Lukaw 22

Sudasɩẁ hlǝ Yesu furũũgɩ nã

(Mãtiyew 26.1-5, 14-16 ; Markaw 14.1-2, 10-11 ; Yuhanãw 11.45-53)

Paaruuguu mãã bà ce-gǝ nǝ̃ burw mãã wù sǝ nǝ̃ leviirw, nǝ̃ paaruuguu mãã bà be-ɲã wà Ta-n-maa paaruu, ɲã̀ gáa ba ɲã̀ piɛ nã,

2 Yahudyaba puruɔntaa'n yuntaaba, nǝ̃ Musa hlũũ'n yuntaabà yáá bà caa bá ko Yesu, nã̀ã ba bà sɔ̃ cwaaba nã, bà sáa fǝ̃ǝ̃ bà mãã bà ji ce gùú tuuguu mãã, nã̀ã ko-yǝ.

3 Sudasɩw mãã wù yáá dàa Nũɔ̃sɔ̃nǝ̃bahǝ̃ǝ̃lba sǝ̃ǝ̃nã, bàa suu-yǝ wà Isɩkariyɔtɩ.

Sɩtãnẃ juo dii kãnɩmbɩblammã wù-lǝ wù hiɛga nã,

4 wú fǝ̃ǝ̃ ǹ-kã bá kãã gbǝ dɩ̀ nã, nǝ̃ Yahudyaba puruɔntaa'n yuntaaba, nǝ̃ Dũnnũ bũũsuɔ'n gardɩba yuntaaba, wù mãã wù ji dii Yesuw bà nãkrɔnɲã nã gùú tammã.

5 Gɩ́ dwal bà nã dugɔ, bá gbǝ dɩ̀ nã wà ba ji pã ǹ-hã-yǝ.

6 Sudasɩẃ hũɔ̃, nã̀ã ba wù tɔ̃n bǝ̃ǝ̃guu mãã Yesuẁ sɩga ba cocindi sǝ̃ǝ̃nã, wú da ǹ-dii-yǝ bà nãkrɔnɲã nã, nǝ̃ cocindɩ báa fǝ̃ǝ̃ dɩ̀ nã.

Yesuẁ tɩgɩnǝ̃ǝ̃ Ta-n-maa paaruu'n wuurɩ nã

(Mãtiyew 26.17-25 ; Markaw 14.12-21 ; Yuhanãw 13.21-30)

7 Burw mãã wù sǝ nǝ̃ leviirw, wù paaruugɩ̀ jáa hi, bà yáá bà saa bá ko Ta-n-maa paaruu'n^a tũmũũw gùú yuuguu mãã,

8 Yesuẃ tĩɛ̃ Piɛrba nǝ̃ Yuhanãw nã̀ã waa nǝ̃-ba wà: «Máarà ɲi ga tɩgɩnǝ̃ǝ̃ Ta-n-maa paaruu'n wuurɩ nã ɲí cii-yáà.»

9 Bá yugu-yǝ wà: «Ǹ caa yí kãã tɩgɩnǝ̃ǝ̃ dɩ̀ nã haa-i?»

10 Yesuẃ fǝ̃ǝ̃ ǹ-siɛ-ba wà: «Ɲi-ń ga kã ɲì ga jãn lǝri, ɲì ga jal nǝ̃ biɛdiɛ yà tuu hũmgbãmũɔ̃gu.

Bláà ɲì duu wù nã.

Wu-ń ga jãn gùú suɔguu mãã, ɲí jãn ɲí duu wù nã.

11 Ɲi-ń ga jãn, ɲi ga yugu gɩ̀ suɔntiiw wà Kaltii wa ɲí juo yugu-yǝ ǹ-ne, wà wu ga wuu Ta-n-maa paaruu'n wuuri nǝ̃ wù duunãtaaba sùɔ́ hagu nã-ì?

12 Gɩ̀ biɛẁ ga pɩgaa ǹ-ja-ɲã́ã̀ nǝ̃ drɔdogǝ̃ngããdagǝ, nǝ̃ gɩ̀ kusunã wariɛga min, ɲi ga gonãã gùú sùɔ́gɩ-i.»

13 Wù wáalá-dǝ gùú tammã, bá maar ǹ-kãã da dɩ̀ min nĩĩgu.

Bá fǝ̃ǝ̃ ǹ-tɩgɩnǝ̃ǝ̃ Ta-n-maa paaruu'n wuurɩ nã.

Yesuẁ wuu Ta-n-maa paaruu'n wuurɩ nǝ̃ wù bluuba

(Mãtiyew 26.26-30 ; Markaw 14.22-26 ; Kor. dĩɛ̃l 11.23-25)

14 Gɩ̀ bǝ̃ǝ̃gɩ gáa hi, bá kãã jiraa juwuukaagɩ nã, nǝ̃ wù tĩɛ̃taaba.

15 Wú fǝ̃ǝ̃ ǹ-waa nǝ̃-ba wà: «Ta-n-maa paaruu gúɔ̀, gɩ̀ cɔ̃mmã̀ yáá mǝ̃̀ hiɛga nã ǹ-car, gùú cíé mǝ̃́ ba mǝ̃̀ yáá mǝ̃̀ caa yí ce-gǝ yì min, nǝ̃ ywaruugɩ̀ ji fǝ̃ǝ̃ ǹ-hi-m.

16 Mǝ̃̀ tu-dǝ nǝ̃-ɲã́ã̀, mǝ̃̀ síì wuu wuur díɛ̀ ǹ-da hlo, fuwɔ Ta-n-maa paaruuguu mãã gɩ̀ ce dìí yuugɩ nã, Dũnnũẁ ga ce dɩ́ suu wù yuuntasǝrɩ nã.»

17 Nã̀ã fǝ̃ǝ̃ ǹ-hũɔ̃ ciraagu, ǹ-dũũ kwayaw Dũnnũw nã, nã̀ã waa nǝ̃-ba wà: «Hṹɔ̃lã̀ ciraa gúɔ̀ ɲí ɲũɔ̃ ɲí hã ɲì ɲĩɛ̃.

18 Mǝ̃̀ mãã mǝ̃̀ tu nǝ̃-ɲã́ã̀, mǝ̃̀ síì ɲũɔ̃ ɛrsɛ̃ kwãmmã hlo, fuwɔ Dũnnũ yuuntasǝrɩ ga jo.»

19 Nã̀ã fǝ̃ǝ̃ tuu burblɩri ǹ-dũũ kwayaw Dũnnũw nã, nã̀ã bǝraa dɩ̀ nã ǹ-hã-ba, nã̀ã waa wà: «Mã́ã cãnkũɔ̃mã-i nnĩĩ, mǝ̃̀ hã-ɲã́ã̀ nǝ̃-mã.

Bláà ɲì ce gɩ̀ cɔ̃mmã̀ã ɲì kãnãã mǝ̃̀ cɔ̃mmã nã.»

20 Bà gáa wuu wuuri ǹ-tã, wú tuu guuɲũɔ̃kuuguu, gùú tammã dɩnmã-i nã̀ã waa wà: «Dũnnũẁ mãã wù ji ɲũɔ̃ gùú twanflãmmãã mãã nǝ̃ cwaaba, guuɲũɔ̃kuu gúɔ̀gɩ̀ pɩgaa mã̀-i.

Wù ji ce-mã nǝ̃ mã́ã twam-i, bà ji ce mã́ tũnũũ ǹ-hã-ɲã́ã̀.

21 Nǝ̃ ɲi díɛ́, wùú mãã wù ji hlǝ mǝ̃̀ furũũgɩ nã, yí nìɛ juwuukaagɩ nã yì min nã nǝ̃-yǝ.

22 Curonbiɛ-lǝ wù saa wú ku-lǝ wo.

Dũnnũẁ yáá wa dɩ ji ce gùú tammã-i.

Nǝ̃ yíi mãã ǹ-dii-yǝ nãkrɔnɲã nã, hujãncɔ̃mmã nǝ̃ ǹ drɔ.»

23 Yesu duunãtaabá ba bà yugu bà ɲĩɛ̃, wà halii bà-lǝ bà sǝ̃ǝ̃nã, wùú mãã wù ji hũɔ̃ ǹ-ce díɛ̀dɩ tuugu.

Yesu tĩɛ̃taabà yugu bà ɲĩɛ̃ wà: «Halii búɔlà yì min nã?»

24 Yesu tĩɛ̃taa yo, bá fǝ̃ǝ̃ ǹ-ba bà fa bà ɲĩɛ̃ nã, wà bà-lǝ bà sǝ̃ǝ̃nã, hawu sáalà wú ba wù buɔ bà min nã.

25 Yesuẃ fǝ̃ǝ̃ ǹ-waa nǝ̃-ba wà: «Cuu wáà yuuntaabà ce cwaaba nǝ̃ fãngããgu, nã̀ã ba bà caa wà bá ba bà be-ba wà cofɩnfaa.

26 Nǝ̃ ɲimãã cɔ̃mmã̀ sǝ nĩĩguu sǝ.

Ɲimãã saa, wùú mãã wù buɔ nã, wù sáalà wú ba ɲì min wuusaalw, nǝ̃ yuuntiiẃ ce wù hla nã́ã́ ɲì mããcier-i.

27 Wùú mãã wu-ń ce wú jiraa, nǝ̃ wudiɛẃ hĩɛ̃ ǹ-hã wú wuu, hawu búɔlà hawu nã-ì?

Wùú mãã jirammã nã wùú sǝ-ì?

Nǝ̃ dɩ̀ min nã, mã́ã̀, mǝ̃́ nǝ̃ nã́ã́ mããcier-i ɲì sǝ̃ǝ̃nã.

28 Gùú bǝ̃ǝ̃guu mãã bà yáá bà kãnnã-m, ɲí hla nã̀ã ba ɲì duu mǝ̃̀ nã fɩraa.

29 Gùú cíé, mǝ̃̀ Tǝẁ mãã wù hlã-m nǝ̃ wù yuuntasǝri, mã́ã yo, mǝ̃̀ dii-ɲã́ã̀ gɩ̀ yuuntasǝrɩ nã-i.

30 Gɩ̀-lǝ gɩ̀ nã, mǝ̃-ń ga ba mǝ̃̀ yuuntasǝrɩ nã gùú bǝ̃ǝ̃gu, yi ga ba yì wuu wuuri yì min nã-i.

Nǝ̃ nũɔ̃ntaa nũɔ̃sɔ̃ nǝ̃ bà hǝ̃ǝ̃lbaa mãã Isɩrayɛl yiɛgu, mǝ̃̀ ga ce ɲí jiraa fãngãtaa'n wanjirammã nã, nã̀ã yugu bà nũɔ̃gu.»

Yesuẁ gbǝ Piɛrw nã, wà wùú Piɛrẁ ji car-mã wà wu sǝ̃n fǝ̃ǝ̃-yǝ

(Mãtiyew 26.31-35 ; Markaw 14.27-31 ; Yuhanãw 13.36-38)

31 Nǝ̃ Yesuẃ fǝ̃ǝ̃ ǹ-waa nǝ̃ Simɔ̃ Piɛrw wà: «Simɔ̃, Simɔ̃, Dũnnũẁ hlã Sɩtãnw nǝ̃ hlũũgu, wà wú saa-ɲã́ã̀, ǹ-hiil biigaa kaammã nã.

32 Nǝ̃ mǝ̃̀ jíɛríɛ nǝ̃ Dũnnũw ǹ-hã-n, n báa ji cu mǝ̃̀ furũũgɩ nã gɩ́ ywar-n.

Nǝ̃, nǝ̃-ń ga ba nã̀ã ver ǹ-hũɔ̃ mǝ̃̀ saa gùú nã mãã, dii dɔ̃mmã ǹ nãbɩgaaba nã.»

33 Piɛrẃ fǝ̃ǝ̃ ǹ-waa nǝ̃-yǝ wà: «Yitii, nǝ̃-ń ba ǹ-ga jãn sùɔ́ wo sùɔ́, kasoduu nã-i wo, kúú nã-i wo, mǝ̃̀ ga duu ǹ nã.»

34 Yesuẃ fǝ̃ǝ̃ ǹ-siɛ-yǝ wà: «Piɛr!

Mǝ̃̀ waa nǝ̃-n jimããgu dìɛ, kwallaẁ síì hi ǹ-bu nǝ̃ ń car-mã, ǹ-ji da yin siɛlw, wà n sǝ̃n fǝ̃ǝ̃-m.»

35 Nǝ̃ Yesuẃ fǝ̃ǝ̃ ǹ-waa wà: «Mǝ̃̀ yáá mã̀ã tĩɛ̃-ɲã́ã̀ gùú nã mãã, ɲi sáá nǝ̃ worblɩ, ɲi sáá nǝ̃ bɩgatĩɛ̃, ɲi sáá nǝ̃ viɛtaagǝ, kuudaagɩ̀ yáá gùu naa ɲãã-ì?»

Bá siɛ-yǝ wà: «Ã-ãã.»

36 «Nǝ̃ kuɔkuɔ-lǝ, yíi nǝ̃n ba nǝ̃ worblɩ, ń tuu-dǝ.

Yíi nǝ̃n ba nǝ̃ bɩgatĩɛ̃ yo, ń tuu-yǝ.

Nǝ̃ yíi nǝ̃n ba ǹ sǝ nǝ̃ dãngunã, ń suur ǹ kuulaadiiyǝpɩpuɔlayǝw n ga sǝ̃ǝ̃ wudiɛ.

37 Mǝ̃̀ tu nǝ̃-ɲã́ã̀ wà: dìí nǝ̃n yállá mǝ̃̀ cɔ̃mmã nã, dɩ̀ saa dɩ́ suu.

Bà yállá wà: “Bà díilá-yǝ cobaliɛba sǝ̃ǝ̃nã.”

Gɩ̀-lǝ gùú cɔ̃mmãã jówà mã̀ ji hi-m.»

38 Duunãtaabá waa nǝ̃-yǝ wà: «Yitii, nĩĩguu nǝ̃n ba, dãngunãba hǝ̃ǝ̃lba-i nnĩĩ.»

Wú siɛ-ba wà: «Yáalà dɩ́ ba nĩĩgu.»

Yesuẁ cirǝ̃ǝ̃ Dũnnũw nã Olivie tun'n tãnũũgɩ nã

(Mãtiyew 26.36-46 ; Markaw 14.32-42)

39 Yesuẁ mãã wù yáá wu-ń ce wú ba wù kã fɩraa Olivie tun'n tãnũũgɩ nã, wú hlǝ ǹ-ta ǹ-ba wù maar gɩ̀ sùɔ́gɩ nã.

Wù duunãtaabá fǝ̃ǝ̃ ǹ-ba bà duu wù nã.

40 Bà gáa hi gɩ̀ sùɔ́gɩ nã, wú fǝ̃ǝ̃ ǹ-waa nǝ̃-ba wà: «Bláà ɲì cirǝ̃ǝ̃ Dũnnũw nã, kuu'n báa ji vuu ǹ-dii-ɲã́ã̀ diicĩɛ̃rǝdɩ nã.»

41 Nã̀ã fǝ̃ǝ̃ ǹ-vã ǹ-hal bà nã, ǹ-kã yigagɩ nã, ǹ-kãã kuulǝǝ, ǹ-ba wù cirǝ̃ǝ̃ Dũnnũw nã wà:

42 «Tɩtii, nǝ̃-ń ba ǹ ji hũɔ̃, báa ya ywaruu gúɔ̀gɩ́ hi-m.

Nǝ̃ mã́ã kusunã cɔ̃m sǝ̃n saa mã́ ce, yíi mǝ̃gãm sáalà mã́ ce.»

43 [Gɩ̀-lǝ gɩ̀ nã, mɛlɛgɛdiɛẃ juo hillaa wù nã, ǹ-ba wù gbǝ̃ǝ̃ wù hiɛga.

44 Yesu hiɛgá yuɔ, wú fǝ̃ǝ̃ ǹ-piɛ kuu Dũnnũcirǝ̃ǝ̃gǝgɩ nã, ǹ-ji fuflɔ̃rũɔ̃, fuwɔ wù fuflɔ̃rũɔ̃gɩ ji ba nã́ã́ twam-i, ǹ-ba gɩ̀ hũn ɲũũrũũgu.]

45 Wù gáa cirǝ̃ǝ̃ Dũnnũw nã ǹ-tã, wú ver ǹ-kã duunãtaaba nã, ǹ-kãã hi bàa jã-mã fuwɔ ǹ-ji duɔsǝraa ǹ-baal.

46 Wú fǝ̃ǝ̃ ǹ-waa nǝ̃-ba wà: «Danii ɲí ba ɲì duɔsǝraa?

Sórrà ɲí ba ɲì cirǝ̃ǝ̃ Dũnnũw nã, kuugɩ báa ji vuu ǹ-dii-ɲã́ã̀ diicĩɛ̃rǝdɩ nã.»

Yesu blǝm'n cɔ̃mmã

(Mãtiyew 26.47-56 ; Markaw 14.43-50 ; Yuhanãw 18.3-11)

47 Wù bla wù waa dɩ̀-lǝ, ǹ-da cocindaarɩ̀ jo.

Nǝ̃ wùú mãã wù yáá dàa Nũɔ̃sɔ̃nǝ̃bahǝ̃ǝ̃lba sǝ̃ǝ̃nã, bà be-yǝ wà Sudasɩ, wù-lǝ wú ba bà yigagɩ nã wù jo nǝ̃-ba.

Wú sũɔ̃l ǹ-ba wù jo Yesuw nãã wà wú juo pɩpɩrĩɛ̃ wù nã.

48 Yesuẃ fǝ̃ǝ̃ ǹ-waa nǝ̃-yǝ wà: «Sudasɩ, ǹ ji dii Curonbiɛẁ wù ɲããtaa'n nãkrɔnɲã nã nǝ̃ pɩpɩrɛ̃mmãã-iì?»

49 Yesu duunãtaabà gáa da dìí mãã dɩ̀ jo, bá yugu-yǝ wà: «Yitii, yí tuu yì dãngunãba-ì?»

50 Bà sǝ̃ǝ̃nã, wudiɛẃ tuu dãngunãw, ǹ-jã ǹ-tii Yahudyaba puruɔntaa'n yuuntigǝ̃ngã'n mããcier'n nãdĩĩyiɛ'n tũɔ̃gu.

51 Yesuẃ waa nǝ̃-ba wà: «Yáalà dɩ́ ba!»

Nã̀ã fǝ̃ǝ̃ ǹ-jĩɛ̃ biɛ'n tũɔ̃gɩ nã, gɩ́ buɔ.

52 Gùú nã-i, wú waa nǝ̃ Yahudyaba puruɔntaa'n yuntaaba, nǝ̃ Dũnnũ bũũsuɔ'n gardɩba yuntaaba, nǝ̃ Yahudyaba vũnvãnããbaa mãã bà júó bà ji blǝ-yǝ wà: «Gɩ̀ híí ɲí jo nǝ̃ dãngunãba nǝ̃ valunɲã, ɲi ji blǝ-m nã́ã́ ŋmãllĩĩ-i nǝ̃-m-ì?

53 Yuu wo yuu, yi yáá yi-ń ce yí ba yì min Dũnnũ bũũsuɔgɩ nã, ɲi sáa blǝ-m gɩ̀-lǝ gɩ̀ bǝ̃ǝ̃gu.

Nǝ̃ kuɔkuɔ-lǝ, ɲimãã bǝ̃ǝ̃guu jáa hi: Dudũũm'n yuuntii'n mããcem'n bǝ̃ǝ̃gu.»

Piɛrẁ car-mã, wà wù-lǝ wù sǝ̃n fǝ̃ǝ̃ Yesuw ǹ-ji da yin siɛlw

(Mãtiyew 26.57-58, 69-75 ; Markaw 14.53-54, 66-72 ; Yuhanãw 18.12-18, 25-27)

54 Bá hla nã̀ã blǝ Yesuw ǹ-kã nǝ̃-yǝ Yahudyaba puruɔntaa'n yuuntigǝ̃ngã'n suɔgu.

Piɛrẃ ba wù dǝ̃ǝ̃ wù duu bà nã halbaa.

55 Bà yáá bàa dii dǝ̃ǝ̃mãã gǝ̃ǝ̃ sǝ̃ǝ̃gɩ nã, ǹ-ba bà hura.

Piɛrẃ kãã jiraa bà sǝ̃ǝ̃nã.

56 Mããcier cijaldiɛẁ yáá dàa gɩ̀ sùɔ́gɩ nã, wù-lǝ wú ba wù ne Piɛrw, ǹ-ji waa wà: «Yesu curodiɛ wɩ̀-i nnĩĩ.»

57 Piɛrẃ car cijalw wà: «Mǝ̃̀ sǝ̃n fǝ̃ǝ̃-yǝ yo.»

58 Gɩ̀ furũũgɩ nã, biɛdiɛẁ gáa da Piɛrw, wú waa nǝ̃-yǝ wà: «Yíi yo, bàá wudiɛ-i.»

Piɛrẃ siɛ gɩ̀ biɛw wà: «Ã-ãã!

Mǝ̃n sǝ nǝ̃-ba!»

59 Bǝ̃ǝ̃daagɩ̀ gáa hi, biɛdiɛẃ waa ǹ-dĩĩ dɩ̀ nã wà: «Biɛ wáà, Galile yiɛntabiɛ-i, sulammã nã, bà yáá bà min nǝ̃-yǝ.»

60 Piɛrẃ siɛ-yǝ wà: «Mǝ̃̀ sáa fǝ̃ǝ̃ ǹ cãwan díɛ̀dɩ tam.»

Wù bla wù waa dɩ̀-lǝ, kwallaẃ fǝ̃ǝ̃ ǹ-bu.

61 Yitiiẃ fǝ̃ǝ̃ ǹ-yiil wù yigagu, ǹ-ba wù ne Piɛrw.

Gùú nã-i, wù yáá wùu waa gùú cãwandii mãã nǝ̃ Piɛrw wà jimããguu dìɛ, kwallaẃ síì hi ǹ-bu nǝ̃ wú car-mã, ǹ-ji da yin siɛlw, wà wù-lǝ wú sǝ̃n fǝ̃ǝ̃-yǝ.

Piɛrẃ fǝ̃ǝ̃ ǹ-kãnãã gɩ̀ cãwandɩ nã.

62 Wú fǝ̃ǝ̃ ǹ-hlǝ, ǹ-kãã ba wù kaal wù higinãã taasǝ̃ǝ̃nǝ̃ǝ̃gu.

Gardɩbà mũũ Yesuw, nã̀ã ba bà tuuraa wù nã

(Mãtiyew 26.59-68 ; Markaw 14.55-65 ; Yuhanãw 18.19-24)

63 Gùú cwaabaa mãã bà yáá bà cii Yesuw nã, bá ba bà hiil wù kwãmmã nã, nã̀ã ba bà mũũ-yǝ.

64 Bá ba ba-ń ce bá vaa ǹ-suu wù yigagɩ nã, nã̀ã ba bà yugu-yǝ wà: «Sii ń fǝ̃ǝ̃!

Halii mṹũlã́-n?»

65 Nã̀ã ba bà tuuraa wù nã hlo.

Bà kã nǝ̃ Yesuw sugojarsuɔgɩ nã

66 Taagà jáa kaalaa, Yahudyaba vũnvãnãã'n kuruugu, Yahudyaba puruɔntaa'n yuntaaba, nǝ̃ Musa hlũũ'n yuntaaba, bá tɩgɩnǝ̃ǝ̃ bà ɲĩɛ̃ nã, ǹ-kã nǝ̃ Yesuw Yahudyaba vũnvãnãã'n sugojarriɛ'n kuruugɩ nã.

67 Bá kãã ba bà yugu-yǝ wà: «Yíǹ-lǝ yíi nǝ̃n ba Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, waa yí nɔ̃.»

Wú siɛ-ba wà: «Mǝ̃-ń waa nǝ̃-ɲã́ã̀ yo, ɲi síì nɔ̃ ǹ-hã-m.

68 Mǝ̃-ń yugu-ɲã́ã̀ nǝ̃ cɔ̃m-i yo, ɲi síì waa cɔ̃m.

69 Nǝ̃ díɛ́ dɩ-ń tã, Curonbiɛẁ ga jiraa Fãngããgɩmintii Dũnnũ nãdĩĩyiɛgu.»

70 Bà min bá dii ǹ-yugu-yǝ wà: «Gɩ ba nã́ã́ yíi Dũnnũ Bíɛ́-lǝ-ì?»

Wú siɛ-ba wà: «Ɲimãã nǝ̃ ɲì hla, ɲi wáalá wà mã́ã-i.»

71 Gɩ̀-lǝ gɩ̀ nã, bá fǝ̃ǝ̃ ǹ-waa wà: «Dɩ̀ cíé bàá mãã bà yinɲã nã, yí caa yí nɔ̃ bà-lǝ nũɔ̃gu ǹ-ce bii hlo?

Yì min yi nṹɔ̃́-dǝ wùu nũɔ̃gɩ nã-i nǝ̃ gɩ̀ hla.»