Mãtiyew 27

Wurɔm lǝntaabà kã nǝ̃ Yesuw Pilatɩ kuugɩ nã

(Markaw 15.1 ; Lukaw 23.1 ; Yuhanãw 18.28)

Ciibǝpuruugu, Yahudyaba puruɔntaa'n yuntaaba min nǝ̃ Yahudyaba vũnvãnããba, bá kãã tɩgii bà ɲĩɛ̃, Yesu cɔ̃mmã nã, ǹ-ji ce bá da ǹ-ko-yǝ.

2 Bá fǝ̃ǝ̃ ǹ-blǝ ǹ-vaa-yǝ, ǹ-tuu ǹ-ta ǹ-kãã dii-yǝ Pilatɩ nãkruɔgɩ nã, wùú yáá Suude yiɛ'n kumãndãw.

Sudasɩ hla'n kolli

(Cɔ̃nfɩrmmã 1.16-20)

3 Sudasɩẁ mãã wù yáá wùu hlǝ Yesu furũũgɩ nã, wù jáa da bà wa ba ji ko-yǝ, gɩ́ ca wù nã, wú ver dìí nǝ̃n yáá wù yuugɩ nã.

Yahudyaba puruɔntaa'n yuntaaba nǝ̃ vũnvãnããbà yáá bàa hã-yǝ nǝ̃ gùú jiibii gur nǝ̃ nũɔ̃sɔ̃w^a mãã, wú ver ǹ-kã nǝ̃-ga bà nãã.

4 Wú kãã waa nǝ̃-ba wà: «Mǝ̃̀ cíé diicĩɛ̃rǝ-i ǹ-dii wùú mãã wù sáa yuɔruɔ nǝ̃ cɔ̃m kuugɩ nã.»

Bá siɛ-yǝ wà: «Hãmĩĩ bincɔ̃m'n bii?

Ǹ yuunã tuul-i.»

5 Sudasɩẃ nǝ̃nǝ̃ǝ̃ jinɲã nã dàa Dũnnũ bũũsuɔgɩ nã nã̀ã ta ǹ-kãã nũũ ǹ-ko wù hla.

6 Yahudyaba puruɔntaa'n yuntaabá biɛriɛ ɲã nã nã̀ã waa wà: «Jin ɲã́ã̀, twam'n jin-i, gɩ̀ sáa saa yí dii ǹ-gaala ɲã̀ nã nǝ̃ Dũnnũ bũũsuɔ'n jinɲã.»

7 Dɩ̀ cíé nnĩĩ nã, bá gbǝ dɩ̀ nã nã̀ã kãã sǝ̃ǝ̃ butumããr'n fugaguu nǝ̃ jin ɲã́ã̀ ǹ-ce niɛriɛ'n pĩɛ̃ndiisuɔgu.

8 Gɩ̀-i, ǹ-tuu ǹ-ji vaa nǝ̃ jimããgu, bà be fuga gúɔ̀ «twam'n fuga».

9 Nĩĩgɩ-i Dũnnũ tanhiil Seremi cãnwanĩɛ̃gà súulǝ́.

Seremi wáalá wà: «Bà túulá jiibii gur nǝ̃ nũɔ̃sɔ̃ wáà.

Isɩrayɛl bluubà yáá bàa dii wù solli nnĩĩ-i.

10 Bà túulá-ga ǹ-dii-ga butumããr'n fugagɩ nã nã́ã́ Yitiiẁ yáá wa mǝ̃́ ce-dǝ nĩĩguu mãã^b.»

Pilatɩẁ jiraa Yesu sugollɩ nã

(Markaw 15.2-15 ; Lukaw 23.3-5, 13-25 ; Yuhanãw 18.29-40 ; 19.4-16)

11 Yesuẁ gáa juo ba kumãndã Pilatɩw nãã, wú yugu-yǝ wà: «Yíi-i Yahudyaba yuuntiiw-ì?»

Yesuẃ siɛ-yǝ wà: «Ǹ wáalá-dǝ gùú tuugu, nĩĩgɩ-i.»

12 Yahudyaba puruɔntaa'n yuntaaba nǝ̃ vũnvãnããbá du nã ǹ-ba bà hã-yǝ nǝ̃ yuɔrɔmmã.

Wú ba ciyɛ̃.

13 Pilatɩẃ waa nǝ̃-yǝ wà: «Bà mãã bà hã-n yuɔrɔmmã ǹ sǝ̃n nɔ̃-ì?»

14 Yesuẁ sáa siɛ-yǝ nǝ̃ bà yuɔrɔm'n sùɔ́gɩ dɩn yo.

Gɩ́ mǝ̃gaa ǹ-tugulǝǝ Pilatɩw nã.

15 Ta-n-maa paaruu nã wo paaruu nã, kumãndãẁ yáá wu-ń ce wú nǝ̃nǝ̃ǝ̃ kasoduuntii dɩnw nã.

Cocindɩ̀ yáá dɩ-ń ba dɩ̀ caa wú nǝ̃nǝ̃ǝ̃ wùú nã mãã, wù nǝ̃nǝ̃ǝ̃ wùú nã-i.

16 Nǝ̃ biɛdiɛ yáá gɩ̀-lǝ gɩ̀ bǝ̃ǝ̃gu kasow nã, cwaaba min bà yáá bà fǝ̃ǝ̃-yǝ wù blasǝrɩ nã.

Bà yáá bà be-yǝ Yesu Barabasɩ.

17 Pilatɩẃ yugu bàá nǝ̃n bàa tɩgii wà: «Yesu Barabasɩw nǝ̃ Yesuw mãã bà be-yǝ Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, ɲí caa mǝ̃́ nǝ̃nǝ̃ǝ̃ hawu nã-ì?»

18 Nã̀ã wa Pilatɩẁ yáá wùu fǝ̃ǝ̃ wà kusuguuguu cíé bá kãã dii Yesuw wù nãkrɔnɲã.

19 Wù gáa jiraa sugojarsuɔgɩ nã, wù ciɛẃ tĩɛ̃ bá kãã waa nǝ̃-yǝ, wà wu báa dii wù nũɔ̃gu cosũɔ̃lyǝ wáà cãwandi nã, wà yisuɔguu nǝ̃n tíɛ́ nnĩĩ, wu ywárrá wù-lǝ dãnsãndɩ nã wù cɔ̃mmã nã.

20 Yahudyaba puruɔntaa'n yuntaaba nǝ̃ vũnvãnããba ba bà juu cocin díɛ̀ wà bá wa bá caa bá nǝ̃nǝ̃ǝ̃ Barabasɩ nã-i nã̀ã ko Yesuw.

21 Pilatɩẃ ver ǹ-yugu-ba wà: «Ɲí caa mǝ̃́ nǝ̃nǝ̃ǝ̃ halii nã-ì gɩ̀ bà hǝ̃ǝ̃lba sǝ̃ǝ̃nã?»

Bá waa wà: «Yí caa ń nǝ̃nǝ̃ǝ̃ Barabasɩ nã-i!»

22 Pilatɩẃ waa wà: «Nǝ̃ Yesuẁ mãã bà be-yǝ Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, mǝ̃́ ce wù-lǝ danii?»

Bá min bá siɛ-yǝ wà: «Gbǝ-yǝ daagɩ nã!»

23 Pilatɩẃ ver ǹ-yugu-ba ǹ-tu hlo wà: «Biɛ wáà cíé diibɩblar hadɩ-i?»

Nǝ̃ bá ver ǹ-ba bà kaasǝraa bolbol wà: «Gbǝ-yǝ daagɩ nã!»

24 Pilatɩẁ gáa juo da kuuguu ji ba gɩ̀ piɛ kuu'n gaalammã nã gɩ̀ maar, wú fǝ̃ǝ̃ wà wù-lǝ wú ywar wù hla-i.

Wú tuu hũmmã ǹ-saar wù nãkrɔnɲã cocin díɛ̀dɩ yinɲã nã nã̀ã waa wà: «Ɲi-ń ko biɛ wáà ɲì dǝlli-i, mǝ̃̀ nũɔ̃'n sɩraa cɔ̃m mã́ã̀ nã.»

25 Bà min bá siɛ wà: «Yi hṹɔ̃lã́-dǝ!

Yi-ń ko-yǝ, gɩ́ ba hãmĩĩ nǝ̃ yì tãnkuuraa'n yuunã tuul-i!»

26 Gɩ̀-i, Pilatɩẃ fǝ̃ǝ̃ ǹ-nǝ̃nǝ̃ǝ̃ Barabasɩw nã nã̀ã ce bá mũũ Yesuw nǝ̃ cãmblɩri nã̀ã dii-yǝ bà nãkruɔgɩ nã, wà bá kãã gbǝ-yǝ daagɩ nã.

Sɩrǝǝsɩbà hiil Yesu kwãmmã nã

(Markaw 15.16-32 ; Lukaw 23.11, 26-43 ; Yuhanãw 19.2-3, 17-22)

27 Gɩ̀-i kumãndã sɩrǝǝsɩbá kã nǝ̃ Yesuw wù dogǝ̃ngãã'n kusuugɩ nã, nǝ̃ bà kuruɔgɩ min gɩ́ juo caliɛ wù nã.

28 Bá hiil wù kuulanãmbaa nã̀ã dii kuulaadiiyǝpɩpuɔlayǝdiɛ ǹ-hã-yǝ.

Kuulaa wáà yáá wuubumbɛ̃mw wù nã.

29 Nã̀ã fǝ̃ǝ̃ ǹ-sɔ̃ huɔn'n hucuugu ǹ-suu ǹ-hã-yǝ, nã̀ã dii guruugu wù nãdĩĩgɩ nã wú fuɔ nã, nã̀ã fǝ̃ǝ̃ ǹ-ba ba-ń ce bá kuulǝǝ wù yigagɩ nã ǹ-ba bà hiil wù kwãmmã nã wà: «Yahudyaba yuuntii yíì, yí fyã́nnã́-n!»

30 Bà yáá bà tɔ tɔlunɲã bà tũn wù nã, nã̀ã ba ba-ń ce bá hũɔ̃ guruugu mãã gɩ̀ yáá wù nãkruɔgɩ nã, ǹ-ba bà mũũ-yǝ nǝ̃-gǝ wù yuugɩ nã.

31 Bà gáa hiil wù kwãmmã nã gɩ́ saa bà nã, gùú bǝ̃ǝ̃guu mãã, bá hiil kuulaadiiyǝpɩpuɔlayǝ wáà wù nã, nã̀ã dii wù bɩgaaba ǹ-hã-yǝ, nã̀ã blǝ ǹ-ta nǝ̃-yǝ bà kã bà ga gbǝ-yǝ daagɩ nã ǹ-ko-yǝ.

32 Bà gáa wa bá hlǝ lǝ'n kusuugɩ nã, bá jal nǝ̃ Siirɛn lǝ'n biɛdiɛ, bà be-yǝ Simɔ̃.

Bá guur wú tuu bà yáá bà ga gbǝ Yesu gùú daagɩ nã mãã.

33 Bà kãã hi gùú sùɔ́guu mãã bà be-gǝ Gɔlgota dɩ̀ yuugɩ-i wà «Yukuɔl'n sùɔ́».

34 Bá gaala ɛrsɛ̃ kwãmmã nã nǝ̃ kuɲiɲǝ̃ǝ̃lãgǝdagǝ ǹ-hã Yesuw wà wú ɲũɔ̃.

Yesuẃ dǝ̃ǝ̃-mã ǹ-ne, nǝ̃ wù sáa hũɔ̃ ǹ-ɲũɔ̃-mã.

35 Bà gáa gbǝ Yesuw daagɩ nã, bá dii trãga ǹ-buruɔ wù kuulanãmba nã, [dɩ̀-lǝ dɩ̀ cíé ǹ-da ce Dũnnũ tanhiil'n cãnwanĩɛ̃gá suu: wù wáalá wà: Bà buruɔ mǝ̃̀ kuulanãmba nã, bà díilá trãga ǹ-tuu mǝ̃̀ kuulaaw,]

36 nã̀ã jiraa ǹ-ba bà cii wù nã.

37 Bà yáá bàa yal wù yuɔrɔm'n yuugu ǹ-piɛ wù yuu'n yiɛgu wà: «Biɛ wáàw-i Yesuw, Yahudyaba yuuntiiw.»

38 Bá yáá bàa gbǝ ŋmãllããba hǝ̃ǝ̃ldaba nǝ̃ Yesuẁ min, wudiɛẁ wù nãdĩĩyiɛgu, nǝ̃ wudiɛẁ wù ɲiɲũɔ̃gɩ nã.

39 Hlũntaaraaba ba bà mɛ̃sã bà yunɲã, nã̀ã ba bà tuuraa wù nã

40 wà: «Yíǹ sáa wa n ji hɩr Dũnnũ bũũsuɔgu, nã̀ã mã-gǝ bãnɲã siɛl kusuugɩ nã-ì?

Kor ǹ hla yí ne!

Gɩ-ń ba gùu ba wà yíi-i Dũnnũ Bíɛ́w, hiirǝǝ daagɩ nã yí ne!»

41 Gùú tammã dɩnmã nã-i Yahudyaba puruɔntaa'n yuntaaba nǝ̃ Musa hlũũ'n yuntaabaa ǹ-pya vũnvãnããba nã, bá juo ba bà hiil wù kwãmmã nã wà:

42 «Wù kórrá cwaa'n dɩgaliɛw, gɩ̀ jáa hi wù-lǝ wù sáa ji ba wù ji gbǝ̃ǝ̃ ǹ-kor wù hla!

Gɩ-ń ba gùu ba wà wɩ̀-i Isɩrayɛl yiɛ'n yuuntiiw, wú hiirǝǝ daagɩ nã yí ne, gɩ̀-lǝ gɩ̀ nã yi ji hũɔ̃ wù cɔ̃mmã.

43 Mǝ̃́ wa wú nǝ̃ wùu piɛ wù nãkruɔgu Dũnnũw nã-ì? Dũnnũẃ kor-yǝ yindiɛ yí ne kɛ-i, gɩ-ń ba gùu ba wà wù cɔ̃mmã dwal wù nã, wù mãã wà wù-lǝ Dũnnũ Bíɛ́-i!»

44 Halle bà yáá bàa gbǝ gùú ŋmãllããbaa mãã bà min nǝ̃ Yesuw, bàá yo, bá kã bá ba bà tuuraa wù nã gùú tammã dɩnmã.

Yesu kuugu

(Markaw 15.33-41 ; Lukaw 23.44-49 ; Yuhanãw 19.25-30)

45 Bǝ̃ǝ̃'n sũɔ̃lɩm'n bǝ̃ǝ̃gu, kuugɩ́ juo ka ǹ-blĩĩ, dudũũmã́ ba cuuw min nã, fuwɔ ǹ-ji da liɛraaba siɛlba.

46 Liɛraaba siɛlnãw nã, Yesuẃ fǝ̃ǝ̃ ǹ-hiil wù yalli ǹ-kaasǝ wà: «Eli, Eli, lama sabakɩtani?»

Gɩ̀ yuugɩ-i wà: «Mǝ̃̀ Dũnnũ, Mǝ̃̀ Dũnnũ, hamã nã-i ń ya mǝ̃́ ba?^c»

47 Bàá mãã bà yáá dàa, badaabá nɔ̃ nã̀ã ba bà waa wà: «Wù be Dũnnũ tanhiil Eliw-i.»

48 Wudiɛẃ wú paa ǹ-sɔ̃ ǹ-kãã tuu kuudagǝ ǹ-dii-gǝ kwãmbuurɩ nã nã̀ã fã-gǝ damlãdarǝ nã ǹ-kã nǝ̃-gǝ Yesu nũɔ̃gɩ nã wà wú mũɔ̃sǝ ǹ-tĩɛ̃.

49 Badaaba bá ver ǹ-ba bà waa nǝ̃-yǝ wà: «Hyárrà yí ne nã́ã́ fíí Eli ga juo kor-yǝ yo!»

50 Nǝ̃ Yesuẁ gáa ver ǹ-hiil wù yalli ǹ-kaasǝ hlo, wù yuflǝẃ fǝ̃ǝ̃ ǹ-hlǝ wù nã.

51 Nǝ̃ níyà, kuulaaw^d mãã bà yáá bàa nũũ-yǝ Dũnnũ bũũduugɩ nã, wù buruɔ gɩ̀ nã tiɛmã hǝ̃ǝ̃lmã, wú taal ǹ-buruɔ, ǹ-tuu wù yuugɩ nã, ǹ-ji kra wù mlãrɩ nã.

Hlɔ̃mmã́ saaraa, tɩntalɩmmã́ taal,

52 fuurunɲã́ cugurǝǝ nǝ̃ bàá mãã bà yáá Dũnnũ cwaaba nã̀ã kurǝǝ, Dũnnũẃ pĩĩ bà cindi.

53 Yesuẁ jáa nĩĩ, bá hlǝ bà fuurunɲã nã ǹ-jãn gùú lǝrii mãã dìi kra dɩ̀ dǝ ǹ-hã Dũnnũw, dìí mãã Serusalɛmgu; cocindɩ́ da-ba.

54 Wurɔm sɩrǝǝsɩ gundii yuuntiiw nǝ̃ sɩrǝǝsɩbaa mãã bà yáá bà cii Yesuw nã, bà gáa júó da ɲũũrũũgùu saaraa ǹ-pɛ dìí nã mãã dɩ̀ yáá dɩ̀ ce, dɩ̀ min, gbǝrsǝrɩ́ mǝ̃gaa ǹ-blǝ-ba.

Bá ba bà waa wà: «Sulammã nã, biɛ wáà yáá Dũnnũ Bíɛ́-i!»

55 Cacindɩ̀ yáá dàa hirammã nã bà maa bà ne. Bà yáá bà duu Yesuw nã Galile yiɛguu dìi, bá pɛ wù nã.

56 Gɩ̀ canããba sǝ̃ǝ̃nã, Magɩdala lǝ'n Mariyamẁ yáá dàa, nǝ̃ Yakubaba nǝ̃ Yisefu ɲũw Mariyamw, ǹ-pya Sebede byanãã'n ɲũw nã.

Yesu pĩɛ̃n'n diimã

(Markaw 15.42-47 ; Lukaw 23.50-56 ; Yuhanãw 19.38-42)

57 Bǝ̃ǝ̃gɩ jáa blariɛ gùú bǝ̃ǝ̃guu mãã, gbaaldiɛẃ jo.

Bà yáá bà be-yǝ Yisefu; wù yáá wù hlǝ Arimatɩ lǝ nã-i.

Wùú yo wù yáá Yesu duunãtiidiɛ-i.

58 Wú kã Pilatɩẃ nãã ǹ-kãã cirǝ̃ǝ̃ Yesu pĩɛ̃ndɩ nã, Pilatɩẃ fǝ̃ǝ̃ ǹ-ce bá hã-yǝ nǝ̃-dǝ.

59 Yisefuẃ kãã tuu pĩɛ̃ndi ǹ-fuɔ-dǝ pĩɛ̃ndiikuulaaflãmw kusunã.

60 Nã̀ã kã nǝ̃-yǝ ǹ-ga dii-yǝ wù-lǝ wù hla'n pĩɛ̃ndiitãnfierɩ nã.

Wù cíé bá ka-dǝ diiflãr-i; dɩ̀ yáá tɩntalɩmmã nã.

Wù gáa kãã dii-yǝ nnĩĩ nã, wú bin tɩntãnkɩnkandarǝ ǹ-suu dɩ̀ nũɔ̃gɩ nã nã̀ã ta.

61 Magɩdala lǝ'n Mariyamw nǝ̃ Mariyamdiɛ wáà yo, bà yáá bà jiraa pĩɛ̃ndiitãnfer'n yigagɩ nã bà min.

62 Yesuẁ kúú gùú yuuguu mãã^e, Yahudyabà yáá bà tɩgɩnǝ̃ǝ̃ bà fiisaa'n yuugɩ nã gùú yuugɩ-i.

Gɩ̀ taakaalgu, Yahudyaba puruɔntaa'n yuntaaba, nǝ̃ Farisĩɛ̃ba, bá kaalaa bà ɲĩɛ̃ ǹ-kã Pilatɩw nãã.

63 Bá kãã waa wà: «Yuuntii, vuuratii wáà yáá dìɛ, wù yáá wù waa wà: “Bãnɲã siɛlnã yuugu, mǝ̃̀ ji nĩĩ.”

64 Gùú cíé yí ba yì jo ǹ nãã wà ń hã-yáà nǝ̃ cwaaba, ba ga ba bà cii wù pĩɛ̃ndiitãnfierɩ nã bãnɲã siɛl ɲã́ã̀ ɲã̀ kusuugɩ nã, nã̀ã wa wù duunãtaabà ji gbǝ̃ǝ̃ ǹ-kã ǹ-ga ŋmã ǹ-hiil-yǝ ǹ-ga ŋmǝ̃ǝ̃rǝ̃ǝ̃ wù nã nã̀ã vuu cwaaba wà Dũnnũw pĩ́ĩlã́ ǹ-hiil-yǝ kúúgɩ nã.

Ba-ń ce dɩ̀-lǝ dɩ ji bla ǹ-ɲǝ̃ǝ̃ dĩɛ̃lãm nã dǝlli!»

65 Pilatɩẃ waa wà: «Sɩrǝǝsɩba-i nnĩĩ.

Ɲi mãã ɲì caa bá kãã cii dɩ̀ nã gùú tammã, kã́ã̀ nǝ̃-ba ba ga cii dɩ̀ nã.»

66 Gɩ̀-lǝ gùú nã-i, bá ta nǝ̃ sɩrǝǝsɩba pĩɛ̃ndiitãnfierɩ nã. Bà gáa kãã hi, bà yáá bàa bin gùú tɩntãndii mãã ǹ-suu pĩɛ̃ndiitãnfer'n nũɔ̃gɩ nã, bá nɩsɩ dɩ̀ nã wa curo'n sǝ̃n saa wú ta ǹ-jãn, nã̀ã ce sɩrǝǝsɩbá ba bà cii dɩ̀ nã.