Cɔ̃nfɩrmmã 11

Sulamntaaba hǝ̃ǝ̃lba

Gɩ furũũgɩ nã, bá fǝ̃ǝ̃ ǹ-hã-m nǝ̃ tǝrdarǝ nã́ã́ guruu-i, nã̀ã waa nǝ̃-m wà: «Suro ń fi Dũnnũ bũũduugu, nǝ̃ siijãnkuugu, nǝ̃ ń ja bàá mãã bà bũũ Dũnnũw gɩ̀ nã bà nũɔ̃gu.

2 Nǝ̃ Dũnnũ bũũsuɔ'n gǝ̃ǝ̃w-lǝ, ya wù-lǝ wú ba wù dǝ, báa fi-yǝ, nã̀ã wa bà hlã coplaaga nǝ̃-yǝ, nǝ̃ bá ba bà ji saaraa lǝrii mãã dìi kra dɩ̀ dǝ ǹ-hã Dũnnũw, ǹ-ji da hyarsǝ gwaahǝ̃ǝ̃l nǝ̃ dɩ̀ hǝ̃ǝ̃l (42).

3 Mǝ̃̀ ji hã mǝ̃̀ sulamntaaba hǝ̃ǝ̃lba nǝ̃ fãngããgu bá ba bà taa bà hiil cɔ̃mmã nã, nã̀ã dii bɩgatãnãã'n kuulanãmba ǹ-ji da bãn tonywargǝ nǝ̃ bãn gwasiɛl (1 260).»

4 Sulamntaaba hǝ̃ǝ̃l báàba-i Olivie tunɲã hǝ̃ǝ̃l ɲã́ã̀, nǝ̃ fitɩnpiɛɲinɲã hǝ̃ǝ̃l ɲã́ã̀ mãã ɲã̀ã hiraa Cuutii'n yigagɩ nã.

5 Curow-ń ba wù caa wú ce-ba nǝ̃ diibɩblaari, dǝ̃ǝ̃mã̀ hlǝ bà nɔ̃nɲã nã ǹ-wuu bà ɲããtaaba.

Ũwũũ, curow-ń ba wù caa wú ce-ba nǝ̃ diibɩblaari, wù saa wú ku nĩĩgɩ-i.

6 Bá nǝ̃ fãngããgu bà ji suu drɔkuɔlɩ nã, duɔgɩ báa da ǹ-nɔ̃ gùú nã mãã bà tu Dũnnũ cãwandɩ nã.

Bá nǝ̃ fãngãã yo, bà ji cin hũmmã́ ba twammã, nã̀ã piɛ narplaaga min ɲũũrũũgu drɔ, bǝ̃ǝ̃ wo bǝ̃ǝ̃ mãã bà caa-dǝ.

7 Ba-ń ga tu bà siɛrnã yaga nã ǹ-tã, jerguyow mãã wù yuguraa wù hlǝ jũɔ̃nulǝǝgɩ nã, wù ji gãnãã nǝ̃-ba, ǹ-gbǝ̃ǝ̃ bà nã, nã̀ã ko-ba.

8 Bà pĩɛ̃nĩɛ̃gà ji ba lǝgǝ̃ngãr'n hlũhanãgǝgɩ nã, dìí mãã bà be-dǝ kũnkũnãmmã nã wà Sodɔm lǝri nǝ̃ Misɩra yiɛgu, gùú sùɔ́guu mãã bà gbǝ́ǝ́ bà Tiiw.

9 Cwaabaa mãã ǹ-hlǝ yiɛntaaba min nã, nũɔ̃ntacindɩ min nã, tammã min nã, nǝ̃ coplaaga min nã, bà ji da bà pĩɛ̃nĩɛ̃ga bãnɲã siɛl nǝ̃ buor kusuugɩ nã, nǝ̃ bà síì ya bá dii-ba pĩɛ̃ndiitãnfierɩ nã.

10 Cuu cwaabà ji ba dudwalɩmmã nã bà cɔ̃mmã nã, bà ji ba bà ce kweyi-kweyiw, nã̀ã ba bà hã bà ɲĩɛ̃ nǝ̃ ɲããhãnɲã, nã̀ã wa tanhiilaaba hǝ̃ǝ̃l báà yáá bàa ji ywar-ba ǹ-car.

11 Bãnɲã siɛl nǝ̃ buor díɛ̀ furũũgɩ nã, nũmǝ̃nãsǝ'n saluugɩ́ hlǝ Dũnnũw nãã ǹ-jãn bà nã, bá suro ǹ-hiraa bà vyanɲã nã; gɩ̀ sùɔ́gɩ nã, gbǝrsǝrɩ́ mǝ̃gaa ǹ-blǝ bàá mãã bà yáá bà da-ba.

12 Mǝ̃́ nɔ̃ yalgǝ̃ngãrdarǝ nã, dìí mãã dɩ̀ yáá dɩ̀ waa nǝ̃-ba drɔkuɔlɩ nã wà: «Yuguraa nnĩĩ!»

Bá fǝ̃ǝ̃ ǹ-yuguraa drɔkuɔlɩ nã yiiluugu kusunã bà ɲããtaa'n yinɲã nã.

13 Gɩ̀-lǝ gɩ̀ bǝ̃ǝ̃gu, ɲũũrũũgɩ́ mǝ̃gaa ǹ saaraa, nǝ̃-ń buruɔ lǝrɩ nã tiɛm'n nũɔ̃sɔ̃w, tiɛmã dɩnmã́ hɩr: cwa toyur tũndii bà siɛl tonnũɔ̃sɔ̃ trãngwaahǝ̃ǝ̃l (7 000) kúú ɲũũrũũ saaram mã́ã́ nã; gbǝrsǝrɩ́ blǝ bà dɩgaliɛw, bá waa wà Drɔ-Dũnnũ yiirɩ bũũ.

14 Hujãncɔ̃mmã hǝ̃ǝ̃lnãẁ tíɛ́.

Nǝ̃ níyà, gɩ-ń ce fiyãã hujãncɔ̃mmã siɛlnãẁ ga jo.

Yen nɩrhǝ̃ǝ̃lnãw

15 Mɛlɛgɛ nɩrhǝ̃ǝ̃lnãẃ bu yendi, nǝ̃ yaliɛgá du nǝ̃ fãngããgu drɔkuɔlɩ nã.

Gà yáá gà waa wà: «Cuu yuuntasǝrɩ̀ hlã Yitiiw nǝ̃ Kortiiw mãã wù plã wù nũɔ̃gu wà wu ga tĩɛ̃ wú jo.

Wù ji ba wù wuu yuuntasǝri fuwɔ fɩraa.»

16 Vũnvãnãã gur nǝ̃ bà nnǝ̃ǝ̃baa nǝ̃n yáá bàa jiraa Dũnnũ yigagɩ nã bà yuuntasǝ'n guujirakuugu drɔ, bá kuulǝǝ, ǹ-tɩsɩnǝ̃ǝ̃ bà yigasǝrɩ nã ɲũũrũũgu, nã̀ã ba bà bũũ Dũnnũw

17 bà waa wà: «Yi dũũ kwayaw yi hã-n, Yitii Dũnnũw mãã Fãngããgɩmintiiw, yíi mãã dìɛ, nã̀ã ba ǹ yáá dìɛ, nã̀ã wa ǹ cíé mããcemmã nǝ̃ ǹ fãngããgǝ̃ngããgu, nã̀ã kra ǹ yuuntasǝrɩ nã.

18 Coplaa'n hiɛgà dṹṹ, nǝ̃ ǹ hyadũũ yo, gɩ́ jo; cugutaa'n sugojar bǝ̃ǝ̃gùu híí nnĩĩ, nǝ̃ ǹ mããcieraa'n pãl'n bǝ̃ǝ̃gu, bàá mãã tanhiilaaba, nǝ̃ Kɩrsa bluuba nǝ̃ bàá mãã bà sɔ̃ ǹ yiirɩ nã, baasaalaaba nǝ̃ baagǝ̃ngĩɛ̃ba, nǝ̃ ɲũũrũũ bǝ̃ǝ̃lǝ̃taa'n bǝ̃ǝ̃lǝ̃m'n bǝ̃ǝ̃gu.»

19 Gɩ̀-i, Dũnnũ bũũduuguu mãã drɔkuɔlɩ nã, gɩ́ cugur, nǝ̃ wù twanɲũɔ̃kuruugɩ́ hillaa wù bũũduugu kusunã.

Dũnnũ ɲĩɛ̃sǝmmã́ juo ba, nǝ̃ yaliɛdaga, nǝ̃ Dũnnũ nãlɛ̃mmã, nǝ̃ ɲũũrũũ saarammã, nǝ̃ dɔtrããcindarǝ.