Cɔ̃nfɩrmmã 2

Sɛbɛw mãã bà yal-yǝ bà hã Efɛsɩ lǝ'n Igɩlisɩ taaba

«Yal ń hã Efɛsɩ lǝ'n Igɩlisɩ taa'n mɛlɛgɛw: “Wùú mãã wù fúɔlá ŋmĩɛ̃ nɩrhǝ̃ǝ̃lw wù nãdĩĩgɩ nã, wùú mãã wù wáà sãnã fitɩnpiɛɲin nɩrhǝ̃ǝ̃l sǝ̃ǝ̃gɩ nã, wù mãã wù waa dìi, dɩ̀-i nnĩĩ:

2 Mǝ̃̀ fǝ̃ǝ̃ ǹ gaaciega, ǹ mããcegbǝ̃ǝ̃mã, nǝ̃ ǹ vaanhlanãw.

Mǝ̃̀ fǝ̃́ǝ̃lã́ wà n síì gbǝ̃ǝ̃ ǹ-hũɔ̃ cobɩbliɛba.

Bàá mãã bà ce bà hla tĩɛ̃taaba nǝ̃ bà sǝ-ba, ǹ dǝ̃́ǝ̃lã́-ba ǹ-ne, nã̀ã fǝ̃ǝ̃ wà kwasǝnãã-i.

3 Ũwũũ, ń nǝ̃ nã̀ã vaa ǹ hla, nã̀ã hũɔ̃ ywaruugu mǝ̃̀ yir'n cɔ̃mmã nã, nǝ̃ ǹ sáa ya ǹ cãndɩ́ karaa.

4 Nǝ̃ mǝ̃̀ mãã nǝ̃ dìí mãã ǹ yuunã, dɩ̀-i ǹ hlárá dwalɩmmãã nǝ̃n yáá ǹ nã dĩɛ̃lãmmã nã.

5 Ǹ hlǝ́rá gùú sùɔ́gu ǹ-ga duruu, kãnãã gɩ̀ nã, nǝ̃ ń nǝ̃nǝ̃ǝ̃ nǝ̃ ń tuu ǹ-tu, nǝ̃ ń ba ǹ ce ǹ gaaciedĩɛ̃lĩɛ̃ga.

Nã̀ã wa [gɩ-ń ce fiyãã], mǝ̃̀ ga jo ǹ nãã, nã̀ã ba mǝ̃̀ ji tuu ǹ fitɩnpiɛkuugɩ́ hlǝ gɩ̀ sùɔ́gɩ nã, mǝ̃̀ sáa hla ń ver ǹ tammã.

6 Nǝ̃ dɩ̀ min drɔ, díɛ̀dɩ́ nǝ̃ ǹ nã: Nikolayitɩ duunãtaa'n gaacie'n cɔ̃mmã́ nǝ̃ mã̀ã bla ǹ nã, nã́ã́ gà cɔ̃mmã̀ mãã mã̀ã bla mã́ã yo mǝ̃̀ nã nĩĩgu mãã.

7 Tɔ̃nɲã-ń ba wùú mãã wù saa, wú nɔ̃ Dũnnũ Yuflǝw mãã wù waa dìi nǝ̃ Igɩlisɩ taaba: Wùú mãã wù ji gbǝ̃ǝ̃ nã, mǝ̃̀ ji hã-yǝ nǝ̃ nũmǝ̃nãsǝ'n tubikuu'n blɩri wú wuu, gùú mãã Dũnnũ suɔgɩ nã.”»

Sɛbɛw mãã bà yal-yǝ bà hã Sɩmirɩn lǝ'n Igɩlisɩ taaba

8 «Yal ń hã Sɩmirɩn lǝ'n Igɩlisɩ taa'n mɛlɛgɛw: “Wuudĩɛ̃lw nǝ̃ wuufaalyǝw, wùú mãã wù yáá wùu ku, nã̀ã ji ver ǹ-ba nũmǝ̃nãw, wù mãã wù waa dìi, dɩ̀-i nnĩĩ:

9 Mǝ̃̀ fǝ̃ǝ̃ [ǹ gaaciega,] ǹ ywaruugu, nǝ̃ ǹ kuokuosǝri – nã̀ã da ń nǝ̃ nã̀ã gbaala – nã̀ã ba mã̀ã fǝ̃ǝ̃ ǹ yiirɩ̀ bǝ̃́ǝ̃lǝ̃́ǝ̃ nĩĩguu mãã bàá mãã bà ce bà hla Yahudyaba nǝ̃ bà sǝ-ba bà saa, nã̀ã ba Sɩtãn bũũtaa'n kuruɔgu.

10 Ǹ mãã ǹ ji da gùú ywaruugu, báa sɔ̃ gɩ̀ nã.

Ne, tiilǝtiiẁ ji dii badaaba kasoduugɩ nã ɲì sǝ̃ǝ̃nã, ǹ-da ǹ-dǝ̃ǝ̃-ɲã́ã̀ ǹ-ne, nǝ̃ ɲí da ywaruugu bãn nũɔ̃sɔ̃ kusuugɩ nã.

Ba yalntasǝrɩ nã fuwɔ kúúgɩ nã, mǝ̃̀ ji hã-n nǝ̃ fɩraa nũmǝ̃nãsǝrɩ́ ba ǹ pãlli.

11 Tɔ̃nɲã-ń ba wùú mãã wù saa, wú nɔ̃ Dũnnũ Yuflǝw mãã wù waa dìi nǝ̃ Igɩlisɩ taaba: Wùú mãã wù ji gbǝ̃ǝ̃ nã, wù síì ku kúúgɩ hǝ̃ǝ̃lnãw.”»

Sɛbɛw mãã bà yal-yǝ bà hã Pɛrgam lǝ'n Igɩlisɩ taaba

12 «Yal ń hã Pɛrgam lǝ'n Igɩlisɩ taa'n mɛlɛgɛw: “Wùú mãã wùu fuɔ dãngunãw mãã wù jã nǝ̃ nɔ̃nɲã hǝ̃ǝ̃lɲã, wù mãã wù waa dìi, dɩ̀-i nnĩĩ:

13 Mǝ̃̀ fǝ̃ǝ̃ [ǹ gaaciega nǝ̃] ǹ mãã nã̀ã jiraa gùú sùɔ́gu: Sɩtãn yuuntasǝ'n guujirakuugɩ́ nǝ̃ gùú sùɔ́gɩ-i.

Ń nǝ̃ nã̀ã mǝ̃gaa ǹ-blǝ mǝ̃̀ yiiri, nǝ̃ ǹ sáa ver ǹ furũũgu ǹ hũɔ̃mã nã mǝ̃̀ cɔ̃mmã nã, halle gùú bãnɲã mãã Ãtɩpasɩw mãã mǝ̃̀ sulamntiiw mãã yalntiiw, bà kúó-yǝ ɲì nãã, gùú sùɔ́guu mãã Sɩtãnẃ nǝ̃ wùu jiraa.

14 Nǝ̃ gadaga nìɛ mǝ̃̀ saa ǹ yuunã: cwaadaabá nìɛ ǹ nãã bàa ɲǝ̃gãr Balam hlũũgɩ nã, wùú mãã wù yáá wù kal Balakɩw wà wú ce Isɩrayɛl bluubá ver furũũ ǹ-wuu kũɔ̃mãã mãã bàa jãn kiiba nǝ̃-mã, nã̀ã dii bà hla durkũmsǝrɩ nã.

15 Nĩĩgɩ-i, yíi yo, ń nǝ̃ cwaadaba, bàá mãã bàa dii bà hla Nikolayitɩ hlũũgɩ nã.

16 Nǝ̃nǝ̃ǝ̃ nǝ̃ ń tuu ǹ-tu, nã̀ã wa gɩ-ń ce fiyãã, mǝ̃̀ ga jo ǹ nãã, nã̀ã ba mǝ̃̀ ji ce byaari nǝ̃-ba nǝ̃ mǝ̃̀ nũɔ̃'n dãngunãw.

17 Tɔ̃nɲã-ń ba wùú mãã wù saa, wú nɔ̃ Dũnnũ Yuflǝw mãã wù waa dìi nǝ̃ Igɩlisɩ taaba: Wùú mãã wù ji gbǝ̃ǝ̃ nã, mǝ̃̀ ji hã-yǝ nǝ̃ mãnw mãã wùu ŋmǝ̃ǝ̃rǝ̃ǝ̃ [wú wuu], nã̀ã hã-yǝ nǝ̃ tɩntãnpɩplaardarǝ.

Tɩntãn díɛ̀ drɔ, yirflãrdaarɩ́ nàa dìi yal, dìí mãã curo'n sǝ̃n fǝ̃ǝ̃-dǝ, nǝ̃-ń ba wùú mãã bà hlã-yǝ nǝ̃-dǝ sǝ.”»

Sɛbɛw mãã bà yal-yǝ bà hã Tɩyatir Igɩlisɩ taaba

18 «Yal ń hã Tɩyatir lǝ'n Igɩlisɩ taa'n mɛlɛgɛw: “Dũnnũ Bíɛ́w mãã wù waa dìi, wùú mãã wù yinɲã́ nǝ̃ nã́ã́ dãncaalam-i, nǝ̃ wù vyanɲã ba nã́ã́ kwabyãrhuuladǝ-i.

19 Mǝ̃̀ fǝ̃ǝ̃ ǹ gaaciega, ǹ dwalɩmmã, ǹ hũɔ̃mã, ǹ mããcemmã ǹ-pɛ badaaba nã, nǝ̃ ǹ vaanhlanãw.

Mǝ̃̀ fǝ̃́ǝ̃lã́ wà ǹ gaaciefaaliɛgà bṹũlã́ ǹ-ɲǝ̃ǝ̃ gaadĩɛ̃lĩɛ̃ga.

20 Nǝ̃ mǝ̃̀ mãã nǝ̃ dìí mãã ǹ yuunã, dɩ̀-i ǹ sǝ̃n ɲǝ̃ǝ̃ Sesabɛlw nǝ̃ cɔ̃m, gùú cijalw mãã wù ce wù hla Dũnnũ tanhiilw.

Wù kal nã̀ã ba wù vuuraa mǝ̃̀ mããcieraaba nã bá da ǹ-dii bà hla durkũmsǝrɩ nã, nã̀ã ba bà wuu kũɔ̃mã mãã bàa jãn kiiba nǝ̃-mã.

21 Mǝ̃̀ hlã-yǝ nǝ̃ gbaagu wú ver wù tammã, nǝ̃ wù sǝ̃n caa wú nǝ̃nǝ̃ǝ̃ wù durkũmsǝrɩ nã, nã̀ã tuu ǹ-tu.

22 Gùú cíé mǝ̃̀ ji juu ǹ-nar-yǝ hlɔm'n guumǝ̃rãkuudagǝ drɔ, nã̀ã tĩɛ̃ ywaruugǝ̃ngããdagǝ bàá mãã bà mǝ̃rǝ̃ǝ̃ nǝ̃-yǝ bà drɔ, ba-ń ba bà sáa wa bá nǝ̃nǝ̃ǝ̃ bà gaaciega nã nã̀ã tuu ǹ-tu sǝ.

23 Mǝ̃̀ ji ko ǹ-guu wù tãnkuuraaba nã, nǝ̃ Igɩlisɩ taaba min, bà ji fǝ̃ǝ̃ wà mã́ã-i wùú mãã wù fǝ̃ǝ̃ cwaa'n kusuugu nǝ̃ bà hiɛga, nã̀ã ba mǝ̃̀ ji piir curo wo curo ɲì sǝ̃ǝ̃nã ǹ-vaa nǝ̃ wù gaaciega.

24 Nǝ̃ ɲimãã-lǝ, Dũnnũ bluu'n dɩgaliɛw mãã Tɩyatir lǝri, ɲi sáa hũɔ̃ kalɩm mã́ã̀, nã̀ã ba ɲi sáa fǝ̃ǝ̃ Sɩtãn cɔ̃nŋmǝ̃ǝ̃rǝ̃mmã – nã́ã́ bà mãã bà be-mã – mǝ̃̀ waa nǝ̃-ɲã́ã̀: mǝ̃̀ síì piɛ tuuldarǝ ɲì drɔ hlo.

25 Nǝ̃ gùú mãã ɲì saa, blǝ́rà-gǝ kwelle fuwɔ mǝ̃ ga jo.

26 Wùú mãã wù ji gbǝ̃ǝ̃ nã, wùú mãã wù ji ce mǝ̃̀ gaaciega fuwɔ ǹ-ga hi gɩ̀ kǝǝri, mǝ̃̀ ji hã-yǝ nǝ̃ fãngããgu wú jiraa coplaa'n yuugɩ nã.

27 Wù ji blǝ bà yigagu nǝ̃ yuuntasǝ'n kwal'n guruugu, nã́ã́ bà mãã bà ca bà mũũ mǝ̃raa'n ganɲã nĩĩgu, nã́ã́ mã́ã nǝ̃ mǝ̃̀ hla, mǝ̃̀ díɛ́ gɩ̀ fãngããgu mǝ̃̀ Tǝw saa nĩĩgu,

28 nǝ̃ mǝ̃̀ ji hã-yǝ nǝ̃ taakaalaaŋmããri.

29 Tɔ̃nɲã-ń ba wùú mãã wù saa, wú nɔ̃ Dũnnũ Yuflǝw mãã wù waa dìi nǝ̃ Igɩlisɩ taaba.” »