Yuhanãw 18

Yesu blǝm'n cɔ̃mmã

(Mãtiyew 26.47-56 ; Markaw 14.43-50 ; Lukaw 22.47-53)

Yesuẁ gáa cirǝ̃ǝ̃ Dũnnũw nã ǹ-tã, wú hlǝ nǝ̃ wù duunãtaaba, bá huɔl Kedrɔ̃ jũɔ̃gu, ǹ-kã tubiɲin'n fugadaagɩ̀ yáá dàa gɩ̀ maal nã.

2 Bà mãã bà yáá bà kã gɩ̀ sùɔ́gɩ nã bà gbãlãã, Sudasɩw mãã wù yáá wùu ba wù hlǝ Yesu furũũgɩ nã, wùú yo, wù yáá wù fǝ̃ǝ̃ gɩ̀ sùɔ́gu.

3 Yahudyaba puruɔntaa'n yuntaaba nǝ̃ Farisĩɛ̃bá tĩɛ̃ sɩrǝǝsɩba nǝ̃ Dũnnũ bũũsuɔ'n mããcieraadaba wà bá ba bà duu Sudasɩw nã.

Bá duu wu nã ǹ-kã sùɔ́ gúɔ̀.

Bà yáá bàa tuu byarceɲinɲã, nǝ̃ yisɩhiɛn'n dǝ̃ǝ̃mã bàa tii-mã ǹ-da ǹ-ba bà daraa ǹ-pya fitɩnɩba nã.

4 Yesuẁ mãã wù yáá wùu tɔ ǹ-fǝ̃ǝ̃ dìí mãã dɩ̀ jo dɩ̀ ji hi-yǝ, gɩ̀-i, wú kuganãã bà nã, ǹ-yugu-ba wà: «Ɲi caa halǝmblǝ-ì?»

5 Bá siɛ-yǝ wà: «Nasarɛtɩ lǝntaa Yesu-i.»

Yesuẃ siɛ-ba wà: «Mǝ̃n-lǝ mã́ã̀-i.»

Sudasɩw mãã wù yáá wùu ba wù hlǝ wù furũũgɩ nã, wù yáá dàa nǝ̃-ba.

6 Yesuẁ gáa waa nǝ̃-ba wà «Mã́ã-i», gùú sùɔ́guu mãã, bá ver nǝ̃ bà furũnɲã tulǝllǝ ǹ-kãã duruu!

7 Yesuẃ ver ǹ-yugu-ba wà: «Ɲi caa halii?»

Bá siɛ-yǝ wà: «Nasarɛtɩ lǝntaa Yesu-i.»

8 Yesuẃ waa nǝ̃-ba wà: «Mǝ̃̀ sáa waa nǝ̃-ɲã́ã̀ wà mǝ̃n-lǝ mã́ã-ì?

Ɲi-ń ba ɲì wa ɲi caa mã́ã-i, yáalà mǝ̃̀ duunãtaabá maar.»

9 Dɩ̀-lǝ dɩ̀ cíé, ǹ-da ǹ-ce wù cãwandɩ́ suu.

Wù yáá wùu waa wà: «Bàá bà min mãã Tɩtii ǹ hlã-m nǝ̃-ba, wù dɩnẁ sáa vaalaa mǝ̃̀ saa.»

10 Yàá Simɔ̃ Piɛrẁ yáá nǝ̃ dãngunãw, wú fa ǹ-ŋmǝ̃ǝ̃l-yǝ, ǹ-paa ǹ-jã ǹ-tii Yahudyaba puruɔntaa'n yuuntigǝ̃ngã'n mããcier'n nãdĩĩyiɛ'n tũɔ̃gu, ǹ-pyar-gǝ.

Bà yáá bà be gɩ̀ biɛw Malkusɩ.

11 Yesuẃ waa nǝ̃-yǝ wà: «Piɛr, dii ǹ dãngunãw wù fuugǝgɩ nã, mǝ̃̀ Tǝẁ cíé wà gùú ywaruuguu mãã gɩ́ hi-m, yíǹ ne wà mǝ̃ ji hla-gǝ-ì?»

12 Yesuẁ gáa waa dɩ̀-lǝ, sɩrǝǝsɩba, nǝ̃ bà yuuntiiw, ǹ-pya Dũnnũ bũũsuɔ'n mããcieraaba nã, bá kãã blǝ ǹ-vaa-yǝ.

13 Blɩ díɛ́ nã, Kayifɩw yáá Yahudyaba puruɔntaa'n yuuntigǝ̃ngãw.

Bà gáa vaa-yǝ nnĩĩ nã, bá kã nǝ̃-yǝ Kayifɩ curɔw nãã haasǝ.

Bà yáá bà be-yǝ Anãsɩ.

14 Yàá Kayifɩw dɩn wáà yáá wùu waa nǝ̃ Yahudyaba yuntaaba wà curo dɩnw-ń ku ǹ-kor wù yiɛntaaba, gùú búɔlá nã.

Simɔ̃ Piɛrẁ car-mã wà wù-lǝ wu sǝ̃n fǝ̃ǝ̃ Yesuw

(Mãtiyew 26.69-70 ; Markaw 14.66-68 ; Lukaw 22.55-57)

15 Bà gáa blǝ Yesuw ǹ-ba bà kã nǝ̃-yǝ, Simɔ̃ Piɛrba nǝ̃ wù nãduunãtiidiɛ bá ba bà duu bà nã.

Yahudyaba puruɔntaa'n yuuntigǝ̃ngãẁ mãã wù yáá wù fǝ̃ǝ̃ Simɔ̃ Piɛr nãyo wáà, gɩ̀-i, bà gáa hi wù suɔgu, wù-lǝ wú jãn ǹ-duu Yesuw nã.

16 Piɛr-lǝ wú fǝ̃ǝ̃ ǹ-hiraa dàa cɩnkaaraagu gǝ̃ǝ̃ yigagɩ nã.

Duunãtii wáà mãã Yahudyaba puruɔntaa'n yuuntigǝ̃ngãẁ fǝ̃ǝ̃-yǝ, wù-lǝ wú hlǝ ǹ-waa cɔ̃mmã nǝ̃ cijalw mãã wù yáá dàa wù cii dũndɔ̃llɩ nã, nã̀ã ce Piɛrẃ jãn.

17 Cijal wáà yugu Piɛrw wà: «Mǝ̃́ wa fíí biɛ wáà duunãtiidiɛ-i nǝ̃ yíi yo-ì?»

Piɛrẃ siɛ-yǝ wà: «Mǝ̃̀ sǝ wù duunãtii.»

18 Yɔ'n bǝ̃ǝ̃ yáá; Yahudyaba puruɔntaa'n yuuntigǝ̃ngã'n mããcieraaba nǝ̃ Dũnnũ bũũsuɔ'n mããcieraaba, bá dii dǝ̃ǝ̃mã ǹ-ba bà hura.

Piɛr yo, wú fǝ̃ǝ̃ ǹ-kã bá kãã ba bà hura-mã bà min.

(Mãtiyew 26.59-66 ; Markaw 14.55-64 ; Lukaw 22.66-71)

19 Bà gáa kã nǝ̃ Yesuw, Yahudyaba puruɔntaa'n yuuntigǝ̃ngãẃ yugu-yǝ nǝ̃ wù duunãtaa'n cɔ̃mmã, nǝ̃ wù mãã wù kal cwaaba nǝ̃ dìi.

20 Yesuẃ siɛ-yǝ wà: «Mǝ̃̀ yáá mǝ̃̀ waa dìí mãã, mǝ̃̀ wáalá-dǝ gbaa cwaaba min yinɲã nã.

Mǝ̃̀ kállá-dǝ nǝ̃-ba pyandiɛ Yahudyaba tɩgim'n donɲã nã, Dũnnũ bũũsuɔgɩ nã, Yahudyabà mãã bà tɩgii bà ɲĩɛ̃ sùɔ́ wo sùɔ́.

Mǝ̃̀ sáa ŋmã ǹ-waa cɔ̃m.

21 Nǝ̃ gɩ̀ ba danii ń ba ǹ yugu-m?

Mǝ̃̀ wáalá cɔ̃mmã nǝ̃ bàá mãã, bà fǝ̃́ǝ̃lã́ mǝ̃̀ wáalá dìí mãã nǝ̃-ba, yugu-ba ń ne, bà-lǝ bàá ji fǝ̃ǝ̃ ǹ-taa dɩ̀ yigagu ǹ-ja-n.»

22 Yesuẁ gáa wanãã nnĩĩ nã, Dũnnũ bũũsuɔ'n mããcierdiɛ ca wù tũɔ̃gu nã̀ã waa nǝ̃-yǝ wà: «Ǹ wanãã nǝ̃ Yahudyaba puruɔntaa'n yuuntigǝ̃ngãw-i nnĩĩ-ì?»

23 Yesuẃ waa nǝ̃-yǝ wà: «Mǝ̃̀ mãã mǝ̃̀ yuɔruɔ ǹ-waa mã̀ã́ mãã, pɩgaa-mã ń ja-yáà, nǝ̃ mǝ̃-ń ba mǝ̃̀ sáa yuɔruɔ ǹ-waa cɔ̃m, ǹ mṹũlã́-m hadi yuunã-ì?»

24 Bà mãã bà yáá bàa vaa-yǝ, Anãsɩẃ fǝ̃ǝ̃ ǹ-ya wú ba vaamã nã nã̀ã tĩɛ̃-yǝ ǹ-hã Yahudyaba puruɔntaa'n yuuntigǝ̃ngã Kayifɩw.

(Mãtiyew 26.71-75 ; Markaw 14.69-72 ; Lukaw 22.58-62)

25 Gɩ̀-lǝ gɩ̀ nã, Simɔ̃ Piɛrẁ yáá dàa wù hura dǝ̃ǝ̃mã.

Curodiɛẃ waa nǝ̃-yǝ wà: «Nã́ã́ wù duunãtiidiɛ sǝ nǝ̃ yíi yo-ì?»

Piɛrẃ siɛ-yǝ wà: «Mǝ̃̀ sǝ wù duunãtii.»

26 Yahudyaba puruɔntaa'n yuuntigǝ̃ngã'n mããcierw mãã Piɛrẁ yáá wùu jã ǹ-tii wù tũɔ̃gu, wù-lǝ wù cwanĩĩdiɛ yáá dàa, wùú yo wù ce mããcemmã wù hã Yahudyaba puruɔntaa'n yuuntigǝ̃ngãw, wù-lǝ wú waa wà: «Nã́ã́ mǝ̃ sáa da yíi sǝ ɲi nǝ̃ biɛ wáà tubiɲin'n fugagɩ nã-ì?»

27 Piɛrẃ ver ǹ-car-dǝ wà kwasǝ-i.

Gùú bǝ̃ǝ̃gɩ dɩngu dàa, kwallaẃ fǝ̃ǝ̃ ǹ-bu.

Bà kã nǝ̃ Yesuw Pilatɩ kuugɩ nã

(Mãtiyew 27.1-2, 11-31 ; Markaw 15.1-20 ; Lukaw 23.1-5, 13-25)

28 Taa'n kaalammã nã, bá curuɔ ǹ-hlǝ nǝ̃ Yesuw Kayifɩ kuugɩ nã, ǹ-kã nǝ̃-yǝ bà kumãndã dogǝ̃ngããgɩ nãã.

Kumãndã wáà yáá Wurɔmtabiɛ-i.

Bà gáa kãã hi, bàá nǝ̃n kã́ã́ nǝ̃-yǝ, bà sáa hũɔ̃ ǹ-jãn kumãndã suɔgu, wà bà-lǝ ba-ń jãn, ba ga blǝ nã, ba síì hi ǹ-per bà hla nã nã̀ã wuu Ta-n-maa paaruu'n wuuri.

29 Gɩ̀-i, kumãndã Pilatɩẃ fǝ̃ǝ̃ ǹ-hlǝ ǹ-kãã yugu-ba wà: «Ɲi wa biɛ wáà cíé bii?»

30 Bá siɛ-yǝ wà: «Wu nã́ã̀ ba wù sáa yuɔruɔ nǝ̃ cɔ̃m, yi sáá yì ga juo dii-yǝ ǹ nãkruɔgɩ nã.»

31 Pilatɩẃ fǝ̃ǝ̃ ǹ-waa nǝ̃-ba wà: «Jówà ɲi tuu-yǝ ɲí kã ɲi ga jar wù sugollì nǝ̃ ɲì hla, ǹ-vaa nǝ̃ ɲì hlũũguu mãã gùú kra dìí nã.»

Bá waa nǝ̃-yǝ wà: «Ɲì hlũũgɩ̀ sǝ̃n hũɔ̃ yi jar curo'n sugolli ǹ-ko gɩ̀ tiiw nǝ̃ yì hla.»

32 Dɩ̀-lǝ dɩ̀ cíé, ǹ-da ǹ-ce Yesuw wáalá dìí mãã, ǹ-kã wù kul'n tam'n yiɛgu, dɩ́ suu.

33 Pilatɩẃ ver ǹ-jãn dogǝ̃ngããgɩ nã, nã̀ã be Yesuẃ jo, ǹ-juo yugu-yǝ wà: «Yíǹ-lǝ yíi-i Yahudyaba yuuntiiw-i?

Yíi-ì?»

34 Yesuẃ siɛ-yǝ wà: «Curo díilá gɩ̀ cãwandi ǹ tũɔ̃gɩ nã dàa, yíi hla'n nũɔ̃nã cãwan-iì?»

35 Pilatɩẃ waa wà: «Yahudya-i nǝ̃-m-ì?

Ǹ lǝntaaba nǝ̃ Yahudyaba puruɔntaa'n yuntaabaa júó ǹ-dii-n mǝ̃̀ nãkruɔgɩ nã, ǹ bǝ̃́ǝ̃lǝ̃́ǝ̃ bii nã-ì?»

36 Yesuẃ fǝ̃ǝ̃ ǹ-waa wà: «Mǝ̃n yuuntasǝrɩ̀ sǝ̃n hlǝ cuu wáá nã sǝ.

Dɩ nã́ã̀ dɩ̀ hlǝ cuu wáá nã, mǝ̃̀ bluuba nã́ã̀ bàa juo ce byaari ǹ-hiil-m, mǝ̃ báa da ǹ-jãn Yahudyaba yuntaa'n nãkrɔnɲã nã.

Nǝ̃ gɩ̀-i nnĩĩ, mǝ̃n yuuntasǝrɩ sǝ cuu wáà dǝl sǝ.»

37 Wù gáa waa dɩ̀-lǝ, Pilatɩẃ yugu-yǝ wà: «Gɩ̀-lǝ, yuuntii-i nǝ̃-n-ì?»

Yesuẃ siɛ-yǝ wà: «Ǹ wáalá-dǝ gùú tammã, dɩ́ nǝ̃ nĩĩgɩ-i, mã́ã-i yuuntiiw.

Mǝ̃̀ júó cuuw nã, ǹ-da ǹ-pɩgaa cwaaba nǝ̃ sulam-i, mǝ̃̀ húulá gùú cɔ̃mmã nã-i.

Sulammã-ń ba mã̀ dwal gùú tii nã, gɩ̀ tiiẃ ba wù nɔ̃ mǝ̃̀ cãwandi-i.»

38 Pilatɩẃ yugu-yǝ wà: «Ǹ ja bii sulam-lǝ?»

Nã̀ã ga fǝ̃ǝ̃ ver ǹ-hlǝ ǹ-kã Yahudyaba nã, ǹ-kãã waa nǝ̃-ba wà: «Mǝ̃n sáa da yuɔrɔm'n sùɔ́ wù nã.

39 Nǝ̃ dɩ̀ dɩndɩ́ nìɛ.

Ǹ saa nǝ̃ mǝ̃̀ mãã mǝ̃̀ hi mǝ̃̀ ce dìí mãã blɩ wo blɩ, ɲi-ń wa ɲi ce ɲì Ta-n-maa paaruugu, mǝ̃-ń ce mǝ̃́ nǝ̃nǝ̃ǝ̃ kasoduuntii dɩn nã, ǹ-hã-ɲã́ã̀; ɲi caa juɲũũgu mǝ̃́ nǝ̃nǝ̃ǝ̃ Yahudyaba yuuntii nã-i, ǹ-hã-ɲã́ã̀-iì?»

40 Bá kaasǝraa huuu wà: «Yi sǝ̃n caa ń nǝ̃nǝ̃ǝ̃ wù-lǝ wù nã!

Yi caa ń nǝ̃nǝ̃ǝ̃ Barabasɩ nã-i!»

Nǝ̃ Barabasɩ wáà, wù yáá cobal-i.