Yuhanãw 17

Yesuẁ cirǝ̃ǝ̃ Dũnnũw

Yesuẁ gáa waa cɔ̃mmã ǹ-tã, wú haar wù yuugu drɔgu nã̀ã waa wà: «Tɩtii, mǝ̃̀ bǝ̃ǝ̃gɩ̀ jáa hi!

Yindiɛ, pɩgaa cwaaba nǝ̃ ǹ bíɛ́'n yuuntasǝ'n gbɩgbaamã, gùú ji ce wùú yo, wú pɩgaa-ba nǝ̃ yíǹ mǝ̃gãmmã.

2 Ǹ hlã wɩ̀-i nǝ̃ fãngããgu, wú jiraa cwaaba min yuugɩ nã, wà bàá mãã ǹ cíé bá jo wù nãã, wù da ǹ-hã-ba nǝ̃ fɩraa nũmǝ̃nãsǝri.

3 Yíǹ-lǝ yíi dɩn-i Dũnnũhuhoryǝw, ba-ń fǝ̃ǝ̃-n, nã̀ã fǝ̃ǝ̃ ǹ tĩɛ̃tii Yesu Kɩrsa yo, bà ja gɩ̀-i fɩraa nũmǝ̃nãsǝri.

4 Ǹ yáá nã̀ã hã-m nǝ̃ gùú mããcemmãã mãã, wà mǝ̃ ce-mã, mǝ̃̀ cíé ǹ-faal-mã, ǹ-da ǹ-pɩgaa ǹ yuuntasǝ'n gbɩgbaamã cuu cwaaba min yinɲã nã.

5 Tɩtii, mǝ̃̀ yáá gùú yuuntasǝ'n gbɩgbaamã nã ǹ nãã, nǝ̃ cuuẁ ji da wú nǝ̃ǝ̃, ver ń dii-m mã̀ã́ nã-i kuɔkuɔgu.»

Yesuẁ cirǝ̃ǝ̃ Dũnnũw nã wù hã wù duunãtaaba

6 «Ǹ níé ǹ-hiil bàá mãã cuuw nã ǹ-hã-m, mǝ̃̀ pɩ́gará ǹ cɔ̃mmã ǹ-ja-ba.

Yíi bɩgaa yáá, ń ver-ba ǹ-hã-m.

Bàá yo bà hṹɔ̃lã́ ǹ-waa cãwan'n hlũũgu.

7-8 Ǹ wáalá kuu wo kuu nǝ̃-m, mǝ̃̀ pɩ́gará-ba nǝ̃-gǝ.

Bà sáa hla-gǝ; bà hṹɔ̃lã́-gǝ.

Bà fǝ̃́ǝ̃lã́ sulammã nã wà mǝ̃ hlǝ́rá yíi nãã-i ǹ-jo, nã̀ã hũɔ̃-dǝ wà yíi tĩ́ɛ̃lã́-m.

Gɩ̀ sùɔ́gɩ nã, bà fǝ̃́ǝ̃lã́ kuɔkuɔgu wà kuu wo kuu mãã ǹ hlã-m nǝ̃-gǝ, wà yíi hla'n kuu-i.

9 Gɩ̀ sǝ nã́ã́ mǝ̃ wa mǝ̃ cirǝ̃ǝ̃ ǹ nã ǹ-hã cuu cwaa-i.

Ǹ hlã-m nǝ̃ bàá mãã, mǝ̃̀ cirǝ̃ǝ̃ ǹ nã bàá cɔ̃m nã-i.

Hamã nã-i?

Yíi bɩgaa-i.

10 Kuu wo kuu mãã mǝ̃n saa, yíi kuu-i, nǝ̃ kuu wo kuu mãã yíi yo ǹ saa, mã́ã kuu-i.

Cwaabà da mǝ̃̀ yuuntasǝ'n gbɩgbaamã bàá nã-i.

11 Gɩ-ń ce fiyãã, mǝ̃n ji kã ǹ nãã, mǝ̃̀ síì ba dìɛ cuuw nã, nǝ̃ bà-lǝ bà ji ba dìɛ.

Tɩtii, yíi mãã Dũnnũw, ce kukuɔya ǹ hlã-m nǝ̃ bàá mãã, ba ǹ cii bà nã, nǝ̃ ǹ fãngããgu, ǹ hlã-m nǝ̃ gùú mãã.

Gɩ̀-lǝ gɩ̀ nã, bà ji gbǝ dɩ̀ dɩndɩ nã nã́ã́ yíí nǝ̃ mã́ã̀, yi mãã yìi gbǝ dɩ̀ dɩndɩ nã gùú tammã.

12 Mǝ̃̀ yáá nǝ̃-ba gùú bǝ̃ǝ̃gu, mǝ̃̀ cíilá bà nã nǝ̃ gùú fãngããguu mãã ǹ hlã-m nǝ̃-gǝ.

Mǝ̃̀ cíilá bà nã, wù dɩn yo, wù sáa vaalaa mǝ̃̀ saa, gɩ-ń ba gɩ̀ sǝ̃n wa wùú nǝ̃n yáá wù saa wú vaalaa nǝ̃ Dũnnũ cãwan'n sɛbɛbá da ǹ-suu.

13 Kuɔkuɔgu, mǝ̃̀ kã yíi nãã-i.

Nǝ̃-ń da mǝ̃̀ waa dɩ̀-lǝ cuuw nã níɛ́, mǝ̃̀ caa, bàá nǝ̃ bà hla, bá ba mã́ã dudwalɩmmã nã, mã̀-i nũɔ̃sǝn dudwalɩmmã.

14 Mǝ̃̀ mãã mǝ̃̀ kállá bá hũɔ̃ ǹ cãwandi, gùú cíé bà cɔ̃mmã́ bla cuu cwaaba nã.

Bà sǝ sùɔ́gɩ̀ dɩn nǝ̃ cuu cwaaba, nã́ã́ mǝ̃n mãã mǝ̃̀ sǝ sùɔ́gɩ̀ dɩngu nǝ̃-ba nĩĩguu mãã.

15 Mǝ̃̀ sǝ̃n cirǝ̃ǝ̃ ǹ nã wà n tuu bá hal cuuw nã, dìí sǝ.

Mǝ̃̀ cirǝ̃ǝ̃ ǹ nã wà n ba ǹ cii bà nã nǝ̃ Diibɩblarǝntiiw.

16 Mǝ̃n mãã mǝ̃̀ sǝ sùɔ́gɩ̀ dɩn nǝ̃ cuu cwaaba gùú tammãã, bàá yo bà sǝ sùɔ́gɩ̀ dɩn nǝ̃-ba nnĩĩ-i.

17 Yíi cãwandɩ-i sulammã, ce ǹ sulammã́ per bà nã, bá ba bà dǝ, ǹ-ba yíi bɩgaaba.

18 Ǹ tĩ́ɛ̃lã́ mã́ã̀ cuuw nã gùú tammã, mã́ã yo mǝ̃̀ tĩ́ɛ̃lã́-ba nnĩĩ-i cuuw nã.

19 Mǝ̃n híilá mǝ̃̀ hla mǝ̃̀ dǝ ǹ-dii mǝ̃̀ hla ǹ-hã-n bàá cɔ̃mmã nã-i, ń ce sulammã́ per bà nã, bá ba bà dǝ, ǹ-dii bà hla ǹ-hã-n.

Yesuẁ cirǝ̃ǝ̃ Dũnnũw nã wù hã bà min mãã bà ji hũɔ̃ wù cɔ̃mmã

20 «Mǝ̃̀ sǝ̃n cirǝ̃ǝ̃ ǹ nã, ǹ-hã bàá dɩn sǝ!

Curo wo curo mãã wù ji nɔ̃ bà cãwandi nã̀ã hũɔ̃ mǝ̃̀ cɔ̃mmã, mǝ̃̀ cirǝ̃ǝ̃ ǹ nã mǝ̃̀ hã wɩ̀-i.

21 Tɩtii, kukuɔya ya bá gbǝ dɩ̀ dɩndɩ nã, nã́ã́ yíí nǝ̃ mã́ã̀, yi mãã yìi jãn yì ɲĩɛ̃ kusunã ǹ-ba kuugɩ̀ dɩngu gùú tammã.

Gùú ji ce bàá yo bá gbǝ dɩ̀ dɩndɩ nã hãmĩĩ nã, cuu cwaabá da ǹ-hũɔ̃ wà yíi tĩ́ɛ̃lã́-m.

22 Ǹ díilá-m gùú yuuntasǝ'n gbɩgbaamã nã mãã, mã́ã yo mǝ̃̀ díilá-ba mã̀ nã, gɩ̀-lǝ gɩ̀ nã, bà ji gbǝ dɩ̀ dɩndɩ nã nã́ã́ yíí nǝ̃ mã́ã̀ yi mãã yìi gbǝ dɩ̀ dɩndɩ nã gùú tammã.

23 Mã́ã̀, mǝ̃́ nǝ̃ ba nã, nǝ̃ yíǹ ba mǝ̃n nã.

Gɩ̀-lǝ gùú ji ce bá gbǝ dɩ̀ dɩndɩ nã huhorɩmmã nã.

Gɩ̀-lǝ gɩ̀ nã, cwaabà ji fǝ̃ǝ̃ wà yíi-i tĩ́ɛ̃lã́-m, wà nǝ̃ bà cɔ̃m yo, mã dwal ǹ nã, nã́ã́ mǝ̃n cɔ̃mmãã mãã mã̀ dwal ǹ nã nĩĩgu.

24 Tɩtii, mǝ̃̀ cɔ̃mmã̀ mãã mã̀ dwállá ǹ nã nǝ̃ cuuẁ ji da wú nǝ̃ǝ̃, gɩ̀-i, ń fǝ̃ǝ̃ ǹ-dii-m mǝ̃̀ yuuntasǝ'n gbɩgbaamã nã.

Mǝ̃̀ caa bàá mãã ǹ díilá-ba mǝ̃̀ nãkruɔgɩ nã, mǝ̃-ń ga ba gùú sùɔ́gu, yi ba yì min nǝ̃-ba, bá ba bà da mǝ̃̀ yuuntasǝ'n gbɩgbaam mã́ã̀.

25 Tɩtii, yíǹ cɔ̃mmã̀ min mã̀ sṹɔ̃lã́.

Cuu cwaabà sáa fǝ̃ǝ̃-n, nǝ̃ mǝ̃n-lǝ, mǝ̃̀ fǝ̃́ǝ̃lã́-n, nǝ̃ bàá nǝ̃n hṹɔ̃lã́ mǝ̃̀ cɔ̃mmã, bàá yo bà fǝ̃́ǝ̃lã́ wà yíi tĩ́ɛ̃lã́-m.

26 Mǝ̃̀ pɩ́gará-ba nǝ̃ ǹ cɔ̃mmã, mǝ̃̀ ji kã nǝ̃ yiga ǹ-ba mǝ̃̀ pɩgaa-ba nǝ̃-mã.

Gɩ̀-lǝ gɩ̀ nã, mǝ̃n cɔ̃mmã̀ dwállá ǹ nã gùú tammãã mãã, ya bàá yo bà cɔ̃mmã́ dwal ǹ nã nĩĩgɩ-i, nǝ̃ mã́ã̀ nǝ̃ mǝ̃̀ hla mǝ̃́ ba bà nã.»