Kor. dĩɛ̃l 10

Cwaabà saa bá blǝ bà hla nã nǝ̃ kiiba

Mã́ã cwanãã, dìí nǝ̃n híí yì vũnvãnããba Musa bǝ̃ǝ̃gu, mǝ̃̀ caa ɲí kãnãã dɩ̀ nã.

Dũnnũẁ yáá wùu ce yiiluudagǝ nǝ̃ǝ̃ ǹ-suu bà yuugɩ nã, bà min bá wáà gɩ̀ taaragu, nã̀ã kãã huɔl lwaakɩnkandi.

2 Gɩ́ nǝ̃ nã́ã́ Dũnnũẁ ɲĩ́ɛ̃lã́ bà min yiiluugɩ nã nǝ̃ lwaakɩnkandɩ nã Musaw nã.

3 Bà min bà wúulá wuurii mãã dɩ̀ hlǝ́rá Dũnnũw nã,

4 nǝ̃ bà min bá ɲũɔ̃ hũmmã dɩnmãã mãã mã̀ hlǝ́rá Dũnnũw nã.

Nã̀ã wa bà yáá bà ɲũɔ̃ Dũnnũ tɩntaluu'n hũm-i.

Tɩntaluu gúɔ̀, Kɩrsa yáá; wù yáá wù wáà wù duu bà nã.

5 Dũnnũẁ cíé dɩ̀-lǝ dɩ̀ min ǹ-hã-ba nǝ̃ cocin'n gaaciegà sáa gà dwal wù nã bà sǝ̃ǝ̃nã, gùú cíé bà cindɩ̀ kúrǝ́ǝ ǹ-ba dàa jerkwaarɩ nã.

6 Gɩ̀ cɔ̃mmã̀ híí-ba, ǹ-da ǹ-ce hãmĩĩ báa nǝ̃ǝ̃ yì yinɲã̀ ɲinbɩblanɲã nã nã́ã́ bà-lǝ bà cíé-dǝ nĩĩgu.

7 Bláá ba ɲì bũũ kiiba nã́ã́ badaabà bṹũlã́-ba bà sǝ̃ǝ̃nã gùú tammã.

Dɩ̀ yállá nĩĩgɩ-i wà cwaaba járrá ǹ-wuu wuuri, nã̀ã ɲũɔ̃ ɲããɲũɔ̃nɲã nã̀ã suro ǹ-ba bà ce siijãnpaaruugu.

8 Bláá ya yí ba durkũmsǝrɩ nã nǝ̃ yì ɲĩɛ̃, nã́ã́ bà sǝ̃ǝ̃nã badaabà cíé-dǝ nĩĩguu mãã nǝ̃ cocindɩ́ kurǝǝ yuugɩ dɩngu.

Bàá nǝ̃n kurǝǝ, bà híí cwa toyur tũndii nũɔ̃sɔ̃w nǝ̃ cwa tonnũɔ̃sɔ̃ trãngwaahǝ̃ǝ̃l nǝ̃ bà siɛlba (23 000).

9 Bláá ya yí dǝ̃ǝ̃ Kɩrsaẁ yi ne nã́ã́ bà badaabà dǝ̃́ǝ̃lã́-yǝ ǹ-ne gùú tammãã nǝ̃ waalaabá duu ǹ-ko-ba.

10 Ǹ-faal, bláá ba ɲì hugɔ̃nãã Dũnnũ yuunã nã́ã́ bà sǝ̃ǝ̃nã badaabá hugɔ̃nãã nĩĩguu mãã nǝ̃ kuu'n mɛlɛgɛẃ juo ko-ba.

11 Dũnnũẁ cíé cɔ̃m mã́ã̀ min ǹ-da ǹ-pɩgaa cwaa-i nǝ̃ cɔ̃m.

Cuu tãl'n bǝ̃ǝ̃gɩ̀ píɛlá hãmĩĩ nã, bà yállá-mã ǹ-gbǝ hãmĩĩ nã-i.

12 Gɩ̀-i, wùú nǝ̃n ba wù kãn wà wu fǝ̃́ǝ̃lã́ ǹ-hiraa, wú blǝ wù hla nã wu báa ji duruu.

13 Sɩtãnẁ dǝ̃́ǝ̃lã́-ɲã́ã̀ nǝ̃ gùú ɲinɲãã, wù dǝ̃ǝ̃ cwaa'n dɩgaliɛ yo nǝ̃ gùú ɲã̀ diinɲã-i.

Dũnnũw yalntii-i; wù síì hũɔ̃ cɔ̃mmã́ hi-ɲã́ã̀, mã̀ã́ mãã mã̀ã maa ɲì fãngããgu.

Dũnnũẁ ji hã-ɲã́ã̀ nǝ̃ fãngããgu ɲí gbǝ̃ǝ̃ ǹ-hũɔ̃-mã, nã̀ã hiil ɲì yuugu mã̀ nã.

14 Gùú cíé mã́ã cwanãã ɲimãã mãã mǝ̃̀ cituubiiba, blǝ́rà ɲì hla nǝ̃ siijãnũũgu.

15 Mǝ̃̀ fǝ̃́ǝ̃lã́ wà ɲi nǝ̃ cɔ̃nfǝ̃ǝ̃gǝgu, gɩ̀-i, mǝ̃́ ba mǝ̃̀ wanãã nǝ̃-ɲã́ã̀ nnĩĩ; blǝ́rà mǝ̃̀ cãwanĩɛ̃ga nǝ̃ ɲì hla, ɲí ne kɛ-i.

16 Yi mãã yi-ń ce yí dũũ kwayaw Dũnnũw nã gùú guuɲũɔ̃gǝ'n cɔ̃mmã nã, nã̀ã ɲũɔ̃-gǝ, kã́nnã̀ gɩ̀ nã ɲi ne: Yi mãã yi-ń ɲũɔ̃-gǝ, hãmĩĩ nǝ̃ Kɩrsaẁ yì sǝ̃n ba curo dɩndɩn sǝ wù twam'n cɔ̃mmã nã-ì?

Nǝ̃ yì mãã yì bǝ́rrà gùú burw nã mãã yì wuu, yi-ń wuu-yǝ, hãmĩĩ nǝ̃ Kɩrsaw, yi juo ba curow dɩn-i nǝ̃-yǝ, wù cãn'n cɔ̃mmã nã.

17 Burblɩrɩ nǝ̃ dɩ̀ dɩndɩn-i.

Hãmĩĩ bṹũlã́ nǝ̃ yì min yì mãã yì wuu burblɩri dɩn díɛ̀, yí nǝ̃ cãndɩ dɩn-i.

18 Kã́nã̀ã Isɩrayɛl bluu'n cɔ̃mmã nã ɲí ne.

Bàá mãã bà wuu siijãnɲinɲãã mãã bà jãn Dũnnũw nǝ̃-ɲã siijãnkuugu drɔ, bà hiɛga nǝ̃ gà dɩn-i nǝ̃ Dũnnũw.

19 Nǝ̃ mǝ̃̀ caa mǝ̃́ waa bii gɩ̀-lǝ gɩ̀ tammã?

Nã́ã́ mǝ̃̀ caa mǝ̃́ waa wà kuuw, nǝ̃ gùú kũɔ̃mãã mãã bá jãn-yǝ nǝ̃-mã, ɲinhuhorɩn-ì?

20 Dìí sǝ gbal gbal!

Mǝ̃̀ caa mǝ̃́ waa wà bàá mãã bà sǝ̃n fǝ̃ǝ̃ Dũnnũw, bá jãn tãntɔ̃nãã-i, bà sǝ̃n jãn Dũnnũ sǝ.

Nã̀ã da mǝ̃n sǝ̃n caa ɲí ba nǝ̃ hiɛgá dɩnga nǝ̃ tãntɔ̃nããba.

21 Ɲi síì gbǝ̃ǝ̃ ǹ-ɲũɔ̃ Yitii guuɲũɔ̃kuugɩ nã, nã̀ã ver ǹ-ɲũɔ̃ tãntɔ̃nãã guuɲũɔ̃kuu yo gɩ̀ nã.

Nǝ̃ ɲi síì gbǝ̃ǝ̃ ǹ-wuu wuur yo Yitii juwuukaagɩ nã, nã̀ã ver ǹ-kã ɲí ba ɲì wuu tãntɔ̃nãã kuu yo gɩ̀ nã.

22 Dàa yi wa yí ce Yitii'n hiɛgá dũ nǝ̃-yáà-ì?

Yì náalá yí ba nǝ̃ fãngããgu ǹ-ɲǝ̃ǝ̃-yǝ-ì?

Yì gaaciegà saa gá bũũ Dũnnũw

23 Badaabà kãn wà hlũũgɩ́ nìɛ bà saa bá ba bà ce cɔ̃mmã min.

Sulam-i, nǝ̃ cɔ̃mmã̀ min sǝ̃n pya bà nã.

Hlũũgɩ nǝ̃ bà saa bá ba bà ji ce cɔ̃mmã min, nǝ̃ mã̀ min sǝ̃n hã bà nãbɩgaaba nǝ̃ fãngããgu Dũnnũ hlũũgɩ nã.

24 Curo'n báa ba wù kaal wù hla'n yuunã cɔ̃mmã dɩndɩn nã, nǝ̃ curo wo curo, wú ba wù kaal wù nãcuro'n cɔ̃mmã nã.

25 Kũɔ̃m wo kũɔ̃m mãã bà suur-mã sɩgagɩ nã, ɲi ji gbǝ̃ǝ̃ ǹ-sǝ̃ǝ̃-mã ǹ-wuu.

Bláá ce yugum mã̀ cɔ̃mmã nã, ɲi báa ji ba ɲì jã-mã wà ɲí ce diibɩblar-i.

26 Bà yállá Dũnnũ cãwandɩ nã wà hlɔ̃mmã nǝ̃ gùú ɲinɲã minw mãã mã̀ nã, Cuutii'n ɲin-i.

27 Gɩ̀ sùɔ́gɩ nã curow mãã wù sǝ̃n fǝ̃ǝ̃ Dũnnũw, wu-ń jar-n wuur nã wù suɔgu, nǝ̃ ǹ-hũɔ̃ ǹ-kã, wu-ń hã-n nǝ̃ kuu wo kuu, wuu-gǝ; báa ce yugummã nã̀ã ji ba ǹ jã-mã wà ń cíé diibɩblar-i.

28 Nǝ̃ curow-ń juo waa nǝ̃-n wà siijãnkũɔ̃m-i, báa ce ń wuu-mã gɩ̀ tii'n cɔ̃mmã nã, nǝ̃ wù mãã wùu dii dìí wù hiɛga nã.

29 Dìí mãã yíǹ hiɛga nã, mǝ̃̀ sǝ̃n waa dìí cɔ̃m sǝ, nǝ̃ wù-lǝ wù díilá dìí wù hiɛga nã, mǝ̃̀ waa dɩ̀-i.

Bincɔ̃m nã-i, mǝ̃̀ ba mǝ̃̀ ji ce dìí mãã mǝ̃̀ nãcuro'n hiɛga nã, nã̀ã ya dìí mãã mǝ̃n hla'n hiɛga nã dɩ́ ba?

30 Mǝ̃-ń dũũ kwaya gùú wuur'n cɔ̃mmã nã, nã̀ã wuu-dǝ, gɩ̀ ba danii curoẃ wa wú tuuraa mǝ̃̀ nã, gɩ̀ wuur'n cɔ̃mmã nã nã̀ã da mǝ̃̀ dṹũlã́ kwaya Dũnnũw nã dɩ̀ cɔ̃mmã nã?

31 Ɲi-ń wa ɲí wuu wuur nǝ̃n ba, yindagǝ nã ɲi wa ɲi ɲũɔ̃ kuu, cɔ̃m wo cɔ̃mmã ɲì wa ɲi ce-mã, cíyà-mã Dũnnũ yir'n bũũm'n cɔ̃mmã nã.

32 Bláá ce cɔ̃m, mã̀ã́ mãã mã̀ ji ce Yahudyaba nǝ̃ niɛriɛba nǝ̃ Igɩlisɩ taabá nǝ̃nǝ̃ǝ̃ Dũnnũ hlũũgɩ nã.

33 Bláà mǝ̃n tammã.

Mǝ̃n caa mǝ̃̀ mãã mǝ̃̀ ce gùú cɔ̃mmã, mã́ dwal cwaaba min nã.

Gùú mãã gɩ̀ ji pya mǝ̃n nã nǝ̃ mǝ̃̀ dɩn, mǝ̃̀ sǝ̃n caa gùú sǝ, nǝ̃ mǝ̃̀ caa gùú mãã gɩ̀ ji pya cocin nã Dũnnũẁ da ǹ-kor-ba.