Cɔ̃nfɩrmmã 10

Sɛbɛblɩw

Mǝ̃́ da mɛlɛgɛdiɛ hlo nǝ̃ fãngããgu, wù hɩr wù hlǝ drɔkuɔlɩ nã, yiiluudagǝ gùu suu wù nã.

Dũnnũ kwal'n dablɩrɩ̀ yáá wù yuu'n yiɛgu; wù yigagɩ̀ yáá nã́ã́ bǝ̃ǝ̃-i, nǝ̃ wù vyanɲã ba nã́ã́ dǝ̃ǝ̃m'n tɩntãlũn-i.

2 Wù yáá wùu fuɔ sɛbɛblɩdiɛ nã wù nãkruɔgɩ nã, wùu cugur.

Wú piɛ wù nãdĩĩviɛgu lwaakɩnkandi drɔ, nǝ̃ wù ɲiɲũɔ̃viɛgu ɲũũrũũgu drɔ,

3 nã̀ã hiil wù yalli ǹ-kaasǝ nǝ̃ fãngããgu, nã́ã́ jara tɩ́sɩ́.

Wù gáa kaasǝ, Dũnnũ nãlɛ̃m nɩrhǝ̃ǝ̃l dul'n yallɩ́ hlǝ.

4 Dũnnũ nãlɛ̃m nɩrhǝ̃ǝ̃l wáà dul'n yallɩ̀ gáa wanãã ǹ-tã, mǝ̃́ wa mǝ̃́ yal, ǹ-nɔ̃ yaldarǝ nã drɔkuɔlɩ nã dɩ̀ waa wà: «Dũnnũ nãlɛ̃m nɩrhǝ̃ǝ̃lẁ wáalá dìi, ya dɩ́ ba ǹ kusuugɩ nã, báa yal-dǝ.»

5 Nǝ̃ gùú mɛlɛgɛw mãã mǝ̃̀ yáá mã̀ã da wùu hiraa lwaakɩnkandi drɔ nǝ̃ ɲũũrũũgu drɔ, wú haar wù [nãdĩĩgu] drɔkuɔl'n yiɛgu,

6 nã̀ã waasǝ nǝ̃ wùú mãã nũmǝ̃nãw fɩraa, nã̀ã ba yà nǝ̃ǝ̃ drɔkuɔli nǝ̃ kuu wo kuuw mãã gɩ̀ kusuugɩ nã, ɲũũrũũgu nǝ̃ kuu wo kuuw mãã gɩ̀ kusuugɩ nã, nǝ̃ lwaakɩnkandi nǝ̃ kuu wo kuuw mãã dɩ̀ kusuugɩ nã wà: «Yuu'n síì dii hlo,

7 nǝ̃ gùú yunɲãã mãã ɲã̀ jo, gùú nã mãã bà ji nɔ̃ mɛlɛgɛ nɩrhǝ̃ǝ̃lnãẁ bu yendi, Dũnnũẁ ji ce wù cɔ̃nŋmǝ̃ǝ̃rǝ̃mmã́ suu, nã́ã́ wù yáá wùu tu dɩ̀ nã nǝ̃ wù mããcieraabaa mãã tanhiilaaba nĩĩgu.»

8 Mǝ̃̀ yáá mã̀ã nɔ̃ gùú yallìi hlǝ drɔkuɔlɩ nã, dɩ́ ver ǹ-wanãã nǝ̃-m, nã̀ã waa wà: «Maar, tuu sɛbɛblɩw mãã wùu cugur mɛlɛgɛ nãkruɔgɩ nã, wùú mãã wùu hiraa lwaakɩnkandi nǝ̃ ɲũũrũũgu drɔ.»

9 Mǝ̃́ kã mɛlɛgɛw nãã, ǹ-kãã cirǝ̃ǝ̃ wù nã wà wú hã-m nǝ̃ sɛbɛblɩw.

Wú waa nǝ̃-m wà: «Hũɔ̃-yǝ, ń hĩĩ-yǝ; wù ga ba wù ca ǹ kusuugɩ nã, nǝ̃ ǹ nũɔ̃gɩ nã, wù ba wù dwal nã́ã́ sal-i.»

10 Mǝ̃́ hũɔ̃ sɛbɛblɩw mɛlɛgɛ nãkruɔgɩ nã, nã̀ã hĩĩ-yǝ.

Mǝ̃̀ nũɔ̃gɩ nã, wù yáá wù dwal nã́ã́ sal-i, nǝ̃ mǝ̃̀ gáa hĩĩ-yǝ, cicɩgǝmmã́ yu mǝ̃̀ kusuugu.

11 Nǝ̃ bá fǝ̃ǝ̃ ǹ-waa nǝ̃-m wà: «Ver ń taa ń hiil Dũnnũ cãwandɩ nã hlo nǝ̃ yiɛntaacin, nǝ̃ coplacin, nǝ̃ tamcin, nǝ̃ yuntaacin.»