Kor. dĩɛ̃l 11

Túulà mǝ̃̀ nǝ̃ǝ̃li nã́ã́ mǝ̃n túulá Kɩrsa dǝlli gùú tammã.

Bibiɛw nǝ̃ cijalw Dũnnũ yigagɩ nã

2 Mǝ̃̀ bɩnǝ̃ǝ̃ ɲì nã, nã̀ã da ɲi kã́nnã́ mǝ̃̀ cɔ̃mmã nã bǝ̃ǝ̃ wo bǝ̃ǝ̃, nã̀ã ba ɲi ce cɔ̃mmã min ǹ-vaa nǝ̃ mǝ̃̀ kállá-ɲã́ã̀ nǝ̃ gùu.

3 Nǝ̃ mǝ̃̀ caa ɲí fǝ̃ǝ̃ cɔ̃mmã dɩn: Kɩrsaw-i bibiɛ'n yuugɩ nã, nǝ̃ bibiɛẃ ba cijal'n yuugɩ nã, nǝ̃ Dũnnũẃ ba Kɩrsa yuugɩ nã.

4 Gɩ̀-i, bibiɛw-ń suu hucuugu nã̀ã ba wù ce cirǝ̃mmã, yindagǝ nã wú wa wú taa ǹ-hiil Dũnnũ cãwandarǝ nã, nǝ̃ wù sáa cugur wù hucuugu, wù dii ciiri wù yuuntii Kɩrsa nã-i.

5 Cijal yo, wu-ń wa wú ce cirǝ̃mmã, yindagǝ nã wa wú taa ǹ-hiil Dũnnũ cãwandarǝ nã, nǝ̃ wù sáa vaa musuɔrw ǹ-suu wù yuugɩ nã, wù dii ciiri wù bla nã-i; wù juo ba nã́ã́ cijalw mãã wùu hul wù yuugu.

6 Cijalw-ń fǝ̃ǝ̃ wà wu síì vaa musuɔrw, wú ji gbǝ̃ǝ̃ ǹ-ce bá hul wù yuugu!

Nǝ̃ gɩ̀ mãã gɩ̀ ce ciiri cijalw nã, wú hul wù yuugu, gɩ̀ saa wú ba wù vaa musuɔrw.

7 Dũnnũẁ nǝ̃́ǝ̃lã́ bibiɛẃ ba wù hla'n tammã, wú da ǹ-ba wù bɩnǝ̃ǝ̃ wù nã, gɩ̀-i, wù sǝ̃n saa wú suu hucuugu nã̀ã ba cirǝ̃mmã nã.

Nǝ̃ wù nǝ̃́ǝ̃lã́ cijalẃ ba bibiɛ'n busam'n cɔ̃m nã-i.

8 Sulammã nã, bibiɛẁ sáa hlǝ cijal nã sǝ, nǝ̃ cijal-lǝ, wù hlǝ́rá bibiɛ nã-i.

9 Dũnnũẁ sáa nǝ̃ǝ̃ bibiɛw cijal'n cɔ̃mmã nã, nǝ̃ wù nǝ̃́ǝ̃lã́ cijal-lǝ bibiɛ'n cɔ̃m nã-i.

10 Gùú cíé cijalẁ saa wú vaa musuɔrw ǹ-suu wù yuugɩ nã, ǹ-da ǹ-pɩgaa wù wanhirammã mɛlɛgɛba cɔ̃mmã nã.

11 Dɩ̀-lǝ dɩ̀ min drɔ, hãmĩĩ mãã yì cúú Yitii furũũgɩ nã, bibiɛẁ mãã nũɔ̃sǝn kuugu cijalẁ saa gùú tammãã mãã, cijal yo wú nǝ̃ wùu ba nũɔ̃sǝn kuugu bibiɛ saa nĩĩgɩ-i.

12 Nã̀ã wa cijalẁ mãã wù hlǝ́rá bibiɛ nã nĩĩguu mãã, gùú tammã dɩnmã nã-i bibiɛ yo wú ba wù huu wù hlǝ cijalw nã, nǝ̃ gɩ̀ cɔ̃mmã hǝ̃ǝ̃lmã min mã̀ hlǝ Dũnnũ nã-i.

13 Blǝ́rà-dǝ ɲi ne kɛ-i!

Nã́ã́ gɩ̀ sáalá cijalẃ cirǝ̃ǝ̃ Dũnnũw nã Dũnnũ cirǝ̃m'n bǝ̃ǝ̃guu nǝ̃ wù sáa vaa musuɔrw wù yuugɩ nã-ì?

14 Cwaa hãmĩĩ cosǝri nǝ̃ dɩ̀ hla, dɩ̀ pɩgaa wà bibiɛ'n yukwaasǝrɩ-ń danãã, circɔ̃m-i.

15 Nã̀ã da cijal-lǝ wù yukwaasǝrɩ-ń danãã, gɩ̀ hã-yǝ nǝ̃ bũũmã.

Dũnnũẁ hlã-yǝ nǝ̃ yukwaasǝpɩpuɔlaari dɩ́ ba dɩ̀ suu wù yuugɩ nã.

16 Nǝ̃ gùú tii nǝ̃n wa wú ce cincaruugu, wù saa wú fǝ̃ǝ̃ wà hãmĩĩ hlũũgɩ nã dɩ́ nǝ̃ nnĩĩ, nǝ̃ Dũnnũ Igɩlisɩ taa yo, bà wáà gùú hlũũgɩ dɩngɩ-i.

Yitii'n wuur'n cɔ̃mmã

17 Cɔ̃mdamã nìɛ mǝ̃̀ saa, mǝ̃̀ ji waa-mã nǝ̃-ɲã́ã̀; ɲi sǝ̃n saa nǝ̃ fyãnuugu mã̀ cɔ̃mmã nã.

Ɲì mãã ɲi-ń tɩgii ɲì ɲĩɛ̃, ɲi sǝ̃n tɩgii ɲì ɲĩɛ̃ ɲì ce mǝ̃gãm sǝ, nǝ̃ ɲí tɩgii ɲì ɲĩɛ̃ ɲì ce bǝ̃ǝ̃lǝ̃m-i.

18 Cɔ̃ndĩɛ̃lãmmã-i nnĩĩ: Bà wáalá nǝ̃-m wà ɲi-ń tɩgii ɲì ɲĩɛ̃ bǝ̃ǝ̃ wo bǝ̃ǝ̃ wà ɲi bũũ Dũnnũw, gbǝllɩ̀ sǝ̃n ba ɲì sǝ̃ǝ̃nã.

Mǝ̃-ń jiraa ǹ-ne-dǝ bǝ̃ǝ̃daagu, mǝ̃̀ ba mǝ̃̀ caa mǝ̃ ji hũɔ̃ wà sulam-i.

19 Gɩ̀ sáalá burɔmmã̀ jãn ɲì sǝ̃ǝ̃nã, cwaabà da ǹ-fǝ̃ǝ̃ ǹ-pyariɛ bàá mãã Yesu Kɩrsa duunãtaaba sulammã nã.

20 Ɲì mãã ɲi-ń tɩgii ɲì ɲĩɛ̃, ɲi sǝ̃n wuu Yitii'n wuur sǝ,

21 nǝ̃ ɲi-ń tɩgii ɲì ɲĩɛ̃, curo wo curo, wu-ń ce wú wa wú gbǝ̃ǝ̃ ǹ-wuu wù hla'n wuur-i.

Gɩ̀-i, badaaba-ń ce bá ba nǝ̃ nũmmã nǝ̃ kwãmmã̀ blǝ badaaba.

22 Gɩ ba nã́ã́ ɲi síì gbǝ̃ǝ̃ ǹ-wuu ɲì ɲããwuunɲã nã̀ã ɲũɔ̃ ɲì ɲããɲũɔ̃nɲã ɲì sɔnɲã nã-ì?

Dàa ɲi caa ɲí bǝ̃ǝ̃lǝ̃ǝ̃ Dũnnũ Igɩlisɩ taa'n yiirɩ nã, nã̀ã diɛ bàá mãã bà sǝ nǝ̃ kuu-ì?

Ɲi caa mǝ̃́ waa hadi nǝ̃-ɲã́ã̀?

Ɲi kãn wà mǝ̃ saa mǝ̃́ fyãn-ɲã́ã̀-iì?

Gbal-i ɲi síì da mǝ̃n fyãnuugu!

23 Sulammã nã, mǝ̃n nṹɔ̃́ gùú cãwandi Yitii saa nã̀ã kal-ɲã́ã̀ nǝ̃-dǝ, dɩ̀-i nnĩĩ: Bà díilá Yitii Yesu nãkrɔnɲã nã gùú yuu'n yisuɔgu, wú tuu burblɩri

24 ǹ-dũũ kwaya Dũnnũw nã, nǝ̃ gɩ̀ furũũgɩ nã, wú bǝraa dɩ̀ nã, nã̀ã waa wà: «Mã́ã cãnkũɔ̃mã-i nnĩĩ, mǝ̃̀ hã-ɲã́ã̀ nǝ̃-mã.

Bláà ɲì ce gɩ̀ cɔ̃mmã ɲì kãnãã mǝ̃̀ cɔ̃mmã nã.»

25 Bà jáa wuu wuuri ǹ-tã, wú tuu guuɲũɔ̃kuugu, gùú tammã dɩnmã-i nã̀ã waa wà: «Dũnnũẁ mãã wù ji ɲũɔ̃ gùú twanflãmmãã mãã nǝ̃ cwaaba, guuɲũɔ̃kuu gúɔ̀gɩ̀ pɩgaa mã̀-i; wù ji ce-mã nǝ̃ mã́ã twam-i.

Ɲi-ń wa ɲí ɲũɔ̃ guuɲũɔ̃kuu gúɔ̀ bǝ̃ǝ̃ wo bǝ̃ǝ̃, ɲṹɔ̃lã̀-gǝ ɲi da ɲi ba ɲì kãnãã mǝ̃̀ cɔ̃mmã nã.»

26 Sulammã nã, ɲi-ń wuu bur wáà bǝ̃ǝ̃ wo bǝ̃ǝ̃ nã̀ã ɲũɔ̃ guuɲũɔ̃kuu gúɔ̀, ɲi ba ɲì waa Yitii'n kúúcɔ̃m-i ǹ-ji hi wù jolli.

27 Gùú cíé yíi nǝ̃n da ǹ hla tamdamã nã, gùú tammã nã mãã mã̀ sǝ̃n bũũ Yitii nã̀ã wuu wù wuuri nã̀ã ɲũɔ̃ wù guuɲũɔ̃kuugɩ nã, ǹ hã ǹ hla nǝ̃ yuɔrɔm-i, Yitii'n cãnkũɔ̃mã nǝ̃ wù twam'n cɔ̃mmã nã.

28 Gɩ̀-i, curo wo curo, wú ba wù saa wú blǝ-dǝ wù hiɛga nã ǹ-ne nǝ̃n ba wù sáa ce cɔ̃m ǹ-jãn Dũnnũw nã, nã̀ã da ǹ-wuu bur wáà nã̀ã ɲũɔ̃ guuɲũɔ̃kuu gúɔ̀.

29 Sulammã nã, wùú nǝ̃n wuu bur wáà, nã̀ã ɲũɔ̃ guuɲũɔ̃kuu gúɔ̀, nã̀ã ba gùú tammã nã mã̀ sǝ̃n bũũ Yitii'n cãnkũɔ̃mã, gɩ̀ tuutiiẁ píɛlá Dũnnũ hyadũũ-i wù hla'n drɔ.

30 Gùú cíé cocindɩ́ ba hlɔnããba nǝ̃ mǝ̃nkurnǝ̃ǝ̃ba ɲì sǝ̃ǝ̃nã, nǝ̃ bà cindɩ̀ kurǝǝ.

31 Yi nã́ã̀ ba yi-ń ce yí jiraa ǹ-blǝ ǹ-fǝ̃ǝ̃ yì yuɔrɔmmã, Dũnnũẁ hiɛgà sáá gà ji du nǝ̃-yáà.

32 Nǝ̃ wù hiɛgà dũ nǝ̃-yáà ǹ-da ǹ-dii-yáà hlũũ nã-i, wù sugojaryuugu, yi báa da yuɔrɔmmã yì min nǝ̃ bàá mãã bà sáa hũɔ̃ wù cɔ̃mmã.

33 Mã́ã cwanãã, ɲi-ń tɩgii ɲì ɲĩɛ̃, ɲì jo ɲì ji wuu Yitii'n wuuri, cíilà ɲì ɲĩɛ̃.

34 Nũmmã-ń jaa gùú tii, wú wuu wuuri wù suɔgu, ɲi báa ji tɩgii ɲì ɲĩɛ̃ ǹ-ce Dũnnũ hiɛgá dũ nǝ̃-ɲã́ã̀.

Gùú cɔ̃mmã nǝ̃n yanãã tũɔ̃lɩmmã nã, mǝ̃-ń ji kã ɲì nãã, mǝ̃̀ ga tũɔ̃l-mã ǹ-hã-ɲã́ã̀.