Cɔ̃nfɩrmmã 8

Nɩsɩm nɩrhǝ̃ǝ̃lnã pyarɩmmã

Tũmblɩẁ gáa pyar nɩsɩm nɩrhǝ̃ǝ̃lnãw, kuugɩ́ juo ba ciyɛ̃ drɔkuɔlɩ nã nã́ã́ liɛr buor-i.

2 Nǝ̃ mǝ̃́ fǝ̃ǝ̃ ǹ-da mɛlɛgɛ nɩrhǝ̃ǝ̃lw mãã wù hiraa Dũnnũ yigagɩ nã; bá hã-ba nǝ̃ bul'n yenĩɛ̃ nɩrhǝ̃ǝ̃lw.

3 Mɛlɛgɛdiɛẃ jo hlo.

Wú kãã hiraa siijãnkuu'n yiɛgu, wùu fuɔ sãnã wusunãtiikuugɩ nã.

Bá hã-yǝ nǝ̃ wusunããw dugɔ wú da ǹ-jãn-yǝ, nǝ̃ Kɩrsa bluuba min cirǝ̃mmã sãnã siijãnkuugu drɔ, gùú mãã yuuntasǝ'n guujirakuu'n yigagɩ nã.

4 Mɛlɛgɛw mãã Dũnnũ yigagɩ nã, wusunãã wáà ɲũɔ̃sǝrɩ́ hlǝ wù nãkruɔgɩ nã, ǹ-ba dɩ̀ yuguraa nǝ̃ Kɩrsa bluu'n cirǝ̃mmã.

5 Mɛlɛgɛẃ tuu wusunãtiikuugu, ǹ-dii siijãnkuu'n dǝ̃ǝ̃mã́ yu-gǝ, nã̀ã nǝ̃ǝ̃ ǹ-kra gɩ̀ nã ɲũũrũũgu.

Dũnnũ nãlɛ̃mmã́ juo ba, nǝ̃ yaliɛdaga, nǝ̃ Dũnnũ ɲĩɛ̃sǝmmã, nǝ̃ ɲũũrũũ saarammã.

Bul'n yenĩɛ̃ nãndiendĩɛ̃lããga

6 Nǝ̃ mɛlɛgɛ nɩrhǝ̃ǝ̃lbaa mãã bà yáá nǝ̃ bul'n yenĩɛ̃ nɩrhǝ̃ǝ̃lw, bá ba bà tɩgɩnǝ̃ǝ̃ bà ji bu-ga.

7 Wuudĩɛ̃lẃ bu yendi, dɔtrããga nǝ̃ dǝ̃ǝ̃mãã mãã mã̀ã gaala nã nǝ̃ twammã, ɲã́ hɩr ɲũũrũũgu drɔ.

Nǝ̃-ń buruɔ ɲũũrũũgɩ nã tiɛmã siɛlmã, tiɛmã dɩnmã́ caa, nǝ̃ nǝ̃-ń buruɔ tubiɲinɲã nã tiɛmã siɛlmã, tiɛmã dɩnmã́ caa, nǝ̃ hĩɛ̃birĩɛ̃gɩ min, gɩ́ caa.

8 Mɛlɛgɛba hǝ̃ǝ̃lnãẃ bu yendi, nǝ̃ kuudagǝ, gùú mãã gɩ̀ yáá gɩ̀ hlǝ tãnũũgǝ̃ngããguu mãã [dǝ̃ǝ̃mã́] blǝ-gǝ, bá nǝ̃ǝ̃ ǹ-dii-gǝ lwaakɩnkandɩ nã.

Lwaakɩnkandɩ-ń buruɔ tiɛmã siɛlmã, tiɛmã dɩnmã́ cin twammã,

9 nǝ̃ ɲããnǝ̃ǝ̃ɲã nǝ̃n yáá nũmǝ̃nãw lwaakɩnkandɩ nã, nǝ̃-ń buruɔ ɲã̀ nã tiɛmã siɛlmã, tiɛmã dɩnmã́ kurǝǝ, nǝ̃ nǝ̃-ń buruɔ batoba nã tiɛmã siɛlmã, tiɛmã dɩnmã́ bǝ̃ǝ̃lǝ̃ǝ̃.

10 Mɛlɛgɛba siɛlnãẃ bu yendi, nǝ̃ ŋmããrgǝ̃ngãdarǝ hlǝ drɔkuɔlɩ nã, dɩ̀ caa nã́ã́ dãncaalam-i; nǝ̃-ń buruɔ lwanɲã nã tiɛmã siɛlmã, dɩ́ duruu tiɛmã dɩnmã drɔ, nǝ̃ hũnnaalaaba drɔ.

11 Ŋmããr díɛ̀dɩ̀ yiirɩ-i wà «Cicɩgǝmmã».

Nǝ̃-ń buruɔ hũmmã nã tiɛmã siɛlmã, tiɛmã dɩnmã́ cin cicɩgǝmmã, nǝ̃ cocindɩ́ ku hũm mã́ã̀ cɔ̃mmã nã, nã̀ã wa mã̀ yáá mã̀ã ga juo ba mã̀ ca.

12 Mɛlɛgɛba nnǝ̃ǝ̃nãẃ bu yendi, nǝ̃-ń buruɔ bǝ̃ǝ̃gɩ nã tiɛmã siɛlmã, gɩ̀ tiɛmã dɩnmã́ suu nã, nǝ̃ hiraa'n tiɛmã dɩnmã, nǝ̃ ŋmĩɛ̃'n tiɛmã dɩnmã, fuwɔ ǹ-ce ɲã̀ tiɛmã dɩnmã́ ba dũũ; nǝ̃-ń buruɔ bǝ̃ǝ̃nãgɩ nã tiɛmã siɛlmã, kuugɩ́ hlǝ gɩ̀ tiɛmã dɩn gbɩgbaamã nã, nǝ̃ yisuɔ yo, gùú dɩ dɩndɩ-i.

13 Mǝ̃́ ne, nã̀ã nɔ̃ curɔdiɛ wùu yuu velvel drɔgu, nã̀ã hiil wù yalli ǹ-ba wù waa wà: «Hujãncɔ̃mmã, nǝ̃ hujãncɔ̃mmã, nǝ̃ hujãncɔ̃mmã ɲũũrũũtaaba drɔ, yenĩɛ̃daa gáà bul'n cɔ̃mmã nã, gàá mãã mɛlɛgɛba siɛlbà ji bu-ga hlo!»