Kor. dĩɛ̃l 8

Siijãnkũɔ̃m'n cɔ̃mmã

Mǝ̃̀ mãã mǝ̃̀ ji waa dìí kã siijãnkũɔ̃m'n yiɛgu, yì min yí fǝ̃́ǝ̃lã́ wà yì nǝ̃ cɔ̃nfǝ̃ǝ̃gǝgu.

Sulammã nã, cɔ̃nfǝ̃ǝ̃gǝgɩ̀ ce curoẃ ba wù bũũ wù yuugu; nǝ̃ gùú mãã gɩ̀ pya yì nã, yí ba yì kã nǝ̃ yigagu, gɩ̀-i, yí ya yì nãbɩgaa'n cɔ̃mmã́ dwal yì nã.

2 Wùú nǝ̃n ba wù kãn wù hiɛga nã wà wu fǝ̃ǝ̃ cɔ̃mmã, wù sáa hi ǹ-ba wù fǝ̃ǝ̃-mã, nã́ã́ wù yáá wù saa wú fǝ̃ǝ̃-mã nĩĩguu mãã.

3 Dũnnũ cɔ̃mmãã mãã mã̀ dwal gùú tii nã mãã, Dũnnũẁ fǝ̃ǝ̃ wù-lǝ wɩ̀-i.

4 Ǹ-kã siijãnkũɔ̃m'n yiɛgu, nã́ã́ yi ji gbǝ̃ǝ̃ ǹ-wuu-mã-ì?

Yi fǝ̃́ǝ̃lã́ wà Dũnnũw nǝ̃ wù dɩndɩn-i, nǝ̃ kuuw sǝ guɔ nã cuu wáá nã.

5 Sulammã nã, ɲinɲã nǝ̃ drɔkuɔlɩ nã, nǝ̃ ɲũũrũũgu, ɲã̀ã́ mãã cwaabà bũũ nã́ã́ bá bũũ Dũnnũ-i.

Dũnnũcin, dɩ́ nìɛ gɩ̀ tammã, nǝ̃ ɲincin yo, dɩ́ nìɛ gɩ̀ tammã ɲã̀ã́ mãã ɲã̀ã jiraa cwaa'n yuugɩ nã,

6 dɩ̀-lǝ dɩ̀ min drɔ hãmĩĩ saa, Dũnnũ nǝ̃ wù dɩndɩn-i; wɩ̀-i yì Tǝw mãã wù nǝ̃́ǝ̃lã́ ɲinɲã min nã̀ã nǝ̃ǝ̃ yí ba wù bɩgaaba.

Yitii yo, wú nǝ̃ wù dɩndɩn-i; wɩ̀-i Yesu Kɩrsaw.

Wùú hlã-yáà nǝ̃ nũmǝ̃nãsǝri, nǝ̃ ɲinɲã min ɲì hlǝ́rá wùú nã-i.

7 Nǝ̃ cwaaba min sǝ̃n fǝ̃ǝ̃ dɩ̀-lǝ.

Badaabá hǝ̃ǝ̃sǝ siijãngɩ nã, gɩ̀-i kuɔkuɔ yo ba-ń ba bà wuu siijãnkũɔ̃mmã, bà tuu mã́ ce kii'n kũɔ̃m-i.

Dũnnũ cɔ̃mmã̀ mãã mã̀ sáa kaalaa bà nã, gɩ̀-i, ba-ń wuu-mã bá ne wà ba yuɔruɔ-i.

8 Wuur sǝ̃n ce yì cɔ̃mmã́ dwal Dũnnũw nã.

Yi-ń ba yì sáa wuu-mã, kuu'n sǝ̃n hlǝ yì nã; nǝ̃ yi-ń wuu-mã yo, kuu'n sǝ̃n piɛ yì nã.

9 Sulammã nã, blǝ́rà ɲì hla nã, ɲì hla'n kusunãgaaciega báa ji dii bàá mãã bà sǝ bàa mǝ̃gaa ǹ-fǝ̃ǝ̃ Dũnnũ cɔ̃mmã kaalaa bà nã, diicĩɛ̃rǝdɩ nã.

10 Yi-ń tuu ǹ-ne, wùú mãã wù sáa hi ǹ-ba nǝ̃ fãngããgu Dũnnũ hlũũgɩ nã, wu-ń ne ǹ-da yíi mãã ǹ-fǝ̃ǝ̃ sulammã min, nã̀ã kãã jiraa siijãnsuɔgɩ nã ǹ-ba ǹ-wuu siijãnkũɔ̃mmã, wùú yo, wù síì suro wà wu ji ba wù wuu-mã-ì?

11 Gɩ̀-lǝ gɩ̀ nã, ǹ cwanĩĩw mãã wù sáa mǝ̃gaa ǹ-fǝ̃ǝ̃ Dũnnũ cɔ̃mmã, wùú mãã Kɩrsaẁ kúú wù cɔ̃mmã nã, wù ji váalá yíi sulam'n fǝ̃ǝ̃m'n cɔ̃mmã nã-i.

12 Nǝ̃-ń ce diicĩɛ̃rǝ díɛ̀ tuugu ǹ-jãn ǹ cwanĩĩw mãã wù sáa fǝ̃ǝ̃ Dũnnũ cɔ̃mmã́ kaalaa wù nã, ǹ cíé ǹ-jãn Kɩrsa nã-i.

13 Gɩ̀-i, wuurɩ-ń ba dɩ̀ ji ce mǝ̃̀ cwanĩĩw duruu Dũnnũ hlũũgɩ nã, mǝ̃̀ síì wuu-dǝ ǹ-da, mǝ̃̀ cwanĩĩw báa ji da ǹ-duruu.