Yuhanãw 19

Pilatɩẁ ce wà ba ko Yesuw

Dɩ̀ jáa ba nnĩĩ nã, Pilatɩẃ wa bá jo nǝ̃ Yesuw ǹ-ji mũũ-yǝ nǝ̃ cãnblɩri.

2 sɩrǝǝsɩbá sɔ̃ huɔn'n hucuugu ǹ-suu ǹ-hã-yǝ.

Nã̀ã ga fǝ̃ǝ̃ ǹ-dii kuulaadiiyǝpɩpuɔlayǝdiɛ wuubumbɛ̃mw wù nã, ǹ-hã-yǝ.

3 Nã̀ã fǝ̃ǝ̃ ǹ-ba bà kuganãã wù nãã bà waa nǝ̃-yǝ wà: «Yahudyaba yuuntii yíì, mǝ̃̀ fyã́nnã́-n.»

Nã̀ã ca wù tũɔ̃gu.

4 Pilatɩẃ ver ǹ-hlǝ ǹ-waa nǝ̃ Yahudyaba wà: «Mǝ̃̀ ji ce bá hlǝ ǹ-jo nǝ̃-yǝ níɛ́, gɩ̀-lǝ gɩ̀ nã, ɲi ji fǝ̃ǝ̃ wà mǝ̃ sáa da yuɔrɔm'n sùɔ́ wù nã.»

5 Nã̀ã ga fǝ̃ǝ̃ ǹ-ce bá hlǝ nǝ̃ Yesuw, huɔn'n hucuugu wù yuugɩ nã, ǹ-pya kuulaabumbɛ̃m wáá nã, wù bũɔ̃gɩ nã.

Pilatɩẃ waa wà: «Biɛ wɩ̀-i nnĩĩ!»

6 Yahudyaba puruɔntaa'n yuntaaba nǝ̃ Dũnnũ bũũsuɔ'n mããcieraabà gáa ne ǹ-da Yesuw, bá paa ǹ-duruu kaasuugɩ nã wà: «Gbǝ-yǝ daagɩ nã!

Gbǝ-yǝ daagɩ nã!»

Pilatɩẃ waa wà: «Kã́ã̀ ɲi ga gbǝ-yǝ nǝ̃ ɲì hla, nã̀ã wa mǝ̃n-lǝ mǝ̃n sáa da yuɔrɔm'n sùɔ́ wù nã.»

7 Yahudyabá waa wà: «Wù cíé wù hla wà wɩ̀-i Dũnnũẁ bíɛ́w, nǝ̃ hãmĩĩ yo, yi nǝ̃ hlũũgu, ǹ-vaa nǝ̃ gɩ̀-lǝ gɩ̀ hlũũgu, wù-lǝ wù tuugɩ̀ saa wú ko.»

8 Bà gáa waa dɩ̀-lǝ, kuugɩ́ juo ba gɩ̀ piɛ Pilatɩ gbǝrsǝrɩ nã.

9 Wú ver ǹ-jãn nǝ̃ Yesuw dogǝ̃ngããgɩ nã, ǹ-kãã yugu-yǝ wà: «Ǹ hlǝ haa-ì?»

Yesuẃ sáa haa-gǝ nǝ̃-yǝ.

10 Pilatɩẃ waa wà: «Ǹ nǝ̃ǝ̃ ǹ-ku nǝ̃ mã́ã-ì?

Ǹ sáa fǝ̃ǝ̃ wà mǝ̃ ji gbǝ̃ǝ̃ ǹ-ce bá nǝ̃nǝ̃ǝ̃ ǹ nã-ì?

Yindagǝ nã mǝ̃ ji gbǝ̃ǝ̃ ǹ-ce bá kãã gbǝ-n daagɩ nã-ì?»

11 Yesuẃ siɛ-yǝ wà: «Dũnnũ nã́ã̀ ba wù sáa hã-n nǝ̃ gɩ̀ fãngããgu, ǹ sáa ǹ-ji gbǝ̃ǝ̃ ǹ-ce-m nǝ̃ kuu.

Gùú cíé, wùú nǝ̃n júó ǹ-ji dii-m ǹ nãkruɔgɩ nã, wù-lǝ wù yuɔrɔmmã ta yíǹ mǝ̃gãmmã nã.»

12 Yesuẁ gáa wanãã nnĩĩ nã, Pilatɩẃ ba wù caa wú nǝ̃nǝ̃ǝ̃ wù nã.

Yahudyabá suro ǹ-ba bà kaasǝraa wà: «Nǝ̃-ń nǝ̃nǝ̃ǝ̃ biɛ wáá nã, fǝ̃ǝ̃ wà ɲì jirammã́ bǝ̃ǝ̃lǝ̃ǝ̃ nǝ̃ Wurɔmtaa'n yuuntigǝ̃ngãw.

Curow mãã wù ce wù hla yuuntiiw, nã́ã́ wù-lǝ Wurɔmtaa'n yuuntigǝ̃ngã'n ɲããtii sǝ-i.»

13 Bà gáa waa-dǝ gɩ̀-lǝ gɩ̀ tammã, Pilatɩẃ ver ǹ-hlǝ nǝ̃ Yesuw, nã̀ã kãã jiraa wù sugojarguujirakuugɩ nã, sùɔ́dagǝ nã bàa cal-gǝ nǝ̃ tɩntrãga, Hebru tammã nã bá wa Gabata.

14 Bǝ̃ǝ̃gɩ̀ jáa sũɔ̃l, nǝ̃ Ta-n-maa paaruugɩ́ ba nã́ã́ cicuɔ'n tuu-i, Pilatɩẃ waa nǝ̃ Yahudyaba wà: «Ɲì yuuntii wɩ̀-i nnĩĩ!»

15 Bá suro ǹ-ba bà kaasǝraa wà: «Ko-yǝ, ko-yǝ, gbǝ-yǝ daagɩ nã!»

Pilatɩẃ waa wà: «Ɲi wa mǝ̃́ gbǝ ɲì yuuntii wɩ̀-i daagɩ nã-ì?»

Yahudyabà puruɔntaa'n yuntaaba waa wà: «Gɩ-ń vã ǹ-hlǝ Wurɔmtaa'n yuuntigǝ̃ngãw nã, hãmĩĩ sǝ̃n fǝ̃ǝ̃ yuuntiidiɛ hlo.»

16 Gɩ̀-i, Pilatɩẃ fǝ̃ǝ̃ ǹ-dii Yesu gbǝl'n cɔ̃mmã sɩrǝǝsɩba nãkrɔnɲã nã.

Yesu gbǝl'n cɔ̃mmã daagɩ nã

(Mãtiyew 27.32-44 ; Markaw 15.21-32 ; Lukaw 23.26-43)

Sɩrǝǝsɩbá hũɔ̃ Yesuw ǹ-ta.

17 Bá ce wú tuu wù gbǝl'n daagu, bá maar fuwɔ gùú sùɔ́guu mãã bà be-gǝ wà yukuɔl, Hebru tammã nã bá wà Gɔlgota.

18 Bà kã́ã́ ǹ-ga gbǝ Yesuẁ gùú sùɔ́gɩ-i, ǹ-pya cobaliɛba hǝ̃ǝ̃ldaba nã, wù dɩnw yiɛ gúɔ̀, wudiɛw yiɛ gúɔ̀, nǝ̃ Yesuẃ ba bà sǝ̃ǝ̃gɩ nã.

19 Pilatɩẁ yáá wùu yal yalɩmdamã ǹ-ce bá kãã piɛ-mã Yesu yuu'n yiɛgu.

Wù yáá wùu yal wà: «Nasarɛtɩ lǝntaa Yesuw, Yahudyaba yuuntiiw.»

20 Bà yáá bàa gbǝ-yǝ gùú sùɔ́guu mãã, gɩ̀ sáá gùu hal nǝ̃ bà lǝ'n kusuugu.

Nǝ̃ bà yáá bàa yal gùú cãwandii mãã ǹ-piɛ wù yuu'n yiɛgu, bà yáá bàa yal-dǝ Hebru tammã nã, nǝ̃ Latɛ̃ tammã nã, nǝ̃ Grɛkɩ tammã nã, gùú cíé Yahudya cindɩ́ kal-dǝ.

21 Pilatɩẁ gáa yal ǹ-piɛ gɩ̀-lǝ gɩ̀ tammã, Yahudyaba puruɔntaa'n yuntaabá suro ǹ-kã wù nãã, ǹ-kãã waa nǝ̃-yǝ, wà wu ce bá hu ǹ-pyar gùú mãã gùu yal wà Yahudyaba yuuntiiw, nã̀ã yal wà: «Biɛ wáà wáalà wà wɩ̀-i Yahudyaba yuuntiiw.»

22 Pilatɩẃ waa nǝ̃-ba wà: «Mǝ̃n yállá dìí mãã, mǝ̃̀ yállá dɩ̀-i.»

23 Sɩrǝǝsɩbà gáa gbǝ Yesuw ǹ-tã, bá tuu wù kuulanãmba ǹ-buruɔ bà nã tiɛmã nnǝ̃ǝ̃, curo wo curo, wú tuu wù yuɔri, nã̀ã fǝ̃ǝ̃ ǹ-tuu wù kuulaadiiyǝw wanɲǝ̃gãrɩm'n sùɔ́ sáá dàa wù nã, bà yáá bàa sɔ̃-yǝ nǝ̃ sɔ̃llɩ nã-i.

24 Bá ba bà waa nǝ̃ bà ɲĩɛ̃ wà: «Bláá ya yí taalaa wù nã, yáalà yí dii trãgà yí ne, wù mãã wù ji ba gùú tii'n yow mãã, yí fǝ̃ǝ̃ gɩ̀ tiiw.»

Dɩ̀-lǝ dɩ̀ cíé, Dũnnũ cãwan'n sɛbɛbá da ǹ-suu.

Dɩ́ nǝ̃ dìi yal wà: «Bà buruɔ mǝ̃̀ kuulanãmba nã, nã̀ã dii trãgà ǹ-tuu mǝ̃̀ kuulaadiiyǝw.»

Sɩrǝǝsɩbà cíé dɩ̀-i nnĩĩ.

25 Bà gbǝ́ǝ́ Yesuẁ gùú daagu drɔ, wù ɲũw, nǝ̃ wù ɲũw nãndiɛw, nǝ̃ Kilopasɩ ciɛ Mariyamw, ǹ-pya Magɩdala lǝ'n Mariyamw nã, bà yáá dàa bàa hiraa ǹ-pɛ̃ gɩ̀ daagu.

26 Yesuẁ gáa da wù ɲũw, nã̀ã ne ǹ-da wù duunãtii mãã wù cɔ̃mmã̀ yáá mã̀ã dwal wù nã, yà ba wù ɲũw tuɔra, wú waa nǝ̃ wù ɲũw wà: «Ɲããɲũũ, ǹ bíɛ́ wɩ̀-i nnĩĩ.»

27 Nã̀ã waa nǝ̃ duunãtii wáà wà: «Ǹ ɲũ wɩ̀-i nnĩĩ.»

Ǹ-tuu gɩ̀-lǝ gɩ̀ bǝ̃ǝ̃gu dìi, duunãtii wáà ce wú kãã ba dàa wùú nãã.

Yesu kuugu

(Mãtiyew 27.45-56 ; Markaw 15.33-41 ; Lukaw 23.44-49)

28 Yesuẁ gáa waa dɩ̀-lǝ, wú fǝ̃ǝ̃ kuɔkuɔgu wà cɔ̃mmã̀ min mã jállíɛ.

Wú waa wà: «Hũnɲũɔ̃sǝrɩ blǝ́rá-m.»

Wù wáalá dɩ̀-lǝ, ǹ-da ǹ-ce dìí nǝ̃n yállá Dũnnũ cãwan'n sɛbɛba nã, wù cɔ̃mmã nã, dɩ́ suu.

29 Butuudaagɩ̀ yáá gɩ̀ sùɔ́gɩ nã gùu yu nǝ̃ kwãɲiɲǝ̃ǝ̃lãmdamã.

Byacierabá tuu kuudagǝ ǹ-fɛ̃-gǝ kwãm mã́ã̀ nã nã̀ã hiil-gǝ, ǹ-fã-gǝ isope tuugɩ nã, ǹ-kã nǝ̃ gɩ̀ kwãmmã Yesu nũɔ̃gɩ nã.

30 Yesuẃ mũɔ̃sǝ kwãm mã́ã̀ nã̀ã waa wà: «Kuɔkuɔ-lǝ, cɔ̃mmã̀ min mã̀ jállíɛ!»

Nã̀ã fǝ̃ǝ̃ ǹ-tɩsɩnǝ̃ǝ̃ wù yuugu, wù yuflǝẃ fǝ̃ǝ̃ ǹ-hlǝ.

Bà fã Yesu gbɩgaaguu nǝ̃ pugɔluɔgu

31 Fiisaa'n yuugɩ̀ yáá nã́ã́ cicuɔ'n tuu-i, ǹ-pya dɩ̀-lǝ dɩ̀ nã, gɩ̀-lǝ gɩ̀ fiisaa'n yuugɩ̀ yáá gùu vaa nǝ̃ yugǝ̃ngãã-i bà saa.

Gɩ̀-i, Yahudyaba yuntaaba sáá bà caa gɩ̀ yuugɩ́ hi Yesu bà pĩɛ̃nĩɛ̃ga danɲã drɔ.

Bá fǝ̃ǝ̃ ǹ-kãã cirǝ̃ǝ̃ Pilatɩw nã, wà wu ya bá kãã mũũ ǹ-karaa bà vyanɲã nã, gɩ̀-lǝ gɩ̀ nã, ba ga kurǝǝ kaliɛ bá hɩr-ba, nǝ̃ fiisaa'n yuugɩ́ ji da gɩ́ hi.

32 Pilatɩẃ hã-ba nǝ̃ hlũũgu, sɩrǝǝsɩbá ta.

Bà yáá bàa gbǝ bàá mãã nǝ̃ Yesuw, bà gáa kãã hi, bá mũũ ǹ-karaa wuudĩɛ̃lnã yo'n vyanɲã nã, nã̀ã mũũ ǹ-karaa bà hǝ̃ǝ̃lnã yo'n ɲinɲã nã.

33 Bà gáa wa ba juo mũũ ǹ-karaa Yesu ɲinɲã nã, ǹ-juo da wù-lǝ wùu ku.

Gɩ̀-lǝ gɩ̀ tammã, bà sáa mũũ ǹ-karaa wù vyanɲã nã.

34 Nǝ̃ sɩrǝǝsɩ biɛdiɛ ce wù pugɔluɔgu ǹ-fã wù gbɩgaagu, twankulǝmmãã nǝ̃ hũmmã́ paa ǹ-ba mã̀ hlǝ.

35 Wùú mãã wù yállá cãwan díɛ̀, wù díɛ́-dǝ gbaa nǝ̃ wù yisɩri, wùú yállá-dǝ ǹ-ja cwaaba.

Wù yállá dìí mãã, sulam-i, wùú nǝ̃n yállá-dǝ, wù fǝ̃́ǝ̃lã́ wà sulam-i.

Wù waa dɩ̀-lǝ, ɲí da ǹ-hũɔ̃ Yesu cɔ̃mmã.

36 Gà-lǝ gà min gà cíé Dũnnũ cãwan'n sɛbɛbá da ǹ-suu, dɩ̀ yáá dìi waa wà: «Bà síì ka halle wù kukuugǝgɩ dɩndɩn yo,»

37 Nǝ̃ dɩ́ ver ǹ-waa hlo sùɔ́dagǝ nã Dũnnũ cãwan'n sɛbɛba nã wà: «Bà ji ver ǹ-ba bà ne wùú mãã bà flã ǹ-kǝ̃ǝ̃l-yǝ.»

Yesu diimã

(Mãtiyew 27.57-61 ; Markaw 15.42-47 ; Lukaw 23.50-56)

38 Yisefuw mãã wù yáá wù hlǝ Arimatɩ lǝri, wú kãã cirǝ̃ǝ̃ Pilatɩw nã, wà wu hã wù-lǝ nǝ̃ Yesu pĩɛ̃ndi.

Wùú yo Yesu duunãtiidiɛ yáá.

Nǝ̃ wù mãã wù yáá wù sɔ̃ Yahudyaba yuntaaba nã, wù sáa ya curoẃ fǝ̃ǝ̃ wà Yesu duunãtii-i nǝ̃ wù-lǝ.

Pilatɩẃ fǝ̃ǝ̃ ǹ-hã-yǝ nǝ̃ hlũũgu wú kãã hɩr Yesu pĩɛ̃ndi.

39 Nikodɛmw mãã wù yáá wùu kã Yesuw nãã yisuɔdagǝ nã, wù-lǝ wú kãã pɛ wù nã.

Nikodɛmẃ gaala miir nɔ̃mmã nǝ̃ Alowɛsɩ nɔ̃mmã nã ǹ-kã.

Mã̀ dɩsɩmmã̀ yáá mã̀ã hi culo gur nǝ̃ nũɔ̃sɔ̃ tuugu.

40 Bá pɛ bà ɲĩɛ̃ nã, cwaabà hǝ̃ǝ̃lba ǹ-tũn mǝ̃ǝ̃lǝ̃ǝ̃tii nã nǝ̃ latɩkolo nɔ̃m mã́ã̀ nã̀ã fuɔ-yǝ nǝ̃ pĩɛ̃ndiikuulaayanɲã.

Bá mǝ̃gaa-yǝ nã́ã́ Yahudyabaa mãã bà ce bà pĩɛ̃nĩɛ̃ga nĩĩgu, nã̀ã da bá dii-ga.

41 Bà yáá bàa gbǝ Yesuw gùú sùɔ́gu, tubiɲin'n fugadaagɩ̀ yáá dàa gɩ̀ tuɔra.

Tubiɲin'n fuga gúɔ̀ kusuugɩ nã, pĩɛ̃ndiitãnfierflãrdaarɩ̀ yáá dàa, bà sáa hi ǹ-dii curo dɩ̀ nã ǹ-da.

42 Bà fiisaa'n yuugɩ̀ mãã gɩ̀ yáá gùú hi ǹ-tã, nǝ̃ pĩɛ̃ndiitãnfer yo dɩ́ ba bà tuɔra, bá paa ǹ-kã nǝ̃ Yesu pĩɛ̃ndi gùú sùɔ́gu.