Cɔ̃nfɩrmmã 5

Tũmblɩ'n sɛbɛw mãã wùu suu nǝ̃ nɩsɩm nɩrhǝ̃ǝ̃lw

Gɩ̀ furũũgɩ nã, wùú mãã wù yáá wùu jiraa yuuntasǝ'n guujirakuugu drɔ, mǝ̃́ da sɛbɛdiɛ wù nãdĩĩgɩ nã, yalɩmmã̀ã ba wù kusuugɩ nã nǝ̃ wù furũũgɩ nã, nǝ̃ wú ba wùu suu nǝ̃ nɩsɩm nɩrhǝ̃ǝ̃lw.

2 Nǝ̃ mǝ̃́ da mɛlɛgɛdiɛ nǝ̃ fãngããgu, wùu hiil wù yalli ǹ-ba wù tu wà: «Halii sáalá nǝ̃ wú cugur sɛbɛ wáà, nã̀ã taal ǹ-pyar wù nɩsɩm mã́ã̀ wù nã?»

3 Nǝ̃ curo'n sáa da drɔkuɔlɩ nã, nǝ̃ ɲũũrũũgɩ nã, nǝ̃ ɲũũrũũ taaragu wù ji gbǝ̃ǝ̃ ǹ-cugur sɛbɛ wáà, yindagǝ nã ǹ-ne-yǝ.

4 Mǝ̃̀ yáá mǝ̃̀ kaal mǝ̃̀ higinãã, nã̀ã wa curo'n sáá wùu da, wùú mãã wù yáá wùu saa nǝ̃ wú cugur sɛbɛ wáà, nã̀ã ne-yǝ.

5 Gɩ̀-i, vũnvãnããba sǝ̃ǝ̃nã, wudiɛẃ waa nǝ̃-m wà: «Báa kaal, nã̀ã wa Suuda nũɔ̃ntaa'n jaraw, wùú mãã Dawuda huɔnblɩw, wù gbǝ̃́ǝ̃lã́ nã ǹ-ba wù ji cugur sɛbɛ wáà nǝ̃ wù nɩsɩm nɩrhǝ̃ǝ̃lw.»

6 Nã̀ã fǝ̃ǝ̃ ǹ-da tũmblɩw mãã nã́ã́ bà kúó-yǝ ǹ-jãn siim-i, wùu ba hirammã nã yuuntasǝ'n guujirakuu'n sǝ̃ǝ̃gɩ nã, nǝ̃ nũmǝ̃nãɲinɲã nnǝ̃ǝ̃ ɲã́ã̀ nǝ̃ vũnvãnãã báà sǝ̃ǝ̃gɩ nã.

Wù yáá nǝ̃ yenĩɛ̃ nɩrhǝ̃ǝ̃l, nǝ̃ yin nɩrhǝ̃ǝ̃l.

Ɲã̀-i Dũnnũ yuflaa nɩrhǝ̃ǝ̃lw mãã wù tĩ́ɛ̃lã́-ba ɲũũrũũ yanɲã min.

7 Wú juo hũɔ̃ [sɛbɛw] wùú mãã wù yáá wùu jiraa yuuntasǝ'n guujirakuugɩ nã, wù nãdĩĩnãkruɔgɩ nã.

8 Wù gáa hũɔ̃ sɛbɛw, nũmǝ̃nãɲinɲã nnǝ̃ǝ̃ ɲã́ã̀, nǝ̃ vũnvãnãã gur nǝ̃ bà nnǝ̃ǝ̃ báà kuulǝǝ tũmblɩ'n yigagɩ nã.

Curo wo curo, wù yáá nǝ̃ bĩĩɲɩw, nǝ̃ sãnã dɩndiɛga, gàa yu nǝ̃ wusunããw, wùú mãã Kɩrsa bluu'n cirǝ̃mmã,

9 nã̀ã ba bà hyar hlǝ̃ǝ̃flĩɛ̃gu bà waa wà: «Ǹ saa nǝ̃ ń tuu sɛbɛw, nã̀ã pyar wù nɩsɩmmã, nã̀ã wa bà kúó-n ǹ-jãn siimã, nǝ̃ ń sǝ̃ǝ̃ ǹ-hiil cwaaba nǝ̃ ǹ twammã ǹ-hã Dũnnũw, nũɔ̃ntaaba min nã, nǝ̃ tammã min nã, nǝ̃ yiɛntaaba min nã, nǝ̃ coplaaga min nã.

10 Ǹ cíé-ba yuntaaba nǝ̃ puruɔntaaba yì Dũnnũw saa, nǝ̃ bá ba bà jiraa ɲũũrũũgɩ min yuugɩ nã.»

11 Mǝ̃̀ yáá mǝ̃̀ ne, ǹ-ji nɔ̃ mɛlɛgɛcindarǝ yallɩ nã, bàa tɩgii ǹ-caliɛ yuuntasǝ'n guujirakuugɩ nã, nǝ̃ nũmǝ̃nãɲinɲã nǝ̃ vũnvãnããba; bà yáá bàa ɲũrũɔ̃ twi twiga ǹ-ji ba bà sǝ̃n fǝ̃ǝ̃ cɔ̃m.

12 Bà yáá bàa hiil bà yaliɛga bà waa wà: «Tũmblɩw mãã nã́ã́ bà kúó-yǝ ǹ-jãn siim-i, wù saa nǝ̃ wú da fãngããgu, nǝ̃ gbaasǝri, nǝ̃ cɔ̃nfǝ̃ǝ̃gǝgu, nǝ̃ pyãluugu, nǝ̃ bũũmã, nǝ̃ buusammã, nǝ̃ bɩnǝ̃mmã.»

13 Ɲããnǝ̃ǝ̃ɲã minw mãã drɔkuɔlɩ nã, nǝ̃ ɲũũrũũgɩ nã, nǝ̃ ɲũũrũũ taaragu, nǝ̃ lwaakɩnkandi drɔ, nũmǝ̃nãɲinɲã minw mãã dàa, mǝ̃́ ba mǝ̃̀ nɔ̃ bà waa wà: «Wùú mãã wùu jiraa yuuntasǝ'n guujirakuugu drɔ, nǝ̃ Tũmblɩw, bɩnǝ̃mmã, nǝ̃ bũũmã, nǝ̃ buusammã, nǝ̃ fãngããsǝrɩ́ ba bà mǝ̃gãmmã fuwɔ fɩraa!»

14 Nũmǝ̃nãɲinɲã nnǝ̃ǝ̃ɲã́ ba ɲã̀ siɛ wà: «Kwaya!»

Nǝ̃ vũnvãnããbá kuulǝǝ, nã̀ã ba bà bũũ Dũnnũw nǝ̃ Tũmblɩw.