Kor. dĩɛ̃l 5

Gùú cɔ̃mmãã mãã mã̀ bla Igɩlisɩ taaba

Cwaabá nìɛ bà waa yanɲã min wà durkũmnããba nìɛ ɲì sǝ̃ǝ̃nã.

Halle bàá mãã bà sǝ̃n fǝ̃ǝ̃ Dũnnũw, bà síì hũɔ̃ ǹ-ce mã̀ tuugu.

Bà wáalá wà ɲì sǝ̃ǝ̃nã, wudiɛ túulá wù tǝ ciɛ ǹ-ba wù cɔ nǝ̃-yǝ.

2 Ɲi yigasǝrɩ̀ yáá dɩ̀ saa dɩ́ ba ɲǝ̃ǝ̃m nã-i, nǝ̃ ɲimãã ver ǹ-ba ɲi bɩnǝ̃ǝ̃ ɲì hla nã.

Wùú nǝ̃n cíé cɔ̃m mã́ã̀ tuugu, ɲì yáá ɲì saa ɲí ɲǝ̃ǝ̃ ǹ-hiil-yǝ ɲì sǝ̃ǝ̃nã.

3 Gɩ-ń dwal mǝ̃n ba mǝ̃̀ sɩraa nǝ̃-ɲã́ã̀, mǝ̃̀ hiɛgá nàa nǝ̃-ɲã́ã̀.

Wùú nǝ̃n cíé cɔ̃m mã́ã̀, mǝ̃̀ hlã-yǝ nǝ̃ yuɔrɔmmã ǹ-tã nã́ã́ mǝ̃ yáá dàa nǝ̃ ɲã́ã̀-i.

4 Nǝ̃ ɲi-ń ga tɩgii ɲì ɲĩɛ̃ Yitii Yesu yiirɩ nã, mǝ̃n ga ba nǝ̃-ɲã́ã̀ mǝ̃̀ hiɛga nã, nǝ̃ Yitii Yesu fãngããgɩ nã.

5 Ɲi saa ɲí dii wùú nǝ̃n cíé cɔ̃m mã́ã̀ Sɩtãn nãkruɔgɩ nã.

Wù ji bǝ̃ǝ̃lǝ̃ǝ̃ wù nã Yitii Yesu Kɩrsaw da ǹ-kor wù yuflǝw, wù jol'n yuugu.

6 Gɩ̀ sáa saa ɲí ba ɲì bũũ ɲì hla!

Ɲi sáa fǝ̃ǝ̃ wà ba-ń dii leviir burduɔgɩ nã fiyãã, wù ce mã̀ min mã́ suro ǹ-ɲũrũɔ̃-i.

7 Gɩ̀ sùɔ́gɩ nã, gùú diicĩɛ̃rǝdii mãã ɲì sǝ̃ǝ̃nã nã́ã́ leviir-i, ɲi saa ɲí hiil-dǝ, ǹ-da ǹ-per ɲì hla nã ǹ-ba nã́ã́ bur jũnflãm-i, mã̀ã́ mãã mã̀ sǝ nǝ̃ leviir.

Yesu Kɩrsaẁ mãã wù kúú yì cɔ̃mmã nã, mǝ̃̀ fǝ̃́ǝ̃lã́ wà Dũnnũw vérrá ɲì nã ǹ-tã.

Wú nǝ̃ nã́ã́ tũmblɩw mãã Yahudyabà ko-yǝ bà ce paaruuguu mãã bá be-gǝ wà Ta-n-maa paaruugu.

8 Gɩ̀ sùɔ́gɩ nã, yi yáá yì ce gùú gaacĩɛ̃yagaa mãã, yállà yí ya gà cellɩ́ ba, nǝ̃ yi ce Ta-n-maa paaruugu nã́ã́ Yahudyabà yáalá leviircũncurɔẃ ba gùú tammã nã̀ã ce-gǝ.

Gùú ji ce yì Dũnnũẃ per yì nã, nǝ̃ yí ba cwaabaa mãã bà sǝ nǝ̃ dɩgaa, nã̀ã ba bà waa sulammã.

9 Mǝ̃̀ tĩ́ɛ̃lã́ mǝ̃̀ sɛbɛdiɛ ǹ-hã-ɲã́ã̀, mǝ̃̀ wáalá nǝ̃-ɲã́ã̀ wù kusuugɩ nã wà ɲi báa kã ɲí ce cɔ̃m ɲì min nǝ̃ durkũmnããba.

10 Nǝ̃ bàá mãã bà sǝ̃n fǝ̃ǝ̃ Dũnnũw nã̀ã ba durkũmnããba, mǝ̃̀ sáa waa wà ɲi báa plii ɲí ce cɔ̃m nǝ̃ bà-i dɛ!

Yisɩnǝ̃ǝ̃ba nǝ̃ ŋmãllããba nǝ̃ siijãnããbá nìɛ cuuw nã.

Nǝ̃ ba-ń wa ɲí báa plii ǹ-ce cɔ̃m ɲì min nǝ̃-ba, gɩ̀-lǝ bà wa ɲí hlǝ cuuw nã gbɩla-i ŋmãã!

11 Nǝ̃ bàá mãã wà Yesu duunãtaa-i nǝ̃-ba, nã̀ã ba durkũmnããba, yisɩnǝ̃ǝ̃ba, siijãnããba, nãdɔ̃ntuuraaba, kwãnɲũɔ̃rããba nǝ̃ ŋmãllããba, mǝ̃̀ wáalá-dǝ bàá cɔ̃m nã-i.

Ɲi sǝ̃n saa ɲí wuu wuurkwar yo nǝ̃ gɩ̀ tuutaaba.

12-13 Bàá mãã bà sǝ Yesu duunãtaaba, mǝ̃n nũɔ̃'n sǝ bà-lǝ bà sugojarcɔ̃mmã nã.

Dũnnũẁ ga jar bà sugolli.

Nǝ̃ bàá mãã nǝ̃-ɲã́ã̀, ɲi sǝ̃n saa ɲí jar bàá sugol sǝ-ì?

Bláà ɲì ce nã́ã́ dɩ̀ yállá Dũnnũ cãwan'n sɛbɛw nã nĩĩguu mãã.

Bà yállá wà: «Ɲǝ̃́ǝ̃lã̀ ɲi hiil cobalw ɲì sǝ̃ǝ̃nã.»