Cɔ̃nfɩrmmã 4

Dũnnũ yuuntasǝ'n guujirakuugu

Gɩ̀-lǝ gɩ̀ furũũgɩ nã, mǝ̃́ ne, ǹ-ne ǹ-da dũndɔ̃ldarǝ dìi cugur drɔkuɔlɩ nã.

Mǝ̃̀ yáá mã̀ã nɔ̃ gùú yaldĩɛ̃lããrɩ nã dɩ̀ wanãã nǝ̃-m nǝ̃ fãngããgu nã́ã́ bà bu yen-i, dɩ̀ waa wà: «Yugo nnĩĩ, mǝ̃̀ ji ce ń da dìí mãã dɩ̀ ga jo furũũgɩ nã.»

2 Gùú bǝ̃ǝ̃gɩ dɩngu dàa, Dũnnũ Yuflǝẃ tuu mǝ̃̀ yuflǝw.

Nǝ̃ níyà, yuuntasǝ'n guujirakuudaagɩ̀ yáá dàa drɔkuɔlɩ nã, nǝ̃ yuuntasǝ'n guujirakuu gúɔ̀gu drɔ, curodiɛẁ yáá wùu jiraa.

3 Wùú nǝ̃n yáá wùu jiraa, wù yáá wù caalaa, nã̀ã ba wù daraa nã́ã́ sasɩpɩ tɩntãnkuusǝdǝ-i, nã̀ã ba ciyɛ̃ nã́ã́ sardowan dǝl-i, nã̀ã ba nã́ã́ Dũnnũ kwal'n dablɩrii mãã dɩ̀ hlǝ emerɔdɩ tɩntãnkuusǝdǝdi, dìi caliɛ yuuntasǝ'n guujirakuu gúɔ́ nã.

4 Nǝ̃ yuuntasǝ'n guujirakuu gúɔ̀ yáá gùu caliɛ nǝ̃ yuuntasǝ'n ɲããjiraɲin gur nǝ̃ ɲã̀ nnǝ̃ǝ̃, nǝ̃ yuuntasǝ'n ɲããjiraɲin ɲã́ã̀ drɔ, vũnvãnãã gur nǝ̃ bà nnǝ̃ǝ̃bà yáá bàa jiraa.

Bà yáá bàa dii kuulaapɩpliɛba, nã̀ã suu sãnã yuuntasǝ'n hucunɲã bà yunɲã nã.

5 Dũnnũ ɲĩɛ̃sǝmmã, nǝ̃ yaliɛdaga, nǝ̃ Dũnnũ nãlɛ̃m'n dullɩ́ ba dɩ̀ hlǝ yuuntasǝ'n guujirakuugu drɔ, nǝ̃ gɩ̀ yigagɩ nã, fitɩn nɩrhǝ̃ǝ̃lw mãã Dũnnũ yuflaa nɩrhǝ̃ǝ̃lẃ ba wù caalaa gbaa.

6 Yuuntasǝ'n guujirakuu'n yigagɩ nã, gɩ̀ yáá nã́ã́ lwaakɩnkan-i, gɩ̀ daraa nã́ã́ dɔtrã-i.

Gɩ̀ sǝ̃ǝ̃gɩ nã, nǝ̃ gɩ̀ calɛmmã nã, nũmǝ̃nãɲinɲã nnǝ̃ǝ̃ɲã̀ yáá dàa yinɲã́ suu ɲã̀ nã yiganyiɛgu nǝ̃ furũnyiɛgu.

7 Nũmǝ̃nãkuudĩɛ̃lããgɩ̀ yáá gɩ̀ hlǝ jaraw, ɲã̀ hǝ̃ǝ̃lnãẃ ba wù hlǝ yuɔrw, nǝ̃ ɲã̀ siɛlnãẃ ba nǝ̃ curo'n blɩ'n yigagu, nǝ̃ ɲã̀ nnǝ̃ǝ̃nãẃ ba wù hlǝ curɔw mãã yuumã nã.

8 Nũmǝ̃nãɲinɲã nnǝ̃ǝ̃ ɲã́ã̀ yáá ɲã̀ min nǝ̃ tãmpɩrãn nãndien, nǝ̃ yinɲã́ ba ɲã̀ã suu ɲã̀ nã taasǝ̃ǝ̃nǝ̃ǝ̃gu nǝ̃ kusuugɩ nã.

Bà sáa yaala bà waa bãn nǝ̃ yisuɔ wà: «Yalla, yalla, Yitii Dũnnũẃ nǝ̃ yalla, Fãngããgɩmintiiw, wùú mãã wù yáá dìɛ, nã̀ã ba dìɛ, nã̀ã ba wù jo!»

9 Wùú mãã wùu jiraa yuuntasǝ'n guujirakuugu drɔ, wùú mãã nũmǝ̃nãw fuwɔ fɩraa, bǝ̃ǝ̃ wo bǝ̃ǝ̃w mãã nũmǝ̃nãɲin ɲã́ã̀ hã-yǝ nǝ̃ wù buusammã, nǝ̃ wù bũũmã, nǝ̃ kwaya dũũmã,

10 vũnvãnãã gur nǝ̃ bà nnǝ̃ǝ̃ báà kuulǝǝ wùú mãã wùu jiraa yuuntasǝ'n guujirakuugu drɔ wù yigagɩ nã, ǹ-ba bà bũũ wùú mãã nũmǝ̃nãw fuwɔ fɩraa, nã̀ã kra bà yuuntasǝ'n hucunɲã yuuntasǝ'n guujirakuu'n yigagɩ nã, nã̀ã ba bà waa wà:

11 «Yitiiw mãã yì Dũnnũw, [yíi mãã Yiyalɩmntiiw,] ǹ saa nǝ̃ buusammã, nǝ̃ bũũmã, nǝ̃ fãngããgu, nã̀ã wa yíi nǝ̃́ǝ̃lã́ ɲinɲã min, nǝ̃ ǹ kusunã cɔ̃m cíé ɲã́ nǝ̃ǝ̃, nã̀ã ba dìɛ.»