Kor. dĩɛ̃l 7

Gùú sùɔ́guu mãã gɩ̀ waa cataacɔ̃mmã

Yindiɛ, ɲi tĩ́ɛ̃lã́ sɛbɛw ǹ-ce gùú yugummã, mǝ̃̀ ji siɛ-ɲã́ã̀ nǝ̃-mã.

Mǝ̃n wa gɩ́ sáalá bibiɛ báa jĩɛ̃ cijal nã.

2 Nǝ̃ durkũmsǝ'n cɔ̃mmã nã, mǝ̃́ ne wà gɩ búɔlá nã bibiɛ wo bibiɛ ba nǝ̃ ciɛ wù yiirɩ nã, nǝ̃ cijal wo cijalẃ ba nǝ̃ blanĩĩ wù yiirɩ nã.

3 Cijalw mãã wù saa nǝ̃ gùu, blanĩĩẃ ce-gǝ ǹ-hã-yǝ nǝ̃ blanĩĩ yo wù mãã wù saa nǝ̃ gùu, cijalẃ ce-gǝ ǹ-hã-yǝ.

4 Cijalẁ síì gbǝ̃ǝ̃ ǹ-ce dìí mãã dɩ̀ dwal wù nã nǝ̃ wù cãnkũɔ̃mã, wù bla mǝ̃gãm-i; blanĩĩ yo, wù síì gbǝ̃ǝ̃ ǹ-ce dìí mãã dɩ̀ dwal wù nã nǝ̃ wù cãnkũɔ̃mã, wù ciɛ'n mǝ̃gãm-i.

5 Ǹ kã cĩĩnũũ'n yiɛgu, bláá ce ɲí vũɔ̃ ɲì ɲĩɛ̃ nã́ã̀ ɲi sáa gbǝ dɩ̀ nã ɲì min wà ɲi ji buruɔ fiyãã ǹ-da ǹ-da ɲi hla nã, ǹ-ga cirǝ̃ǝ̃ Dũnnũw nã.

Nǝ̃ gɩ̀ furũũgɩ nã, ɲì mãã nã́ã́ ɲi síì gbǝ̃ǝ̃ ǹ-blǝ ɲì hla nã-i, vérrà ɲí ji ba nǝ̃ ɲì ɲĩɛ̃ Sɩtãnw báa ji da ǹ-dǝ̃ǝ̃-ɲã́ã̀.

6 Mǝ̃n wáalá gàá mãã nǝ̃-ɲã́ã̀ nnĩĩ, gɩ̀ sáa ce nã́ã̀ mǝ̃́ wa mǝ̃́ guur ɲí ba ɲì wáà gà hlũũgu-i dɛ!

Nǝ̃ mǝ̃̀ hã-ɲã́ã̀ nǝ̃ cɔ̃nfǝ̃ǝ̃gǝ-i.

7 Sulammã nã, gɩ nã́ã̀ ba mã́ã dɩn nãã, cwaaba min ba nã́ã̀ ba sãmblanããba mã́ã tammã.

Nǝ̃ Dũnnũẁ sáa pã yì min nǝ̃ tammã dɩnmãã.

Wù hlã cwaadaaba nǝ̃ cɔ̃mdam'n fãngããgu, nã̀ã hã badaaba nǝ̃ mãdam'n fãngããgu.

8 Mǝ̃̀ mãã mǝ̃̀ ji waa dìi nǝ̃ sãmblanããba nǝ̃ blakuucanããba, dɩ̀-i nnĩĩ: ba nã́ã̀ ba nnĩĩ bà dɩndǝn, mã́ã tammã, gɩ̀ yáá gɩ̀ ji saa.

9 Nǝ̃ ba-ń fǝ̃ǝ̃ wà ba síì gbǝ̃ǝ̃ ǹ-blǝ bà hla nã, gɩ̀ búɔlá nã bá taa, canũũgu nǝ̃ blanũũgɩ báa da ǹ-ko-ba.

10 Nǝ̃ yindiɛ bàá mãã bà táalá, mǝ̃̀ waa dɩ́ gbǝ̃ǝ̃ nǝ̃-ba wà cijalw báa ce ǹ-buruɔ nǝ̃ wù blaw.

Mã́ã nũɔ̃nã cãwan sǝ, nǝ̃ Yitii díilá-dǝ mǝ̃̀ nũɔ̃gɩ nã wà mǝ̃ waa-dǝ.

11 Cijalw-ń buruɔ nǝ̃ wù blaw, wù sǝ̃n saa wú tuu blanĩĩdiɛ hlo.

Mǝ̃̀ sáa hla wú ver ǹ-kãã jiraa nǝ̃ wù blaw.

Nǝ̃ blanĩĩ yo wù sǝ̃n saa wú ɲǝ̃ǝ̃ wù ciɛw.

12 Yindiɛ, mǝ̃̀ jo mǝ̃̀ ji waa mǝ̃̀ ja cwaa'n dɩgaliɛw-i.

Mã́ã nũɔ̃nãcãwanĩɛ̃-i, Yitii sáa dii-ga mǝ̃̀ nũɔ̃gɩ nã.

Curo nǝ̃-ń hũɔ̃ Yesu cɔ̃mmã nã̀ã ba nǝ̃ cijalw mãã wù sáa hũɔ̃ Yesu cɔ̃mmã, nǝ̃ wú hũɔ̃ wà ɲi ji gbǝ̃ǝ̃ ǹ-jiraa ɲì min, báa ce ń ɲǝ̃ǝ̃-yǝ.

13 Nǝ̃ cijal yo wu-ń hũɔ̃ Yesu cɔ̃mmã nã̀ã ba nǝ̃ blanĩĩw mãã wù sáa hũɔ̃ Dũnnũ cɔ̃mmã nã̀ã hũɔ̃ wà ba jiraa bà min, wù sǝ̃n saa wú hla-yǝ.

14 Sulammã nã, blanĩĩw mãã wù sáa hũɔ̃ Yesu cɔ̃mmã, wú nǝ̃ wùu kuganãã Dũnnũw nã wù ciɛ'n cɔ̃mmã nã.

Nǝ̃ cijalw mãã wù sáa hũɔ̃ Yesu cɔ̃mmã, wùú yo wú nǝ̃ wùu kuganãã Dũnnũw nã wù bla cɔ̃mmã nã.

Nnĩĩ nã́ã̀ ba gɩ̀ sǝ, bà tãnkuuraabà sáá bà ji ba Dũnnũ bɩgaaba.

Nǝ̃ sulammã nã, bà kuganãã Dũnnũw nã.

15 Nǝ̃ blanĩĩw mãã wù sáa hũɔ̃ Yesu cɔ̃mmã, yindagǝ nã cijalw mãã wù sáa hũɔ̃ Yesu cɔ̃mmã, wu-ń wa wú ji kã bá buruɔ nǝ̃ wù ciɛẁ yindagǝ nã wù blaw, wà wu mãã wùu hũɔ̃ Yesu cɔ̃mmã, wù ji gbǝ̃ǝ̃ ǹ-kã bá buruɔ.

Dɩ-ń ce gɩ̀ tammã blanĩĩw yindagǝ nã cijalw mãã wù hṹɔ̃lã́ Yesu cɔ̃mmã, wù ba wù hla nã-i.

Dũnnũẁ bíé-ɲã́ã̀ ɲí da ǹ-ba hyasɩrãgǝ nã-i.

16 Cijalw nǝ̃n hṹɔ̃lã́ Yesu cɔ̃mmã, wù ji ce danii nã̀ã fǝ̃ǝ̃ wà wùú ji ce wù blaẃ hũɔ̃ Yesu cɔ̃mmã?

Dàa blanĩĩw mãã wù hṹɔ̃lã́ Yesu cɔ̃mmã, wù ji ce danii nã̀ã fǝ̃ǝ̃ wà wùú ji ce wù ciɛ hũɔ̃ Yesu cɔ̃mmã?

Bà síì gbǝ̃ǝ̃ ǹ-fǝ̃ǝ̃ dɩ̀-lǝ.

Yi saa yí ba yì wáà ǹ-vaa nǝ̃ Dũnnũ belli

17 Gɩ-ń vã ǹ-hlǝ dɩ̀-lǝ dɩ̀ nã, dìí mãã mǝ̃̀ ji waa-dǝ nǝ̃-ɲã́ã̀ ǹ-pya nã, dɩ̀-i nnĩĩ: Dũnnũẁ bíé curo wo curo, ǹ-ya wú ba gùú tammã, wú ba gɩ̀ tammã nã̀ã ba wù wáà ǹ-vaa nǝ̃ hlũũguu mãã Yitii Dũnnũẁ káaráa gɩ̀ nã ǹ-hã-yǝ.

Mǝ̃̀ kal cwaaba nǝ̃ dɩ̀-i Igɩlisɩ taaba sǝ̃ǝ̃nã.

18 Dũnnũẁ yáá wùu be-n gùú bǝ̃ǝ̃gu, nǝ̃n ba bà yáá bàa sii-n, báa ce ń wa ń ŋmǝ̃ǝ̃rǝ̃ǝ̃ ǹ hla nã.

Nǝ̃ Dũnnũẁ yáá wù be-n gùú bǝ̃ǝ̃gu, nǝ̃n ba bà sáa bàa hi ǹ-síì-n, báa ce ń wa ń kãã ce bá síì-n.

19 Bà síilǝ́-n wo, bà sáa síì-n wo, gɩ̀ sǝ nǝ̃ cɔ̃m Dũnnũ yinɲã nã.

Dìí nǝ̃n gbǝ̃́ǝ̃lã́, ba ǹ bũũ Dũnnũẁ kárrá gùú hlũsǝrɩ nã.

20 Curo wo curo, wù yáá gùú tammã nǝ̃ Dũnnũẃ be wú ba wù duu wù nã, wú ba nĩĩgu.

21 Dũnnũẁ yáá wù be-n gùú nã mãã, nǝ̃-ń ba ǹ ya wasǝrɩ nã, báa ce ń jã cɔ̃m.

Nǝ̃ nǝ̃-ń da tam ǹ-ba ǹ ji hiil ǹ yuugu dɩ̀ nã, hiil-gǝ.

22 Sulammã nã, Yitii bíé gùú lwɛbaa mãã bá ba bà duu wù nã, wù híilá wasǝ'n cɔ̃mmã bà yunɲã nã.

Nã̀ã wa bá nǝ̃ sùɔ́gɩ dɩn-i nǝ̃ Yitiiẁ Gùú tammã dɩn mã̀-i, bàá nǝ̃n yáá bà hla nã, nǝ̃ wú be-ba, wù cíé bá fǝ̃ǝ̃-dǝ bà yunɲã nã, wà ba cíé wùú Kɩrsa lwɛ-i.

23 Dũnnũẁ sǝ̃́ǝ̃lã́-ɲã́ã̀ solgbǝ̃ǝ̃dǝdɩ nã, bláá jo ɲi ji ba cwaa'n lwɛba.

24 Mã́ã cwanãã, curo wo curo, wù yáá gùú tammãã nǝ̃ Dũnnũẃ be-yǝ, wú ba nĩĩgu.

Bàá mãã bà sáa taa, bà cɔ̃mmã

25 Bàá mãã bà sáa taa, Yitii sáa dii cɔ̃m mǝ̃̀ nũɔ̃gɩ nã wà mǝ̃ waa nǝ̃-ba, nǝ̃ mǝ̃̀ mãã mǝ̃̀ kãn dìí, mǝ̃̀ ji waa dɩ̀-i nǝ̃-ba.

Yitiiẁ níé mǝ̃̀ yiɛgu nã̀ã ce mǝ̃́ ba yalntiiw.

26 Ywaruugɩ̀ mãã gɩ̀ jáa bũũ kuɔkuɔgu, mǝ̃n kãn wà gɩ sáalá curo wo curo wú ba nnĩĩ wú báa taa.

27 Nǝ̃-ń ba ǹ táalá ciɛ, báa ce ń wa ń kã ɲí buruɔ.

Nǝ̃-ń ba ǹ sáa hi ǹ-taa ciɛ, báa ce ń wa ń tuu ciɛ.

28 Nǝ̃-ń tuu ciɛ ǹ sáa ce diicĩɛ̃rǝ, nǝ̃ busul yo wu-ń tuu blanĩĩ, wù sáa ce diicĩɛ̃rǝ.

Bàá nǝ̃n táalá bà ji da ywaruugu dugɔ cuu wáá nã.

Mǝ̃̀ sǝ̃n caa ɲí jãn gɩ̀ ywaruugɩ nã.

29 Mã́ã cwanãã, mǝ̃̀ mãã mǝ̃̀ caa mǝ̃́ waa dìí, dɩ̀-i nnĩĩ: Bǝ̃ǝ̃gɩ̀ píɛlá nã ǹ-tã.

Ǹ-tuu kuɔkuɔgu, bàá mãã nǝ̃ canããba, bá ba nã́ã́ bá sǝ nǝ̃ ba-i.

30 Bàá mãã bà kaalaa, bá ba nã́ã́ bà sáa bà kaalaa-i.

Bàá mãã kweyi-kweyi nã, bá ba nã́ã́ bà sáa kweyi-kweyi nã-i.

Bàá mãã bà sǝ̃ǝ̃ ɲinɲãã, bá ba nã́ã́ kuu'n sǝ bà saa-i.

31 Bàá mãã bà da cuu wáà dalaagu, bá ba nã́ã́ bà sáa da-gǝ-i.

Nã̀ã wa cuu wáà mãã gùú tammã, wù maar wù tãl nã-i.

32 Mǝ̃n sǝ̃n caa ɲí ba mããjãmmã nã.

Bàá mãã bà sáa taa, bà-lǝ bà hiɛgá nǝ̃ Yitii mããcem'n cɔ̃m nã-i; bà ba bà caa bá ce mã́ dwal wù nã-i.

33 Nǝ̃ bàá nǝ̃n táalá, bà-lǝ bà hiɛga nǝ̃ cuu wáà ɲin'n cɔ̃m nã-i; bà caa bá ce bà cɔ̃mmã́ dwal bà canãã nã-i.

34 Gɩ̀-lǝ gɩ̀ nã, bà hiɛgà yuɔ cɔ̃mmã hǝ̃ǝ̃l-i.

Canããbaa mãã bà sǝ nǝ̃ blanããba nǝ̃ pǝǝbiiba, bàá yo bà saa dɩ̀ nǝ̃ nnĩĩ-i.

Bà-lǝ bà hiɛgá nǝ̃ Yitii mããcem'n cɔ̃m nã-i; bà caa bá ba wùú bɩgaa-i bà cɔ̃mmã min nã, nǝ̃ bà hiɛga min.

Nǝ̃ bàá mãã bà táalá, bà-lǝ bà hiɛga nǝ̃ cuu ɲin nã-i; bà caa bà cɔ̃mmã́ dwal bà bla bà nã.

35 Mǝ̃n wáalá dɩ̀-lǝ ǹ-pɛ ɲimãã nã-i, mǝ̃̀ sáa waa-dǝ ǹ-guur-ɲã́ã̀ nǝ̃ cɔ̃m.

Mǝ̃̀ caa ɲí ba ɲi wáà Dũnnũ hlũũgu nã́ã́ gɩ̀ mãã gɩ̀ saa gɩ́ wáà nĩĩguu mãã, ǹ-da ǹ-dii ɲì hla Yitii mããcemmã nã nǝ̃ ɲì hiɛga min.

36 Yindiɛ, gùú pũmpǝrw-ń fǝ̃ǝ̃ wà wu-ń hla wù gǝciɛ'n taamã wú ce-yǝ nǝ̃ diibɩblar-i, nǝ̃ wu-ń ba wùu fǝ̃ǝ̃ wà wù cɔ̃mmã blǝ́rá wù yuugu, wu síì gbǝ̃ǝ̃ ǹ-kã bá buruɔ nǝ̃-yǝ, nã̀ã ba wù ne wà gɩ sáalá wú taa-yǝ, wú taa-yǝ.

Wu-ń ce dɩ̀-lǝ, wù sáa ce diicĩɛ̃rǝ sǝ.

37 Wùú nǝ̃n ya wù hiɛgá mǝ̃gaa ǹ-jiraa, nǝ̃ wú da wà wu ji gbǝ̃ǝ̃ ǹ-kã bá buruɔ nǝ̃ wù gǝciɛw, curo sáa guur ǹ-dii-yǝ dɩ̀ nã, nǝ̃ gɩ́ ba gùu ba wù hla'n kusunã cɔ̃mmã, wu ba wù caa-dǝ, wù fǝ̃ǝ̃ wù ce-i.

38 Gɩ̀ sùɔ́gɩ nã, wùú nǝ̃n taa wù gǝciɛw, wù fǝ̃́ǝ̃lã́ ǹ-ce; nǝ̃ wùú nǝ̃n hla cataagǝgu, wù-lǝ wùú fǝ̃́ǝ̃lã́ ǹ-ce ǹ-maa gɩ̀ sùɔ́gu.

39 Cijalw mãã wùu taa nǝ̃ wù blaẁ ba wù sáa hi ǹ-ku, wu-ń hla-yǝ nã̀ã kãã jiraa nǝ̃ blanĩĩdiɛ diidwaldǝdɩ sǝ wù saa.

Nǝ̃ wu-ń ku, wù ji gbǝ̃ǝ̃ ǹ-kãã jiraa nǝ̃ blanĩĩdiɛ, wùú mãã wù dwal wù nã; dìí nǝ̃n gbǝ̃́ǝ̃lã́ blanĩĩ wáà ba wùu hũɔ̃ ǹ-ba wù duu Yitii nã.

40 Nǝ̃ dɩ̀ min drɔ, mǝ̃n ne wà wu-ń ba wù sáa tuu blanĩĩ, gùú búɔlá nã ǹ-ɲǝ̃ǝ̃ wú tuu blanĩĩw.

Mã́ã nũɔ̃nãcãwan-i, nǝ̃ mǝ̃̀ fǝ̃́ǝ̃lã́ wà Dũnnũ Yuflǝẃ nìɛ mã́ã yo mǝ̃̀ saa.