Markaw 13

Dũnnũ bũũsuɔ'n mũũm'n cɔ̃mmã

Yesuẁ gáa ba wù hlǝ Dũnnũ bũũsuɔgɩ nã gùú nã, wù duunãtiidiɛ waa nǝ̃-yǝ wà: «Kaltii, ne dogǝ̃ngãn ɲã́ã̀ mãã!

Ne bà mlã-ɲã nǝ̃ gùú tɩntrãfɩnfiɛgaa mãã!»

2 Yesuẃ fǝ̃ǝ̃ ǹ-siɛ-yǝ wà: «Ɲi mãã ɲì da gùú dogǝ̃ngãnɲãã mãã nnĩĩ, bà ga juo jiilaa ǹ-baal ɲã̀ min nã, bà síì ya tɩntãndɩ dɩndɩ́ ba dɩdarǝ'n drɔ.»

Gàá mãã gà ji ba gà ce ɲí fǝ̃ǝ̃ wà cuu tãllɩ píɛlá nã

(Mãtiyew 24.3-14 ; Lukaw 21.7-19)

3 Yesuẃ fǝ̃ǝ̃ ǹ-kãã jiraa Olivie tun'n tãnũũgɩ nã, ǹ-vĩĩ Dũnnũ bũũsuɔgu.

Piɛrba nǝ̃ Yakubaw nǝ̃ Yuhanãw bá nǝ̃ Ãndrew, bà-lǝ bá ba bà dǝ nǝ̃ Yesuw dɩn.

Bá yugu-yǝ wà:

4 «Ǹ wáalá gàá mãã nnĩĩ, waa ń ja-yáà, gà ji ce bii bǝ̃ǝ̃-i?

Bii ji ce ǹ-pɩgaa-yáà wà gà min ga ji ce ǹ-suu?»

5 Yesuẃ fǝ̃ǝ̃ ǹ-ba wù waa nǝ̃-ba wà: «Mǝ̃́garà ɲí blǝ ɲì hla nã, ba báa ji vuu-ɲã́ã̀.

6 Cocindɩ ga jo ǹ-ji tuu mǝ̃̀ yiiri ǹ-ce-dǝ bà dǝl; wùú nǝ̃n jo, wù ji waa wà: “Mǝ̃n-lǝ mã́ã-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo.”

Gɩ̀ taabà ji vuu cocin nã.

7 Ɲi-ń ji ba ɲì nɔ̃ byariɛ'n dullɩ nã, nã̀ã ji bà ɲì nɔ̃ byariɛ'n cɔ̃mmã nã, bláá ya gbǝrsǝrɩ́ blǝ-ɲã́ã̀, gà-lǝ gàá sáalà gá ce.

Nǝ̃ cuu-lǝ, wù sǝ yà hi wù tã yugo.

8 Codũliɛdaagà ji suro byaari nǝ̃ codũliɛdaaga, yiɛdagǝtaabà ji suro byaari nǝ̃ badaaba.

Ɲũũrũũgɩ̀ ji mǝ̃gaa ǹ-saaraa sɔsǝcin nã, nǝ̃ nũm yo mã̀ ji ba dìɛ.

Nǝ̃ gà-lǝ gà ji ba nã́ã́ cakusunĩĩ'n kusuugɩ̀ mãã dĩɛ̃l ǹ-du wù nã nã̀ã ba gɩ̀ jaa-yǝ nĩĩgu mãã.

9 «Mǝ̃́garà ɲí blǝ ɲì hla nã, bá ji kã nǝ̃-ɲã́ã̀ sugojarsɔnɲã nã, bà ji dii-ɲã́ã̀ Yahudyaba tɩgim'n dontaa'n nãkrɔnɲã nã, bá mũũ-ɲã́ã̀.

Bà ji kã nǝ̃-ɲã́ã̀ kumãndãgǝ̃ngĩɛ̃ba nã nǝ̃ yuntaa yo bà nãã.

Bà ji ce-ɲã́ã̀ nǝ̃ dɩ̀-lǝ dɩ̀ min mã́ã cɔ̃mmã nã-i, ɲí ce dɩ̀ siɛrnãsǝri bà yinɲã nã.

10 Gɩ̀ saa Yesu cɔ̃ndudwalɩmmã́ waa ǹ-ja coplaaga min haasǝ.

11 Nǝ̃ gùú nã mãã ba-ń ji kãã dii-ɲã́ã̀ fãngãtaa'n nãkruɔgɩ nã, bláá maa ɲí ba ɲì jã ɲi mãã ɲì ga waa dìí mãã gɩ̀ sùɔ́gɩ nã.

Sulammã nã, gɩ̀-lǝ gɩ̀ bǝ̃ǝ̃gu, ɲi sɩga ba ɲì waa ɲì nũɔ̃nãcãwanĩɛ̃ sǝ, Dũnnũ Yuflǝ-lǝ wùú ga dii-ga ɲì nũɔ̃gɩ nã, wu-ń dii-ga, wáalà-ga.

12 Ɲũũnãtii ji dii ɲũũnãtiiw fãngãtaa'n nãkruɔgɩ nã bá ko-yǝ.

Tiiba yo bà ji ce gùú dɩ̀ dɩndɩ-i nǝ̃ tãnkuuraaba.

Tãnkuuraabà ji suro bà tǝbaa yuunã, ǹ-ce bá ko-ba.

13 Ɲì cɔ̃mmã̀ ji bla cwaaba min nã, mã́ã cɔ̃mmã nã-i.

Nǝ̃ gùú tii mãã wù ji sa ǹ-cii ǹ-hiraa dɩ̀ dɩndɩ nã fuwɔ gɩ̀ kǝǝrɩ nã, Dũnnũẁ ji kor-yǝ.

Yesuẁ waa Serusalɛm mũũm'n cɔ̃mmã

(Mãtiyew 24.15-28 ; Lukaw 21.7-19)

14 «Gùú nã mãã ɲi-ń da wùú mãã gɩ̀ cɔ̃mmã̀ã bla Dũnnũw nã, wù ce bǝ̃ǝ̃lǝ̃mmã, wùu ba gùú sùɔ́guu mãã wù sǝ̃n saa wú ba gɩ nã, yíi mãã ǹ kal cɔ̃m mã́ã̀, ǹ saa ń fǝ̃ǝ̃ mã́ kaala ǹ nã!

[Nã̀ã wà Dũnnũ tanhiil Daniyɛlw wáalá gɩ̀ cɔ̃mmã wù sɛbɛw nã.]

Gɩ̀-lǝ gɩ̀ nã, bàá mãã Suude yiɛgu, bá ba bá kwar bá maar tãnũnɲã nã.

15 Yíi nǝ̃n ba taasǝ̃ǝ̃nǝ̃ǝ̃gu, n báa jãn duugu n ga tuu ǹ wariɛga.

16 Yíi nǝ̃n ba fugagɩ nã, n báa ver ń kũũ ǹ-ga tuu kuulaadiiyǝpɩpuɔlayǝ.

17 Gɩ̀-lǝ gɩ̀ bãnɲã nã, gɩ̀ ywaruugɩ̀ ga dɩsɩrǝǝ cakusunǝ̃ǝ̃ba nã-i dugɔ, nǝ̃ bàá mãã bà tãnkuuraabà ŋmãsã yugo.

18 Bláà ɲì cirǝ̃ǝ̃ Dũnnũw nã wà wu báa ya dɩ̀-lǝ dɩ́ hi yɔ'n bǝ̃ǝ̃gu.

19 Nã̀ã wa sulammã nã ǹ-tuu cuu dullɩ nã dìi ǹ-ji vaa nǝ̃ jimããgu, yun ɲã́ã̀ɲã̀ ywaruu'n tuugɩ̀ sáa hi ǹ-hi curo ǹ-da, nǝ̃ gɩ̀ síì hi curo ǹ-da yo sã.

20 Nǝ̃ yun ɲã́ã̀, Yitiiw nã́ã̀ ba wù sáa hiil kuu ɲã̀ nã, curo'n sáa wù ji kor ǹ-hlǝ dɩ̀ nã.

Nǝ̃ wù níé ǹ-hiil bàá mãã, bà-lǝ bàá cɔ̃mmã nã-i wú hiil kuu yun ɲã́ã̀ nã.

21 Gɩ̀-lǝ gɩ̀ nã, curow-ń waa nǝ̃-ɲã́ã̀ wà Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, “Wɩ̀-i nhlíɛ̀!” yindagǝ nã: “Wɩ̀-i náà!”, bláá hũɔ̃-dǝ.

22 Kwasǝnããdaabà ga jo.

Badaabà ji ce bà hla, wà bà-i kortaabaa mãã Dũnnũw plã wù nũɔ̃gu wà wu ga tĩɛ̃ bá jo, badaabá ce bà hla wà ba-i Dũnnũ tanhiilaaba.

Bà ji ce cɔ̃mmã ǹ-pɩgaa cwaaba, nã̀ã ce cɔ̃ntugulǝm yo.

Bà ce gà-lǝ, ǹ-da ce wà dɩ́ nã́ã̀ ba dɩ̀ ji gbǝ̃ǝ̃ ǹ-ce, bá da ǹ-vuu halle bàá mãã Dũnnũw níé ǹ-hiil-ba.

23 Mǝ̃́garà ɲí blǝ ɲì hla nã, mǝ̃n-lǝ mǝ̃̀ túɔ́ ǹ-gbǝ ɲì nã ǹ-kra.

Curonbiɛ'n jol'n tammã

(Mãtiyew 24.29-31 ; Lukaw 21.25-28)

24 «Gɩ̀-lǝ gɩ̀ yunɲã nã, ywaruu'n bǝ̃ǝ̃gɩ-ń ji ta, bǝ̃ǝ̃gɩ̀ ga juo ba dũũ, nǝ̃ hyargaagɩ́ juo ba gɩ̀ sǝ gùu kaalaa.

25 Ŋmĩɛ̃gà ji hlǝ drɔkuɔlɩ nã ǹ-duruu, nǝ̃ drɔɲinɲãã mãã nǝ̃ fãngããgu, ɲã̀ã́ yo, ɲã́ ba ɲã̀ saaraa.

26 Gùú nã-i, bà ga da Curonbiɛẁ jo yiilunɲã sǝ̃ǝ̃nã, nǝ̃ fãngããgǝ̃ngããdagǝ, nǝ̃ yuuntasǝ'n gbɩgbaamcindamã.

27 Wù ji tĩɛ̃ wù mɛlɛgɛbaa nã̀ã tɩgii wù níé hiil bàá bà minw mãã cuu yanɲã nnǝ̃ǝ̃ɲã nã, ǹ-tuu cuu yanɲã min nã ǹ-ga kra drɔkuɔl min nã.

Figietuu'n cãwaadũũmã

(Mãtiyew 24.32-35 ; Lukaw 21.29-33)

28 «Fǝ̃́ǝ̃lã̀ figie tuu'n cãwaadũũmã̀ mãã mã̀ waa dìí mãã: ɲi-ń ji da gɩ̀ pɩpɩrãnɲã caa gùú nã, ɲi fǝ̃ǝ̃ wà hufyallɩ píɛlá nã-i.

29 Gùú tammã dɩnmã nã-i, ɲimãã yo, ɲi-ń ji da gɩ̀ ɲinɲã, fǝ̃́ǝ̃lã̀ wà Curonbiɛ'n bǝ̃ǝ̃gɩ píɛlá nã, wà dɩ́ kaalaa gɩ̀ sɩga hǝ̃ǝ̃sǝ nǝ̃ wú ver ǹ-jo.

30 Yáalà mǝ̃́ waa sulammã nǝ̃-ɲã́ã̀: kuɔkuɔtaa ɲimãã síì tã ǹ-baal, nã́ã́ gɩ̀ cɔ̃mmã̀ min mã sáa ce.

31 Drɔkuɔli nǝ̃ ɲũũrũũgɩ̀ ji ta ǹ-baal, nǝ̃ mǝ̃n cãwandɩ̀ ji ba.

Dũnnũ dɩn fǝ̃́ǝ̃lã̀ cuu tãl'n bǝ̃ǝ̃gu

(Mãtiyew 24.36-44)

32 «Nǝ̃ cuu tãl'n yuugu nǝ̃ gɩ̀ bǝ̃ǝ̃gu, curo'n sǝ̃n fǝ̃ǝ̃-ɲã, nã́ã́ Tiiyǝ sǝ nǝ̃ wù dɩn.

Halle drɔ mɛlɛgɛba nǝ̃ Biɛnĩĩw, bà sǝ̃n fǝ̃ǝ̃-gǝ.

33 Mǝ̃́garà ɲí blǝ ɲì hla nã, bláà nũmǝ̃nãw, [nǝ̃ ɲí ba cirǝ̃mmã nã] nã̀ã wa ɲi sǝ̃n fǝ̃ǝ̃ gɩ̀ bǝ̃ǝ̃gɩ mãã gɩ̀ hi gùú bǝ̃ǝ̃gu.

34 Gɩ̀ ji ba tammã dɩnmã-i nǝ̃ biɛw mãã wù maar waali, nǝ̃ wù suɔgɩ́ ba.

Wú hã wù mããcieraaba curo wo curo nǝ̃ wù mããcem'n hlũũgu, ǹ-kra dɩ̀ nã ǹ-hã-yǝ, nã̀ã kra dɩ̀ nã ǹ-hã wùú mãã wù cii suɔ'n dũndɔ̃llɩ nã wà wu ba nũmǝ̃nãw ǹ-ba wù cii gɩ nã.

35 Gɩ̀ sùɔ́gɩ nã, bláà nũmǝ̃nãw, nã̀ã wa ɲi sǝ̃n fǝ̃ǝ̃ gùú bǝ̃ǝ̃guu mãã suɔntiiẁ ga jo.

Gɩ̀ ji ba bahɛruu nã-i wa, yisɔvũnvǝ̃ǝ̃gǝ nã-i wa, taajãlũũ nã-i wa, yindagǝ nã ciibǝǝ nã-i wa, curo'n sáa fǝ̃ǝ̃.

36 Bláá ya wu ga juo guɔruɔ ɲi nã duɔsǝmmã nã.

37 Mǝ̃̀ mãã mǝ̃̀ waa dìí mãã nǝ̃-ɲã́ã̀, mǝ̃̀ waa-dǝ nǝ̃ cwaaba min-i: Bláà nũmǝ̃nã!»