Kor. dĩɛ̃l 4

Yesu Kɩrsa tĩɛ̃taa'n cɔ̃mmã

Mǝ̃̀ caa ɲí fǝ̃ǝ̃ wà Kɩrsa mããcieraa-i nǝ̃-yáà.

Dũnnũw nǝ̃ wùu dii sulammãã mãã mã̀ã ŋmǝ̃ǝ̃rǝ̃ǝ̃ wù cɔ̃mmã nã hãmĩĩ nãkrɔnɲã nã-i, yí da ǹ-ba yi kal cwaaba nǝ̃-mã.

2 Yuuntiiw-ń dii cɔ̃m curo'n nãkruɔgɩ nã, wù mãã wù cirǝ̃ǝ̃ gùú nã mãã gɩ̀ tiiw saa, gɩ̀-i, wú ba yalntii.

3 Nǝ̃ mǝ̃n-lǝ, gɩ-ń dwal ɲí ba ɲi kãn wà mǝ̃́ yuɔruɔ nǝ̃ cɔ̃m, yindagǝ nã cuu cwaaba ba bà kãn wà mǝ̃ yuɔruɔ nǝ̃ cɔ̃m, gɩ̀ sǝ̃n ce-m nǝ̃ kuu.

Mǝ̃n sǝ̃n blǝ mǝ̃̀ hla'n cɔ̃mmã nǝ̃ mǝ̃̀ hla.

4 Sulam-i, mǝ̃̀ hiɛgà sǝ̃n car-m nǝ̃ cɔ̃m, nǝ̃ gùú sǝ̃n pɩgaa wà mǝ̃ sṹɔ̃lã́.

Dũnnũ dɩndɩn ji jar mǝ̃̀ sugolli, curo sǝ.

5 Gùú cɔ̃mmã nã-i, ɲi sǝ̃n saa ɲí jar curo'n sugolli nǝ̃ dɩ̀ yuugɩ̀ sáa hi yugo.

Cíilà Yitii Yesu Kɩrsa jol'n yuugu; gɩ̀-lǝ gɩ̀ yuugu, cɔ̃mmãã nǝ̃n ŋmǝ̃́ǝ̃rǝ̃́ǝ̃ dudũũmã nã, wù ji ce mã́ curuɔ, nǝ̃ cwaabà mãã bà kãn cɔ̃m wo cɔ̃m bà hiɛga nã, wù ji fɩrǝǝ mã̀ã́ yo mã̀ nã.

Gɩ̀ sùɔ́gɩ nã, curo wo curo mãã wù saa nǝ̃ gùú bɩnǝ̃mmãã mãã, wù ga da-mã Dũnnũw saa.

6 Mã́ã cwanãã, mǝ̃̀ túulá Apolɔsɩ cɔ̃mmã nǝ̃ mǝ̃n hla'n mǝ̃gãmmã ǹ-kal ɲã́ã̀-i, nã̀ã pɩgaa-ɲã́ã̀ yì gaaciega nã, ɲi mãã ɲì saa ɲí ba ɲì duu gùú hlũfɩnfaagɩ nã mãã gɩ̀ cɔ̃mmã̀ yállá.

Nǝ̃ ɲi báa ji da ǹ-ba ɲì huɔruɔ ɲì hla wà ɲi nǝ̃ wáà-i, nã̀ã hla badaaba.

7 Wùú mãã wù kãn wà wu buɔ badaaba nã, wù ne wù hla danii tam-i nã̀ã ba wù kãn wà wu buɔ bà nã?

Kuu wo kuu mãã wù saa, Dũnnũ sáa hã-yǝ nǝ̃-gǝ-ì?

Nǝ̃ Dũnnũw mãã wù hlã-yǝ nǝ̃-gǝ, bii cíé wú ba wù bũũ wù hla nã́ã́ bà sáa hã-yǝ nǝ̃-gǝ sǝ?

8 Wo, ɲi ne wà kuu'n sǝ gùu naa-ɲã́ã̀-ì?

Ɲi ne wà ɲi cíé gbaalaa-i ǹ-tã-ì?

Ɲi ne wà ɲi cíé yuntaaba nǝ̃ hãmĩĩ ba yì sǝ ba-ì?

Gɩ̀ yáá gɩ̀ ji dwal mǝ̃n nã ɲí ba yuntaaba, gɩ̀-lǝ gɩ̀ nã hãmĩĩ yo, yi yáá yì ji kã yí jiraa yuuntasǝrɩ nã nǝ̃-ɲã́ã̀.

9 Hãmĩĩ mãã Yesu tĩɛ̃taaba, mǝ̃̀ kãn wà gɩ nǝ̃ nã́ã́ Dũnnũẁ cíé hãmĩĩ ba cwaaba min furũũgɩ nã.

Yi nǝ̃ nã́ã́ cwaabaa mãã bàa jar bà sugolli ǹ-ba bà ji ko-ba nã̀ã kãã hiil-ba nǝ̃ sɩgagu mɛlɛgɛba yinɲã nã nǝ̃ cuu taa'n yinɲã nã.

10 Kɩrsa cɔ̃mmã nã, cwaabà ne yí ce baahãrãã-i.

Nǝ̃ ɲimãã-lǝ, ɲí ne wà ɲimãã-i cɔ̃nfǝ̃ǝ̃rǝ̃ǝ̃ba Kɩrsa hlũũgɩ nã.

Bà ne hãmĩĩ ba mǝ̃nkurnǝ̃ǝ̃-i, nǝ̃ ɲimãã-lǝ ɲí wa ɲimãã-i fãngãtaaba.

Bà dìɛ hãmĩĩ nǝ̃ ɲí ne wà bá bɩnǝ̃ǝ̃ bɩnǝ̃ǝ̃ ɲì nã-ì?

11 Ǹ-ji vaa nǝ̃ jimããgu, yi cɔ nǝ̃ nũmmã nǝ̃ hũnɲũɔ̃sǝri.

Yi sǝ nǝ̃ kuulanãm, nã̀ã ba ywaruugɩ nã bà nãkrɔnɲã nã.

Wancɔm'n sùɔ́gɩ dɩn sǝ yi saa,

12 nã̀ã ba yi-ń ce yí ywar yì hla'n mããcemmã nã nã̀ã da yì nũɔ̃nã wuuri.

Ba-ń ba bà tuuraa yi nã, yi-ń ce yí ba yì cirǝ̃ǝ̃ Dũnnũw nã yi hã-ba wà wu piɛ wù nãkrɔfɩnfaagu bà drɔ.

Ba-ń ba bà ywar-yáà, yi-ń ce yí hũɔ̃-mã yì hla nã.

13 Ba-ń ba bà bǝ̃ǝ̃lǝ̃ǝ̃ yì yiriɛga nã, yi ba yì siɛ-ba nǝ̃ hyasɩrãgǝ-i nǝ̃ kusufɩnfaagu.

Bà ne yí ba nã́ã́ hiɛnɲãã mãã bàa per-ɲã́ã̀ ǹ-tuu ǹ-ga nǝ̃nǝ̃ǝ̃-i.

Ǹ-ji vaa nǝ̃ jimããgu, bà ne yí ba mǝ̃ǝ̃lǝ̃ǝ̃bɩgaa-i.

14 Mǝ̃n sáa yal cɔ̃m mã́ã ǹ-da ǹ-dii cir sǝ ɲì nã ɲì gaacie'n cɔ̃mmã nã, nǝ̃ mǝ̃̀ yal-mã ǹ-da ǹ-kal-ɲã́ã̀-i, ɲi mãã mǝ̃̀ cituubiiba.

15 Gɩ-ń dwal cwaabaa mãã bà kal-ɲã́ã̀ nǝ̃ Yesu Kɩrsa cɔ̃mmã bá ba bàa bũũ, ɲi saa ɲí fǝ̃ǝ̃ wà tiiyǝẁ dɩn-i ɲì saa.

Wù-lǝ wɩ̀-i mã́ã!

Mã́ã wáalá Yesu cɔ̃ndudwalɩmmã nǝ̃-ɲã́ã̀, ɲí hũɔ̃ ǹ-cu wù furũũgɩ nã, gɩ̀-i, mǝ̃́ ba ɲì tǝw.

16 Mǝ̃̀ mãã ɲì tǝw, cíyà kukuɔya nǝ̃ ɲí tuu mǝ̃̀ nǝ̃ǝ̃li.

17 Gùú cɔ̃mmãã cíé mǝ̃́ tĩɛ̃ Timotew mãã mǝ̃̀ bíɛ́ cituublɩẃ ba wù kã ɲì nãã.

Yalntii-i nǝ̃-yǝ Yitii'n hlũũgɩ nã.

Mǝ̃n mãã mǝ̃̀ wáà Kɩrsa hlũũgu gùú tammã, mǝ̃̀ caa wú kãã kal-ɲã́ã̀ nǝ̃-gǝ hlo, nã́ã́ mǝ̃n mãã mǝ̃̀ waaraa mǝ̃̀ kal cwaaba nǝ̃-gǝ sɔnɲã min, nǝ̃ Igɩlisɩ taaba min sǝ̃ǝ̃nã gùú tammã.

18 Ɲì sǝ̃ǝ̃nã, cwaadaabà huɔruɔ bà hla nã bà waa wà mǝ̃ síì ver ǹ-kã ɲì nãã hlo.

19 Nǝ̃ Dũnnũw-ń hũɔ̃, mǝ̃̀ síì hǝ̃ǝ̃sǝ nã̀ã ver ǹ-kã ɲì nãã.

Gɩ̀-lǝ gɩ̀ nã, bà yáá bà waa gùú cãwanĩɛ̃ga bà huɔruɔ bà hla nã, mǝ̃̀ ga fǝ̃ǝ̃ nǝ̃n ba bá nǝ̃ gɩ̀ fãngããgu bà gaaciega nã.

20 Nã̀ã wa Dũnnũ Yuuntasǝ'n cɔ̃mmã, cãwanĩɛ̃'n cɔ̃m dɩndɩn sǝ, nǝ̃ cwaabà saa bá da wù fãngããgu yì gaaciega nã.

21 Nǝ̃ ɲi caa bii gbalw?

Ɲi caa mǝ̃́ kã nǝ̃ damlã-ì ǹ-ga tãn-ɲã́ã̀ dàa, ɲi caa mǝ̃́ kã nǝ̃ dwalɩm-i mǝ̃̀ hiɛga nã nǝ̃ hyasɩrãgǝgu-ì?