Cɔ̃nfɩrmmã 6

Nɩsɩm nãndien pyarɩmmã

Mǝ̃́ da Tũmblɩw yà pyar nɩsɩmdĩɛ̃lãmmã nɩsɩm nɩrhǝ̃ǝ̃l wáá nã.

Nã̀ã fǝ̃ǝ̃ ǹ-nɔ̃ nũmǝ̃nãkuugɩ dɩngu ɲã̀ nnǝ̃ǝ̃ ɲã́ã̀ sǝ̃ǝ̃nã gɩ̀ wanãã nã́ã́ Dũnnũ nãlɛ̃m-i wà: «Jo.»

2 Mǝ̃́ ne, ǹ-ne ǹ-da sǝ̃nsuupɩpladiɛ wùu hillaa.

Wùú nǝ̃n yáá wùu yugo wù drɔ, wù yáá nǝ̃ tǝ̃ǝ̃gu; bá hã-yǝ nǝ̃ yuntaa'n hucuugu, nǝ̃ wú ta nã́ã́ wùú mãã wù gbǝ̃ǝ̃ nã wù tammã, nã̀ã ba wù ga gbǝ̃ǝ̃ nã.

3 Wù gáa pyar nɩsɩmmã hǝ̃ǝ̃lnãw, mǝ̃́ nɔ̃ nũmǝ̃nãɲinɲã hǝ̃ǝ̃lnãẁ waa wà: «Jo.»

4 Nǝ̃ sǝ̃nsuudiɛ, wuubumbɛ̃mw, wùu hillaa.

Wùú nǝ̃n yáá wùu yugo wù drɔ, wù yáá wùu da fãngããgu wù ji hiil ɲũũrũũ sɩsɩrãmmã, cwaabá da ǹ-ba bà mũũ bà ko bà ɲĩɛ̃.

Bà yáá bàa hã-yǝ nǝ̃ dãngunãgǝ̃ngãw.

5 Tũmblɩẁ gáa pyar nɩsɩmmã siɛlnãw, mǝ̃́ nɔ̃ nũmǝ̃nãɲinɲã siɛlnãẁ waa wà: «Jo.»

Mǝ̃́ ne, ǹ-ne ǹ-da sǝ̃nsuubɩblɩdiɛ wùu hillaa.

Wùú nǝ̃n yáá wùu yugo wù drɔ, wù yáá wùu blǝ guufikuudagǝ wù nãkruɔgɩ nã.

6 Nǝ̃ mǝ̃́ nɔ̃ [nã́ã́] yaldarǝ-i dɩ̀ waa nũmǝ̃nãɲinɲã nnǝ̃ǝ̃ ɲã́ã̀ sǝ̃ǝ̃gɩ nã wà: «Mihĩĩ'n culow dɩnẃ ba curo'n yuugɩ dɩn mããcem'n pãlli, nǝ̃ fom bii'n culoba siɛlbá ba curo'n yuugɩ dɩn mããcem'n pãlli, nǝ̃ báa jĩɛ̃ nɔ̃mmã nã nǝ̃ ɛrsɛ̃ kwãmmã nã.»

7 Wù gáa pyar nɩsɩmmã nnǝ̃ǝ̃nãw, mǝ̃́ nɔ̃ nũmǝ̃nãɲinɲã nnǝ̃ǝ̃nãẁ waa wà: «Jo.»

8 Mǝ̃́ ne, ǹ-ne ǹ-da sǝ̃nsuudiɛ cwayii.

Wùú nǝ̃n yáá wùu yugo wù drɔ, bà yáá bà be-yǝ wà «Kuu», nǝ̃ cugutaa'n wanjiram'n sùɔ́gɩ́ ba gɩ̀ tĩɛ̃-yǝ.

Nǝ̃-ń buruɔ ɲũũrũũgɩ nã tiɛmã nnǝ̃ǝ̃mã, bà díɛ́ fãngããgu ǹ-gbǝ̃ǝ̃ tiɛmã dɩnmã nã, ǹ-ba bà ko cwaaba nǝ̃ dãngunãw, nǝ̃ nũmmã, nǝ̃ hlɔmmã mãã mã̀ã pisɩrĩɛ̃, nǝ̃ jerbɩganããbaa mãã ɲũũrũũgu.

9 Wù gáa pyar nɩsɩmmã ndiinãw, bà yáá bàa ko bàá mãã Dũnnũ cãwan'n cɔ̃mmã nã, nǝ̃ bà siɛrnãsǝ'n cɔ̃mmã nã, mǝ̃́ da bà yuflaaba siijãnkuugu taara.

10 Bà yáá bàa hiil bà yaliɛga bà kaasǝraa wà: «Fuwɔ bii bǝ̃ǝ̃-i, Yitii yíi mãã yiyalɩmmã nǝ̃ wuuhuhorw, ǹ ji fennãã ǹ-jar cuu cwaabaa mãã bà tũnũũ yì twammã nã, nã̀ã hiil yì mããjaamã?»

11 Bà sǝ̃ǝ̃nã, curo wo curo wù yáá nǝ̃ kuulaadiiyǝpɩpuɔlayǝw mãã wuupɩplaw, nǝ̃ bá waa nǝ̃-ba wà ba fiisa bǝ̃ǝ̃dagǝ fiyãã hlo, fuwɔ bà nãmããcieraaba nǝ̃ bà cwanããbaa mãã bà saa bá ko-ba bà-lǝ bà tammã, bà nũɔ̃gɩ́ suu ǹ-jalliɛ.

12 Gùú nã mãã Tũmblɩẁ pyárrá nɩsɩm nãndiennãw, mǝ̃́ da ɲũũrũũgùu saaraa dugɔ.

Bǝ̃ǝ̃gɩ́ juo blĩĩ kɩrkɩr, nǝ̃ hiraagɩ min, gɩ́ juo ba nã́ã́ twam-i ciyɛ̃,

13 nǝ̃ drɔkuɔl'n ŋmĩɛ̃gá duruu ɲũũrũũgu, nã́ã́ salkaarw mãã wù saaraa mãngoro tuugɩ nã gùú tammã, ǹ-wuɔr gɩ̀ kãnkũmmãnɲã.

14 Drɔkuɔlɩ́ ta nã́ã́ bá fĩĩ cĩĩnũũ-i, nǝ̃ tãnũnɲã min nǝ̃ hlɔ̃mmã mãã lwaakɩnkandɩ̀ caliɛ mã̀ nã, ɲã́ hlǝ ɲã̀ sɔnɲã nã.

15 Ɲũũrũũ yuntaaba, cogǝ̃ngĩɛ̃ba, sɩrǝǝsɩba yuntaaba, gbaalaaba, nǝ̃ fãngãtaaba, nǝ̃ cwaaba min, lwɛba nǝ̃ bàá mãã bà hla nã, bá ŋmǝ̃ǝ̃rǝ̃ǝ̃ tãnfonɲã nã nǝ̃ tãnũn'n tɩntrãkuuyaga sǝ̃ǝ̃nã.

16 Nã̀ã ba bà waa nǝ̃ tãnũnɲã nǝ̃ tɩntrãkuuyaga wà: «Dúrùu yì drɔ, nǝ̃ ɲí ŋmǝ̃ǝ̃rǝ̃ǝ̃ yì nã, yí da ǹ-hal nǝ̃ wùú mãã wùu jiraa yuuntasǝ'n guujirakuugu drɔ, nã̀ã hal nǝ̃ Tũmblɩ'n hyadũũgu.

17 Sulammã nã, wù hyadũũ'n yuugǝ̃ngããgɩ̀ híí, nǝ̃ halii ji gbǝ̃ǝ̃ ǹ-kã bá hiraa nǝ̃-gǝ?»