Cɔ̃nfɩrmmã 9

Mɛlɛgɛba ndiinãẃ bu yendi, nǝ̃ mǝ̃́ da ŋmãrdarǝ, dìí mãã dìi hlǝ drɔkuɔlɩ nã ǹ-duruu ɲũũrũũgu.

Bá hã-yǝ nǝ̃ jũɔ̃nulǝǝ'n kanɩgablɩri.

2 Wú cugur jũɔ̃nulǝǝgu, ɲũɔ̃sǝdarǝ, dìí mãã nã́ã́ ǝ̃rǝ̃ǝ̃'n ɲũɔ̃sǝ-i, dɩ́ ba dɩ̀ hlǝ funulǝǝgɩ nã; nǝ̃ funulǝǝ'n ɲũɔ̃sǝrɩ́ blĩĩ bǝ̃ǝ̃gu nǝ̃ saluugu.

3 Jisɔ̃nããbá hlǝ ɲũɔ̃sǝrɩ nã, ǹ-suu ɲũũrũũgɩ nã, nǝ̃ fãngããdagǝ, gùú mãã nã́ã́ ɲũũrũũ nũmũũ'n kuu-i, gɩ́ hã-ba.

4 Bá waa nǝ̃-ba wà ba báa ce ɲũũrũũ hĩɛ̃gu nǝ̃ diibɩblar, ba báa ce-dǝ ɲinsɩrãnɲã nã, ba báa ce-dǝ tubikuu nã, nǝ̃ bá ce-dǝ cwaaba nã mãã Dũnnũ nɩsɩmmã̀ sáá bà sãnũnɲã nã.

5 Bà díɛ́ hlũũgu ǹ-ba bà ji ywar-ba hyarsǝri ndii kusuugɩ nã, nǝ̃ bà sáa da-gǝ ǹ-ba bà ji ko-ba.

Bà yáá bà kãnnã-ba nǝ̃ gùú kãnãmmã, mã̀ jaamã̀ yáá nã́ã́ nũmũũw-ń duu curow.

6 Gɩ̀ bãn'n kusuugɩ nã, cwaabà ji ba bà caa kuugu, nǝ̃ bà síì da-gǝ.

Bà ji ba bà caa bá kurǝǝ, nǝ̃ kuugɩ̀ ji kwar ǹ-hal bà nã.

7 Jisɔ̃nãã báà yáá bà hlǝ sǝ̃nsonããba mãã bàa tɩgɩnǝ̃ǝ̃ bà nã byarcecɔ̃mmã nã.

Kuudaagɩ̀ yáá bà yunɲã nã́ã́ sãnã yuuntasǝ'n hucuu-i, nǝ̃ bà yigasǝrɩ́ ba dɩ̀ hlǝ curo'n blɩ'n kuugu.

8 Bà yáá nǝ̃ yukwaasǝri nã́ã́ cijal'n yukwaasǝ-i, nǝ̃ bà ɲirãnɲã ba nã́ã́ jaraba ɲin-i.

9 Bà dǝ̃ngũnɲã̀ yáá nã́ã́ kwal'n byarcekuulaaw mãã wù cĩĩ, nǝ̃ bà tãmpɩrãn'n dullɩ̀ ba nã́ã́ byarcewotorobaa mãã sǝ̃nsonããcindɩ̀ fa-ba bà sɔ̃ bà maar byarcegu.

10 Bà yáá nǝ̃ plǝnɲãã mãã nǝ̃ byarceɲinɲã sãmsãm nã́ã́ nũmũnǝ̃ǝ̃-i, nǝ̃ bà plǝn nã-i bà fãngããgɩ̀ yáá dàa bá ba bà ce diibɩblaari cwaaba nã, ǹ-ji da hyarsǝri ndii.

11 Bà yuugɩ nã, bà yáá bàa kra jũɔ̃nulǝǝ gúɔ̀gɩ̀ mɛlɛgɛw nã-i wú ba bà yuuntiiw, wùú mãã bà be-yǝ Hebru tammã nã wà Abadɔ̃, nǝ̃ Grɛkɩ tammã nã wà Apolɩyɔ̃.

12 Hujãncɔ̃mdĩɛ̃lãmmã̀ tíɛ́.

Nǝ̃ níyà, hujãncɔ̃mmã hǝ̃ǝ̃lmã́ nàa mã̀ jo mã̀-lǝ mã̀ furũũgɩ nã.

13 Mɛlɛgɛ nãndiennãẃ bu yendi, nǝ̃ mǝ̃́ nɔ̃ yaldarǝ nã dìi hlǝ ɲinɲã nã mãã bàá piɛ-ɲã sãnã siijãnkuuguu mãã Dũnnũ yigagɩ nã, gɩ̀ jiiyaga nnǝ̃ǝ̃ga nã.

14 Wù yáá wù waa nǝ̃ mɛlɛgɛ nãndiennãw nǝ̃n yáá wùu fuɔ yendɩ nã wà: «Nǝ̃nǝ̃ǝ̃ mɛlɛgɛba nnǝ̃ǝ̃ba mãã jɔrgɔba nã lwaagǝ̃ngããgu tuɔra, gùú mãã Efratɩw.»

15 Gɩ̀-lǝ gɩ̀ nã, bà yáá bàa tɩgɩnǝ̃ǝ̃ mɛlɛgɛba nnǝ̃ǝ̃baa mãã bǝ̃ǝ̃ gúɔ̀gɩ cɔ̃mmã nã, nǝ̃ yuu gúɔ̀gɩ cɔ̃mmã nã, nǝ̃ hiraa gúɔ̀gɩ cɔ̃mmã nã, nǝ̃ blɩ díɛ̀ cɔ̃mmã nã, bá nǝ̃nǝ̃ǝ̃ bà nã; nǝ̃-ń buruɔ cwaaba nã tiɛmã siɛlmã, bá da ǹ-ko tiɛmã dɩnmã.

16 Bà sɩrǝǝsɩbaa mãã bà yáá sǝ̃nsonããba drɔ, bà kurɔn'n nũɔ̃gɩ̀ yáá jonãã trãngwaahǝ̃ǝ̃l-i (200 000 000); mǝ̃́ nɔ̃ bà nũɔ̃gu.

17 Nĩĩgu mãã Dũnnũẁ pɩ́gará-m mǝ̃́ da sǝ̃nsonããba nǝ̃ bàá nǝ̃n yáá bàa yugo-ba, gɩ̀-i nnĩĩ: Bà yáá nǝ̃ dǝ̃ngũũcĩĩbyarceɲinɲã mãã ɲã̀ã hlãrãã nã́ã́ dǝ̃ǝ̃m-i, nã̀ã blĩĩ nã́ã́ Dũnnũ vãl-i, nã̀ã ba nã́ã́ hlam-i.

Sǝ̃nsonãã'n yunɲã yáá nã́ã́ jaraba yun-i, nǝ̃ dǝ̃ǝ̃mã, nǝ̃ ɲũɔ̃sǝri, nǝ̃ naarjũmmã, ɲã́ ba ɲã̀ hlǝ bà nɔ̃nɲã nã.

18 Nǝ̃-ń buruɔ cwaaba nã tiɛmã siɛlmã, tiɛmã dɩnmã́ ku narba siɛl báá nã: dǝ̃ǝ̃mã, nǝ̃ ɲũɔ̃sǝri, nǝ̃ naarjũmmã, ɲã́ hlǝ bà nɔ̃nɲã nã.

19 Nã̀ã wa, sǝ̃nsonãã'n fãngããgɩ̀ yáá bà nɔ̃n nã-i nǝ̃ bà plǝnɲã nã.

Bà plǝnɲã yáá ɲã hlǝ waalaaba; ɲã yáá nǝ̃ yunɲã; bà yáá bà ce diibɩblaari nǝ̃ ɲã̀-i.

20 Cwaa'n dɩgaliɛw, bàá mãã nar báà sáá bàa ko-ba, bà sáa ver bà furũũgu ǹ-hã bà nãkrɔnɲã yáá ɲã̀ã ce ɲã̀ã: bà sáa ya tãntɔ̃nãã'n bũũmã́ ba, nǝ̃ sãnã kiiba, nǝ̃ kwaplar'n bɩgaaba, nǝ̃ kwabyãr'n bɩgaaba, nǝ̃ tɩntrã'n bɩgaaba, nǝ̃ dan'n bɩgaaba.

Kii báàbà síì gbǝ̃ǝ̃ ǹ-daraa, nǝ̃ bà síì gbǝ̃ǝ̃ ǹ-nɔ̃, nã̀ã ba bà síì gbǝ̃ǝ̃ ǹ-wáà,

21 nǝ̃ bà sáa nǝ̃nǝ̃ǝ̃ bà kukwoga nã, nǝ̃ bà kaaraagɩ nã, nǝ̃ bà durkũmsǝrɩ nã, nǝ̃ bà ŋmãllɩ nã, nã̀ã tuu ǹ-tu.