Kor. dĩɛ̃l 9

Yesu tĩɛ̃taa'n cɔ̃mmã

Gɩ ba nã́ã́ hlũũgɩ̀ sǝ mǝ̃n saa mǝ̃̀ ba mǝ̃̀ ji gbǝ̃ǝ̃ ǹ-ce cɔ̃mmã min-ì?

Dàa gɩ̀ ba nã́ã́ Yesu tĩɛ̃tii sǝ nǝ̃-m-ì?

Gɩ ba nã́ã́ mǝ̃̀ sáa da Yitii Yesuw nǝ̃ mǝ̃̀ yinɲã-ì?

Dàa ɲimãã nǝ̃ ɲì hla, ɲimãã sǝ̃n pɩgaa mǝ̃n cíé gùú mããcemmãã mãã ǹ-hã Yitiiw-ì?

2 Gɩ-ń dwal cwadaabá hla wà Yesu tĩɛ̃tii sǝ nǝ̃-m, ɲimãã-lǝ nǝ̃ ɲì dɩn, ɲi saa ɲí fǝ̃ǝ̃ wà wù tĩɛ̃tii-i nǝ̃-m.

Nã̀ã wa ɲimãã hla'n hũɔ̃mãã Yitii'n cɔ̃mmã nã, mã̀ã́ pɩ́garà dɩ̀-lǝ.

3 Cwaabaa mãã bà bǝ̃ǝ̃lǝ̃ǝ̃ mǝ̃̀ yiirɩ nã, mǝ̃̀ ver díɛ̀-i ǹ-hã-ba wà:

4 Mǝ̃̀ mãã mǝ̃̀ ce gùú mããcemmã, mǝ̃̀ saa nǝ̃ wuurɩ-i nǝ̃ ɲãɲũɔ̃nɲã, gɩ̀ cɔ̃mmã nã.

5 Ɲi kãn wà mǝ̃n sǝ̃n saa mǝ̃́ da hlũũgu ǹ-kã nǝ̃ ciɛ mǝ̃̀ waalɩ nã, wùú mãã wùu hũɔ̃ Yesu cɔ̃mmã nã́ã́ Yesu tĩɛ̃taa'n dɩgaliɛẁ cíé-dǝ nĩĩguu mãã bá nǝ̃ Yesu ɲũũnãtaaba nǝ̃ Piɛrw-ì?

6 Ɲi kãn wà Barnãbasɩw nǝ̃ mã́ã dɩn sáalà yí ce mããcemmã ǹ-wuu yì hla fuflũɔ̃rũɔ̃gɩ nã-ì?

7 Ɲi nṹɔ̃́ ǹ-da wà sɩrǝǝbiɛ hawu kã́ã̀ wù ce byaari nǝ̃ bà sǝ̃n hã-yǝ nǝ̃ wù nũɔ̃nã wuuri?

Dàa curoẁ mãã wù so gùú tubikuugu, wù sǝ̃n saa wú wuu gɩ̀ biiga-ì?

Dàa wancin yo wù mãã wù cii gùú kwasǝ̃nɲinɲã nã mãã, wù sǝ̃n saa wú ɲũɔ̃ ɲì nɔ̃nɔ̃w-ì?

8 Bláá ba ɲì kãn wà mǝ̃ wáalá cãwanĩɛ̃ gáà ǹ-vaa nǝ̃ cwaa'n gaacie'n dɩndɩn-i, nǝ̃ Musa hlũũ yo gɩ̀ waa gùú mãdiinmã-i.

9 Dɩ̀ yállá Musa hlũũgɩ nã wà nǝ̃ǝ̃w mãã wù ce mããcemmã dũmmã sǝ̃ǝ̃nã, bá sǝ̃n saa bá vaa wù nũɔ̃gu wà wu báa wuu-mã.

Ɲi kãn wà Dũnnũw jã nin'n cɔ̃m dɩn-i?

10 Nã́ã́ wù sáa waa dɩ̀-lǝ hãmĩĩ cɔ̃m nã sǝ-ì?

Sulammã nã, wù yállá-dǝ hãmĩĩ cɔ̃m nã-i.

Secierẁ piɛ wù nãkruɔgu wù mããcem nã-i, wà wu ji da wuuri ǹ-wuu, nǝ̃ wùú mãã wù tɩgii dũmmã, wùú yo wù piɛ wù nãkruɔgu mã̀ã́ nã-i, wà wu ji da wù yuɔri.

11 Hãmĩĩ wáalá Dũnnũ cãwandi nǝ̃-ɲã́ã̀, gɩ̀ cíé nã́ã́ yi dṹũlã́ dũũr-i, nǝ̃ gɩ̀ ba danii ɲí ba ɲì kãn wà yi sǝ̃n saa nǝ̃ ɲì nãkrɔnɲinɲã?

12 Cwaadaaba-ń ba bà saa nǝ̃ ɲì nãkrɔnɲinɲã, ɲi ne wà hãmĩĩ sǝ̃n saa nǝ̃-ɲã ǹ-maa bà lǝ-ì?

Nǝ̃ dɩ̀-lǝ dɩ̀ min drɔ yi sáa caa kuu ɲì saa.

Yi sǝ̃n caa yí ce cɔ̃m, mã̀ã́ mãã mã̀ ji cii cwaaba nǝ̃ Kɩrsa cɔ̃ndudwalɩm'n hũɔ̃mã, gɩ̀-i, yí hũɔ̃ cɔ̃mmã̀ min yì hla nã.

13 Ɲì fǝ̃́ǝ̃lã́ wà bàá mãã bà ce mããcemmã Dũnnũ bũũduugɩ nã, bà wuurɩ̀ hlǝ Dũnnũ bũũduu nã-i, nǝ̃ bàá mãã bà jãn siimã Dũnnũw siijãnkuugɩ nã, bàá yo bà wuurɩ̀ hlǝ siijãnɲin nã-i.

14 Bàá mãã bà waa Yesu cɔ̃ndudwalɩmmã nǝ̃ cwaaba, Yitii wa bá saa bá ba bà hã bàá yo nǝ̃ bà nũɔ̃nã wuuri gùú tammã-i.

15 Dɩ̀ min drɔ mǝ̃n sáa cirǝ̃ǝ̃ kuu nã ɲì saa, nǝ̃ mǝ̃̀ sǝ̃n yal mǝ̃̀ hã-ɲã́ã̀ mǝ̃̀ cirǝ̃ǝ̃ kuu nã sǝ.

Mǝ̃-ń cirǝ̃ǝ̃ Kuu nã ɲi saa, mǝ̃̀ ji bũũ mǝ̃̀ hla nǝ̃ bii-i?

Mǝ̃-ń ku, gùú búɔlá nã, curoẃ pyar gɩ̀ bũũmã mǝ̃̀ nã!

16 Mǝ̃n sǝ̃n waa Yesu cɔ̃ndudwalɩmmã mǝ̃̀ bũũ mǝ̃̀ hla sǝ, Dũnnũ kárrá mã̀ nã wà mǝ̃ ce gɩ̀ mããcemmã.

Mǝ̃-ń ba mǝ̃̀ sáa ce-mã mǝ̃̀ ji da ywaruugu.

17 Gɩ nã́ã̀ ba wà mã́ã sórrá nǝ̃ mǝ̃̀ hla, ǹ-ba mǝ̃̀ ce-mã, mǝ̃̀ yáá mǝ̃̀ saa nǝ̃ pãl-i.

Nǝ̃ Dũnnũẁ mãã wù díilá-m wà mǝ̃ ce-mã, mǝ̃̀ saa mǝ̃́ ba mǝ̃̀ ce-mã.

18 Gɩ̀-lǝ gɩ̀ nã, mǝ̃n ywaruu'n sol-i hagɩ-ì?

Gɩ̀-i, mǝ̃́ waa Yesu cɔ̃ndudwalɩmmã nǝ̃ cwaaba mǝ̃ǝ̃lǝ̃ǝ̃.

Mǝ̃n yáá mǝ̃̀ saa nǝ̃ gùú Yesu cɔ̃ndudwalɩm'n waamã nã, mǝ̃̀ sáa caa-gǝ curo'n saa.

19 Mǝ̃n sǝ curo'n wabiɛ, mǝ̃̀ nǝ̃ mǝ̃̀ hla nã-i; nǝ̃ dɩ̀ min kusuugɩ nã, mǝ̃̀ ce mǝ̃̀ hla cwaaba min wabiɛ-i ǹ-da ǹ-dii cocin Kɩrsa hlũũgɩ nã.

20 Mǝ̃-ń ba Yahudyaba sǝ̃ǝ̃nã, mǝ̃̀ ce mǝ̃̀ hla Yahudya-i ǹ-da ǹ-dii-ba Kɩrsa hlũũgɩ nã.

Mǝ̃n sǝ̃n wáà Musa hlũũgu, nǝ̃ mǝ̃-ń ba nǝ̃ bàá mãã bà wáà-gǝ, mǝ̃̀ ce mǝ̃̀ hla bàá tam-i ǹ-da ǹ-dii-ba Kɩrsa hlũũgɩ nã.

21 Gùú tammã̀ dɩnmã-i mǝ̃-ń ba nǝ̃ cwaabaa mãã bà sǝ̃n wáà Musa hlũũgu, mã́ã yo, mǝ̃̀ ce mǝ̃̀ hla nã́ã́ mǝ̃ sǝ̃n wáà-gǝ-i ǹ-da ǹ-dii-ba Kɩrsa hlũũgɩ nã.

Nǝ̃ gɩ̀ sǝ wà mǝ̃ sǝ̃n wáà Dũnnũ hlũũgu; nã̀ã da mǝ̃́ nǝ̃ Kɩrsa hlũũ nã-i.

22 Mǝ̃-ń ba nǝ̃ bàá mãã mǝ̃nkurnããba Dũnnũ hlũũgɩ nã, mǝ̃̀ ce mǝ̃̀ hla mǝ̃nkurnĩĩ-i, ǹ-da ǹ-dii-ba Kɩrsa hlũũgɩ nã.

Mǝ̃̀ jãn cwaaba min sǝ̃ǝ̃nã ǹ-ba bà tammã, ǹ-da ǹ-dii halle gɩ-ń ba cwaaba denden-i yo wù hlũũgɩ nã.

23 Nǝ̃ mǝ̃̀ ce dɩ̀-lǝ dɩ̀ min Yesu cɔ̃ndudwalɩm'n cɔ̃m nã-i, ǹ-ga da ǹ-da mǝ̃̀ yuɔri.

24 Ɲimãã nǝ̃ hla ɲì fǝ̃́ǝ̃lã́ wà cwaaba-ń kã susɔ̃l'n sùɔ́gɩ nã, cocin sṹwã̀ nǝ̃ curo dɩndɩn tíyà bà min yigagɩ nã.

Gɩ̀ sùɔ́gɩ nã, gbǝ̃́ǝ̃lã́ ɲí sɔ̃ ɲí ɲǝ̃ǝ̃ cwaaba min.

25 Curo wo curo mãã wù ji kã susɔ̃lli, wù saa wú hũɔ̃ cɔ̃ncin wù hla nã, ǹ-ba wù ǝ̃ǝ̃lã susɔ̃llɩ nã.

Wù-lǝ wù ce-dǝ wù ji da bɩnǝ̃m'n hucuuguu mãã gɩ̀ ji bǝ̃ǝ̃lǝ̃ǝ̃ yuudagǝ, nǝ̃ hãmĩĩ ce-dǝ yi ji da bɩnǝ̃m'n hucuuguu mãã gɩ̀ síì bǝ̃ǝ̃lǝ̃ǝ̃ ǹ-da.

26 Gùú cíé mǝ̃n ba mǝ̃̀ sǝ̃n sɔ̃ mǝ̃̀ dii, nǝ̃ mǝ̃̀ sɔ̃ mǝ̃̀ ɲǝ̃ǝ̃ kaar-i, nã̀ã ver ǹ-ba nã́ã́ byarcerw mãã wù sǝ̃n ce byaari wù dii.

27 Mǝ̃̀ fii mǝ̃̀ cãnkũɔ̃mmã, mǝ̃́ nǝ̃ mã̀ã hi mã̀ nã, nã́ã́ mǝ̃̀ wabiɛ-i.

Hadi yuunã-ì?

Nã̀ã wa mǝ̃̀ wáalá Dũnnũ cãwandii mãã ǹ-ja cwaaba, mã́ã̀ nǝ̃ mǝ̃̀ hla, mǝ̃ báa ji kãã ba furũũgɩ nã.