Cɔ̃nfɩrmmã 7

Dũnnũ bluuba

Gɩ̀-lǝ gɩ̀ furũũgɩ nã, mǝ̃́ da mɛlɛgɛba nnǝ̃ǝ̃ bàa hiraa cuu yanɲã nnǝ̃ǝ̃ɲã nã.

Bà yáá bàa blǝ ɲũũrũũ salunɲã nnǝ̃ǝ̃ɲã, saluugɩ báa da ǹ-fiir ɲũũrũũgɩ nã, nǝ̃ lwaakɩnkandi drɔ, nǝ̃ tubikuugu dɩn yo gɩ̀ drɔ.

2 Nǝ̃ mǝ̃́ ver ǹ-da mɛlɛgɛdiɛ wùu hlǝ bǝ̃ǝ̃'n pal'n yiɛgu, nã̀ã ba yà fuɔ Dũnnũw mãã nũmǝ̃nãw, wù nɩsɩmpiɛkuugɩ nã.

Wú haar wù yalli ǹ-ba wù kaasǝ nǝ̃ mɛlɛgɛba nnǝ̃ǝ̃baa nǝ̃n yáá bàa da fãngããgu ǹ-ba bà ce ɲũũrũũgu nǝ̃ lwaakɩnkandi nǝ̃ diibɩblaari wà:

3 «Bláá bǝ̃ǝ̃lǝ̃ǝ̃ ɲũũrũũgɩ nã, nǝ̃ lwaakɩnkandi, nǝ̃ tubiɲinɲã, fuwɔ ǹ-ji da yìi ji nɩsɩ Dũnnũ mããcieraa'n sãnũnɲã nã nǝ̃ yì nɩsɩmmã.»

4 Bà yáá bàa nɩsɩ bàá nã nǝ̃ nɩsɩm mã́ã̀, mǝ̃́ fǝ̃ǝ̃ ǹ-nɔ̃ bà yáá gùú nũɔ̃gu.

Bà yáá cwa toyur tũndii yin gwaahǝ̃ǝ̃l nǝ̃ nũɔ̃sɔ̃ nǝ̃ bà hǝ̃ǝ̃l (144 000) Isɩrayɛl nũɔ̃ntaaba min sǝ̃ǝ̃nã:

5 Suuda nũɔ̃ntaaba nã, cwa toyur tũndii yin nãndien (12 000) yáá wùu nɩsɩ nǝ̃ nɩsɩm mã́ã̀; nǝ̃ cwa toyur tũndii yin nãndienw (12 000) Wurbɛn nũɔ̃ntaaba nã; nǝ̃ cwa toyur tũndii yin nãndien (12 000) Gadɩ nũɔ̃ntaaba nã;

6 nǝ̃ cwa toyur tũndii yin nãndien (12 000) Asɛr nũɔ̃ntaaba nã; nǝ̃ cwa toyur tũndii yin nãndien (12 000) Nɛfɩtali nũɔ̃ntaaba nã; nǝ̃ cwa toyur tũndii yin nãndien (12 000) Mãnãse nũɔ̃ntaaba nã;

7 nǝ̃ cwa toyur tũndii yin nãndien (12 000) Simeyɔ̃ nũɔ̃ntaaba nã; nǝ̃ cwa toyur tũndii yin nãndien (12 000) Levi nũɔ̃ntaaba nã; nǝ̃ cwa toyur tũndii yin nãndien (12 000) Isɩkar nũɔ̃ntaaba nã;

8 nǝ̃ cwa toyur tũndii yin nãndien (12 000) Sabulɔ̃ nũɔ̃ntaaba nã; nǝ̃ cwa toyur tũndii yin nãndien (12 000) Yisefu nũɔ̃ntaaba nã; nǝ̃ cwa toyur tũndii yin nãndien (12 000) Bɛ̃nsamɛ̃ nũɔ̃ntaaba nã; bà min, bà yáá bàa nɩsɩ nǝ̃ nɩsɩm mã́ã̀.

9 Gɩ̀-lǝ gɩ̀ furũũgɩ nã, mǝ̃́ ne, ǹ-ne ǹ-da cohuɔdagǝ dugɔ, gùú mãã curo'n sáá wù ji gbǝ̃ǝ̃ ǹ-ja-dǝ.

Bà yáá coplaaga min nã, nũɔ̃ntaaba min nã, yiɛntaaba min nã, nǝ̃ tammã min nã.

Bà yáá bà hiraa yuuntasǝ'n guujirakuu'n yigagɩ nã, nǝ̃ Tũmblɩ'n yigagɩ nã, nã̀ã dii kuulaadiibapɩpuɔlaaba mãã baapɩpliɛba, nǝ̃ kãbiɛnɲã ba bà nãkrɔnɲã nã,

10 nǝ̃ bá hiil bà yaliɛga ǹ-ba bà kaasǝraa wà: «Korɩmmã́ nǝ̃ yì Dũnnũ saa-i, wùú mãã wùu jiraa yuuntasǝ'n guujirakuugɩ nã, nǝ̃ Tũmblɩw saa.»

11 Mɛlɛgɛba minw nǝ̃n yáá bàa hiraa ǹ-caliɛ yuuntasǝ'n guujirakuugu, nǝ̃ vũnvãnããba, nǝ̃ nũmǝ̃nãɲinɲã nnǝ̃ǝ̃ɲã, bá kuulǝǝ, ǹ-tɩsɩnǝ̃ǝ̃ ɲã̀ yigasǝrɩ nã ɲũũrũũgu, yuuntasǝ'n guujirakuu'n yigagɩ nã, nã̀ã ba bà bũũ Dũnnũw

12 bà waa wà: «Kwaya!

Bɩnǝ̃mmã, nǝ̃ buusammã, nǝ̃ cɔ̃nfǝ̃ǝ̃gǝgu, nǝ̃ kwaya dũũmã, nǝ̃ bũũmã, nǝ̃ fãngããgu, nǝ̃ pyãluugɩ́ ba yì Dũnnũw saa fuwɔ fɩraa!

Kwaya!»

13 Vũnvãnããba sǝ̃ǝ̃nã, wudiɛẃ tuu cãwandi, nã̀ã waa nǝ̃-m wà: «Bàá mãã bà díilá kuulaapɩpuɔlaaba mãã baapɩpliɛba, haba-i, nǝ̃ bà hlǝ́rá haa-ì?»

14 Mǝ̃́ siɛ-yǝ wà: «[Mǝ̃̀] tii, ǹ fǝ̃́ǝ̃lã́-dǝ.»

Gɩ̀-i, wú waa nǝ̃-m wà: «Bàá mãã bà díɛ́ ywargǝ̃ngããgu, bà-i.

Bà sáará bà kuulaadiibapɩpuɔlaaba Tũmblɩ'n twammã nã, bá juo pesǝ.

15 Gùú cíé bá ba bà hiraa Dũnnũ yuuntasǝ'n guujirakuu'n yigagɩ nã, nã̀ã ba bà ce mããcemmã bà hã-yǝ bǝ̃ǝ̃nã yisuɔ wù bũũduugɩ nã.

Wùú mãã wùu jiraa yuuntasǝ'n guujirakuugɩ nã, wù ji cii bà nã wù kuɔlɩ nã.

16 Nũmmã̀ síì jaa-ba hlo, hũnɲũɔ̃sǝrɩ̀ síì blǝ-ba hlo, nǝ̃ bǝ̃ǝ̃gɩ̀ síì hyã-ba hlo, nǝ̃ vuvǝ̃ǝ̃mã̀ síì ca bà nã hlo.

17 Sulammã nã, Tũmblɩw mãã yuuntasǝ'n guujirakuugɩ sǝ̃ǝ̃gɩ nã, wù ji blǝ bà nã, nã̀ã blǝ bà yigagu ǹ-kã nǝ̃-ba nũmǝ̃nãsǝ'n hũnnaalaaba nã, nǝ̃ Dũnnũẃ hinĩɛ̃ ɲiɲirãmmã min bà yinɲã nã.»