Markaw 14

Bà gbǝ Yesu blǝm'n cɔ̃mmã nã

(Mãtiyew 26.1-5 ; Lukaw 22.1-2 ; Yuhanãw 11.45-53)

Gɩ̀ yáá gùu yanãã bãnɲã hǝ̃ǝ̃l-i nǝ̃ Yahudyaba paaruuguu mãã bà ko tũmblɩw gɩ̀ nã, bà be-gǝ wà Ta-n-maa, nǝ̃ bà paaruuguu mãã bà ce-gǝ nǝ̃ burw mãã wù sǝ nǝ̃ leviirw, ɲã́ hi.

Yahudyaba puruɔntaa'n yuntaaba nǝ̃ Musa hlũũ'n yuntaabá ba bà caa ba mãã bà ji vuuraa ǹ-blǝ Yesuw gùú tammãã mãã ǹ-ce bá ko-yǝ.

2 Nã̀ã wa bà yáá bà waa wà: «Gɩ̀ sǝ̃n saa gɩ́ ba paaruu'n bǝ̃ǝ̃gu cwaaba báa ji suro ǹ-gaala kuugɩ nã.»

Cijaldiɛẁ tũn latɩkolo nɔ̃mmãã Yesu yuugɩ nã

(Mãtiyew 26.6-13 ; Yuhanãw 12.1-8)

3 Ǹ-ya Yesuẃ ba Betani lǝri sǝ̃nkũnĩĩ Simɔ̃ kuugɩ nã, wú kãã jiraa juwuukaagɩ nã, cijaldiɛ kãã jo nǝ̃ latɩkolo nɔ̃mmã kuufɩnfaadagǝ kusunã, bàa ce-gǝ nǝ̃ tɩntãndarǝ, bà be-dǝ wà albatɩr tɩntãn.

Wú juo guur korblɩ'n yuugu, nã̀ã tũn latɩkolo nɔ̃m mã́ã̀ Yesu yuugɩ nã.

4 Bà sǝ̃ǝ̃nã, badaba'n hiɛgá dũ, bá ba bà waa nǝ̃ bà ɲĩɛ̃ wà: «Wù bǝ̃́ǝ̃lǝ̃́ǝ̃ latɩkolo nɔ̃m mã́ã̀ nã wanĩĩ ji?

5 Bà yáá yì ji gbǝ̃ǝ̃ ǹ-suur latɩkolo nɔ̃m mã́ã̀, ǹ-hã kokwaaba nǝ̃ gɩ̀ jinɲã.

Mã̀ sollɩ̀ yáá dɩ̀ ji hi cokuku'n blɩ mããcem'n solli.»

Bá hiɛgá fǝ̃ǝ̃ ǹ-du nǝ̃-yǝ.

6 Nǝ̃ Yesuẃ fǝ̃ǝ̃ ǹ-waa nǝ̃-ba wà: «Bláá ba ɲì kwar cijal'n yigagu!

Ɲi ywar-yǝ wanĩĩ?

Wù cíé dìí mãã nnĩĩ, wù cíé nũɔ̃sǝn cɔ̃m-i ǹ-hã-m.

7 Sulammã nã, kokwaabà ji ba dìɛ ɲì sǝ̃ǝ̃nã bǝ̃ǝ̃ wo bǝ̃ǝ̃, gùú bǝ̃ǝ̃gɩ-ń saa ɲì nã, ɲi ji gbǝ̃ǝ̃ ǹ-ce-ba nǝ̃ diifɩnfaari.

Nǝ̃ mǝ̃n-lǝ, mǝ̃̀ síì ba dìɛ ɲì sǝ̃ǝ̃nã bǝ̃ǝ̃ wo bǝ̃ǝ̃.

8 Cijal wáà mãã wù ji hi dìí nã, wù cíé dɩ̀-i nnĩĩ nã.

Wù túɔ́ ǹ-tũn mǝ̃̀ pĩɛ̃n'n latɩkolo nɔ̃mmã-i mǝ̃n nã, nǝ̃ mǝ̃ ji da mǝ̃́ ku.

9 Yáalà mǝ̃́ waa sulammã nǝ̃-ɲã́ã̀, sùɔ́ wo sùɔ́ mãã cɔ̃ndudwalɩm mã́ã̀ ga waa ǹ-ja cuu cwaaba, bà ga ba bà waa cijal wáà diicerǝ díɛ̀dɩ cɔ̃mmã, nã̀ã ba bà kãnãã wù cɔ̃mmã nã.»

Sudasɩẁ caa wú hlǝ Yesu furũũgɩ nã

(Mãtiyew 26.14-16 ; Lukaw 22.3-6)

10 Sudasɩ Isɩkariyɔtɩw mãã wù yáá Nũɔ̃sɔ̃nǝ̃bahǝ̃ǝ̃lba sǝ̃ǝ̃nã, wú suro ǹ-kã Yahudyaba puruɔntaa'n yuntaaba nã wù ga hlǝ Yesu furũũgɩ nã ǹ-dii-yǝ bà nãkruɔgɩ nã.

11 Bà gáa nɔ̃ dɩ̀-lǝ, gɩ́ dwal bà nã dugɔ, bá gbǝ dɩ̀ nã wà ba ji pã ǹ-hã-yǝ.

Nǝ̃ Sudasɩ-lǝ, wú ba wù caa gùú bǝ̃ǝ̃guu mãã gɩ̀ ji saa wú ba wù ji hlǝ Yesu furũũgɩ nã ǹ-dii-yǝ bà nãkruɔgɩ nã.

Yesuẁ wuu Ta-n-maa paaruu'n wuuri nǝ̃ wù bluuba

(Mãtiyew 26.17-25 ; Lukaw 22.7-14, 21-23 ; Yuhanãw 13.21-30)

12 Burw mãã wù sǝ nǝ̃ leviirw, wù paaruugɩ̀ jáa hi, bà yáá bà saa bá ko Ta-n-maa paaruu'n tũmũũw^a gùú yuuguu mãã, wù duunãtaabá yugu-yǝ wà: «Ǹ caa n ga wuu Ta-n-maa paaruu'n wuuri haa-ì?

Yí kãã tɩgɩnǝ̃ǝ̃ dɩ̀ nã.»

13 Wú fǝ̃ǝ̃ ǹ-tĩɛ̃ wù duunãtaaba hǝ̃ǝ̃ldaba, nã̀ã waa nǝ̃-ba wà: «Kã́ã̀ lǝ'n kusuugɩ nã, ɲi ga jal nǝ̃ biɛdiɛ yà tuu hũngbãmũɔ̃gu.

Bláà ɲì duu wù nã.

14 Wu-ń ga jãn gùú suɔgu, ɲí jãn ɲí duu wù nã.

Ɲi ga yugu gɩ̀ suɔntiiw wà Kaltii wa ɲí juo yugu-yǝ ǹ-ne, wà wu ga wuu Ta-n-maa paaruu'n wuuri nǝ̃ wù duunãtaaba sùɔ́ hagu nã-ì?

15 Gɩ̀ biɛẁ nǝ̃ wù hla, wùú ga pɩgaa-ɲã́ã̀ nǝ̃ drɔdogǝ̃ngããdagǝ, nǝ̃ gɩ̀ kusunã wariɛga min gàa tɩgɩnǝ̃ǝ̃, ɲi ga gonãã Ta-n-maa paaruu'n wuur nã gùú sùɔ́gɩ-i ǹ-hã-yáà.»

16 Duunãtaabá fǝ̃ǝ̃ ǹ-ta bà maar lǝ'n kusuugɩ nã, ǹ-kãã hi ǹ-da cɔ̃mmã min nã́ã́ wù wáalá-dǝ nĩĩgu mãã.

Bá fǝ̃ǝ̃ ǹ-tɩgɩnǝ̃ǝ̃ Ta-n-maa paaruu'n wuurɩ nã.

17 Bahɛruugɩ nã, Yesuẃ kãã jo nǝ̃ Nũɔ̃sɔ̃nǝ̃bahǝ̃ǝ̃lba.

18 Ǹ-ya bá ba juwuukaagɩ nã bà wuu wuuri, Yesuẃ fǝ̃ǝ̃ ǹ-waa nǝ̃-ba wà: «Yáalà mǝ̃́ waa sulammã nǝ̃-ɲã́ã̀, ɲì sǝ̃ǝ̃nã, yi mãã yì wuu wuuri yì min nǝ̃ ɲimãã mãã, wudiɛ ji hlǝ mǝ̃̀ furũũgɩ nã.»

19 Bà min bà yigasǝrɩ juo ɲǝ̃ǝ̃, nã̀ã ba bà waa bà duu bà ɲĩɛ̃ nã wà: «Nã́ã́ mã́ã-ì?»

20 Wú fǝ̃ǝ̃ ǹ-waa nǝ̃-ba wà: «Nũɔ̃sɔ̃nǝ̃ɲihǝ̃ǝ̃l ɲimãã sǝ̃ǝ̃nã, wùú mãã wù yisɩ nǝ̃ mã́ã̀ bur yuɔgɩ nã, wù-lǝ wɩ̀-i.

21 Curonbiɛ-lǝ wù ji ta nã́ã́ dɩ̀ yállá nĩĩgu mãã wù cɔ̃mmã nã, nǝ̃ yíi mãã ǹ dii-yǝ nãkruɔgɩ nã, hujãncɔ̃mmã́ nǝ̃ ǹ drɔ.

Gɩ̀ tiiw nã́ã̀ ba wù sáa huu, gùú yáá gɩ̀ ji buɔ wù nã!»

Yitii'n wuur'n cɔ̃mmã

(Mãtiyew 26.26-30 ; Lukaw 22.15-20 ; Kor. dĩɛ̃l 11.23-25)

22 Bà gáa ba wuurɩ nã, Yesuẃ fǝ̃ǝ̃ ǹ-tuu burblɩri ǹ-dũũ kwayaw Dũnnũw nã, nǝ̃ gɩ̀ furũũgɩ nã, wú bǝraa dɩ̀ nã ǹ-hã-ba nã̀ã waa wà: «Hṹɔ̃lã̀ mã́ã cãnkũɔ̃mã-i nnĩĩ nã.»

23 Nã̀ã fǝ̃ǝ̃ ǹ-tuu guuɲũɔ̃kuugu, ǹ-dũũ kwayaw Dũnnũw nã, nã̀ã hã-ba nǝ̃-gǝ, bà min bá ɲũɔ̃.

24 Wú fǝ̃ǝ̃ ǹ-waa nǝ̃-ba wà: «Mã́ã twammã-i nnĩĩ nã, Dũnnũẁ mãã wù ji ɲũɔ̃ gùú twanflãmmãã mãã nǝ̃ cwaaba, mã̀-lǝ mã-i.

Mã̀ tṹnṹũ cocin'n cɔ̃mmã nã.

25 Yáalà mǝ̃́ waa sulammã nǝ̃-ɲã́ã̀, mǝ̃̀ síì ɲũɔ̃ ɛrsɛ̃ kwãmmã ǹ-da hlo, fuwɔ gùú yuuguu mãã mǝ̃̀ ga ɲũɔ̃ ɛrsɛ̃ kwãnsɩrãmmã Dũnnũ yuuntasǝrɩ nã.»

26 Dɩ̀-lǝ dɩ̀ furũũgɩ nã, bá ba bà hyar hlãnɲã bà bũũ Dũnnũẁ, nã̀ã suro ǹ-ta bà maar Olivie tun tãnũũgɩ nã.

Yesuẁ wa Piɛrw ji hla-yǝ

(Mãtiyew 26.31-35 ; Lukaw 22.31-34 ; Yuhanãw 13.36-38)

27 Yesuẃ fǝ̃ǝ̃ ǹ-waa nǝ̃-ba wà: «Ɲì min ɲi ji ver furũũ yisuɔ gúɔ́ nã.

Nã̀ã wa dɩ́ nàa dìi yal wà: “Mǝ̃̀ ji ko tũnciirw, tũmba min bà ji pisɩrĩɛ̃ ǹ-baal.”

28 Nǝ̃ mǝ̃-ń ji nĩĩ, mǝ̃̀ ji ta ɲì yiga nã Galile yiɛgu.»

29 Piɛrẃ fǝ̃ǝ̃ ǹ-waa nǝ̃-yǝ wà: «Halle bà min ba-ń ver furũũ, mǝ̃n-lǝ mǝ̃n síì ver furũũ.»

30 Yesuẃ fǝ̃ǝ̃ ǹ-waa nǝ̃-yǝ wà: «Ya mǝ̃́ waa sulammã nǝ̃-n, jimããgu, yisuɔgɩ dɩn gúɔ̀ nã, kwallaẁ síì hi ǹ-bu yin hǝ̃ǝ̃lw, nǝ̃ ń car-mã, ǹ-ji da yin siɛlw, wà n sǝ̃n fǝ̃ǝ̃-m.»

31 Nǝ̃ Piɛrw ver ǹ-ba wù waa wù dĩĩ dɩ̀ nã wà: «Halle mǝ̃-ń ji ba mǝ̃̀ saa mǝ̃́ kã yí ku nǝ̃-n, mǝ̃n síì car-dǝ wà mǝ̃ sǝ̃n fǝ̃ǝ̃-n.»

Bà min bá fǝ̃ǝ̃ ǹ-waa gùú dɩ̀ dɩndɩndi.

Yesuẁ cirǝ̃ǝ̃ Dũnnũw nã Getɩsɩmãnegu

(Mãtiyew 26.36-46 ; Lukaw 22.39-46)

32 Bá kãã hi sùɔ́dagǝ nã, bà be-gǝ wà Getɩsɩmãne, Yesuẃ fǝ̃ǝ̃ ǹ-waa nǝ̃ wù duunãtaaba wà: «Járrà nhlíɛ̀, nǝ̃ mǝ̃n kãã ba mǝ̃̀ cirǝ̃ǝ̃ Dũnnũw nã.»

33 Wú fǝ̃ǝ̃ ǹ-be Piɛrw, Yakubaw bá nǝ̃ Yuhanãw, bá ta bà min nǝ̃-yǝ.

Gbǝrsǝdaarɩ́ juo blǝ-yǝ, wù hiɛgá dũ nã ǹ-ba gà suɔ.

34 Wú fǝ̃ǝ̃ ǹ-waa nǝ̃-ba wà: «Mǝ̃̀ hiɛgá nǝ̃ gà hyã ga jo gà ji ko-m.

Bláà dìɛ nhlíɛ̀, ɲí ba nũmǝ̃nãw.»

35 Nã̀ã fǝ̃ǝ̃ ǹ-waa ǹ-kã yigagɩ nã fiyãã ǹ-kãã duruu ɲũũrũũgu ǹ-ba wù cirǝ̃ǝ̃ Dũnnũw nã wà dɩ́ nã́ã̀ ba dɩ̀ ji gbǝ̃ǝ̃ ǹ-ce, wú ce ywaruu'n bǝ̃ǝ̃ gúɔ̀gɩ báa hi-yǝ.

36 Wù yáá wù waa wà: «Aba Tɩtii, yíǹ saa, cɔ̃mmã min mã̀ ji gbǝ̃ǝ̃ ǹ-ce, báa ya ywaruu gúɔ̀gɩ́ hi-m.

Nǝ̃ mã́ã kusunã cɔ̃m sǝ̃n saa mã́ ce, yíi mǝ̃gãm sáalà mã́ ce.»

37 Wú ver ǹ-kã wù duunãtaaba nã ǹ-kãã hi-ba duɔsǝmmã, wú waa nǝ̃ Piɛrw wà: «Simɔ̃, ǹ duɔsǝ duɔsǝ-i!

Halle ǹ sáa ji ba ǹ ji gbǝ̃ǝ̃ ǹ-ba nũmǝ̃nãw ǹ-ce bǝ̃ǝ̃dagǝ fiyãã?

38 Bláà nũmǝ̃nãw, nǝ̃ ɲí ba ɲì cirǝ̃ǝ̃ Dũnnũw nã, kuu'n báa ji vuu ǹ-dii-ɲã́ã̀ diicĩɛ̃rǝdɩ nã.

Ɲi kusunã cɔ̃mmã̀ fa, nǝ̃ mǝ̃nkursǝrɩ́ ba ɲì cãnkũɔ̃mã nã.»

39 Wú vã ǹ-kã yigagɩ nã fiyãã hlo, ǹ-kãã cirǝ̃ǝ̃ Dũnnũw nã gùú tammã dɩnmã nã.

40 Nã̀ã ver ǹ-jo wù duunãtaaba nãã ǹ-juo da duɔsǝmmãã ji gbǝ̃ǝ̃ bà nã, bá ver ǹ-car nǝ̃-mã, bà sáa fǝ̃ǝ̃ bà mãã bà ji waa dìí nǝ̃-yǝ.

41 Yinsiɛlnãw, wú ver ǹ-juo waa nǝ̃-ba wà: «Váalà ɲì hla duɔsǝmmã nã, bláà ɲì fiisa!

Cɔ̃m'n kǝ-i!

Bà mãã bà ji dii Curonbiɛw diicĩɛ̃rǝntaa'n nãkrɔnɲã nã gùú bǝ̃ǝ̃guu mãã, gɩ̀ bǝ̃ǝ̃gɩ híí!

42 Sórrà, jaatiɛ.

Wùú mãã wù ji hlǝ mǝ̃̀ furũũgɩ nã wú nìɛ wù kuganãã.»

Yesu blǝm'n cɔ̃mmã

(Mãtiyew 26.47-56 ; Lukaw 22.47-53 ; Yuhanãw 18.3-12)

43 Yesuẁ bla wù waa dɩ̀-lǝ, ǹ-da Sudasɩw mãã wù yáá Nũɔ̃sɔ̃nǝ̃bahǝ̃ǝ̃lba sǝ̃ǝ̃nã, wù-lǝ ya ba wù jo nǝ̃ cocindi.

Bà yáá nǝ̃ dãngunãba nǝ̃ valunɲã.

Yahudyaba puruɔntaa'n yuntaaba, nǝ̃ Musa hlũũ'n yuntaaba, nǝ̃ vũnvãnããbaa yáá bàa tĩɛ̃-ba.

44 Wùú mãã wù yáá wù hlǝ Yesu furũũgɩ nã, wù yáá wùu pɩgaa-ba nǝ̃ díɛ̀-i wà: «Mǝ̃-ń kãã hi nã̀ã pɩpɩrĩɛ̃ gùú biɛ nã mãã, wù-lǝ wɩ̀-i, blǝ́rà-yǝ ɲí kã nǝ̃-yǝ, nǝ̃ cwaabá mǝ̃gaa ǹ-cii wù nã ǹ-fa.»

45 Bà gáa yii ǹ-hi, Sudasɩẃ paa ǹ-kuganãã Yesuw nãã, nã̀ã waa wà: «Kaltii!» nã̀ã juo mũɔ̃sǝrãã wù nã.

46 Gɩ̀-i, bà dɩgaliɛẃ fǝ̃ǝ̃ ǹ-juo blǝ-yǝ.

47 Bàá nǝ̃n yáá dàa, bà sǝ̃ǝ̃nã wudiɛ fa ǹ-ŋmǝ̃ǝ̃l wù dãngunãw ǹ-jã ǹ-tii Yahudyaba puruɔntaa'n yuuntigǝ̃ngã'n mããcier'n tũɔ̃gu.

48 Gùú nã-i, Yesuẃ fǝ̃ǝ̃ ǹ-waa nǝ̃-ba wà: «Gɩ̀ híí ɲí jo nǝ̃ dãngunãba nǝ̃ valunɲã, ɲi ji blǝ-m nã́ã́ cobal-i nǝ̃-m-ì?

49 Yunɲã min mǝ̃̀ yáá nǝ̃-ɲã́ã̀ Dũnnũ bũũsuɔgɩ nã mǝ̃̀ kal cwaaba, ɲi sáa blǝ-m gɩ̀-lǝ gɩ̀ bǝ̃ǝ̃gu.

Nǝ̃ dɩ̀-lǝ dɩ̀ híí ǹ-da ǹ-ce Dũnnũ cãwan'n sɛbɛbà cãwandɩ́ suu.»

50 Gɩ̀-i, wù duunãtaaba min bá ya wú ba nã̀ã ta kwarɩmmã.

51 Biɛmpɩrdiɛẁ yáá wù duu bà nã nǝ̃ kuulaasuuyǝkɩkaw dɩndɩn wù cãmblɩrɩ nã.

Bá blǝ-yǝ.

52 Nǝ̃ wù gáa nǝ̃nǝ̃ǝ̃ wù kuulaasuuyǝw nã, nã̀ã sɔ̃ ǹ-kwar nǝ̃ wù turkwaari.

Bà kã nǝ̃ Yesuw sugojarsuɔgɩ nã

(Mãtiyew 26.57-68 ; Lukaw 22.54-55, 63-71 ; Yuhanãw 18.13-14, 19-24)

53 Bá kã nǝ̃ Yesuw Yahudyaba puruɔntaa'n yuuntigǝ̃ngã'n kuugɩ nã, Yahudyaba puruɔntaa'n yuntaaba min, vũnvãnããba nǝ̃ Musa hlũũ'n yuntaaba, bá kãã tɩgii gɩ̀ sùɔ́gɩ nã.

54 Piɛrẃ ba wù dǝ̃ǝ̃ wù duu bà nã halbaa, fuwɔ ǹ-ga kãã jãn Yahudyaba puruɔntaa'n yuuntigǝ̃ngã'n suɔ'n kusuugu.

Wú jãn ǹ-kãã jiraa nǝ̃ mããcieraaba, ǹ-ba bà hura dǝ̃ǝ̃mã.

55 Yahudyaba puruɔntaa'n yuntaaba nǝ̃ Yahudyaba vũnvãnãã'n sugojarkuruɔgu, bá ba bà caa curo, wùú mãã wù ji wa wu díɛ́ dɩdarǝ ǹ-kã Yesu yiɛgu, dìí mãã dɩ̀ ji ce wù kukwo'n cɔ̃mmã, nǝ̃ bà sáa da curo.

56 Nã̀ã wa cocin yáá bà bǝr bà dii Yesuw nã, nǝ̃ gà-lǝ gà min nã, bàá nǝ̃ bà ɲĩɛ̃, bà cãwanĩɛ̃ga sáa ga tuu.

57 Badaabá suro wà bá bǝr ǹ-dii wù nã wà:

58 «Yi nṹɔ̃́ wù waa wà: “Jíilà Dũnnũ bũũduu gúɔ̀ mãã cwaabà mlã-gǝ, ɲi da mã̀ã mã gɩdagǝ bãnɲã siɛl kusuugɩ nã, gùú mãã cwaanbiiba sáa mã-gǝ.”»

59 Nǝ̃ halle dìí yo dɩ̀ nã, bà cãwanĩɛ̃gà sáa tuu.

60 Yahudyaba puruɔntaa'n yuuntigǝ̃ngãẃ suro bà sǝ̃ǝ̃nã ǹ-yugu-yǝ wà: «Bà mãã bà wa ba díɛ́ gàá mãã ǹ-kã ǹ yiɛgu, yíǹ síì da dɩdarǝ ǹ-siɛ-ba-ì?»

61 Yesuẃ ba cĩɛ̃, wù sáa siɛ-ba nǝ̃ cɔ̃m.

Yahudyaba puruɔntaa'n yuuntigǝ̃ngãw ver ǹ-yugu-yǝ hlo wà: «Nã́ã́ yíǹ-lǝ yíi-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo-ì?

Yi mãã yì bũũ gùú Dũnnũw, yíǹ-lǝ yíi wù bíɛ́w-iì?»

62 Yesuẃ fǝ̃ǝ̃ ǹ-siɛ-yǝ wà: «Ũwũũ mǝ̃n-lǝ mã́ã-i.

Ɲi ji da Curonbiɛw wùu jiraa Fãngããgɩmintii Dũnnũ nãdĩĩyiɛgu, nã̀ã ba wù jo drɔ yiilunɲãã sǝ̃ǝ̃nã.»

63 Yahudyaba puruɔntaa'n yuuntigǝ̃ngãẃ fa ǹ-taal wù kuulanãmbaa nã̀ã waa wà: «Dɩ̀ cíé bàá mãã bà yinɲã nã, yi caa yí nɔ̃ bà-lǝ bà nũɔ̃gu ǹ-ce bii hlo!

64 Ɲi nṹɔ̃́ wù waa wù jãn Dũnnũw nã.

Ɲi kãn wanĩĩ?»

Bà min bá fǝ̃ǝ̃ ǹ-jar wù sugolli ǹ-waa wà wu saa nǝ̃ kol-i.

65 Badaabá fǝ̃ǝ̃ ǹ-ba bà tɔ tɔlunɲã bà tũn wù nã, ba-ń ce bá vaa ǹ-suu wù yigagɩ nã, nã̀ã ba bà mũũ-yǝ bà waa wà: «Sii ń fǝ̃ǝ̃!»

Dũnnũ bũũsuɔ'n mããcieraabá hũɔ̃ Yesuw ǹ-kãã ba bà tii tãngbǝ̃rsǝri.

Piɛrẁ car-mã, wà wù-lǝ wu sǝ̃n fǝ̃ǝ̃ Yesuw

(Mãtiyew 26.69-75 ; Lukaw 22.56-62 ; Yuhanãw 18.15-18, 25-27)

66 Ǹ-ya Piɛrẃ ba taaragu gǝ̃ǝ̃w nã, Yahudyaba puruɔntaa'n yuuntigǝ̃ngã'n mããcier cijaldiɛ juo hi.

67 Wù jáa ne ǹ-da Piɛrw hura dǝ̃ǝ̃mã, wú ba wù ne-yǝ nã̀ã ji waa nǝ̃-yǝ wà: «Yíi yo ǹ yáá nǝ̃ Nasarɛtɩ lǝntabiɛw, Yesuw!»

68 Piɛrẃ car-yǝ wà: «Mǝ̃̀ sáa fǝ̃ǝ̃, mǝ̃̀ sǝ mã̀ã fǝ̃ǝ̃ ǹ mãã ǹ caa ń waa dìí mãã.»

Nã̀ã fǝ̃ǝ̃ ǹ-suro ǹ-ta yanjalw nã taasǝ̃ǝ̃nǝ̃ǝ̃yiɛgu, [Kwallaẃ fǝ̃ǝ̃ ǹ-bu].

69 Mããcier cijal wáà da-yǝ, wú fǝ̃ǝ̃ ǹ-ba wù waa nǝ̃ bàá nǝ̃n yáá dàa wà: «Bà wudiɛw-i nǝ̃ wáàw!»

70 Wú ver ǹ-car-dǝ hlo.

Fiyãã gɩ̀ furũũgɩ nã, bàá nǝ̃n yáá dàa, bá ver ǹ-ba bà waa nǝ̃ Piɛrw wà: «Sulam-i, yíǹ yáá nǝ̃ bluu báà, nã̀ã wa yíi yo Galile yiɛntabiɛ-i nǝ̃-n.

[Ɲi waa tammã dɩn-i.]»

71 Gɩ̀-i, wú du nã ǹ-ba wù waasǝ Dũnnũw wà: «Dũnnũẃ piɛ wù nãkrɔbɩblaagu mǝ̃̀ drɔ, mǝ̃n ba mǝ̃̀ bǝr kwasǝ nǝ̃n ba.

Mǝ̃̀ sǝ̃n fǝ̃ǝ̃ biɛ wáà mãã ɲì waa wù cɔ̃mmã nǝ̃-m!»

72 Gùú bǝ̃ǝ̃gɩ dɩngu dàa, kwallaẃ fǝ̃ǝ̃ ǹ-ba wù bu yinhǝ̃ǝ̃lnãw.

Piɛrw fǝ̃ǝ̃ ǹ-kãnãã cãwandɩ nã mãã Yesuẁ yáá wùu waa-dǝ nǝ̃-yǝ wà: «Kwallaw-ń wa wu ji bu yinhǝ̃ǝ̃lw, ǹ ji car-dǝ ǹ-da yinsiɛlw wà n sǝ̃n fǝ̃ǝ̃-m.»

Piɛrẃ fǝ̃ǝ̃ ǹ-duruu kaaluugɩ nã.