Lukaw 23

Bà kã nǝ̃ Yesuw kumãndãw mãã Wurɔm lǝntaabà kárrá wù nã wù nãã

(Mãtiyew 27.1-2, 11-14 ; Markaw 15.1-5 ; Yuhanãw 18.28-38)

Gùú nã-i, bà min bá fǝ̃ǝ̃ ǹ-suro, ǹ-blǝ Yesuw, ǹ-kã nǝ̃-yǝ kumãndã Pilatɩ kuugɩ nã,

2 ǹ-kãã ba bà waa nǝ̃ Pilatɩw wà: «Yi díɛ́ biɛ wáà, wù caa wú vuu ǹ-haar yì bluuba.

Wù waa nǝ̃-ba wà ba báa pã nãndi ǹ-hã yuuntigǝ̃ngãw mãã Wurɔmgu bà be-yǝ wà Sesaar, wà wù-lǝ wɩ̀-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wà wù-lǝ yuuntii-i.»

3 Pilatɩẃ fǝ̃ǝ̃ ǹ-yugu-yǝ wà: «Yíi Yahudyaba yuuntiiw-ì?»

Yesuẃ siɛ-yǝ wà: «Ǹ wáalá-dǝ gùú tuugu, nĩĩgɩ-i.»

4 Pilatɩẃ fǝ̃ǝ̃ ǹ-waa nǝ̃ Yahudyaba puruɔntaa'n yuntaaba, nǝ̃ cocindii mãã dɩ̀ yáá dàa wà: «Mǝ̃n sáa da yuɔrɔm'n sùɔ́ biɛ wáá nã.»

5 Bàá nǝ̃n blǝ́rá Yesuw ǹ-kã nǝ̃-yǝ, bá hla nã̀ã waa ǹ-dĩĩ dɩ̀ nã, wà: «Wù túulá-gǝ Galile yiɛgɩ-i dìi, ǹ-ba wù kal cwaaba, fuwɔ ǹ-ji hi Suude yiɛgu nhlíɛ̀.

Ǹ-ba wù caa wú haar cwaaba.»

Bà kã nǝ̃ Yesuw Erodɩw nãã

6 Bà gáa waa Galile yiɛ'n cɔ̃mmã, Pilatɩẃ fǝ̃ǝ̃ ǹ-yugu-ba wà: «Biɛ wáà, Galile yiɛntabiɛ-ì?»

7 Bá siɛ-yǝ wà wu hlǝ Galile-i, Erodɩ yiɛgu.

Nǝ̃ Erodɩ yo, wù mãã wù yáá dàa Serusalɛmguu gɩ̀-lǝ gɩ̀ bãnɲã nã, Pilatɩẃ fǝ̃ǝ̃ ǹ-waa nǝ̃-ba wà bá kã nǝ̃-yǝ wùú nãã.

8 Erodɩẁ gáa da Yesuw, gɩ́ dwal wù nã dugɔ.

Wù nṹɔ̃́ wù cɔ̃mmã nã, gɩ́ hǝ̃ǝ̃sǝ, wú ba wù caa wú da-yǝ, nǝ̃ wú ce cɔ̃mdamã ǹ-pɩgaa-yǝ wú ne.

9 Gùú nã-i, wú fǝ̃ǝ̃ ǹ-ba wù yugu-yǝ nǝ̃ cɔ̃ncin, Yesuẃ ba ciyɛ̃, wù sáa waa cɔ̃m.

10 Yahudyaba puruɔntaa'n yuntaaba, nǝ̃ Musa hlũũ'n yuntaabá gbǝ̃ǝ̃ ǹ-ba bà hã-yǝ nǝ̃ yuɔrɔmmã.

11 Erodɩw, bá nǝ̃ wù sɩrǝǝsɩba, bá tuu yuntaa'n kuulanãmba, ǹ-dii ǹ-hã-yǝ, nã̀ã ba bà hiil wù kwãmmã nã, bà diɛ-yǝ, nã̀ã ji fǝ̃ǝ̃ ǹ-ce bá ver, ǹ-maar nǝ̃-yǝ Pilatɩw nãã.

12 Erodɩbà sáá bà gbǝ nǝ̃ Pilatɩw.

Nǝ̃ gɩ̀-lǝ gɩ̀ yuugu dàa, bá paa ǹ-dwal.

Pilatɩẁ hã-ba nǝ̃ Yesuw wà bá ko-yǝ

(Mãtiyew 27.15-26 ; Markaw 15.6-15 ; Yuhanãw 18.39–19.16)

13 Gùú nã-i, Pilatɩẃ fǝ̃ǝ̃ ǹ-tɩgii Yahudyaba puruɔntaa'n yuntaaba, nǝ̃ yigantaaba, nǝ̃ cwaaba min,

14 ǹ-kãã waa nǝ̃-ba wà: «Ɲi júó ǹ-ji hã-m nǝ̃ biɛ wáà, wà wu vuu wù haar cwaaba.

Mǝ̃̀ yúgurǝ́-yǝ ɲì yinɲã nã.

Nǝ̃ mǝ̃n sáa da wù yuɔrɔm'n sùɔ́.

15 Erodɩ yo, wù sáa da wù yuɔrɔm'n sùɔ́ wù nã, gùú cíé wú ver ǹ-tĩɛ̃ bá jo nǝ̃-yǝ.

Biɛ wáà, wù sáa ce kuu, gùú mãã gɩ̀ ji hi wù kukwo'n cɔ̃mmã.

16 Mǝ̃̀ ji ce bá mũũ-yǝ nǝ̃ cãmblɩri, nã̀ã nǝ̃nǝ̃ǝ̃ wú maar.»

17 [Ta-n-maa paaruugɩ̀ yáá gɩ-ń hi, Pilatɩẁ yáá wù saa wú hiil curow dɩn kasoduugɩ nã, ǹ-nǝ̃nǝ̃ǝ̃ wù nã.]

18-19 Biɛdiɛẁ yáá dàa bà be-yǝ wà Barabasɩ.

Gùú nã mãã cwaa'n hiɛgà yáá gàa du lǝ'n kusuugɩ nã nǝ̃ fãngãtaaba, nã̀ã ba bà piirǝǝ, Barabasɩẁ yáá wùu ko curo gɩ̀ bǝ̃ǝ̃gu, bá blǝ ǹ-suu wù nã kasoduugɩ nã.

Gɩ̀-lǝ gɩ̀ nã, cwaabá fǝ̃ǝ̃ ǹ-ba bà kaasǝraa huuu, wà bà-lǝ bá caa wú ko Yesuw, nã̀ã nǝ̃nǝ̃ǝ̃ Barabasɩ nã-i.

20 Pilatɩẁ mãã wù yáá wù caa wú nǝ̃nǝ̃ǝ̃ Yesuw nã, wú fǝ̃ǝ̃ ǹ-yugu-ba, ǹ-tu hlo.

21 Nǝ̃ bá hla, nã̀ã ba bà kaasǝraa bà waa wà: «Gbǝ-yǝ daagɩ nã ń ko-yǝ!

Gbǝ-yǝ daagɩ nã!»

22 Pilatɩẃ fǝ̃ǝ̃ ǹ-yugu-ba yin siɛlnãw wà: «Biɛ wáà cíé diibɩblar hadɩ-i?

Mǝ̃n sáa da wù mãã wù cíé dìí mãã, dɩ́ hi wù kol'n cɔ̃mmã.

Mǝ̃̀ ji mũũ-yǝ nǝ̃ cãnblɩri, nã̀ã nǝ̃nǝ̃ǝ̃ wú maar.»

23-24 Bá hla nã̀ã dĩĩ dɩ̀ nã, ǹ-ba bà kaasǝraa wà wú gbǝ Yesuw.

Bà jáa kaasǝraa ǹ-gbǝ̃ǝ̃ Pilatɩw nã, wú fǝ̃ǝ̃ ǹ-waa nǝ̃-ba wà ba mãã bà caa dìí mãã, wu ji ce-dǝ.

25 Gùú biɛ mãã wù yáá wùu haar cwaaba, bá ba bà piirǝǝ, nã̀ã ko curo bá dii-yǝ kasoduugɩ nã, bà yáá bà caa wú nǝ̃nǝ̃ǝ̃ wù-lǝ wùú nã-i.

Wú fǝ̃ǝ̃ ǹ-nǝ̃nǝ̃ǝ̃ wù-lǝ wù nã, nã̀ã hã sɩrǝǝsɩba nǝ̃ Yesuw, wà dìí mãã cwaa'n kusuugɩ nã, wà bá ce-yǝ nǝ̃-dǝ.

Sɩrǝǝsɩbà maar nǝ̃ Yesuw, bà ga gbǝ-yǝ ǹ-ko-yǝ

(Mãtiyew 27.32-34 ; Markaw 15.21-23)

26 Bà gáa ba bà maar nǝ̃ Yesuw, bá kãã jal nǝ̃ Siirɛn lǝ'n biɛdiɛ, bà be-yǝ wà Simɔ̃, yà hlǝ fugagɩ nã.

Bà mãã bà yáá bà kã bà ga gbǝ Yesuw gùú daagɩ nã mãã, bá blǝ Simɔ̃w ǹ-piɛ-gǝ ǹ-hã-yǝ, wú ba wù wáà wù duu Yesu furũũgɩ nã nǝ̃-gǝ.^a

27 Serusalɛm taaba, cocindɩ́ ba dɩ̀ duu wù nã, nǝ̃ canããbá pɩpɩrĩɛ̃ bà yunɲã nã, nã̀ã ba bà kaalaa wù cɔ̃mmã nã.

28 Yesuẃ fǝ̃ǝ̃ ǹ-yiil, ǹ-ne-ba nã̀ã waa nǝ̃-ba wà: «Serusalɛm canãã ɲimãã, bláá kaalaa mǝ̃n cɔ̃mmã nã.

Káalàa ɲì hla'n cɔ̃m nã-i, nǝ̃ ɲì tãnkuuraa'n cɔ̃mmã nã.

29 Ɲi-ń da mǝ̃̀ mãã mǝ̃̀ waa dɩ̀-lǝ, yuugɩ́ nàa gɩ̀ jo, gùú yuuguu mãã, cwaabà ji ba bà waa wà: “Canããbaa mãã bà ĩ́ɛ̃lã́, bà sáa hi ǹ-huu ǹ-da, tãnkuur'n sáa ŋmãsã bà ŋmãmmã ǹ-da, bà-lǝ bà yunɲã̀ dwállá.”

30 Gɩ̀-lǝ gɩ̀ bǝ̃ǝ̃gu, cwaabà ji ba bà jiɛriɛ nǝ̃ tãnũnɲã, wà ɲí duruu ǹ-suu bà nã, nã̀ã ba bà waa nǝ̃ tãmbiiga wà gá ŋmǝ̃ǝ̃rǝ̃ǝ̃ bà nã.

31 Ɲi-ń da bà ce dabirĩɛ̃gu nnĩĩba tammã, dakuulaa-lǝ, bà ji ce-gǝ danii?»

(Mãtiyew 27.35-44 ; Markaw 15.24-41 ; Yuhanãw 19.17-27)

32 Cobaliɛba hǝ̃ǝ̃ldaabà yáá dàa, bà kã nǝ̃-ba, bà ga gbǝ bàá yo daagɩ nã.

33 Bà gáa hi gùú sùɔ́guu mãã bà be-gǝ wà Yukuɔl, sɩrǝǝsɩbá gbǝ Yesuw daagɩ nã gɩ̀ sùɔ́gɩ nã, nã̀ã gbǝ cobaliɛ báà yo, curo wo curo, wù dǝ'n daagɩ nã wù tuɔra, wù dɩnw, wù nãdĩĩ yiɛgu, nǝ̃ wudiɛw, wù ɲiɲũɔ̃ yiɛgu.

34 Gùú nã-i, Yesuẃ fǝ̃ǝ̃ ǹ-ba wù waa wà: «Tɩtii, ce bà dũndɔ.

Bà mãã bà ce dìí mãã, bà sáa fǝ̃ǝ̃-dǝ.»

Gɩ̀-lǝ gɩ̀ nã, sɩrǝǝsɩbá fǝ̃ǝ̃ ǹ-dii trãga, ǹ-da ǹ-yuɔ wù kuulanãmba.

35 Cwaabá hiraa, ǹ-ba bà ne, nǝ̃ Yahudyaba yuntaa-lǝ, bà-lǝ bá ba bà hiil wù kwãmmã nã, nã̀ã ba bà waa wà: «Wu-ń ba wù hlǝ́rá Dũnnũ nã-i, nã̀ã ba Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, nǝ̃ Dũnnũw-ń ba wù níé ǹ-hiil wùú nǝ̃n ba, wú kor wù hla yí ne.

Mǝ̃n wa, wùú yáá wù kor cwaabaa-ì?»

36 Sɩrǝǝsɩba yo, bá ba bà hiil wù kwãmmã nã.

Nã̀ã fǝ̃ǝ̃ ǹ-jo nǝ̃ kwãɲiɲǝ̃ǝ̃lãmdamã,

37 ǹ-juo ba bà waa nǝ̃-yǝ wà: «Yíi nǝ̃n ba Yahudyaba yuuntiiw, kor ǹ hla yí ne.»

38 Bà yáá bàa yal ǹ-piɛ wù yuu'n yiɛguu wà: «Yahudyaba yuuntiiw-i nnĩĩ.»

39 Cobaliɛbaa mãã bà yáá bàa gbǝ-ba wù tuɔra, wù dɩndiɛẃ fǝ̃ǝ̃ ǹ-ba wù tuuraa wù nã, nã̀ã ba wù waa wà: «Yíi sǝ Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo.

Kor ǹ hla, nǝ̃ ń kor hãmĩĩ yo kɛ!»

40-41 Wù nãyo-lǝ, wú ba wù gãnãã nǝ̃-yǝ wà: «Yíǹ sǝ̃n sɔ̃ Dũnnũw nã-ì?

Ń ba ǹ hiil biɛ wáà kwãmmã.

Cwa yì hǝ̃ǝ̃l hãmĩĩ mãã yì ywar yì min nǝ̃ biɛ wáà, hãmĩĩ-lǝ, yi cáalá yì kuugu nǝ̃ yì hla-i, nǝ̃ biɛ wáà-lǝ, wù sáa ce kuu.»

42 Nã̀ã fǝ̃ǝ̃ ǹ-waa nǝ̃ Yesuw wà: «Yesu, nǝ̃-ń ga ba ǹ jo ǹ yuuntasǝrɩ nã gùú bǝ̃ǝ̃gu, báa sĩĩnǝ̃ǝ̃ mǝ̃̀ nã.»

43 Yesuẃ fǝ̃ǝ̃ ǹ-siɛ-yǝ wà: «Ya mǝ̃́ waa sulammã nǝ̃-n: jimããguu dìɛ, mǝ̃̀ ga jãn nǝ̃-n Dũnnũ suɔgu.»

Yesu kuugu

(Mãtiyew 27.45-56 ; Markaw 15.33-41 ; Yuhanãw 19.28-30)

44 Bǝ̃ǝ̃'n sũɔ̃lɩm'n bǝ̃ǝ̃gu, kuugɩ́ juo ka ǹ-blĩĩ, dudũũmã́ ba cuuw min nã, fuwɔ ǹ-ji da liɛraaba siɛlba.

45 Bǝ̃ǝ̃gɩ́ juo ba dudũũmã nã, kuulaaw^b mãã bà yáá bàa nũũ-yǝ Dũnnũ bũũduugɩ nã, wù buruɔ gɩ̀ nã tiɛmã hǝ̃ǝ̃lmã, wú taal ǹ-buruɔ wù sǝ̃ǝ̃gɩ nã.

46 Yesuẃ fǝ̃ǝ̃ ǹ-dii ǹ-kaasǝ wà: «Tɩtii, mǝ̃̀ dii mǝ̃̀ yuflǝw yíi nãkruɔgɩ nã-i.»

Wù gáa waa dɩ̀-lǝ ǹ-tã, wù Yuflǝẃ fǝ̃ǝ̃ ǹ-hlǝ.

47 Wurɔm sɩrǝǝsɩ gundii yuuntiiw mãã wù yáá dàa gɩ̀ sùɔ́gɩ nã, wù gáa da dìí nǝ̃n cíé, wú ba wù bũũ Dũnnũẁ wù waa wà: «Sulammã nã, biɛ wáà yáá wùu sũɔ̃l.»

48 Cohuɔguu nǝ̃n yáá gùu tɩgii gɩ̀ sùɔ́gɩ nã, ǹ-ba bà ne yinɲã, bà gáa da dìi ce gɩ̀ tammã, bá fǝ̃ǝ̃ ǹ-pɩpɩrĩɛ̃ bà yunɲã nã, ǹ-ba bà kũũrǝ̃ǝ̃.^c

49 Yesu cokuganãmba min, nǝ̃ canããbaa nǝ̃n hlǝ́rá Galile yiɛguu dìi, ǹ-ba bà duu wù nã, bá hiraa halbaa, ǹ-ba bà maa bà ne.

Yesu pĩɛ̃n'n diim'n cɔ̃mmã

(Mãtiyew 27.57-61 ; Markaw 15.42-47 ; Yuhanãw 19.38-42)

50-51 Biɛdiɛẁ yáá dàa wù hlǝ Yahudyaba lǝrii mãã, bà be-dǝ wà Arimatɩ lǝ.

Bà be-yǝ Yisefu.

Cofɩnfayǝ yáá, wù sǝ̃n hũɔ̃ cɔ̃ncĩɛ̃mmã.

Wù yáá wù fennãã Dũnnũ yuuntasǝrɩ nã.

Yahudyaba vũnvãnãã'n sugojarradiɛ yáá.

Bà yáá bàa blǝ Yesu cɔ̃mmã gùú tuugu, ǹ-kãã ba bà ce-mã, nǝ̃ wù-lǝ wù sáá wùu hũɔ̃-dǝ nǝ̃-ba.

52 Gɩ̀ biɛẃ kã Pilatɩw nãã, ǹ-kãã cirǝ̃ǝ̃ wù nã, wà wú hã-yǝ nǝ̃ Yesu pĩɛ̃ndi.

53 Wù gáa hã-yǝ nǝ̃-dǝ, wú ce bá hiirǝǝ dɩ̀ nã daagɩ nã, ǹ-fuɔ-dǝ pĩɛ̃n'n kuulaa kusunã.

Pĩɛ̃ndiitãnfierdaarɩ̀ yáá dàa, yà ce bá ka-dǝ, tɩntalɩmmã nã, bà sáa hi ǹ-dii curo dɩ̀ nã ǹ-da.

Wú fǝ̃ǝ̃ ǹ-kãã dii Yesu pĩɛ̃ndi gùú sùɔ́gu.

54 Gɩ̀ yáá gùu vaa nǝ̃ jimãyuu yáá.

Gɩ̀-lǝ gɩ̀ nã, bà jo bà ji du Yahudyaba fiisaa'n yuu'n tɩgɩnǝ̃mmã nã.

55 Canããbaa nǝ̃n hlǝ́rá Galile yiɛguu dìi, ǹ-ba bà duu Yesuw nã, bá kã bá ta nǝ̃ Yisefuw pĩɛ̃ndiitãnfierɩ nã, ǹ-kãã ne bà mãã bà mã́rrã́ Yesu pĩɛ̃ndɩ nã gùú tuugu.

56 Nã̀ã ver ǹ-kũũ suɔgɩ nã, ǹ-kãã mǝ̃gaa nɔ̃mmã, nǝ̃ latɩkolo mãã bà ga tũn pĩɛ̃ndɩ nã.

Fiisaa'n yuugu, curo'n sáá wù da wù ce kuu, bá fiisa gɩ̀-lǝ gɩ̀ yuugu.