Mãtiyew 24

Dũnnũ bũũsuɔ'n mũũm'n cɔ̃mmã

Yesuẃ fǝ̃ǝ̃ ǹ-hlǝ Dũnnũ bũũsuɔgɩ nã, ǹ-ba wù maar, wù duunãtaabá kã wù nãã wà wú ne Dũnnũ bũũsuɔ'n donɲã.

2 Yesuẃ fǝ̃ǝ̃ ǹ-waa nǝ̃-ba wà: «Yáalà mǝ̃́ waa sulammã nǝ̃-ɲã́ã̀: ɲi díɛ́ don ɲã́ã̀ mãã nnĩĩ-i, yuugɩ nàa yuu nã bà ga juo jiilaa ǹ-baal ɲã̀ min nã, bà síì ya tɩntãndɩ dɩndɩ́ ba dɩdarǝ'n drɔ.»

3 Yesuẁ gáa kãã jiraa Olivie tun tãnũũgɩ nã, wù duunãtaabá fǝ̃ǝ̃ ǹ-kuganãã ǹ-kãã jii ǹ-yugu-yǝ bà dǝ wà: «Ǹ wáalá gàá mãã nnĩĩ, waa ń ja-yáà, gà ji ce bii bǝ̃ǝ̃-i?

Bincɔ̃m ji ce ǹ-pɩgaa-yáà nǝ̃ ǹ jolli nǝ̃ cuu tãl'n bǝ̃ǝ̃gu?»

4 Yesuẃ siɛ-ba wà: «Mǝ̃́garà ɲí blǝ ɲì hla nã, ba báa ji vuu-ɲã́ã̀.

5 Cocindɩ ga jo ǹ-ji tuu mǝ̃̀ yiiri ǹ-ce-dǝ bà dǝl; wùú nǝ̃n jo, wù ji waa wà: “Mǝ̃n-lǝ mã́ã-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo.”

Gɩ̀ taabà ji vuu cocin.

6 Ɲi ji ba ɲì nɔ̃ byariɛ'n dullɩ nã, nã̀ã bà ɲì nɔ̃ byariɛ'n cɔ̃mmã nã.

Mǝ̃́garà ɲi blǝ ɲì hla nã, ɲi báa ya gbǝrsǝrɩ́ blǝ-ɲã́ã̀, gà-lǝ gàá sáalà gá ce.

Nǝ̃ cuu-lǝ, wù sǝ yà hi wù tã yugo.

7 Codũliɛdaagà ji suro byaari nǝ̃ codũliɛdaaga, yiɛdagǝtaabà ji suro byaari nǝ̃ badaaba; nũmmã ji ba sɔsǝcin nã, nǝ̃ ɲũũrũũ yo gɩ̀ ji mǝ̃gaa ǹ-saaraa sɔsǝcin nã.

8 Nǝ̃ gà-lǝ gà ji ba nã́ã́ cakusunĩĩ'n kusuugɩ̀ mãã gɩ̀ dĩɛ̃l gɩ̀ du wù nã nã̀ã ba gɩ̀ jaa-yǝ nĩĩgu mãã.

9 Bà ji blǝ ǹ-ywar-ɲã́ã̀, nã̀ã ko-ɲã́ã̀.

Ɲi cɔ̃mmã̀ ji bla coplaaga min nã mã́ã cɔ̃mmã nã-i.

10 Gɩ̀-lǝ gɩ̀ nã, cocindɩ̀ ji ver furũũ.

Bà ji ba bà hlǝ bà ɲĩɛ̃ furũnɲã nã, nǝ̃ bà ɲĩɛ̃ cɔ̃mmã́ bla bà ɲĩɛ̃ nã.

11 Tanhiilaakwasǝnããbà ga jo ǹ-ji vuu cocin wà bà-lǝ bà-i Dũnnũ tanhiilaaba.

12 Kuu ji ba gɩ̀ piɛ gaabɩbliɛga nã gɩ̀ maar, gɩ̀-lǝ gɩ̀ tammã cocindɩ̀ síì ba dɩ̀ dwal nǝ̃ dɩ̀ ɲĩɛ̃ hlo.

13 Nǝ̃ gùú tii mãã wù ji sa ǹ-cii ǹ-hiraa dɩ̀ dɩndɩ nã fuwɔ gɩ̀ kǝǝrɩ nã, Dũnnũẁ ji kor-yǝ.

14 Dũnnũ yuuntasǝ'n cɔ̃ndudwalɩm mã́ã̀mã̀ ji waa ǹ-ja cwaaba cuu yanɲã min nã, coplaaga min gá nɔ̃-dǝ nǝ̃ cuuẁ ji da wú tã.

(Markaw 13.14-23 ; Lukaw 21.20-24)

15 «Gùú nã mãã ɲi-ń da wùú mãã wù cɔ̃mmã̀ã bla Dũnnũw nã, wù ce bǝ̃ǝ̃lǝ̃mmã, wùú mãã Dũnnũ tanhiil Daniyɛlw wáalá wù cɔ̃mmã wù sɛbɛw nã, wùu ba Dũnnũ nũɔ̃sǝn sùɔ́gɩ nã, yíi mãã ǹ kal cɔ̃m^a mã́ã̀, ǹ saa ń fǝ̃ǝ̃ mã́ kaalaa ǹ nã!

16 Gɩ̀-lǝ gɩ̀ nã, bàá mãã Suude yiɛgu, bá ba bà kwar bà maar tãnũnɲã nã.

17 Yíi nǝ̃n ba taasǝ̃ǝ̃nǝ̃ǝ̃gu, n báa wa ń jãn duugɩ nã ǹ-ga tuu ǹ ɲinɲã.

18 Yíi nǝ̃n ba fugagɩ nã, n báa ver ń kũũ ǹ-ga tuu kuulaadiiyǝpɩpuɔlayǝ.

19 Gɩ̀-lǝ gɩ̀ bãnɲã nã, gɩ̀ ywaruugɩ̀ ga dɩsɩrǝǝ cakusunǝ̃ǝ̃ba nã-i dugɔ, nǝ̃ bàá mãã bà tãnkuuraabà ŋmãsã yugo.

20 Bláà ɲì cirǝ̃ǝ̃ Dũnnũw nã, ɲì kwarɩm'n bǝ̃ǝ̃gɩ̀ báa ji ba yɔ'n bǝ̃ǝ̃gu yindagǝ nã fiisaa'n yuugu.

21 Nã̀ã wa sulammã nã, ywargǝ̃ngããdaagɩ̀ ga jo, gùú mãã gɩ̀ sáa hi ǹ-hi curo ǹ-da, ǹ-tuu cuu dullɩ nã dìi ǹ-ji vaa nǝ̃ jimããgu, nǝ̃ gɩ̀ tuugɩ̀ síì hi curo ǹ-da.

22 Dũnnũẁ nã́ã̀ ba wù sáa hiil kuu yun ɲã́ã̀ nã, curo'n sáá wù ji kor ǹ-hlǝ dɩ̀ nã.

Nǝ̃ wù níé ǹ-hiil bàá mãã, bà-lǝ bàá cɔ̃mmã nã-i wú hiil kuu ɲã nã.

23 Gɩ̀-lǝ, curodiɛw-ń ji waa nǝ̃-ɲã́ã̀ wà: “Níyà, Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo wɩ̀-i nhlíɛ̀!” nǝ̃ndrǝ: “Wɩ̀-i náà!”, bláá hũɔ̃-dǝ.

24 Nã̀ã wa kwasǝnããdaabà ga jo.

Badaabà ji ce bà hla, wà bà-i kortaabaa mãã Dũnnũẁ plã wù nũɔ̃gu wà wu ga tĩɛ̃ bá jo, badaabá ce bà hla wà bà-i Dũnnũ tanhiilaaba.

Bà ji ce cɔ̃ngǝ̃ngãmmã ǹ-pɩgaa cwaaba nã̀ã ce cɔ̃ntugulǝm yo.

Bà ce gà-lǝ, ǹ-da ce wà dɩ́ nã́ã̀ ba dɩ̀ ji gbǝ̃ǝ̃ ǹ-ce, bá da ǹ-vuu halle bàá mãã Dũnnũw níé ǹ-hiil-ba.

25 Níyà, mǝ̃n-lǝ, mǝ̃̀ túɔ́ ǹ-gbǝ ɲì nã ǹ-kra!

26 Gɩ̀ sùɔ́gɩ nã, ba-ń waa nǝ̃-ɲã́ã̀ wà Kɩrsaẃ nàa jerkwaarɩ nã, bláá kã.

Yindagǝ nã bá waa nǝ̃-ɲã́ã̀ wà wu nàa wùu ŋmǝ̃ǝ̃rǝ̃ǝ̃ duu gúɔ̀ kusunã, bláá hũɔ̃-dǝ.

27 Dũnnũẁ ɲĩɛ̃sǝmmã̀ mãã mã̀ ta gùú tammãã mãã, ǹ-hlǝ bǝ̃ǝ̃'n pal'n yiɛgu ǹ-ga hi gɩ̀ jãnɩm'n yiɛgu, Curonbiɛ yo wù jol'n bǝ̃ǝ̃gɩ ji ce nnĩĩ-i.

28 Pĩɛ̃ndɩ-ń ba gùú sùɔ́gu, dũnǝ̃ǝ̃ba tɩgii gùú sùɔ́gɩ-i.

(Markaw 13.24-31 ; Lukaw 21.25-33)

29 «Gɩ̀-lǝ gɩ̀ ywaruu'n yunɲã-ń yii ǹ-ta, bǝ̃ǝ̃gɩ̀ ga juo ba dũũ nǝ̃ hyargaagɩ́ juo ba gɩ̀ sǝ gùu kaalaa.

Ŋmĩɛ̃gà ji hlǝ drɔkuɔlɩ nã ǹ-duruu, nǝ̃ drɔɲinɲãã mãã nǝ̃ fãngããgu, ɲã̀ã́ yo, ɲã́ ba ɲã̀ saaraa.

30 Gɩ̀-lǝ gɩ̀ nã, gùú mãã gɩ̀ pɩgaa Curonbiɛ'n cɔ̃mmã, gɩ̀ ji hlǝ drɔkuɔlɩ nã.

Gɩ-ń hlǝ gɩ̀-lǝ gɩ̀ nã, cwaaba min cuuw nã, bà ji pɩpɩrĩɛ̃ bà yunɲã nã nã̀ã ba bà kaalaa.

Bà ji ne ǹ-da Curonbiɛẁ hɩr wù jo drɔ yiilunɲãã drɔ nǝ̃ fãngããgǝ̃ngããdagǝ, nǝ̃ yuuntasǝ'n gbɩgbaamcindamã.

31 Gɩ̀-lǝ gɩ̀ nã wù ji ce wù mɛlɛgɛba bu yendi, ǹ-tɩgii, bà minw mãã Dũnnũẁ níé ǹ-hiil-ba cuu yanɲã nnǝ̃ǝ̃ɲã min nã, ǹ-tuu drɔkuɔl'n yuugɩ nã, ǹ-ga kra gɩ̀ mlãrɩ nã.

32 Fǝ̃́ǝ̃lã̀ figie tuu'n cãwaadũũmã̀ mãã mã̀ waa dìí mãã: ɲi-ń ji da gɩ̀ pɩpɩrãnɲã caa gùú nã, ɲi fǝ̃ǝ̃ wà hufyallɩ píɛlá nã-i.

33 Gùú tammã dɩnmã nã-i, ɲi-ń ji ba ɲì da gà-lǝ gà min gà ce, ɲí fǝ̃ǝ̃ wà Curonbiɛ'n bǝ̃ǝ̃gɩ píɛlá nã, wà dɩ káaláa gɩ̀ síì hǝ̃ǝ̃sǝ nǝ̃ wú ver ǹ-jo.

34 Yáalà mǝ̃́ waa sulammã nǝ̃-ɲã́ã̀: kuɔkuɔtaa ɲimãã síì tã ǹ-baal, nã́ã́ gɩ̀ cɔ̃mmã̀ min mã sáa ce.

35 Drɔkuɔli nǝ̃ ɲũũrũũgɩ̀ ji ta ǹ-baal, nǝ̃ mǝ̃n cãwandɩ̀ ji ba.

(Markaw 13.32-37 ; Lukaw 17.26-30, 34-36)

36 «Nǝ̃ cuu tãl'n yuugu nǝ̃ gɩ̀ bǝ̃ǝ̃gu, curo'n sǝ̃n fǝ̃ǝ̃-ɲã, nã́ã́ Tiiyǝ sǝ nǝ̃ wù dɩn.

Halle drɔ mɛlɛgɛba nǝ̃ Biɛnĩĩw, bà sǝ̃n fǝ̃ǝ̃-gǝ.

37 Dìí nǝ̃n cíé Nũhũ bǝ̃ǝ̃gu, Curonbiɛ yo wù jol'n bǝ̃ǝ̃gɩ̀ ji ce nnĩĩ-i.

38 Nũhũ bǝ̃ǝ̃gu, dɔkɩnkandɩ̀ wáalá dɩ ji nɔ̃, cwaabà bla wuurɩ nã-i nǝ̃ kwãnɲũɔ̃gǝgɩ nã, bà taa bà ɲĩɛ̃, nã̀ã ba bà hiil bà bisiiba fuwɔ gùú yuuguu mãã Nũhũẁ jáa jãn batow nã.

39 Bà sáa fǝ̃ǝ̃rǝ̃ǝ̃ wà cɔ̃mmã́ nàa mã̀ jo, fuwɔ ǹ-ji da dɔkɩnkandìi ga juo guu bà min nã^b.

Curonbiɛ yo, wù jol'n bǝ̃ǝ̃gɩ̀ ji ce nnĩĩ-i.

40 Cwaaba hǝ̃ǝ̃lbà ji ba mããcemmã nã fugagɩ nã, bà ga tuu wù dɩnw ǹ-ta nǝ̃-yǝ, nǝ̃ wudiɛẃ ba.

41 Canããba hǝ̃ǝ̃lba-ń ba bà jasǝ jũmmã bà min nãmlãrɩ nã, bà ga tuu wù dɩnw ǹ-ta nǝ̃-yǝ nǝ̃ wudiɛẃ ba.

42 Gɩ̀ sùɔ́gɩ nã, bláà nũmǝ̃nãw, nã̀ã wa ɲi sǝ̃n fǝ̃ǝ̃ ɲì Tii'n jol'n yuugu.

43 Ɲi fǝ̃́ǝ̃lã́ wà duu'n tii nã́ã̀ ba wu-ń ce wú fǝ̃ǝ̃ ŋmãllĩĩ'n jol'n bǝ̃ǝ̃gu, wù yáá wù ji ba nũmǝ̃nãw ǹ-ba wù fennãã, wù sáá wù ji ya wú ka fieri ǹ-jãn.

44 Ɲimãã yo, tɩ́gɩnǝ̃̀ǝ̃ ɲí cii.

Ɲi mãã ɲì sǝ̃n ne Curonbiɛ'n hlũũgu gùú nã, wù jo gùú bǝ̃ǝ̃gɩ-i.

Mããcieraaba hǝ̃ǝ̃l cɔ̃mmã

(Lukaw 12.41-48)

45 «Nǝ̃-ń nɔ̃ wà mããcierw mãã yalntiiw nã̀ã ba wù fǝ̃ǝ̃ cɔ̃mmã, wɩ̀-i mããcierw mãã wù yuuntiiẁ kárrá-yǝ wù suɔ'n mããcieraa'n yuugɩ nã, nã̀ã ce wu ba wù hã-ba nǝ̃ wuuri dɩ̀ bǝ̃ǝ̃gu.

46 Gɩ̀ tii'n yuuntii wu-ń ga kã nã̀ã ver ǹ-ji hi-yǝ, wù ce gɩ̀ mããcemmã mã̀ tammã nã, wù yuugɩ̀ dwállá.

47 Yáalà mǝ̃́ waa sulammã nǝ̃-ɲã́ã̀: yuuntiiẁ ji kra-yǝ wù cɔ̃mmã min yuugɩ nã.

48 Nǝ̃ gɩ-ń ba mããcierbɩblayǝw, wù ji ba wù ne wà: “Mǝ̃̀ yuuntiiẁ síì jo kuɔkuɔ”,

49 nã̀ã du nã ǹ-ba wù mũũ wù nãmããcieraaba, nã̀ã ba wù wuu nã̀ã ba wù ɲũɔ̃ nǝ̃ kwãnɲũɔ̃rããba.

50 Gɩ̀-lǝ gɩ̀ nã, mããcierw mãã wù sǝ̃n ne wù yuuntii'n hlũũgu gùú yuuguu nǝ̃ gùú bǝ̃ǝ̃guu mãã, wù jo gùú nã-i.

51 Wu-ń jo, mããcier wáà cíé gùú gaabɩbliɛgaa mãã, wú juo pã-yǝ nǝ̃-ga fuwɔ piyɛ̃, nã̀ã dii-yǝ wù mãã wù ga dii kusunɲãhǝ̃nhãltaaba gùú sùɔ́guu mãã, kaaluugu nǝ̃ ɲirãn'n wuumã̀ ga ba dàa.»