì yáá ǹ nã nǝ̃ yí hã-n nǝ̃ hũmmã ń ɲũɔ̃?

38 Bii bǝ̃ǝ̃-i yi díɛ́ wà norii-i nǝ̃-n, nã̀ã hũɔ̃ ǹ-hyar-n yì nãã?

Nǝ̃ bii bǝ̃ǝ̃-i yi díɛ́-n ǹ sǝ nǝ̃ kuulanãmba, yí hã-n nǝ̃-ba ń dii?

39 Ǹ yáá ǹ jaa bii bǝ̃ǝ̃-i nǝ̃ ǹ yáá kasow nã bǝ̃ǝ̃ hagɩ-ì yí kãã dǝ̃ǝ̃-n?”

40 Yuuntiiẁ ga waa nǝ̃-ba wà: “Yáalà mǝ̃́ waa sulammã nǝ̃-ɲã́ã̀: ɲi yáá ɲì ce-dǝ ɲì hã mǝ̃̀ cwanããba nã̀ã ba ɲì ce-dǝ ɲì hã wùú mãã bà min furũũgɩ nã, gɩ́ nǝ̃ nã́ã́ ɲi yáá ɲì ce-dǝ ɲì hã mã́ã-i.”

41 Gɩ̀ furũũgɩ nã, wù ga ver ǹ-waa nǝ̃ bàá mãã dàa wù ɲiɲũɔ̃gɩ nã wà: “Hálàa mǝ̃̀ tuɔra, ɲimãã mãã ɲì cɔ̃mmã bǝ̃ǝ̃lǝ̃ǝ̃!

Bà díilá dǝ̃ǝ̃mãã mãã fɩraa, ǹ-ba bà cii tiilǝtiiw nǝ̃ wù tĩɛ̃taaba nã, bláà ɲì kã mã̀-lǝ mã̀ã́ nã-i!

42 Ɲi sáa da, nũmmã̀ yáá mã̀ ko-m, ɲi sáa hã-m nǝ̃ wuurɩ mǝ̃́ wuu; hũnɲũɔ̃sǝrì yáá mǝ̃̀ nã, ɲí sáa hã-m nǝ̃ hũmmã mǝ̃́ ɲũɔ̃.

43 Mǝ̃̀ yáá noriiw, ɲí sáa hũɔ̃ mǝ̃́ hyar ɲì nãã; mǝ̃̀ sáá nǝ̃ kuulanãmba, ɲí hã-m nǝ̃-ba mǝ̃́ cĩĩ mǝ̃̀ cãnkũɔ̃mã; mǝ̃̀ yáá mǝ̃̀ jaa, nã̀ã ba kasow nã, ɲi sáa kãã dǝ̃ǝ̃-m.”

44 Wu-ń waa dɩ̀-lǝ, bà ga waa wà: “Yitii, bii bǝ̃ǝ̃-i nũmmã̀ yáá mã̀ ko-n, yindagǝ nã hũnɲũɔ̃sǝrì yáá ǹ nã yindagǝ nã ǹ ya noriiw yindagǝ nã ǹ sáá nǝ̃ kuulanãmba yindagǝ nã ǹ yà ǹ jaa yindagǝ nã ǹ yà kasow nã nǝ̃ yi sáa kãã pya ǹ nã?

Bii bǝ̃ǝ̃-i?”

45 Yuuntiiẁ ga waa nǝ̃-ba wà: “Yáalà mǝ̃́ waa sulammã nǝ̃-ɲã́ã̀: ɲi yáá ɲì hla dɩ̀ celli ɲì hã mǝ̃̀ cwanããba, bàá mãã bà min furũũgɩ nã, gɩ̀ nǝ̃ nã́ã́ ɲi yáá ɲì hla dɩ̀ celli ɲì hã mã́ã-i.”

46 Gɩ̀-lǝ gɩ̀ nã, bà-lǝ bà ji kã fɩraa piirɩm'n sùɔ́gɩ nã.

Nǝ̃ bàá mãã cosũɔ̃lbaba, bà-lǝ bà ga da fɩraa nũmǝ̃nãsǝri.»