Cɔ̃nfɩrmmã 1

Cɔ̃nfɩrɩm'n sɛbɛw

Fyãnuugu

Yesu Kɩrsaẁ fɩ́rrǝ́ gùú cɔ̃mmã nã.

Dũnnũẁ hlã-yǝ nǝ̃-mã ǹ-pɩgaa wù mããcieraaba nǝ̃ dìí mãã gɩ-ń ce fiyãã dɩ̀ ji hi, nã̀ã tĩɛ̃ wù mɛlɛgɛw wù mããcier Yuhanãw nãã, ǹ-ce mã́ fǝ̃ǝ̃.

2 Wù-lǝ wù pɩ́gará-dǝ gbaa, wà wu díɛ́ kuu wo kuuw mãã, Dũnnũ cãwan-i, nǝ̃ Yesu Kɩrsa siɛrnãsǝri.

3 Wùú mãã wù kal sɛbɛ wáà, nǝ̃ bàá mãã bà nɔ̃ Dũnnũ tanhiil'n cãwanĩɛ̃ gáà, nã̀ã ba bà blǝ dìí mãã dɩ̀ yállá, bà yunɲã̀ dwállá, nã̀ã wa dɩ̀ bǝ̃ǝ̃gɩ̀ píɛlá nã!

4 Sɛbɛ wáà yállá ǹ-hlǝ Yuhanãw nã-i, ǹ-hã Igɩlisɩ taa'n kurɔn nɩrhǝ̃ǝ̃lw mãã Asii yiɛgu: Dũnnũw mãã wù yáá dìɛ, nã̀ã ba dìɛ, nã̀ã ba wù ga jo, bá nǝ̃ yuflaa nɩrhǝ̃ǝ̃lw mãã wù yuuntasǝ'n guujirakuu'n yigagɩ nã, bá ne ɲì yiɛgu, nã̀ã hã-ɲã́ã̀ nǝ̃ hyasɩrãgǝgu,

5 bá nǝ̃ Yesu Kɩrsaw, wùú mãã sulamntiiw mãã yalntiiw, nǝ̃ wuudĩɛ̃lw ǹ-hlǝ kuugɩ nã, nǝ̃ ɲũũrũũ yuntaa'n yuuntiiw!

Yì cɔ̃mmã̀ mãã mã̀ dwal wùú nã, wù ca yì nã ǹ-pyar yì gaacĩɛ̃yaga yì yuunã nǝ̃ wù twammã,

6 nã̀ã ce yí ba yuntaaba, nǝ̃ puruɔntaaba wù Tǝ Dũnnũw saa; wù buusammã nǝ̃ fãngããgɩ́ ba wù saa fuwɔ fɩraa!

Kwaya!

7 Níyà, wùú jówà yiilunɲã nã nnĩĩ.

Cwaaba min, bà ji da-yǝ, halle bàá nǝ̃n flã ǹ-kǝ̃ǝ̃l-yǝ, nǝ̃ cuu coplaaga min, gà ji pɩpɩrĩɛ̃ gà yunɲã nã ǹ-ba bà kaal wù cɔ̃mmã nã.

Ũwũũ, kwaya!

8 Yitii Dũnnũẃ waa wà: «Mã́ã-i Alfaw nǝ̃ Omegaw^a, wùú mãã dìɛ, nã̀ã ba wù yáá dìɛ, nã̀ã ba wù jo, Fãngããgɩmintiiw.»

Dìí nǝ̃n fɩ́rrǝ́ Curonbiɛ'n cɔ̃mmã nã

9 Mã́ã Yuhanã mã́ã̀mã ɲì cwanĩĩw, nǝ̃ ɲì nãyow ywaruugɩ nã, nǝ̃ yuuntasǝrɩ nã, nǝ̃ vaanhlanãw Yesu Kɩrsaw nã, mǝ̃̀ yáá dàa gùú hlɔ̃mmã nã mãã lwaakɩnkandìi caliɛ mã̀ nã, bà be-mã wà Patɩmɔsɩ, Dũnnũ cãwan'n cɔ̃mmã nã, nǝ̃ Yesu Kɩrsa siɛrnãsǝ'n cɔ̃mmã nã.

10 Dũnnũ Yuflǝẃ juo tuu mǝ̃̀ yuflǝw Yitii'n yuugu, nǝ̃ mǝ̃́ nɔ̃ yaldarǝ nã nǝ̃ fãngããgu mǝ̃̀ furũnyiɛgu nã́ã́ yen búwǝ̀.

11 Dɩ̀ yáá dɩ̀ waa wà: «Ǹ mãã ǹ da dìi, yal-dǝ sɛbɛdiɛ nã, nǝ̃ ń tĩɛ̃-yǝ ń hã Igɩlisɩ taa'n kurɔn nɩrhǝ̃ǝ̃l ɲã́ã̀: Efɛsɩ lǝri, Sɩmirɩn lǝri, Pɛrgam lǝri, Tɩyatir lǝri, Sardɩ lǝri, Filadɛlɩfi lǝri, nǝ̃ Lawɔdise lǝri.»

12 Mǝ̃́ yiil wà mǝ̃ caa ǹ-fǝ̃ǝ̃ gùú yallɩ nǝ̃n yáá dɩ̀ wanãã nǝ̃-m.

Mǝ̃̀ gáa yiil, mǝ̃́ da fitɩnpiɛɲin nɩrhǝ̃ǝ̃lw mãã bàa ce-ɲã nǝ̃ sãnãw,

13 nǝ̃ gɩ̀ fitɩnpiɛɲin [nɩrhǝ̃ǝ̃l] ɲã́ã̀ɲã sǝ̃ǝ̃gɩ nã, curodiɛ wù hlǝ curo'n blɩw.

Wù yáá wùu dii kuulaadiiyǝpɩpuɔlayǝdiɛ, nã̀ã hĩɛ̃sã sãnã kuulaayiɛdagǝ wù dǝ̃ngũũgɩ nã.

14 Wù yuugu nǝ̃ wù yukwaasǝrɩ̀ yáá dìi pesǝ nã́ã́ kurando jũm-i nǝ̃ plammã.

Wù yinɲã yáá nã́ã́ dãncaalam-i,

15 nǝ̃ wù vyanɲã̀ ba nã́ã́ kwabyãrhuuladǝ-i, nã́ã́ ɲã́ nǝ̃ ɲã̀ã blǝ nã ǝ̃rǝ̃ǝ̃ nã-i, nǝ̃ wù yallɩ́ ba dɩ̀ hlǝ hũngǝ̃ngãm'n dulli.

16 Wù yáá wùu fuɔ ŋmĩɛ̃ nɩrhǝ̃ǝ̃lw wù nãdĩĩgɩ nã, nǝ̃ dãngunãw mãã wù jã nǝ̃ nɔ̃nɲã hǝ̃ǝ̃lɲã, wù yáá wù hlǝ wù nũɔ̃gɩ nã, nǝ̃ wù yigagɩ̀ yáá nã́ã́ bǝ̃ǝ̃-i, gɩ̀ caalaa nǝ̃ fãngããgu.

17 Mǝ̃̀ gáa da-yǝ, mǝ̃́ duruu wù vyanɲã taara nã́ã́ mǝ̃̀ kúú-i.

Wú piɛ wù nãdĩĩgu mǝ̃̀ drɔ nã̀ã waa wà: «Báa sɔ̃ cɔ̃m nã, mã́ã-i wuudĩɛ̃lw nǝ̃ wuufaalyǝw,

18 nǝ̃ wùú mãã nũmǝ̃nãw.

Mǝ̃̀ yáá mã̀ã ku, nǝ̃ ne, mǝ̃́ nǝ̃ nũmǝ̃nãw fuwɔ fɩraa.

Kúú'n kanɩgablɩri nǝ̃ cugutaa'n wanjiram'n sùɔ́'n dǝllɩ́ nǝ̃ mã́ã nãkruɔ nã-i.

19 Yal ǹ díɛ́ dìi: dìí mãã dìɛ, nǝ̃ dìí mãã dɩ̀ saa dɩ́ jo furũũgɩ nã.

20 Nǝ̃ gùú cɔ̃nŋmǝ̃ǝ̃rǝ̃mmãã mãã ŋmĩɛ̃ nɩrhǝ̃ǝ̃lw mãã ǹ díɛ́-ga mǝ̃̀ nãdĩĩgɩ nã, nǝ̃ sãnã fitɩnpiɛɲin nɩrhǝ̃ǝ̃lw mãã ǹ díɛ́-ɲã, mã̀-i nnĩĩ: Ŋmĩɛ̃ nɩrhǝ̃ǝ̃l wáà pɩgaa Igɩlisɩ taa'n kurɔn nɩrhǝ̃ǝ̃l ɲã́ã̀ mɛlɛgɛba-i, nǝ̃ sãnã fitɩnpiɛɲin nɩrhǝ̃ǝ̃l ɲã́ã̀ ba Igɩlisɩ taa'n kurɔn nɩrhǝ̃ǝ̃l ɲã́ã̀.»