Kor. dĩɛ̃l 6

Kɩrsa bɩgaa'n sugojarcɔ̃mmã nǝ̃ bà ɲĩɛ̃

Ɲì sǝ̃ǝ̃nã, curow-ń da cɔ̃mmã nã nǝ̃ wù Kɩrsa nãyow, wu-ń ce wú siɛ ǹ-tuu ǹ-kã nǝ̃-mã cuu fãngãtaaba nãã wà bá jar-mã.

Gɩ ba nã́ã́ gɩ sáalá wú ba wu-ń ce wú hla wù síì hã Kɩrsa bluubá jar-mã-ì?

2 Ɲi sáa fǝ̃ǝ̃ wà bàá mãã Kɩrsa bluuba, bàá ji jar cuu cwaa'n sugolli-ì?

Ɲi-ń ba ɲi ji jar cuu cwaa'n sugolli, gɩ̀ ba danii ɲí ba ɲi síì gbǝ̃ǝ̃ ǹ-jar cɔ̃nsaalammã?

3 Ɲi sáa fǝ̃ǝ̃ wà hãmĩĩ ji jar mɛlɛgɛba yo bà sugolli-ì?

Nã̀ã ji wa cuu wáà cɔ̃m!

4 Nǝ̃ ɲi ba danii cɔ̃mmã-ń jãn curow nǝ̃ wù nãyo'n sǝ̃ǝ̃gɩ nã, ɲi suro ǹ-kã cuu fãngãtaaba nãã wà ba jar-mã?

Ɲi caa ɲí ba ɲi jar ɲì cɔ̃mmã bàá nã-i, nã̀ã da bà sǝ guɔ nã Igɩlisɩ taaba sǝ̃ǝ̃nã!

5 Dɩ̀-lǝ circɔ̃m-i dɛ!

Gɩ ba nã́ã́ curo'n sɩraa ɲimãã sǝ̃ǝ̃nã gbal yo, wùú mãã nǝ̃ cɔ̃nfǝ̃ǝ̃gǝgu wù ji gbǝ̃ǝ̃ ǹ-jar wù nãbɩgaa'n sugolli-ì?

6 Gɩ̀ ba danii ɲimãã mãã ɲì fǝ̃ǝ̃ Dũnnũw, ɲi-ń ce ɲí ver ǹ-be ɲi ɲĩɛ̃ sugojaruugɩ nã, bàá mãã bà sǝ̃n fǝ̃ǝ̃ Dũnnũw bà saa.

7 Sugojarcɔ̃mmã dɩndɩn yo mã-ń da ɲì sǝ̃ǝ̃nã, mã̀ pɩgaa wà ɲi nǝ̃nǝ̃ǝ̃ Dũnnũ hlũũgɩ nã.

Hamã nã-i curow-ń ce-ɲã́ã̀ nǝ̃ diibɩblaari, wu-ń ŋmã ɲì kuu ɲí ba ɲì sǝ̃n gbǝ̃ǝ̃ ǹ-hũɔ̃-mã ɲì hla nã?

8 Nǝ̃ ɲimãã ver ǹ-ba ɲì ce ɲi mãã Kɩrsaw nã nǝ̃ bàá mãã nǝ̃ diibɩblaari, nã̀ã ba ɲi ŋmã bà nãkruɔɲinɲã!

9 Ɲi sáa fǝ̃ǝ̃ wà diicĩɛ̃rǝntaabà síì da Dũnnũ Yuuntasǝrɩ-iì?

Bláá ce ɲí vuu ɲì hla!

Bàá mãã durkũmnããba, nǝ̃ siijãnããba, nǝ̃ capuɔraaba, nǝ̃ blapuɔraaba yindagǝ nã bàá mãã bà mǝ̃rǝ̃ǝ̃ nǝ̃ bà nãbibyanããba,

10 nǝ̃ ŋmãllããba, nǝ̃ bàá mãã kuu'n sǝ̃n hiil-ba ǹ-da, nǝ̃ bàá mãã ba-ń ce bá ɲũɔ̃ kwãmmã́ blǝ-ba, nǝ̃ kũɔ̃nwaaraaba nǝ̃ cobaliɛbà síì da Dũnnũ Yuuntasǝri.

11 Ɲi sǝ̃ǝ̃nã, badaabà yáá bà ce gaacĩɛ̃ya gáà tuugu, nǝ̃ Dũnnũ Yuflǝẁ pérrá ɲì nã, nã̀ã hiil-ɲã́ã̀ ɲì dǝ, ɲí ba Dũnnũ bɩgaaba.

Dũnnũ Yuflǝẁ cíé ɲí ba cosũɔ̃lbaba Dũnnũ yinɲã nã Yesu Kɩrsa nũɔ̃'n drɔ.

Ɲì cãn'n cɔ̃mmã

12 Ɲì sǝ̃ǝ̃nã badaabà kãn wà ba ji gbǝ̃ǝ̃ ǹ-ce cɔ̃mmã min, sulam-i, nǝ̃ mã̀ min sǝ̃n pya ɲì nã.

Mã́ã yo, hlũũgɩ́ nìɛ mǝ̃̀ saa mǝ̃́ ce cɔ̃mmã min, nǝ̃ mǝ̃̀ síì hũɔ̃ ǹ-ya cɔ̃ndamã́ blǝ mǝ̃̀ yuugu ǹ-ce mǝ̃́ ba mã̀ wabiɛw.

13 Bà kãn hlo wà Dũnnũw cíé wuuri kusuu'n cɔ̃m nã-i, nã̀ã ce kusuugu wuur'n cɔ̃mmã nã.

Dìí yo sulam-i, nǝ̃ yuudagǝ Dũnnũẁ ji bǝ̃ǝ̃lǝ̃ǝ̃ gɩ̀ ɲinɲã hǝ̃ǝ̃lɲã min nã.

Wù sáa ce curo'n cãndi wà dɩ́ ba durkũmsǝrɩ nã, nǝ̃ wù cíé-dǝ dɩ́ ba Yitii'n dǝlli-i nǝ̃ Yitii ba cãnkũɔ̃m'n tiiw.

14 Dũnnũẁ pĩ́ĩlã́ Yitiiw; wù ji pĩĩ ǹ-hiil hãmĩĩ yo kúúgɩ nã nǝ̃ wù fãngããgu.

15 Ɲimãã sáa fǝ̃ǝ̃ wà ɲì cãnkũɔ̃mmã, Kɩrsa cãn'n sɔsǝdarǝ-iì?

Gɩ̀ sùɔ́gɩ nã, nã́ã́ gɩ sáalá wudiɛ tuu Kɩrsa cãn'n sùɔ́dagǝ ǹ-dii ǹ-plii-gǝ nǝ̃ cijal mãã wù suur wù hla wù hã bibyanããba, wù cãndɩ nã-ì?

Dɩ̀-lǝ dɩ̀ síì ce ǹ-da few!

16 Ɲi sáa fǝ̃ǝ̃ wà curow-ń cɔ nǝ̃ cijalw mãã wù suur wù hla wù hã bibyanããba, wú juo ba twammã dɩn-i nǝ̃-yǝ-ì?

Bà yállá Dũnnũ cãwandɩ nã wà gɩ̀ cwaaba hǝ̃ǝ̃lba min, bà ji ba twammã dɩnmã.

17 Nǝ̃ gùú tii mãã wu-ń hũɔ̃ ǹ-dii wù hla ǹ-hã Yitiiw, bà hiɛgà juo ba sùɔ́gɩ dɩn-i.

18 Bláá ɲì sɔ̃ durkũmsǝrɩ nã!

Curow mãã wù ce gùú gaacĩɛ̃yagaa mãã, gà sǝ̃n ba wù cãndɩ nã nǝ̃ durkũmsǝ'n diicĩɛ̃rǝ-lǝ dɩ̀ ba wù cãn nã-i.

19 Ɲi sáa fǝ̃ǝ̃ wà ɲì cãnkũɔ̃mã-i Dũnnũ Yuflǝ suɔgu-ì?

Dũnnũ Yuflǝẃ nǝ̃ ɲì nã; Dũnnũ hlã-ɲã́ã̀ nǝ̃-yǝ.

Gɩ̀ sùɔ́gɩ nã, ɲì cãnkũɔ̃mã sǝ ɲì hla mǝ̃gãm sǝ.

20 Dũnnũẁ mãã wù sǝ̃́ǝ̃lã́-ɲã́ã̀ solkuusǝdǝdɩ nã, ɲì cãndɩ mãã dɩ̀ ce kuu wo kuu, dɩ́ ba dɩ̀ ce-gǝ dɩ̀ bũũ Dũnnũw.