Cɔ̃nfɩrmmã 3

Sɛbɛw mãã bà yal-yǝ bà hã Sardɩ lǝ'n Igɩlisɩ taaba

«Yal ń hã Sardɩ lǝ'n Igɩlisɩ taa'n mɛlɛgɛw: “Wùú mãã nǝ̃ Dũnnũ yuflaa nɩrhǝ̃ǝ̃lw nǝ̃ ŋmĩɛ̃ nɩrhǝ̃ǝ̃lw, wù mãã wù waa dìi, dɩ̀-i nnĩĩ: Mǝ̃̀ fǝ̃ǝ̃ ǹ gaaciega.

Mǝ̃̀ fǝ̃́ǝ̃lã́ wà ǹ yiirɩ dúú wà ń nǝ̃ nũmǝ̃nã, nǝ̃ ń nǝ̃ nã̀ã ku.

2 Ba nũmǝ̃nãw, nǝ̃ ń dii kɩkǝmmã gà dɩgaliɛw mãã kúú'n nũɔ̃gɩ nã, nã̀ã wa mǝ̃̀ díɛ́ wà ǹ gaaciega sáa jalliɛ mǝ̃̀ Dũnnũ yigagɩ nã.

3 Ǹ hṹɔ̃lã́ cãwandi, nã̀ã nɔ̃-dǝ gùú tammã, kãnãã gɩ̀ nã ń ne; blǝ-dǝ, nǝ̃ ń nǝ̃nǝ̃ǝ̃ nǝ̃ ń tuu ń tu.

Nǝ̃-ń ba ǹ sáa ba nũmǝ̃nãw, mǝ̃̀ ga jo nã́ã́ ŋmãllĩĩ-i, ǹ síì fǝ̃ǝ̃ gùú bǝ̃ǝ̃guu mãã mǝ̃̀ ga juo tugulǝǝ ǹ nã.

4 Nǝ̃ Sardɩ lǝri, cwaadaabá nàa, bàá mãã bà sáa bla bà kuulanãmba; bà ji dii kuulaapɩpliɛba ǹ-ba bà wáà nǝ̃-m, nã̀ã wa bà saa nǝ̃-dǝ.

5 Wùú mãã wù ji gbǝ̃ǝ̃ nã, wù ji dii kuulaapɩpliɛba; mǝ̃̀ síì hu ǹ-hiil wù yiiri nũmǝ̃nãsǝ'n sɛbɛw nã, nã̀ã ba mǝ̃̀ ji hiraa dɩ̀ nã mǝ̃̀ Tǝ yigagɩ nã nǝ̃ wù mɛlɛgɛba yigagɩ nã, wà mǝ̃ fǝ̃ǝ̃ wù yiiri.

6 Tɔ̃nɲã-ń ba wùú mãã wù saa, wú nɔ̃ Dũnnũ Yuflǝw mãã wù waa dìi nǝ̃ Igɩlisɩ taaba.”»

Sɛbɛw mãã bà yal-yǝ bà hã Filadɛlɩfi lǝ'n Igɩlisɩ taaba

7 «Yal ń hã Filadɛlɩfi lǝ'n Igɩlisɩ taa'n mɛlɛgɛw: “Wùú mãã Yiyalɩmntiiw nǝ̃ Wuuhuhorw, nã̀ã ba nǝ̃ Dawuda kanɩgablɩri, wu-ń cugur dũndɔ̃lli, curo'n síì gbǝ̃ǝ̃ ǹ-suu-dǝ, nǝ̃ wu-ń suu-dǝ, curo'n síì gbǝ̃ǝ̃ ǹ-cugur-dǝ, wù mãã wù waa dìi, dɩ̀-i nnĩĩ:

8 Mǝ̃̀ fǝ̃ǝ̃ ǹ gaaciega.

Ne, mǝ̃̀ cúgurǝ́ dũndɔ̃ldarǝ ǹ yigagɩ nã, dìí mãã curo'n síì gbǝ̃ǝ̃ ǹ-suu-dǝ, nã̀ã wa ǹ fãngããgɩ̀ sáa bũũ, nǝ̃ dɩ̀ min drɔ ǹ blǝ́rá mǝ̃̀ cãwandi, nǝ̃ ǹ sáa ver furũũgu mǝ̃̀ yiirɩ nã.

9 Mǝ̃̀ hã-n nǝ̃ Sɩtãn bũũtaa'n kuruɔguu mãã gɩ̀ ce gɩ̀ hla Yahudyaba nǝ̃ gɩ̀ sǝ-ba, nã̀ã ba gɩ̀ bǝr kwasǝri.

Mǝ̃̀ ji ce gɩ́ juo kuulǝǝ ǹ vyanɲã taara, nã̀ã fǝ̃ǝ̃ wà ǹ cɔ̃mmã dwállá mǝ̃̀ nã.

10 Gbǝ̃ǝ̃mãã mãã mã̀ ga juo dǝ̃ǝ̃ cuucwaaba ǹ-ne, mã-ń ga jo gùú bǝ̃ǝ̃gu, mã́ã yo, mǝ̃̀ ji cii ǹ nã nǝ̃-mã, nã̀ã wa ǹ hṹɔ̃lã́ ǹ-blǝ dìí mãã mǝ̃̀ kárrá dɩ̀ nã ǹ-hã-n, wà ń vaa ǹ hla.

11 Gɩ-ń ce fiyãã, mǝ̃̀ ga jo.

Gùú mãã ǹ saa, mǝ̃gaa ń blǝ-gǝ, curo'n báa ji hũɔ̃ ǹ pãlli.

12 Wùú mãã wù ji gbǝ̃ǝ̃ nã, mǝ̃̀ ji ce wú ba mǝ̃̀ Dũnnũ bũũduu'n dotaar'n jaablɩdarǝ, nǝ̃ wú ba wù síì hlǝ ǹ-da.

Mǝ̃̀ ji yal mǝ̃̀ Dũnnũ yiiri wù drɔ, nǝ̃ mǝ̃̀ Dũnnũ lǝ'n yiiri wù drɔ, dìí mãã Serusalɛmflĩɛ̃guu mãã wù hɩr wù hlǝ drɔkuɔlɩ nã, mǝ̃̀ Dũnnũw tuɔra, nã̀ã yal mã́ã yo, mǝ̃̀ yirflããri wù drɔ.

13 Tɔ̃nɲã-ń ba wùú mãã wù saa, wú nɔ̃ Dũnnũ Yuflǝw mãã wù waa dìi nǝ̃ Igɩlisɩ taaba.”»

Sɛbɛw mãã bà yal-yǝ bà hã Lawɔdise lǝ'n Igɩlisɩ taaba

14 «Yal ń hã Lawɔdise lǝ'n Igɩlisɩ taa'n mɛlɛgɛw: “Wùú mãã bá be-yǝ wà Kwaya, wùú mãã sulamntiiw mãã Yalntiiw, nǝ̃ Wuuhuhorw, nã̀ã ba Dũnnũw ɲããnǝ̃ǝ̃ɲã min wanhlǝmmã, wù mãã wù waa dìi, dɩ̀-i nnĩĩ:

15 Mǝ̃̀ fǝ̃ǝ̃ ǹ gaaciega.

Mǝ̃̀ fǝ̃́ǝ̃lã́ wà n sáa sɩrĩɛ̃, nǝ̃ ǹ sáa huulaa yo.

Ǹ yáá ǹ saa ń sɩrĩɛ̃, yindagǝ nã ń huulaa!

16 Ǹ mãã bũũyɩ-bũũyɩ, ǹ sáa sɩrĩɛ̃, ǹ sáa huulaa, mǝ̃̀ ji huusa ǹ-hiil-n mǝ̃̀ nũɔ̃gɩ nã.

17 Nã̀ã wa ǹ waa wà: Mǝ̃̀ gbáalá, mǝ̃̀ díɛ́ gbaasǝri, nǝ̃ mǝ̃̀ dugɔw sǝ kuu nã.

Nǝ̃ ǹ sáa fǝ̃ǝ̃ wà yublatii-i nǝ̃-n, nã̀ã ba hujãncɔ̃mntiiw, nǝ̃ kuokuow, nǝ̃ yɩrnĩĩw, nǝ̃ turkwaari.

18 Mǝ̃̀ gbǝ ǹ nã, ń jo mã́ã́ nãã ǹ-ji sǝ̃ǝ̃ sãnãw mãã bà hãnãã wù nã dǝ̃ǝ̃mã nã ǹ-hiil wù dɩgaagu, ǹ-da ǹ-gbaala sulammã nã, nã̀ã sǝ̃ǝ̃ kuulaapɩpliɛba, ǹ-da ǹ-suu ǹ cãndɩ nã, nǝ̃ ǹ turkwaarɩ báa dii ciiri ǹ nã hlo, nǝ̃ ń sǝ̃ǝ̃ tĩɛ̃gu ń dii ǹ yinɲã nã, ǹ-da ǹ-ba ǹ daraa.

19 Bàá mãã bà dwal mǝ̃̀ nã, mǝ̃̀ wanãã bà nã, nã̀ã ba mǝ̃̀ piir-ba.

Dii dɔ̃mmã ǹ hla nã, nǝ̃ ń nǝ̃nǝ̃ǝ̃ nã̀ã tuu ǹ-tu!

20 Ne, mǝ̃́ nìɛ mã̀ã hiraa dũndɔ̃llɩ nã, nã̀ã ba mǝ̃̀ dǝ̃ǝ̃ fieri.

Curow-ń nɔ̃ mǝ̃̀ yallɩ nã, nã̀ã cugur fieri, mǝ̃̀ ji jãn wù nãã, mǝ̃̀ ji wuu wuuri nǝ̃-yǝ, nǝ̃ wùú yo, wú wuu nǝ̃-m.

21 Wùú mãã wù ji gbǝ̃ǝ̃ nã, mǝ̃̀ ji ce wú jiraa nǝ̃-m mǝ̃̀ yuuntasǝ'n guujirakuugu drɔ, nã́ã́ mã́ã yo, mǝ̃̀ gbǝ̃́ǝ̃lã́ nã nĩĩguu mãã, nã̀ã jiraa nǝ̃ mǝ̃̀ Tǝw wù yuuntasǝ'n guujirakuugu drɔ.

22 Tɔ̃nɲã-ń ba wùú mãã wù saa, wú nɔ̃ Dũnnũ Yuflǝw mãã wù waa dìi nǝ̃ Igɩlisɩ taaba.”»