Yuhanãw 16

Yesuw nã̀ã fǝ̃ǝ̃ ǹ-ba wù waa wà: «Mǝ̃̀ wáalá gà-lǝ gà min nǝ̃-ɲã́ã̀, ɲi báa ji da ǹ-ver furũũ.

2 Bà ji ɲǝ̃ǝ̃-ɲã́ã̀ nǝ̃ Yahudyaba tɩgim'n don'n jãnɩmmã.

Ǹ-pya dɩ̀-lǝ dɩ̀ nã, yuugɩ́ nàa yuu nã, bà ji ba ba-ń ko curo ɲì sǝ̃ǝ̃nã, bà ba bà ne wà fíí bà cíé nũɔ̃sǝn cɔ̃m-i ǹ-hã Dũnnũw.

3 Bà mãã bà sǝ̃n fǝ̃ǝ̃ mǝ̃̀ Tǝw, nã̀ã ba bà sǝ̃n fǝ̃ǝ̃ mã́ã yo, gùú ji ce bá ba bà ji ce-ɲã́ã̀ nǝ̃ gà-lǝ gà min.

4 Mǝ̃̀ wáalá-ga ǹ-ja-ɲã́ã̀ kuɔkuɔgu, gà cel'n bǝ̃ǝ̃gɩ-ń ji hi, ɲi da ǹ-kãnãã wà mǝ̃ yáá mã̀ã hi ǹ-waa-ga nǝ̃-ɲã́ã̀ ǹ-da.

«Yi mãã yi yáá yì min, gùú cíé mǝ̃̀ sáa waa gà-lǝ nǝ̃-ɲã́ã̀ gɩ̀ dullɩ nã».

Dũnnũ Yuflǝw mãã wù ga juo ce dìí

5 «Nǝ̃ yindiɛ, mǝ̃n jáa ba mǝ̃̀ maar wùú nǝ̃n tĩ́ɛ̃lã́-m wù nãã, ɲì sǝ̃ǝ̃nã curo'n sáa ji yugu-m wà mǝ̃ kã haa-ì.

6 Mǝ̃̀ fǝ̃́ǝ̃lã́ wà mǝ̃ wáalá gàá mãã nǝ̃-ɲã́ã̀ nnĩĩ, wà gà-lǝ gàá cíé ɲí ɲǝ̃ǝ̃ ɲì yigasǝri.

7 Nǝ̃ halle dɩ̀-lǝ dɩ̀ min nã, mǝ̃̀ waa sulam-i nǝ̃-ɲã́ã̀: mǝ̃-ń ta gùú ji buɔ ɲì nã; nã̀ã wa mǝ̃-ń ba mǝ̃̀ sáa ta, pyannãtii sɩga jo ɲì nãã.

Mǝ̃n maar, mǝ̃̀ hillɩ nã, mǝ̃̀ ga tĩɛ̃-yǝ ǹ-ji hã-ɲã́ã̀.

8 Wu-ń ga jo, wù ji pɩgaa cwaaba nǝ̃ bà mããyuɔrɔmmã, nã̀ã pɩgaa-ba nǝ̃ sũɔ̃lɩmmã, nã̀ã ver ǹ-pɩgaa-ba nǝ̃ Dũnnũw sugojartammã.

9 Bà mãã bà yúɔrúɔ dìí yuugɩ nã mãã dɩ̀-i nnĩĩ: bà sǝ bàa hũɔ̃ mǝ̃̀ cɔ̃mmã.

10 Wù mãã wù pɩgaa cwaaba nǝ̃ sũɔ̃lɩmmã nǝ̃ dìí nã mãã, dɩ̀-i nnĩĩ: mǝ̃̀ ji kã mǝ̃̀ Tǝw nãã, nǝ̃ ɲí síì da-m hlo.

11 Wù mãã wù pɩgaa-ba nǝ̃ dìí mãã ǹ-kã sugojaryiɛgu dɩ̀-i nnĩĩ: Dũnnũẁ hlã cuu wáà yuuntii nǝ̃ wù diiyuɔrɔdǝdi ǹ-tã.

12 «Cɔ̃ncindɩ́ nìɛ mǝ̃̀ saa mǝ̃́ waa-dǝ nǝ̃-ɲã́ã̀, nǝ̃ dɩ̀ fãngããgɩ̀ nǝ̃ gùu ta ɲì nã kuɔkuɔgu.

13 Dũnnũ Yuflǝw-ń ga jo, wù ji ja-ɲã́ã̀ nǝ̃ sulammã min.

Wù-lǝ wùú pɩ́garà cwaaba nǝ̃ sulammã.

Wù sɩga juo waa wù hla'n nũɔ̃nãcãwanĩɛ̃ sǝ, wù nṹɔ̃́ dìí mãã, wù ji waa dɩ̀-i nǝ̃-ɲã́ã̀, nã̀ã tu ɲì nã nǝ̃ gàá mãã gà ga jo.

14 Wù ga juo tu ɲì nã nǝ̃ mã́ã nũɔ̃nãcãwandɩ-i, gùú ji ce wú pɩgaa cwaaba nǝ̃ mǝ̃̀ yuuntasǝ'n gbɩgbaamã.

15 Kuu wo kuu mãã mǝ̃̀ Tǝw saa, mã́ã kuu-i.

Gùú cíé mǝ̃́ waa wà wù Yuflǝẁ ga juo tu ɲì nã nǝ̃ mã́ã nũɔ̃nãcãwan-i.»

Yesuẁ waa wà duunãtaa'n kaaluugɩ ji ver ǹ-ba ɲĩɛ̃gu bà saa

16 Gɩ̀-lǝ gɩ̀ furũũgɩ nã, Yesuẃ waa nǝ̃ wù duunãtaaba wà: «Fiyãã ɲi ji ne ǹ-naa-m, nǝ̃ fiyãã ɲi ji ver ǹ-da-m.»

17 Wù duunãtaadaabá ba bà yugu bà ɲĩɛ̃ wà: «Bii cãwan'n plǝ-i nnĩĩ-lǝ wà fiyãã yi ji ne ǹ-naa-yǝ, nǝ̃ fiyãã yi ji ver ǹ-da-yǝ.

Nã̀ã ver ǹ-waa wà wu kã wù Tǝw nãã-i.

18 Wù mãã wa fiyãã, fiyãã wáà yuugɩ-i wanĩĩ?

Yi sáa fǝ̃ǝ̃ wù cãwan díɛ̀ dɩ̀ tam.»

19 Yesuẃ fǝ̃ǝ̃ wà ba caa bá yugu-yǝ, wú waa nǝ̃-ba wà: «Mǝ̃̀ wáalá-dǝ nǝ̃-ɲã́ã̀ mǝ̃ wa fiyãã ɲi ji ne ǹ-naa-m, nǝ̃ fiyãã ɲi ji ver ǹ-da-m.

Ɲi yugu ɲì ɲĩɛ̃ mã̀ã́ nã-ì?

20 Yáalà mǝ̃́ waa sulammã nǝ̃-ɲã́ã̀: ɲimãã, ɲi ji kaal kii'n kaaluugu, nǝ̃ cuu cwaaba ba kweyi-kweyi nã.

Ɲì yigasǝrɩ̀ ji ɲǝ̃ǝ̃, nǝ̃ ɲì yigasǝ'n ɲǝ̃ǝ̃mã ji cin ǹ-ba dudwalɩmmã ɲì saa.

21 Cijal'n kúsúugɩ-ń blǝ-yǝ, honãã'n ywaruugɩ-ń ce gɩ́ ce wú bǝ̃ǝ̃lǝ̃ǝ̃ wù yigagɩ nã ɲãmɲãm.

Nǝ̃ wu-ń ji da wù hla nã, wù mãã wù díɛ́ tãnkuurw, dudwalɩmmã̀ paa ǹ-ce wú sĩĩnǝ̃ǝ̃ honãã'n ywaruu gúɔ́gɩ min nã gbɩla-i.

22 Ɲì dǝllɩ̀ nǝ̃ gùú tammã-i.

Ɲì yigasǝrɩ́ nìɛ ɲǝ̃ǝ̃mã nã kuɔkuɔgu, nǝ̃ yi ji ver ǹ-da yì ɲĩɛ̃ hlo.

Gɩ̀-lǝ gɩ̀ nã, ɲi ji ba dudwalɩmmã nã, curo'n síì gbǝ̃ǝ̃ ǹ-hiil-ɲã́ã̀ gɩ̀ dudwalɩmmã nã.

23 Yuu gúɔ̀, ɲi sɩga yugu-m nǝ̃ cɔ̃m hlo.

Yáalà mǝ̃́ waa sulammã nǝ̃-ɲã́ã̀, kuu wo kuu mãã ɲi ga cirǝ̃ǝ̃ gɩ̀ nã mǝ̃̀ Tǝw saa, mã́ã nũɔ̃'n drɔ, wù ga hã-ɲã́ã̀ nǝ̃-gǝ.

24 Ǹ-tuu ǹ-ji vaa nǝ̃ kuɔkuɔgu, ɲi sǝ ɲĩ̀ĩ hi ǹ-cirǝ̃ǝ̃ kuu nã mǝ̃̀ nũɔ̃'n drɔ.

Ɲi-ń cirǝ̃ǝ̃, ɲi ji da, gɩ̀-lǝ gɩ̀ nã, ɲì dudwalɩmmã̀ ji jalliɛ gbɩla.

25 «Mǝ̃̀ wáalá gà-lǝ gà min nǝ̃-ɲã́ã̀ dũũm nã-i.

Nǝ̃ bǝ̃ǝ̃daagɩ́ nàa gɩ̀ jo, mǝ̃̀ síì waa cãwaadũũmã nǝ̃-ɲã́ã̀ hlo.

Mǝ̃̀ ji pɩgaa-ɲã́ã̀ nǝ̃ mǝ̃̀ Tǝ cɔ̃mmã́ kaalaa ɲì nã gbaa.

26 Gɩ̀-lǝ gɩ̀ yuugu, ɲi ji cirǝ̃ǝ̃ Dũnnũw nã mã́ã nũɔ̃'n drɔ-i.

Mã́ã sɩga cirǝ̃ǝ̃ mǝ̃̀ Tǝw nã ǹ-hã-ɲã́ã̀.

27 Hamã nã-ì?

Mǝ̃n cɔ̃mmã̀ mãã mã̀ dwal ɲimãã nã, nǝ̃ ɲí ver ǹ-hũɔ̃ wà mǝ̃ hlǝ́rá wùú nãã-i ǹ-jo, gùú cíé ɲimãã yo ɲì cɔ̃mmã́ ba mã̀ dwal mǝ̃̀ Tǝw nã.

28 Mǝ̃̀ hlǝ́rá mǝ̃̀ Tǝw nãã-i ǹ-jo cuuw nã.

Kuɔkuɔgu, mǝ̃̀ ji ya cuuẃ ba, nã̀ã ver ǹ-kã mǝ̃̀ Tǝw nãã.»

29 Wù gáa waa dɩ̀-lǝ, wù duunãtaabá waa wà: «Kuɔkuɔ-lǝ, ǹ yíɛ́ cãwaadũũmã́ ba nã̀ã waa ǹ cãwandi gbaa.

30 Yi fǝ̃́ǝ̃lã́ yindiɛgu wà n fǝ̃ǝ̃ dɩ̀ min.

Yi-ń ba yì caa yí yugu-n nǝ̃ mã̀ã́ mãã, yí da nã̀ã tɔ ǹ-fǝ̃ǝ̃-mã-i.

Gɩ̀ sùɔ́gɩ nã, yi hṹɔ̃lã́-dǝ wà n hlǝ́rá Dũnnũ nã-i.»

31 Yesuẃ waa nǝ̃-ba wà: «Ɲi sáa wa ɲi hṹɔ̃lã́ mǝ̃̀ cɔ̃mmã kuɔkuɔgu-ì?

32 Nǝ̃ mǝ̃̀ waa nǝ̃-ɲã́ã̀, bǝ̃ǝ̃daagɩ́ nàa gɩ̀ jo, nǝ̃ gɩ̀ híí yo sa, ɲi ji buruɔ curo wo curo wú ta wù suɔgu nã̀ã ya mǝ̃́ yanãã nǝ̃ mǝ̃̀ dɩn dɩndɩn.

Nǝ̃ mǝ̃̀ Tǝẁ mãã dìɛ nǝ̃-m, mǝ̃̀ síì yanãã nǝ̃ mǝ̃̀ dɩn.

33 Mǝ̃̀ wáalá gɩ̀-lǝ gɩ̀ cãwanĩɛ̃ga nǝ̃-ɲã́ã̀, ɲí da ǹ-ba hyasɩrãgǝgɩ nã mǝ̃n nã.

Ɲi ji ywar cuuw nã, nǝ̃ bláá sɔ̃ cɔ̃m nã.

Mǝ̃n gbǝ̃́ǝ̃lã́ cuu wáà fãngããgɩ nã.»